2
Tugeda wea ambolwei
1 Wel yumpla i bin zoin tugeda lo Kraist. Em meke laip blo yumpla strong ane tekemaut wori prom yumpla. Bikoz em labe yumpla, em i zoine yumpla tugeda lo da OliSpirit so yumpla go gad gudpasinwei ane labing piling po wananada. 2 Yupla go meke laip blo mi nadakain api ip yupla go gri wea wananada ane lab wananada ane wok tugeda gad wanat ane wanwei.
3 Yupla mas no wande ebriting po yuplaselp. No meke yuplaselp mospesil den ol nada pipol. Yupla mas ambol yuplaselp ane trite ol nada pipol wea wei dat dempla i mogud den yupla. 4 Wa, yupla mas elp lugaut ol nada pipol ane no mata lugaut yuplaselp.
Ambolwei blo Kraist - Kraist prapa nambawan
5 Wa, da tingking ane da wei blo yupla po meke ol samting i mas seimkain wiskain Kraist i meke ol samting.
6 Nomata Zizas i bin God,
em no bin meke emselp seimkain wase God
wail em bin ya wea yumpla.
7 Bat Zizas bin mina meke emselp kam smol.
Em bin pute bigpaua blo em ane glori wansaid
ane bin teke wei blo ambol sebant.
Em bin kam wase pipol, bon seimkain wase beibi, gro kam man.
8 Em bin meke emselp ambol
ane em bin meke emselp wase yumpla.
Em bin mata lisen ane mekem wanem God i bin wandem
raitap go antil dat taim wen em bin ded wea da kros wase man uda bin broke dem lo.
9 Bikoz Zizas bin lisen ane mekem wanem God i spik,
God bin teke em go antap po eben
ane meke em nadakain spesil.
God bin gibe em spesil neim,
ane dat neim i moantap wea ebri nada neim.
10 Ane lo dat neim blo Zizas, ebri pipol i go baudaun
de antap lo eben, ane ya daun wea ert ane andanit lo ert.
11 Ebri maut blo ebri pipol i go spik Zizas Kraist i BosLod
ane ol go mata gibe ona po God uda i da PapaGod.
Sain wase lait po Kraist
12 Ol mai labing amenpamle, yupla i bin ebritaim lisen ane mekem wanem ai bin spik yupla po mekem wen ai bin de wea yupla. Ane nau ai no de, yupla mas kipgo meke mo samting blo God wanem ai bin spik yupla po mekem. Ane mata ebritaim prapa rispekt God ane yupla mas prapa prait prom em tu. 13 God em i wok insaid laip blo yupla ane gibe yupla da piling po prapa lisen em ane da strong po meke wok blo em wea i meke God api.
14 Ebridem samting wea yupla mekem, yupla no smolsmoltok ane graul gense wananada, 15 solong nobodi i kan bleime yupla. Yupla mas stap klin, nogad nating rong. Stap tugeda wase pipol blo God midel wea ol pipol blo dis wold uda i nadakain nugud wea laip blo dempla, wea dempla ebritaim meke sin. Wa, laip blo yupla mas sain midel wea dem pipol wase lait i sain wea dak. 16 Yupla mas kip soe ol pipol da mesiz blo Kraist wea i go gibe laip, solong wen Kraist i go kambaigen, ai go bloubaut yupla bikoz yupla no bin gibap ane ai no bin meke dis adwok po nating. 17 Nomata dempla kile mi, blad blo mi i gobi wase opring po God. Ane bilib blo yupla tu i gobi wase opring ane demtu opring i go go antap po God. Ane ai gobi nadakain api ip i go apen, den ai ken sere dat api wea yupla. 18 Ane ip diswan i go meke yupla api, den ai gobi prapa api tugeda wea yupla tu.
Pol preize Timoti
19 Ip BosLod Zizas i gri, ai go sane Timoti go po yupla sun, den wen em go kambaigen, em go meke mi api wen em go spik po mi baut wiswei yupla. 20 Ai mata gad Timoti ya wea mi uda i woribaut yupla. 21 Dem nada pipol i mata tingbaut demplaselp. Dempla no tingbaut demting blo Zizas Kraist. 22 Bat yupla sabe a, Timoti i bin prube emselp. Em bin wok wea mi wase em boi blo mi, em bin elpe mi pris da Gudniuz baut Kraist. 23 Ai go sane Timoti go po yupla stret apta wen ai go sabe wanem go apen po mi ya. 24 Ip da BosLod i go lete mi po go luk yupla, den wantaim ai go go tu wea Timoti.
Pol tok gudtok baut Epaprodaitas
25 Ai tingk ai go mata sane Epaprodaitas gobaigen po yupla. Em i tru amenbala ane em i tru wokmet tugeda wea mi po prise da Gudniuz baut Kraist. Em i mesizman blo yupla ane yupla i bin sanem kam po elpe mi wen ai bin nide elp. 26 Em i mina wande luk yupla ebriwan, ane bodi blo em i nadakain ebi prom tumas wori bikoz em bin paindaut yupla bin lisen em bin sik. 27 Em i bin nadakain sik, klostu po ded, bat God i bin soe sorewei po em ane God bin soe sorewei po mi tu. Em bin stape Epaprodaitas prom ded, bikoz bambai ai go gad nadakain bigsore.
28 Daswai ai mina wande sane em gobaigen po yupla solong yupla go bi mata api po luk em gen den ai nogo gad woribaut yupla. 29 Wen em kam de, yupla mas welkam em wea prapa apiwei, ane ebritaim soe rispekt po demkain pipol wase em. 30 Em no bin woribaut ded prom meke wok blo Kraist. Em bin klostu po ded wen em bin trai po elpe mi po meke demting wea yupla spostu elpe mi, bat yupla de prapa longwei prom mi.