1 Mʉ́ãye queti diamacʉ̃́ tʉodʉgára, sĩcãrĩbíritʉ sáa. Teero tiirá, “ʉ̃sã pʉarã́ wáaweonoãrira niiãdacu ãno Atenaspʉ” jĩĩwʉ̃. 2 Teero jĩĩrã, marĩ menamacʉ̃ Timoteore wáadutiwʉ. Cʉ̃ʉ̃ Cõãmacʉ̃rẽ padecotei Jesuyé quetire wederémena. Cʉ̃ʉ̃rẽ ticocowʉ, mʉ́ãrẽ Jesuré padeonemó, wãcũtutuari tiiáro jĩĩrã. 3-4 Ãpẽrã́ basocá mʉ́ã Jesuré padeorí ĩñarã, ĩñatuti, buijã́cua. Cʉ̃́ã teero tiirí, Jesuré padeodúrijããrõ jĩĩrã, Timoteore wededutira ticocowʉ. Ʉ̃sã toopʉ́ niirã, mʉ́ãrẽ ateré wedesʉguetoawʉ: “Marĩ Jesuré padeoráre ñañarõ netõrĩ́ tiiádacua”, jĩĩwʉ̃. Ʉ̃sã jĩĩrirobirora wáaa. Mʉ́ã teeré masĩcu. 5 Teero tiigʉ́, wãcũ sĩcãrĩbíhegʉ, mʉ́ãye quetire néeatidutiwʉ, “¿padeomíĩ cʉ̃́ã?” jĩĩgʉ̃. Apetó tiigʉ́, Satanás mʉ́ãrẽ wedesãjãjĩyi; ʉ̃sã “bʉ́ri peti buejĩyura” jĩĩ wãcũmitʉ.

6 Mecʉ̃tígãrẽ Timoteo mʉ́ã pʉtopʉ ĩñagʉ̃ jeaarigʉ pʉtʉajeaawĩ. Mʉ́ãyere ãñuré queti néepʉtʉajeai. Mʉ́ã Jesuré padeorucúrere, mʉ́ã ãñurõ cãmerĩ́ maĩrécʉtirere wedeawĩ. Ʉ̃sãrẽ maĩrémena wãcũrucujãyiro. Ʉ̃sãrẽ bayiró ĩñadʉgaayiro ʉ̃sã mʉ́ãrẽ ĩñadʉgarobirora. 7 Teero tiirá, ʉ̃sã mʉ́ã Jesuré padeorucújãrĩ tʉorá, ñañarõ netõpacára, wãcũtutuara niiã sũcã. 8 Marĩ Õpʉ̃rẽ mʉ́ã padeó wãcũtutuari tʉorá, ʉ̃sã yeerisãã sũcã. 9 Mʉ́ã ʉ̃sãrẽ bayiró peti ʉsenirĩ tiijã́ã. Teero tiirá, ʉ̃sã Cõãmacʉ̃rẽ deero tii ʉsenire ticopetimasĩricu. 10 Ñamirĩ́, bʉ́recori Cõãmacʉ̃rẽ bayiró sãĩrucújãã, mʉ́ãrẽ ĩñadʉgara. Mʉ́ãrẽ Jesuyére wededʉgaga, padeonemóãrõ jĩĩrã.

11 Cõãmacʉ̃ marĩ Pacʉ basiro marĩ Õpʉ̃ Jesuména ʉ̃sãrẽ tiiápuaro mʉ́ã pʉtopʉ wáaadarere. 12 Marĩ Õpʉ̃ Jesús mʉ́ãrẽ cãmerĩ́ maĩnemórĩ tiiáro. Ʉ̃sã mʉ́ãrẽ maĩrṍbirora mʉ́ãcãrẽ niipetirare maĩrĩ́ tiiáro. 13 Cʉ̃ʉ̃ teero tiirí, mʉ́ã cʉ̃ʉ̃ ãñurõ tiiápuremena wãcũtutuara, wapa cʉohéra niiãdacu Cõãmacʉ̃ marĩ Pacʉ ĩñacoropʉre. Marĩ Õpʉ̃ Jesús cʉ̃ʉ̃yaramena atibʉ́recopʉ pʉtʉaatiri, teerora niiãdacu.