48
Yaaq'ubee Efrayimısiy Menaşşeeys xayir-düə huvu
1 Sabara gahbı ılğeeç'umee Yusufuk'le uvhuyn:
– Dek ık'arır.
Mang'vee cuna q'öyre dix Menaşşeyiy Efrayim cuka alyapt'ı dek g'acesva yəqqı'lqa gexha.
2 Yaaq'ubus xabar g'uxoole:
– Haane yiğna dix Yusuf vasqavur ı'qqə.
İzrailik'le man g'ayxhı, gucuka vuc g'alirxhuyne tülee'ar giy'ar.
3 Yaaq'ubee Yusufuk'le eyhen:
– Gırgın əxəna Allah Kana'anne cigeene Luzee zas dyagu xayir-düə huvu, 4 inəxüd uvhu: «İlekkende Zı yiğna nasıl geeb qaa'as, hexxaa'asda, vake xədın xalq' g'alya'as. Vale qiyğad vake g'abıynbışis man cigabı hammaşiys heles».
5 Həşdiyle q'öyre yiğna dix, zı inyaqa qalesse, Misir yedike vuxhaynbı yizınbı vuxhes. Efrayimiy Menaşşe, Ruveniy Şimon xhinne yizınbı vuxhes. 6 Manbışile qiyğa vake g'abıyn uşaxar yiğınbı vuxhes. Manbışilqa gexhan cigabımee Efrayimıleyiy Menaşşeyle ılğeeç'es. 7 Zı inəxüd yizda Raahile qiyk'uva ha'a. Yizda Raahile zı Paddan-Arameençe siyk'alang'a Kana'anne ölkee Efratısqa hiviyxharne cigee qiyk'u. Mana maacar Efratne yəqqə k'eyxhı. Efratın g'iyniyn do Bet-Lexem vodun.
8 İzrailik'le Yusufun dixbı g'avcu qiyghanan:
– İnbı vuşbune?
9 Yusufee dekkıs inəxüd cuvab qele:
– Allahee inyaa zas huvuyn dixbı vob.
İzrailee eyhen:
– Manbı zasqa qavaale xayir-düə hevles.
10 İzrail q'əsniy qıxha, mang'une uleppışik'le yugda g'ece deşdiy. Yusufee dixbı dekkısqana qaa'a, dekkeeyib manbı xhılibışeeqa sav'u ubbabı ha'a.
11 Qiyğa İzrailee Yusufuk'le eyhen:
– Yizde fıkreeqacad qidyayleyiy yiğın sayid aq'va g'eceva, haane Allahee yiğın dixbıb zak'le haaguynbı.
12 Yusufee dixbı dekkıne q'aratsaysse g'avşu, mang'une ögiyl çiyelqamee k'yoyzarna. 13 Qiyğa Yusufee Efrayim ulyozara'ana cune sağne sural, İzrailinıd man solun sura eyxhe, Menaşşeer cune solne, İzrailyneer sağne sural ulyozara'a. Qiyğa manbı dekkısqana qaa'a. 14 İzraileemee sağın xıl hotku k'ınne nevayne Efrayimne, solun xılymee xərne nevayne Menaşşeyne vuk'lelqa giyxhe.
15 Qiyğa İzrailee Yusufus xayir-düə hoole:
– Yizde dekkaaşe İbrahimeeyiy I'saq'ee ı'bəədat ha'ane Allahee,
G'iyniyne yiğılqamee zı havaacıne Allahee,
16 Zı gırgıne pisvalybışike g'attixhan hı'iyne malaaikee,
Havaasre ine uşaxaaşisıb xayir-düə hevlecen!
Yizın doyud, yizde dekkıneyiy cune dekkın
İbrahimıniy I'saq'ın dobud manbışile k'ena yik'el qale'ecen.
Ç'iyene aq'val manbışda nasıl geeb quvxhecen.
17 Yusufuk'le dekke sağın xıl Efrayimne vuk'lelqa gixhxhı g'acumee, man mang'une yik'eençe eyxhe deş. Mang'us dekkın xıl Efrayimne vuk'lele alyat'u Menaşşeyne vuk'lelqa gixhxhes ıkkiykan. 18 Yusufee dekkık'le eyhen:
– Dek, ğu ha'an qotkuda eyxhe deş. Şena ts'erriyna dix eyxhe, sağın xıl mang'une vuk'lelqa gixhxhe.
19 Dekmee, mang'vee eyhençilqa qidyarı, eyhen:
– Ats'an dix, zak'le ats'an. Mang'une nasılıked xədın millet g'ales, manar qıvaats'ana ixhes. Saccu mang'una k'ınna çoc mang'uler qıvaats'ana ıxha, mang'une nasılıke sa deş, geedın milletbı g'ales.
20 Mane yiğıl Yaaq'ubee manbışis xayir-düə hoole:
– İzrailin vuşun dobu xayir-düə hooleng'a ağmiş ha'as:
«Hasre ğu Allahee Efrayimiy Menaşşe xhinne hee'ecenva!» eyhes.
Mang'vee məxür Efrayim Menaşşeyle ooqana ha'a.
21 İzrailee Yusufuk'le eyhen:
– Yizın qik'asın yiğbı k'ane qeetxheyid, Allahee şu yik'el hivxanaa'as deş, şu dekkaaşine cigabışeeqa savaak'al haa'asınbı. 22 Vas çocaaşilee hexxada zı Şekem axtın ciga hele. Zı mana Emorğançenbışde xılençe yizde g'ılıncikayiy vukuka g'avşu.