12 Eruk Isrel ämawebe, Yawe Anutujintä intä kädet ŋode täŋpeŋ kuŋatneŋta peŋ täwet täyak; Yawe Anutujin unita umuri nadäŋpäŋ gämorikengän kuŋatpäŋ mani kädet kudup buramineŋ. Täŋpäŋ gäripi nadäŋ imiŋpäŋ bänep nadäk-nadäkjin mäjojin kudup Yawe Anutujinken peŋpäŋ watä piä täŋ imineŋ. 13 Täŋkaŋ baga mani apiŋo täwetpäŋ täwoŋäretat u kudup nadäŋpäŋ iwatneŋ. Nadäkaŋ? Baga man uwä in täŋkentäŋ tamikta biŋam.

14 Kunum kudup kwawani ba käbopi punininik unu u Yawe Anutujin täŋo. Täŋ imaka kome terak it täkaŋ ba kome ini imaka, Anututä mähemi täyak. 15 Bureni, Yawe uwä ärowani ini pärik kubä upäŋkaŋ bänepi nadäk-nadäki orajiye terak peŋpäŋ nadäŋ yämikinik täŋpäŋ äma äbori äbori päke u yärepmitpäŋ inpäŋ inita biŋam iwoyäŋpäŋ tepmaŋkuko unitä pen ude itkaŋ. 16 Unita inä ärowani kädet peŋpäŋ Yawe täŋo mangän iwatta bänep pewut. 17  * 1Ti 6:15; Rev 17:14, 19:16; Apos 10:34; Rom 2:11; Gal 2:6; Efe 6:9 U imata, Yawe Anutujin uwä anutu jopi, ba imaka kehäromi nikek u kudup yärepmit täyak. Uwä ärowani ini pärik kubä irirän imaka kuduptagäntä Yawe unita nadäwä umuri täŋpäpäŋ gämorikengän kuŋatneŋ. Yawe uwä ämawebeta nadäŋirän ärowani äpani ude nämo täk täyak, ba äma kubätä nadäŋ namän yäŋpäŋ bänepi täga nämo äriwek. 18 Täŋpäkaŋ webe kajari ba nanak kodäŋani jiraŋken yepmaŋpani u ba äma kudupi in bämopjinken it täkaŋ u täŋkentäŋ yämiŋpäŋ tek kenta ketem yämik täyak. 19 Ude täk täyak unita in imaka, äma äbani unita nadäŋ yämikinik täneŋ. U imata, bian in imaka, Isip komeken äbani ude it täŋkuŋonik.

20 Täŋpäkaŋ in Yawe Anutujinta umuri nadäŋ imiŋpäŋ u kubägän iniŋ oretpeŋ kuŋatneŋ. Täŋpäŋ uken tubeŋ kuŋpäŋ yäŋkehäromtak man yänayäŋ täkaŋ u wäpi terakgän kaŋ yäk täŋput. 21 Uwä Anutujin unita wäpi iniŋ orerut. Imaka umuri umuri pewän ahäŋ tamiŋkuko u dapunjintä yabäŋpäŋ-nadäŋkuŋ. 22  * Stt 15:5, 22:17, 46:27 Äbekjiye orajiyetä Isip komeken kuŋkuŋo uwä ämawebe 70tägän kuŋkuŋ. Täŋpäkaŋ Yawe Anutujintä täŋkentäŋ-pewän apiŋo in bumta itkaŋ, guk jiraŋ kunum terak itkaŋ ude.