15
1 Voꞌotic ti jnaꞌojtic xa cꞌu xꞌelan smelol li scꞌop Rioxe, acꞌu quictatic spasel ti cꞌusitic jun o coꞌontic jtuctique. Jaꞌ acꞌu jpastic ti cꞌusitic mu xicta o sbaic li muchꞌutic mu to ta xchꞌunic lec li scꞌop Rioxe. 2 Jaꞌ acꞌu jpastic jujun ti cꞌusitic ta xchꞌunic o más li scꞌop Rioxe. 3 Mi jaꞌuc ti Cristoe, muc spas ti cꞌusi jun o yoꞌon stuque, icuch yuꞌun ilbajinel. Jaꞌ icꞌot ti cꞌusi tsꞌibabil ta scꞌop Rioxe ti cꞌusi iyalbe ti Stote: “Ti muchꞌutic mu xascꞌane, mu xiscꞌan uc”, xut ti Stote, xi tsꞌibabil. 4 Scotol li cꞌusi tsꞌibabil ta scꞌop Rioxe jaꞌ chipꞌijubotic o, yechꞌo ti mu xquicta jbatic cꞌalal mu xiscꞌanotic li crixchanoetique, yuꞌun jpatoj coꞌontic ti chicuxiotic onox ta sbatel osile. 5 Jaꞌ tspat coꞌontic ti Rioxe yoꞌ mu xquicta o jbatic cꞌalal mu xiscꞌanotic li crixchanoetique. Acꞌu scoltaoxuc yoꞌ coꞌol o ajolique yuꞌun jaꞌ yech tscꞌan ti Cristoe. 6 Mi coꞌol ajolique, lec scꞌoplal avuꞌunic ti Yajval ti Cajvaltic Jesucristoe, jaꞌ ti Stote.
Jaꞌ liꞌ yaloj ti ep namal crixchanoetic iyalbe scꞌop Riox ti Pabloe
7 Yechꞌo un coꞌolcoꞌol xacꞌan abaic chac cꞌu chaꞌal scꞌanojotic ti Cristoe yoꞌ xꞌichꞌe o ta mucꞌ ti Rioxe. 8 Lavi ay stoj jmultic ti Cristoe, voꞌotic li juriootique, jaꞌ icꞌot ti cꞌusi iꞌalbatic ti baꞌyi jtotique, jaꞌ ivinaj o ti yech ti cꞌusi chal ti Rioxe. 9 Yechꞌo ti avaꞌiic uque, voꞌoxuc ti maꞌuc juriooxuque, ti jaꞌ chacꞌ jcuxlejaltic ti Rioxe yoꞌ “colaval” xavutic o uque. Jaꞌ onox yech tsꞌibabil chac liꞌi:
Voꞌon chcalbe yaꞌiic acꞌoplal li namal crixchanoetique.
Chacacꞌ ta ichꞌel ta mucꞌ,
xi. 10 Tsꞌibabil noxtoc:
Li namal crixchanoetique ta sta yora ti jun yoꞌonic chac cꞌu chaꞌal jun coꞌontic voꞌotic ti stꞌujojotic onox ti Rioxe,
xi. 11 Tsꞌibabil noxtoc:
Li namal crixchanoetique chlic yalic ti lec cꞌusi tspas ti Rioxe.
Ep crixchanoetic ta sjunlej balamil jaꞌ yech chlic yalic,
xi. 12 Ti Isaías uque jaꞌ yech istsