Matiu
tokbaut laip ane tising blo Zizas
1
Da bipotaim pamlelain blo Zizas da Promiswan
(Luk 3.23-38)
1 Dis buk i tokbaut Zizas Kraist da Promiswan uda God i bin sanem, da wan uda i bin kamaut prom da pamlelain blo King Deibid ane blo Eibram:
2 Eibram i bin da papa blo Aizak.
Aizak i bin da papa blo Zekop.
Zekop i bin da papa blo Zuda ane ol bala blo em.
3 Zuda i bin da papa blo Perez ane Zera, ane mama blo demtu i bin Tamar.
Perez i bin da papa blo Ezron.
Ezron i bin da papa blo Ram.
4 Ram i bin da papa blo Aminadab.
Aminadab i bin da papa blo Nason.
Nason i bin da papa blo Salmon.
5 Salmon i bin da papa blo Boaz ane mama blo em i bin Reiab.
Boaz i bin da papa blo Obed ane mama blo em i bin Rut.
Obed i bin da papa blo Zesi.
6 Zesi i bin da papa blo King Deibid.
Deibid i bin da papa blo Solomon ane mama blo em i bin Batsiba, da widooman blo Uraia.
7 Solomon i bin da papa blo Riaboam.
Riaboam i bin da papa blo Abiza.
Abiza i bin da papa blo Asap.
8 Asap i bin da papa blo Ziosapat.
Ziosapat i bin da papa blo Zioram.
Zioram i bin da papa blo Uzaia.
9 Uzaia i bin da papa blo Zotam.
Zotam i bin da papa blo Eiaz.
Eiaz i bin da papa blo Ezakaia.
10 Ezakaia i bin da papa blo Manasa.
Manasa i bin da papa blo Amos.
Amos i bin da papa blo Zosaia.
11 Zosaia i bin papa blo Zioiakin ane ol bala blo em. Diswan i bin da taim wen da king blo Babilonia i bin kese ol dem Zuwispipol ane teke dempla go ane meke dempla sleib de lo Babilonia.
12 Apta wen dempla i bin teke dempla go po Babilonia:
Zioiakin i bin da papa blo Salatela.
Salatela i bin da papa blo Zerubabal.
13 Zerubabal i bin da papa blo Abiud.
Abiud i bin da papa blo Eliakim.
Eliakim i bin da papa blo Azor.
14 Azor i bin da papa blo Zadok.
Zadok i bin da papa blo Akim.
Akim i bin da papa blo Eliud.
15 Eliud i bin da papa blo Eliazar.
Eliazar i bin da papa blo Matan.
Matan i bin da papa blo Zekop.
16 Zekop i bin da papa blo Zosep, ane Zosep i bin da man blo Meri.
Meri i bin da mama blo Zizas, ane em nau da Promiswan uda God i bin sanem kam.
17 Prom Eibram kam po King Deibid i gad 14 pamlelain, den nada 14 pamlelain kam prom Deibid kam po dat mub blo ol dem pipol blo Izrael go po Babilon, den nada 14 pamlelain prom da taim wea Babilon kam po da taim blo da Promiswan uda God i go sanem.
Zizas Kraist i bon
(Luk 2.1-7)
18 Nau diswan da stori baut wiskain Zizas da Promiswan uda God i go sanem kam, i bin bon. Meri mama blo Zizas i bin engeiz po Zosep, demtu no bin maret yet. Wail Meri stil no bin sabe slip lo man, da OliSpirit i bin kam ane Meri i bin kam pamle. 19 Zosep i bin prapa gudman ane wen em bin sabe Meri i bin pamle, em tot po emselp, ‘Aukam em i pamle. Em mas bin slip lo nada man. Ai nogo graul em prant ol pipol, bat ai mata go paine wei po broke dis engeizment blo mitu kuaiatwan.’
20 Wail em bin leidaun tingbaut po wei po go, em bin go slip. Midel lo da slip wan einzel blo da AntapGod i bin kam po em lo drim, ane da einzel i bin spik po em, ‘Zosep, yu kam prom pamlelain blo King Deibid, so yu no prait prom maret Meri, bikoz da beibi de lo Meri i gad nau, i bin kam prom da OliSpirit. 21 Em go bone boibeibi ane yu mas neim em Zizas. Yu mas gibe em dat neim bikoz em i go seibe ol pipol blo em prom meke ol nugudting.’
22 Disting i bin apen po prube dem tok blo dat spesilmesizman blo God Aizaia:
23 ‘Luk! Da oman uda prapa no sabe slip lo man
em go gad pamle!
Em go bone boi pikinini,
ane demtu i go neim em Imanuel.
Dis neim i min “God i ya midel lo yumpla”.’
24 Wen Zosep i bin gedap prom slip, em bin mekem wanem da einzel blo da AntapGod i bin spik. So em bin go maret Meri. 25 Meri i bin stap demkain, no slip lo Zosep antil da boi i bin bon, den Zosep i bin neim em Zizas.