2
Espíritu Santu dijataꞌque niꞌi
1 Cincuenta nʉmʉrĩ Pascua waꞌáca beꞌro Pentecosté wãmetiri bosenʉmʉ waꞌacaro niwʉ̃. Ti bosenʉmʉ nicã Jesure ẽjõpeorã apaturi todʉporo na nérẽ́ca wiꞌipʉta tja nerẽcãrã niwã. 2 Ti wiꞌipʉ na nérẽ́ca beꞌro wãcũña marĩrõ wĩꞌrõ ʉpʉtʉ aꞌtiro weronojõ ʉꞌmʉsepʉ bʉsʉ dijaticaro niwʉ̃. Ti wiꞌi bʉsʉseꞌsa waꞌacaro niwʉ̃. 3 Tojo waꞌari cura nánʉcʉ̃ na dʉpopa buꞌipʉ pecameꞌe ʉ̃jʉ̃rĩ põꞌrã ñeꞌmerõ weronojõ bajuro pesacaro niwʉ̃. 4 Espíritu Santure cʉoyʉꞌrʉacãrã niwã. Tojo weerã tutuaro meꞌrã cʉ̃ dutisere añurõ weecãrã niwã. Cʉ̃ weetamurõ meꞌrã apemasã ye ucũsere ucũmasĩtimiꞌcãrã ucũnʉꞌcãcãrã niwã.
5-8 Pentecosté bosenʉmʉrẽ Jerusalẽ́pʉre pãjãrã judío masã apeye diꞌtacjãrãpʉ nerẽcãrã niwã. Na ẽjõpeosetisere añurõ weeri masã nicãrã niwã. Espíritu Santu tutuaro oꞌonoꞌcãrã ucũcã tʉꞌorã, ãꞌrã na tiropʉ waꞌacãrã niwã. Waꞌa, na yere ucũcã tʉꞌorã, tʉꞌomarĩa waꞌacãrã niwã. Aꞌtiro nicãrã niwã:
—Ãꞌrã marĩ yere ucũrã aꞌti diꞌta Galileacjãrã nima. ¿Deꞌro weerã aꞌtocjãrã nimirã, marĩ yere añurõ ucũti? ni aꞌmerĩ sẽrĩtiñaꞌcãrã niwã. 9 Marĩ apesecjãrã, Elãcjãrã, Mesopotamiacjãrã niꞌi. Ãpẽrã Judeacjãrã, Capadociacjãrã, Pontocjãrã, Asiacjãrã niꞌi. 10 Ãpẽrã Frigiacjãrã, Panfiliacjãrã, Egiptocjãrã, Libia diꞌta Cirene wãmetiri macã pʉꞌtocjãrã niꞌi aꞌti macãpʉre. Romacjãrã bosenʉmʉ etama aꞌtopʉre. Na niꞌcãrẽrã judío masã nima. Ãpẽrã judío masã nitimirã, judío masã weronojõ ẽjõpeosetirã na quẽꞌrã aꞌtopʉre nima. 11 Ãpẽrã Cretacjãrã, Arabiacjãrã nima. Marĩ apesecjãrã diaꞌcʉ̃ nimirã, marĩ ye ucũse meꞌrã tʉꞌorã weeꞌe Õꞌacʉ̃ cʉ̃ añuse weeꞌquere, nicãrã niwã. 12 Nipeꞌtirã na yere ucũcã tʉꞌorã, tʉꞌomarĩa waꞌacãrã niwã.
—¿Deꞌro weero tojo waꞌati? nicãrã niwã.
13 Niꞌcãrẽrã Espíritu Santu tutuaro oꞌonoꞌcãrãrẽ bujicãꞌcãrã niwã.
—Na queꞌarã weeapã, tojo ni ucũrã, nicãrã niwã.
Pedro masãrẽ wereꞌque niꞌi
14 Na tojo nicã tʉꞌogʉ, Pedro ti wiꞌipʉ níꞌcʉ wijaacʉ niwĩ sopepʉre. Cʉ̃ meꞌrãcjãrã Jesú besecṹúꞌcãrã cʉ̃ sirota sirutuwijaacãrã niwã. Pedro nipeꞌtirã tʉꞌoato nígʉ̃ ʉpʉtʉ tutuaro meꞌrã ucũcʉ niwĩ:
—Yʉꞌʉ acawererã, tojo nicã nipeꞌtirã Jerusalẽ́pʉ nisetirã, yʉꞌʉre añurõ tʉꞌoya. Mʉsã “Na queꞌarã weema”, ni wãcũapʉ. 15 Ʉ̃sã queꞌarã mejẽta weeapʉ. Niꞌcãrõacã ñamiacãcure nueve niꞌi. Aꞌti horare queꞌaya marĩꞌi. 16 Mʉsã niꞌcãrõacã tʉꞌosere dʉporopʉ Joel wãmetigʉ Õꞌacʉ̃ ye queti weremʉꞌtãrĩ masʉ̃ ojamʉꞌtãcʉ niwĩ. Aꞌtiro ni ojacʉ niwĩ:
17-18 “Aꞌti turi peꞌtise dʉporo Espíritu Santure nipeꞌtirãrẽ oꞌógʉti”, nicʉ niwĩ Õꞌacʉ̃.
