1 Õꞌacʉ̃ Moisére cʉ̃ asistesere ĩꞌóca beꞌro cʉ̃rẽ nicʉ niwĩ:

—Pʉa pjĩ ʉ̃tã pjĩrĩ mʉꞌʉ doquemʉtõꞌque pjĩrĩ weronojõta daꞌreya. Ne waro ojaꞌquereta ojagʉti tja. 2 Ñamiacã ñamicurero ʉ̃rʉ̃gʉ̃ Sinaípʉ mʉjãgʉ̃tigʉ̃ apoyuya. Tigʉ dʉposãrĩpʉ waꞌa, yʉꞌʉ tiro ejaya. 3 Ne apĩ mʉꞌʉ meꞌrã mʉjãticãꞌto. Ne tigʉpʉre ãpẽrã masã marĩato. Tojo nicã oveja, wecʉa tigʉ põtẽorõpʉre baꞌanuꞌcũticãꞌto.

4 Cʉ̃ níꞌcaronojõta Moisé todʉporo ʉ̃tã pjĩrĩ níꞌque weronojõ daꞌrecʉ niwĩ. Ape nʉmʉ peꞌe ñamicurero wãꞌcã, Õꞌacʉ̃ cʉ̃ dutiꞌcaronojõta ʉ̃rʉ̃gʉ̃ Sinaípʉ te pjĩrĩrẽ miimʉjãcʉ niwĩ. 5 To cʉ̃ mʉjãejacã, Õꞌacʉ̃ oꞌmecurua meꞌrã dijati, Moisé tiropʉ ejacʉ niwĩ. Cʉ̃ wãmerẽ weregʉ, “Wiogʉ niꞌi”, nicʉ niwĩ. 6 Moisé dʉporo yʉꞌrʉagʉ, aꞌtiro nicʉ niwĩ:

—Yʉꞌʉ Õꞌacʉ̃, mʉsã wiogʉ niꞌi. Masãrẽ pajañaꞌgʉ̃, añurõ weesetigʉ niꞌi. Uáyegʉ mejẽta niꞌi. Masãrẽ yʉꞌʉ maꞌiyʉꞌrʉsere ĩꞌoꞌo. Yʉꞌʉ “Weegʉti” níꞌquere queoro weeꞌe. 7 Peje curari beꞌrocjãrã quẽꞌrãrẽ maꞌinuꞌcũcʉ̃saꞌa. Masã ñaꞌarõ weesere, yʉꞌʉre yʉꞌrʉnʉꞌcãsere acobojoꞌo. Yʉꞌʉ tojo weemicã, ñaꞌarõ weegʉ́a ne buꞌiri daꞌrenoꞌña marĩgʉ̃ tojatisami. Buꞌiri daꞌrenoꞌsami. Pacʉsʉmʉa ñaꞌarõ weeꞌque wapa na põꞌrãpʉre, na pãrãmerãpʉre, na pãrãmerã nituriarãpʉre, tojota buꞌiri daꞌre yapatinoꞌrãsama, nicʉ niwĩ.

8 Cʉ̃ tojo nicã tʉꞌogʉ, Moisé maata nucũcãpʉ paamuꞌrĩqueꞌa, Õꞌacʉ̃rẽ eꞌcatipeocʉ niwĩ. 9 Cʉ̃rẽ eꞌcatipeogʉ, aꞌtiro ni sẽrĩcʉ niwĩ:

—Wiogʉ, diacjʉ̃ta yʉꞌʉ weesere tʉꞌsagʉ, ʉ̃sãrẽ baꞌpatiya. Ãꞌrã masã yʉꞌrʉnʉꞌcãsepijarã nima. Tojo nimicã, ʉ̃sã ñaꞌasere, ʉ̃sã ñaꞌarõ weesere acobojoya. Ʉ̃sãrẽ mʉꞌʉ yarã masã tojacã weeya, ni sẽrĩcʉ niwĩ.

10 Õꞌacʉ̃ Moisé sẽrĩꞌquere tʉꞌóca beꞌro aꞌtiro nicʉ niwĩ:

“Añurõ tʉꞌoya. Niꞌcãrõacãrẽ yʉꞌʉ nipeꞌtirã mʉsã Israe curuacjãrã meꞌrã ‘Aꞌtiro weegʉti’ ni apoꞌquere cũugʉ̃ti. Nipeꞌtirã masã ĩꞌorõpʉ añubutiasere weeĩꞌogʉ̃saꞌa. Te todʉporopʉ ne ape diꞌtapʉ aꞌti turipʉre weeĩꞌonoꞌña marĩꞌquere ĩꞌogʉ̃ti. Noꞌo nipeꞌtirã mʉsã waꞌtero nirã́ yʉꞌʉ mʉsã wiogʉ mʉsãrẽ añubutiaro weeatjere ĩꞌarãsama.

11 ”Niꞌcãcã yʉꞌʉ mʉsãrẽ weedutiꞌquere weeya. Mʉsã tojo weecã, yʉꞌʉ mʉsã tiro nirã́ amorreo masãrẽ, cananeo masãrẽ, hitita masãrẽ, ferezeo masãrẽ, heveo masãrẽ, jebuseo masãrẽ cõꞌawĩrõgʉ̃saꞌa.

