1 Yuꞌun mu xa xꞌechꞌ icaꞌi ti jal muc xcaꞌi cꞌu xaꞌelanique, yechꞌo un ijnop ti xuꞌ jtuc tey chicom ta jteclum Atenase. 2-3 Yechꞌo ti ijtac tal li Timoteoe yuꞌun xchꞌunoj scꞌop Riox uc. Jaꞌ jchiꞌil ta yalel aꞌyuc cꞌusi yaloj ti Cajvaltic Jesucristoe. Ijtac tal liꞌtoe yuꞌun tal spat avoꞌonic yoꞌ mu xavicta o abaic ta xchꞌunel li scꞌop Rioxe ti chaꞌilbajinatique. Anaꞌojic ti ta onox xiꞌilbajinatotic oe. 4 Ti cꞌalal liꞌoticotic toꞌox ta ateclumalique, icalticotic onox avaꞌiic ti oy ilbajinele. Anaꞌojic xa ti ta melel chiꞌilbajinatotique yuꞌun laꞌilbajinatic xa uc. 5 Yuꞌun jal xa muc xcaꞌi ti cꞌu xaꞌelanique, yechꞌo ti ijtac tal li Timoteoe, yuꞌun ta jcꞌan chcaꞌi mi achꞌunojic to li scꞌop Rioxe. “Ati iyicta la sbaique”, xichi, yuꞌun stalel ti tsqꞌuel coꞌontic ti pucuje. Yuꞌun ti mi lasloꞌloic ti pucuje, yech noꞌox icacꞌ jvocolticotic avuꞌunic.

6 Lavie icaꞌiticotic xa cꞌu xaꞌelanic, iyul xa yalbon li Timoteoe. Jun coꞌonticotic ti icaꞌiticotic ti achꞌunojic to li scꞌop Rioxe, ti chacꞌuxubinvanique. Iyal noxtoc li Timoteoe ti scotol cꞌacꞌal chayulesoticotic ta ajolique, ti avoꞌonicuc qꞌuelvananic chac cꞌu chaꞌal coꞌonuc jqꞌueloticotic li voꞌoticotic uque. 7 Jun coꞌonticotic tajmec ti icaꞌiticotic ti achꞌunojic to li scꞌop Rioxe. Acꞌu mi o mu jta cꞌusi xtun cuꞌunticotic, acꞌu mi abol jbaticotic ta ilbajinel, jaꞌ xa ijpat o coꞌonticotic ti achꞌunojic toe. 8 Ti cꞌalal icaꞌiticotic ti sjunul avoꞌonic avichꞌojic ta mucꞌ ti Cajvaltic Jesucristoe, ximuyubajoticotic xa. 9 Jun coꞌonticotic avuꞌunic, yechꞌo ti mu xlaj calbeticotic colaval ti Rioxe ti avichꞌojic ta muqꞌue. 10 Ta cꞌacꞌal acꞌubal ta jcꞌanbeticotic ti Rioxe ti acꞌu yuꞌuc cuꞌunticotic chtal jqꞌueloticotic noxtoque, yuꞌun chtal calticotic avaꞌiic ti cꞌusitic mu to xanaꞌique.

11 Ta jcꞌanbeticotic ti Jtotic Riox ta vinajele xchiꞌuc ti Cajvaltic Jesucristoe ti acꞌu yacꞌoticotic tale. 12-13 Ta jcꞌanbeticotic noxtoc ti acꞌu scoltaoxuque yoꞌ más xacꞌan o abaique, yoꞌ más xacꞌanic o noxtoc li yan crixchanoetique chac cꞌu chaꞌal chajcꞌanticotic acotolique, yoꞌ chꞌabal o amulic chayilic ti Riox quichꞌojtic ta muqꞌue, jaꞌ ti Jtotic ta jcotoltique, ti cꞌalal xtal yicꞌotic ti Cajvaltic Jesucristoe. Ta xchiꞌin tal scotol ti muchꞌutic yichꞌojic ta mucꞌ ti cꞌalal ichamique.