“Espíritu Santure oꞌóca beꞌro mʉsã põꞌrã ʉmʉa, numia masãrẽ wererãsama yé quetire.
Bʉcʉrã, maꞌmapjiare na quẽꞌerõpʉ ĩꞌogʉ̃saꞌa beꞌropʉ waꞌatjere.
Yʉꞌʉ dutiro weerãrẽ Espíritu Santure oꞌógʉsaꞌa.
Na quẽꞌrã yé cjase quetire masãrẽ wererãsama.
19 Aꞌti diꞌtare, ʉꞌmʉsepʉre mejẽcã bajuse ĩꞌogʉ̃saꞌa.
Tojo waꞌaro dí, pecameꞌe, oꞌme bajuarosaꞌa.
20 Ʉmʉco quẽꞌrã naꞌitĩꞌa waꞌarosaꞌa.
Tojo waꞌacã, mujĩpũ ʉmʉcocjʉ̃ bajutigʉsami.
Mujĩpũ ñamicjʉ̃ quẽꞌrã sõꞌagʉ̃ waꞌagʉsami.
Dí weronojõ sõꞌagʉ̃sami.
Masãrẽ yʉꞌrʉoꞌcʉ cʉ̃ apaturi aꞌtiatji dʉporo tojo waꞌarosaꞌa.
Cʉ̃ aꞌtigʉ, wiopesase meꞌrã asistedijatigʉsami.
Mejõ nirĩ nʉmʉ nisome.
21 Noꞌo yʉꞌʉre ‘Ñaꞌarõ weeꞌquere acobojoya’ nicã, narẽ acobojogʉsaꞌa.
Narẽ pecameꞌepʉ waꞌaboꞌcãrãrẽ yʉꞌrʉogʉti”, nicʉ niwĩ Õꞌacʉ̃, ni ojacʉ niwĩ Joel, ni werecʉ niwĩ Pedro Jerusalẽ́cjãrã masãrẽ.
22-23 Apeye narẽ Pedro aꞌtiro werenemocʉ niwĩ:
—Mʉsã añurõ tʉꞌoya yʉꞌʉ ucũsere. Õꞌacʉ̃ marĩ pacʉ, Jesú Nazarecjʉ̃rẽ oꞌócʉ niwĩ. Cʉ̃ meꞌrã cʉ̃ tutuasere ĩꞌocʉ niwĩ marĩrẽ. Aꞌtere marĩ tiropʉre weeĩꞌowĩ. Tojo weerã cʉ̃ tojo weeꞌquere ĩꞌatjĩarã, marĩ masĩꞌi Jesucristo Õꞌacʉ̃ oꞌóꞌcʉta nicʉ niwĩ nisere. Dʉporopʉ marĩ pacʉ Õꞌacʉ̃ “Yʉꞌʉ macʉ̃rẽ masã ñaꞌarã wẽjẽrãsama”, ni masĩtojacʉ niwĩ. Tojo waꞌatjere masĩgʉ̃, “Tojota waꞌarosaꞌa”, nicʉ niwĩ. Cʉ̃rẽ, marĩ pacʉ oꞌóꞌcʉ nimicã, mʉsã ñaꞌarãrẽ curusapʉ paabiꞌpe wẽjẽdutiwʉ. 24 Marĩ pacʉ tojo waꞌáca beꞌro Jesucristore cʉ̃ wẽrĩꞌcʉpʉre masõcʉ niwĩ. Cʉ̃ wẽrĩdojaticʉ niwĩ. Masã waꞌacʉ niwĩ. 25 Dʉporopʉ wiogʉ Davi aꞌtiro ojamʉꞌtãcʉ niwĩ Jesú cʉ̃ ucũatjere:
Pacʉ, mʉꞌʉrẽ ĩꞌanuꞌcũcãꞌa.
Mʉꞌʉ yʉꞌʉ wiogʉ, yʉꞌʉ meꞌrã ninuꞌcũcãꞌa.
Tojo weegʉ yʉꞌʉ uiweꞌe.
26-28 Yʉꞌʉ ejeripõꞌrãpʉre pũrõ eꞌcatise meꞌrã ucũꞌu.