12 ”Mʉsã sãjãti diꞌtacjãrã meꞌrã ne aꞌmerĩ ‘Tojo weerã́’, ni apoticãꞌña. Mʉsã tojo weecã pũrĩcãrẽ, mʉsãrẽ na ẽjõpeose queose yeeꞌquere sirutucã weerãsama. 13 Tojo weronojõ oꞌorã, aꞌtiro peꞌe weeya. Na waꞌicʉrãrẽ ʉ̃jʉ̃amorõpeosere paamʉtõcãꞌña. Apeye ʉ̃tãpaga na miinʉꞌcõꞌque na ẽjõpeosere mʉtõpeꞌocãꞌña. Tojo nicã Aserá wãmetigo na ẽjõpeose yeeꞌque yucʉ meꞌrã weeꞌque tuturire dʉtecõꞌacãꞌña.

14 ”Ne apĩ Õꞌacʉ̃ nitigʉre ẽjõpeoticãꞌña. Ãpẽrãrẽ ẽjõpeosirutucã ne ʉaweꞌe. Yʉꞌʉ diaꞌcʉ̃rẽ ẽjõpeocã ʉaꞌa.

15 ”Ti diꞌtapʉ nirã́ meꞌrã ne aꞌmerĩ ‘Tojo weerã́’, ni apoticãꞌña. Na ãpẽrãnojõ Õꞌacʉ̃ nitirãrẽ eꞌcatipeorã, waꞌicʉrãrẽ wẽjẽ ʉ̃jʉ̃amorõpeorã, mʉsãrẽ pijibosama. Mʉsã quẽꞌrã na wẽjẽ ʉ̃jʉ̃amorõpeoꞌquere na meꞌrã baꞌatamubosaꞌa. 16 Apetero weerã na põꞌrã numiarẽ mʉsã põꞌrã ʉmʉarẽ numisobosama. Numisoo, na põꞌrã numia Õꞌacʉ̃ nitirãrẽ ẽjõpeorã, mʉsã põꞌrã ʉmʉarẽ mejãrõta narẽ ẽjõpeocã weebosama.

17 ”Mʉsã ne cãꞌrõ Õꞌacʉ̃ nitirãrẽ cõme meꞌrã ʉ̃jʉ̃asipio wĩorẽꞌquere ẽjõpeoticãꞌña”, nicʉ niwĩ Õꞌacʉ̃.

27 Õꞌacʉ̃ Moisére cʉ̃ dutise wéréca beꞌro cʉ̃rẽ nicʉ niwĩ: “Yʉꞌʉ ucũsere ojaya. Te yʉꞌʉ mʉꞌʉ meꞌrã, Israe curuacjãrã meꞌrã apoꞌque niꞌi”, nicʉ niwĩ.

28 Moisé topʉre Õꞌacʉ̃ meꞌrã cuarenta ʉmʉcori, cuarenta ñamirĩ* 34.28 Ĩꞌaña Gn 7.4 docapʉ ojaꞌquere. tojacʉ niwĩ. Ne baꞌaro marĩrõ, sĩꞌrĩrõ marĩrõ nicʉ niwĩ. Topʉ “Õꞌacʉ̃ masã meꞌrã tojo weegʉti” ni apoꞌquere te ʉ̃tãpjĩrĩpʉ ojaõꞌocʉ niwĩ. Tetá diez Õꞌacʉ̃ dutise cũuꞌque nicaro niwʉ̃. 29 Beꞌro Moisé ʉ̃rʉ̃gʉ̃ Sinaípʉ níꞌcʉ pʉa pjĩ te dutise ojaꞌque pjĩrĩrẽ miidijaticʉ niwĩ. Tigʉ ʉ̃rʉ̃gʉ̃pʉ níꞌcʉ dijatagʉ, cʉ̃ diapoa asistesere masĩticʉ niwĩ. Cʉ̃, Õꞌacʉ̃ meꞌrã ucṹca beꞌro niyucã, tojo asistecaro niwʉ̃. 30 Aarṍ, tojo nicã nipeꞌtirã Israe curuacjãrã cʉ̃ diapoa asistecã ĩꞌarã, cʉ̃rẽ ui nicãrã niwã. Tojo weerã cʉ̃ pʉꞌtoacãpʉ waꞌaticãrã niwã. 31 Na tojo weecã ĩꞌagʉ̃, Moisé peꞌe narẽ pijineocʉ niwĩ. Tojo weerã Aarṍ, nipeꞌtirã wiorã cʉ̃ tiropʉ dajacãrã niwã. Na dajacã ĩꞌagʉ̃, na meꞌrã ucũcʉ niwĩ. 32 Beꞌro nipeꞌtirãpʉta Israe curuacjãrã etabʉrocãrã niwã. Na etacã, Moisé Õꞌacʉ̃ ʉ̃rʉ̃gʉ̃ Sinaípʉ dutise oꞌoꞌquereta narẽ werecʉ niwĩ.

33 Na meꞌrã ucũpeꞌoca beꞌro cʉ̃ diapoapʉre niꞌcã suꞌti casero ʉsemerĩrĩ casero meꞌrã moꞌacʉ niwĩ. 34 Moisé Õꞌacʉ̃ meꞌrã bocaejari wiꞌipʉ cʉ̃ meꞌrã ucũgʉ̃ sãjãgʉ̃, ti caserore tuweemʉjãcʉ niwĩ. Cʉ̃ wijatagʉ, Õꞌacʉ̃ dutisere Israe curuacjãrãrẽ wereturiamʉjãcʉ niwĩ. 35 Cʉ̃ ti wiꞌire wijatacã, Israe curuacjãrã Moisé diapoa asistecã ĩꞌacãrã niwã. Tojo weegʉ ti casero meꞌrã diapoare moꞌamʉjãcʉ niwĩ tja. Õꞌacʉ̃ meꞌrã ucũgʉ̃ sãjãgʉ̃, ti caserore tuweemʉjãcʉ niwĩ.