Alabari a Saꞌani a
Matta
Ucuɗuwu wa aatagada a nda
Matta, vuma na ɗanai aatagada a nda, vuma ta̱ ɗa a̱tsuma̱ a ajiya e Yesu. Matta za va Israꞌila ɗa, waru u ɗana ta̱ aatagadaꞌa adama u roco a̱za̱ a̱ yi, aza a Israꞌila, a na Yesu ɗa Zamawawa na a̱ ri e indanasa ma̱ta̱wa̱ ma̱ yi.
Matta reve ta̱ a na Yesu Mogono ma amayun ma ɗa, u to tsugono tsu uvaɗi suru. Waru u roco ta̱ amayun a ɗa Yesu shiton ta̱ ili i na ama̱sula̱ a Nzuwulai mu Ufaru n dammai adama a Zamawawa na a̱ ta̱wa̱ na woo oꞌwo Mogono ma Gbain. Matta rito ta̱ a na tsugono tsa̱ yi, tsugono tsu uvaɗi u nda u ɗa shi. Tsugono tsu uvaɗi u to koto, amma tsugono tsa̱ Yesu tsu ta̱ lo babu ukotu. Mogono na a ciga a ꞌyuwan u da̱na̱ za vu ucira. Yesu roco ta̱ ucira wa̱ yi ana u lyuwai aci o ukwisa̱, reve waru u ꞌyon diga a aason. Ili i nda suru oɓolo na akapi e ili suru a̱ ta̱ pe a̱tsuma̱ a aatagada a nda.
Matta kamba ta̱ a̱za̱ e Itoni anaꞌan adama a na u cuɗuwai cine Yesu shitoyin ifoɓi ya̱ A̱sula̱ tsa̱ra̱ u ta̱wa̱to ama zuzu na̱ a̱yi. Ana Ada̱mu nusayin A̱sula̱, ama o oꞌwo ta̱ wukasu na̱ a̱yi. Kucci na ama a yuwusain a Nzuwulai mu Ufaru waa gura tawa addama a nda shi. Matta roco tsu ta̱ cine Yesu o oꞌwoi kucci na cayi ama ure u na a̱a̱ ta̱wa̱ zuzu na̱ A̱sula̱, waru Yesu ɗa mogono ma na maa yuwusan tsugono tsi ili suru a̱tsuma̱ o uvaɗi u nda.
Ili i na i ri pe a̱tsuma̱ a aatagada a nda
1. Nkaya na̱ limatan va̱ Yesu (1:1–2:23)
2. Ikaka ya Yahaya za vu Urumbusu (3:1-12)
3. Urumbusu wa̱ Yesu na̱ ma̱lyungwa̱ ma̱ yi (3:13–4:11)
4. Yesu a̱tsuma̱ a̱ Ga̱lili (4:12–18:35)
5. Yesu lyawa ta̱ Ga̱lili a̱ tyo Urishelima (19:1–20:34)
6. Ajuma o ukosu wa̱ Yesu: a̱tsuma̱lima̱ a̱ yi nu ukwa̱ wa̱ yi (21:1–27:66)
7. Yesu ꞌyon ta̱ a̱tsuma̱ o ukwa̱ (28:1-20)
1
Nkaya ma̱ Yesu
(Luk. 3:23-38)
1 Yesu Kristi† Zamawawa† uta̱ ta̱ o uꞌwa u Mogono Da̱wuda diga o ugundo wa Ibrahim.† Apa nda ugeru u tsukaya tsa na wu uta̱i.
2 Ibrahim ɗa matsain Ishiyaku.
Ishiyaku† ɗa matsain Yakubu.
Yakubu† ɗa matsain Yahuza na akapi a̱ muwun ma̱ a̱na̱wu ma̱ yi olobo.
3 Yahuza† ɗa matsain mpishe Farisa na̱ Zera (Tamar ɗa makuci me le).
Farisa ɗa matsain Hesuruna.
Hesuruna ɗa matsain Aram.
4 Aram ɗa matsain Aminadabu.
Aminadabu ɗa matsain Nashon.
Nashon ɗa matsain Salumuna.
5 Salumuna ɗa matsain Buwaza.
(Rahapu† ɗa makuci ma Buwaza.)
Buwaza ɗa matsain Obe.
(Rutu* Rutu Takpaci ɗa. ɗa makuci ma̱ Obe.)
Obe ɗa matsain Yese.
6 Yese† ɗa matsain Da̱wuda Mogono.
Da̱wuda† ɗa matsain Sulemanu.
(Bashaba ɗa makuci ma̱ Sulemanu, a̱yi ɗa ka na Da̱wuda† Da̱wuda yuwan ta̱ tsipere na̱ Bashaba a̱yi o oluso Uriya, reve u yuwan ifoɓi i na vali va̱ yi Uriya a̱a̱ kuwa̱. Aalabari a nda a̱ ta̱ pe a̱tsuma̱ 2 Sam. 11:1-27. usai e ekere a Uriya.)