Yʉꞌʉre cõꞌasome wẽrĩꞌcãrã nirõpʉ.
Yʉꞌʉ mʉꞌʉ macʉ̃ ñaꞌase moogʉ̃ upʉ ne boasome.
Yʉꞌʉ wẽ́rĩ́ca beꞌro apaturi masãgʉ̃saꞌa tja.
Tere yʉꞌʉ masĩꞌi.
Tojo weegʉ ne uise moogʉ̃saꞌa.
Pũrõ eꞌcatiꞌi mʉꞌʉrẽ ĩꞌagʉ̃, ni ojacʉ niwĩ Davi.
29 »Yʉꞌʉ acawererã, mʉsãrẽ weresĩꞌrĩsaꞌa marĩ ñecʉ̃ Davi yere. Cʉ̃ wẽrĩcʉ niwĩ. Cʉ̃ wẽrĩcã, cʉ̃rẽ yaacãrã niwã. Cʉ̃ ya masãpe aꞌti macãta niꞌi. Marĩ masĩꞌi, cʉ̃ basu peꞌe cʉ̃ ye cjasere ojatipĩ. Apĩpʉre ojagʉ weepĩ. 30 Davi catigʉ, Õꞌacʉ̃ ye queti weremʉꞌtãrĩ masʉ̃ nicʉ niwĩ. Marĩ pacʉ Õꞌacʉ̃ cʉ̃rẽ aꞌtiro ni werecʉ niwĩ: “Mʉꞌʉ pãrãmi nituriagʉpʉ mʉꞌʉ dutiꞌcaro weronojõta aꞌti diꞌtare dutigʉ nigʉ̃sami”, nicʉ niwĩ. 31-32 Cʉ̃rẽ Õꞌacʉ̃ tojo níꞌquere Davi weremʉꞌtãcʉ niwĩ Jesú cʉ̃ masãtjere. “Cʉ̃ wẽrĩgʉ̃sami. Wẽrĩ, maata masãgʉ̃sami. Ãpẽrã wẽrĩꞌcãrã weronojõ wẽrĩdojasome. Cʉ̃ upʉ boasome”, ni ojacʉ niwĩ Davi. Davi aꞌtiro ojaꞌcʉ nimigʉ̃, wẽrĩa waꞌacʉ niwĩ. Cʉ̃ ya upʉ boa waꞌapã. Aꞌtere tojo nígʉ̃, Jesure waꞌatje peꞌere ojayugʉ weepĩ. Jesure cʉ̃ pacʉ wẽrĩꞌcʉpʉre masõcʉ niwĩ. Marĩ ĩꞌaꞌcãrã nitjĩarã masĩꞌi cʉ̃ masõꞌquere. 33 Cʉ̃ pacʉ cʉ̃rẽ ʉꞌmʉsepʉ cʉ̃ tiro wiogʉ dujiri cũmurõpʉ miimʉjãcʉ niwĩ. Õꞌacʉ̃ cʉ̃ todʉporopʉ níꞌcaronojõta cʉ̃ macʉ̃rẽ marĩrẽ Espíritu Santure oꞌóduticʉ niwĩ. Tojo weerã Espíritu Santu cʉ̃ weetamuse meꞌrã mʉsã ye ucũsere ʉ̃sã ucũapʉ. 34-35 Davi peꞌe cʉ̃ upʉ meꞌrã ʉꞌmʉsepʉre masãmʉjãatipĩ. Tojo weegʉ Jesú peꞌere waꞌatjere ucũgʉ̃ weepĩ. Apeyere Jesucristore waꞌatjere Davi aꞌtiro ojanemocʉ niwĩ tja:
Õꞌacʉ̃ ʉꞌmʉsepʉ nigʉ̃́ cʉ̃ macʉ̃rẽ, yʉꞌʉre yʉꞌrʉoacjʉre aꞌtiro nicʉ niwĩ:
“Yʉꞌʉ tiro wiogʉ dujiri cũmurõpʉ dujigʉsaꞌa.
Mʉꞌʉ to dujicã, mʉꞌʉrẽ ĩꞌatuꞌtimiꞌcãrãrẽ narẽ ẽjõpeocã weegʉti.”
Tojo nicʉ niwĩ yʉꞌʉre yʉꞌrʉoacjʉre Õꞌacʉ̃, ni ojacʉ niwĩ.
Cʉ̃ aꞌtiro ojagʉ, Jesure ucũgʉ̃ weepĩ.
