4
Satana i tempte Zizas
(Luk 4.1-13; Mak 1.12-13)
1 Den da OliSpirit blo God i bin teke Zizas go po wan ples wea i nogad man po Satana i go trai po trike em. 2 Zizas i bin de po poti dei ane poti nait. Em no bin kaikai nating ane em i bin kam prapa nadakain anggre. 3 Den Satana i bin kam ane spik po em, ‘Ip yu prapa Boi blo God, tane dem ston ya po bred.’
4 Bat Zizas i bin spik po em, ‘No! Baibol i spik:
“Pipol nide moden kaikai po stap laip.
Ol mas lisen po ebri wod wanem God i spik ane mekem.” ’
5 Den Satana i bin teke Zizas go po Zarusalem ane mekem stanap antap lo prapa ai pat blo da Tempol blo God. 6 Satana i bin spik po em, ‘Ip yu prapa Boi blo God, zamp godaun, bikoz Baibol i spik diskain ya:
“God i go oda ol einzel po kese yu.
Dempla i go kare yu antap
solong yu nogo poldaun, paite leg lo ston.” ’
7 Zizas i ansa em baik diskain ya, ‘Baibol i spik diskain ya tu, “No teste da AntapGod uda i God blo yu.” ’
8 Den Satana i bin teke Zizas go po top blo wan prapa ai maunten, ane em soem ebri kantri blo da wold wea i gad ol prapa nais samting po luk. 9 Satana bin spik, ‘Ip yu go nildaun ane wosip mi ai go gibe ebridem samting ya po yu.’
10 Zizas i spik po em, ‘Gedaut prom ya Satana. Baibol i spik:
“Yu mas wosip da AntapGod uda i God blo yu.
Mata wosip em.” ’
11 Den Satana i bin tekop go ane ol einzel i bin kam ane elpe Zizas.
Zizas stat tise ol pipol
(Mak 1.14-15; Luk 4.14-15)
12 Wen Zizas i bin lisenbaut Zon i bin insaid zeilaus, em bin libe Zudia ane em bin kambaik po Galali. 13 Bat em no bin stap de lo Nazaret. Em bin go ane stap de lo Kapaniam, longsaid lo leik blo Galali, lo eria blo Zebulun ane Naptali. 14 Diswan i bin po prubem wanem Aizaia, da spesilmesizman blo God i bin spik:
15 ‘Ai gad mesiz ya po yupla dem pipol blo Zebulun ane Naptali,
uda i stap klostu po Leik Galali, ane stap kros lo Zodan Riba,
wea da eria blo Galali wea dem Nozuwispipol i stap.
16 Yupla dem pipol uda i bin stap lo dak,
yupla go luk prapa nadakain braitlait,
wase san i go laitap da ples blo ded.’
17 Ane prom de go, Zizas i bin stat po tise ol pipol diskain, ‘Nomo meke ol nugudting ane tan kam po God bikoz dat taim wea God i go ruloba ebribodi i klostu nau.’
Dem pas klostuman
(Mak 1.16-20; Luk 5.1-11)
18 Prom de Zizas i bin wagbaut wea sanbis blo Leik Galali. Em bin luk tu bala, Saiman uda nada neim i Pita, ane Andru, uda sake net de. Demtu tu pisaman. 19 Zizas i bin ala po demtu, ‘Kam ane bi klostuman blo mi, ane ai go soe yutu wiskain po wine man po God.’ 20 Demtu wantaim bin libe net blo demtu biain ane pole Zizas.
21 Den lelbet longwei go lo sanbis em bin luk tu nada bala, Zemes ane Zon, sidaun insaid lo bot wea papa blo demtu, Zebadi. Dempla bin somape net. Em bin ala po demtu po kam. 22 Demtu bin wantaim zamp ausaid prom da bot, libe papa blo demtu ane da bot biain ane go wea Zizas.
Zizas tise ol pipol ane meke dempla kamgud
(Luk 6.17-19)
23 Zizas i bin wagbaut wea Galali tise ol pipol insaid lo dem zuwispreaus, ane ebriwea tise dempla baut da Gudniuz blo da ples wea God i king. Ane em i bin meke dem pipol uda i gad olkain sik ane olkain diziz kamgudgen. 24 Pipol prom ebri ples blo da eria ausaid prom Galali i bin lisenbaut em, raitap go po kantri blo Siria. Ol i bin teke ebridem pipol kam po Zizas wea dempla i bin gad bigpein lo bodi blo dempla, ane nugudspirit insaid lo dempla, demwan uda i bin paralaiz ane demwan uda i bin gede tumas pit. Ane Zizas i bin meke ebriwan dempla kamgudgen. 25 Prapa nadakain plenti pipol i bin pole em. Sam dempla i bin kam prom da eria blo Galali. Dem nadalot i bin kam prom Zarusalem ane prom nada pat blo da eria blo Zudia. Ane sam dem nadalot i bin kam prom da eria blo Dekapolis, ane prom ol nada ples kros lo Zodan Riba.