7 Sulemanu† ɗa matsain Rihobuwa.
Rihobuwa ɗa matsain Abija.
Abija ɗa matsain Asa.
8 Asa ɗa matsain Jehoshafa.
Jehoshafa ɗa matsain Jehora.
Jehora ɗa matsain Azariya.
9 Azariya ɗa matsain Jotam.
Jotam ɗa matsain Ahazu.
Ahazu ɗa matsain Hezekiya.
10 Hezekiya ɗa matsain Manasa.
Manasa ɗa matsain Amon.
Amon ɗa matsain Josaya.
11 Josaya ɗa matsain Jekoniya na̱ muwun ma̱ a̱na̱wu ma̱ yi olobo.
(A mantsa ma ɗaɗa a̱ pura̱i ama a̱ tyo e iɗa ya Babila† tsugbashi.)
12 Ana a̱ pura̱ nle a̱ tyo Babila, a̱vu Jekoniya matsan Shayatiya.
Shayatiya ɗa matsain Zerubabe.
13 Zerubabe ɗa matsain Abihudu.
Abihudu ɗa matsain Eliyaki.
A̱vu Eliyaki matsan Azoro.
14 Azoro ɗa matsain Saduku.
Saduku ɗa matsain Akimu.
Akimu ɗa matsain Aliyadu.
15 Aliyadu ɗa matsain Eliza.
A̱vu Eliza matsan Mata.
Reve Mata matsan Yakubu.
16 Yakubu ɗa matsain Isuhu.
Isuhu ɗa vali va̱ Meri,
Meri† ɗa mma va̱ Yesu za na e ɗeyi Kristi Zamawawa.
17 Ala o ugeru wa zuva e reme ta̱ tsukaya kupa na̱ a̱za̱ a̱ na̱shi diga ya Ibrahim a̱ tyo ya̱ Da̱wuda, na̱ tsukaya kupa na̱ a̱za̱ a̱ na̱shi diga a mantsa ma̱ Da̱wuda a̱ tyo mantsa ma na a̱ pura̱ nle a̱ tyo Babila, waru na̱ tsukaya kupa na̱ a̱za̱ a̱ na̱shi diga a mantsa ma na a̱ pura̱ nle a̱ tyo Babila a̱ tyo mantsa ma Zamawawa.
Limatan va̱ Yesu Kristi
18 Apa nda ununa a matsain Kristi Zamawawa. Mma va̱ yi eegeɓe a vuma ro ɗa na a̱ tsu ɗe Isuhu. Babu u reve vali, a̱vu u tsura̱ a̱a̱tsuma̱ o ure wa̱ Ruhu va Akiza.† 19 Isuhu gba vuma va̱ a̱ɓula̱ ɗa za na shi a yuwusan ili i na i ri mejege; agba u ciga u ca Meri wono a alanga e eteshe shi, ɗaɗa u foɓoi wu kasa na̱ a̱yi usokowu.
20 A̱yi a̱tsuma̱ a majiyan mo ndolo, a̱vu malingata ma̱ A̱sulazuva ma̱ ta̱wa̱ ya̱ꞌa̱ yi a̱tsuma̱ a alavu, reve u damma, “Isuhu, mawun ma tsukaya ma̱ Da̱wuda, she vu uwwa wovon na vaa zuwa Meri wan, adama a na Ruhu va Akiza ɗa zuwa niyi u yuwain a̱a̱tsuma̱ a mawuꞌun. 21 U ta matsan ulobo, a̱vu vu ca yi aala Yesu,‡ Aala “Yesu” ta̱ nu urevu “A̱sulazuva za vi iwawi.”† adama a na u ta wawa ama a̱ yi o unusu u le.”
22 Ne ɗa nzuwulai ma̱ A̱sulazuva n shiwain, ununa Ishaya vumava̱sula̱† dammai ɗe nu ujimu, 23 a na,
“Usheli u na koto u revei vali shi u ta yuwan a̱a̱tsuma̱, u ta matsan ulobo, reve a ca yi aala Imanuwe.” Urevu wa̱ yi a̱yi ɗa, “A̱sula̱ oɓolo na̱ a̱tsu.” ◊ Isha. 7:14.
24 Ana Isuhu jiwain, reve u yuwan ili i na malingata ma̱ A̱sulazuva ma damma niyi u yuwan. A̱vu u tara Meri a̱ tyo o uꞌwa wo oꞌwo ka va̱ yi, 25 agba e revelei shi hali u matsan uloboꞌo. Reve Isuhu ca yi aala Yesu.