36 »Tojo weerã mʉsã judío masã nipeꞌtirã masĩña. Jesure, mʉsã curusapʉ paabiꞌpeꞌcʉre Õꞌacʉ̃ cʉ̃rẽta marĩ wiogʉ sõrõpĩ. Cʉ̃ Õꞌacʉ̃ besenoꞌcʉta nicãꞌmiwĩ, ni werecʉ niwĩ Pedro.
37 Cʉ̃ tojo nicã tʉꞌorã, “Ʉ̃sã buꞌiri cʉosaꞌa”, ni wãcũcãrã niwã. Tojo weerã Pedrore, ãpẽrã Jesú cʉ̃ besecṹúꞌcãrãrẽ “¿Ʉ̃sã deꞌro weerãsari?” ni sẽrĩtiñaꞌcãrã niwã.
38 Na tojo nicã, Pedro narẽ yʉꞌticʉ niwĩ:
—Bʉjaweti dʉcayuya mʉsã ñaꞌarõ weesetiꞌquere. Jesucristore ẽjõpeo, wãmeyenoꞌña. Mʉsã aꞌtiro wééca beꞌro Õꞌacʉ̃ acobojogʉsami ñaꞌarõ weesetiꞌquere. Tojo nicã Espíritu Santure oꞌógʉsami. Mʉsã meꞌrã ninuꞌcũcʉ̃sami. 39 Õꞌacʉ̃ todʉporopʉ níꞌcaronojõta mʉsãrẽ, mʉsã põꞌrã nituriarãrẽ, aperocjãrãpʉre Espíritu Santure oꞌógʉsami. Noꞌo nipeꞌtirã cʉ̃ beserãrẽ oꞌógʉsami, ni werecʉ niwĩ Pedro.
40 Cʉ̃ aꞌte diaꞌcʉ̃ wereticʉ niwĩ. Narẽ añurõ bosa, werecasanemocʉ niwĩ:
—Aꞌti diꞌtacjãrã Jesure wẽjẽꞌcãrã ñaꞌarã nima. Na ñaꞌarõ weeꞌque wapa Õꞌacʉ̃ buꞌiri daꞌregʉsami. Na weronojõ niticãꞌña. Mʉsã Õꞌacʉ̃rẽ acobojose sẽrĩña. Tojo weecã, Õꞌacʉ̃ buꞌiri daꞌretigʉsami, ni werecʉ niwĩ Pedro.
Jesure ẽjõpeori masã na weesetiꞌque niꞌi
41 Pedro tojo ni werecã tʉꞌorã, pãjãrã Jesucristore ẽjõpeocãrã niwã. Cʉ̃rẽ ẽjõpeocã ĩꞌarã, beꞌro Pedro quẽꞌrã narẽ wãmeyecãrã niwã. Cʉ̃ tojo ni wéréca nʉmʉta iꞌtiati mil waꞌtero masã ẽjõpeocãrã niwã.
42 Ãpẽrã todʉporo Jesure ẽjõpeoꞌcãrã meꞌrã naꞌirõ nerẽcãrã niwã. Pedro quẽꞌrã na weresere añurõ tʉꞌotʉꞌsacãrã niwã. Na basu sʉꞌori baꞌa, Õꞌacʉ̃rẽ ñubuenuꞌcũcãꞌcãrã niwã.
43 Jesú cʉ̃ besecṹúꞌcãrã cʉ̃ weeꞌcaronojõta masã dutitirãrẽ yʉꞌrʉo, apeye peje weeĩꞌocãrã niwã. Na tojo weesere ĩꞌarã, masã nipeꞌtirã ĩꞌamarĩacãrã niwã. 44-45 Jesure ẽjõpeorã aꞌmerĩ añurõ weetamucãrã niwã. Peje cʉorã na ye apeyenojõrẽ dua, te wapare ãpẽrã moorãrẽ dʉcawaacãrã niwã. Tojo weerã nipeꞌtirã niꞌcãrõnojõ cʉobʉrocãrã niwã. 46 Ʉmʉcorinʉcʉ̃ nipeꞌtirã ñubuerã waꞌacãrã niwã Õꞌacʉ̃ wiꞌipʉ. Na ye wiꞌseripʉre eꞌcatise meꞌrã aꞌmerĩ sʉꞌori baꞌacãrã niwã. 47 Tojo Õꞌacʉ̃rẽ eꞌcatise oꞌonuꞌcũcãꞌcãrã niwã. Ãpẽrã quẽꞌrã narẽ añurõ wãcũcãrã niwã. Ʉmʉcorinʉcʉ̃ Õꞌacʉ̃ cʉ̃rẽ ẽjõpeotimiꞌcãrãrẽ ẽjõpeocã weecʉ niwĩ. Tojo weerã siape meꞌrã Jesure pãjãrã ẽjõpeonemocãrã niwã.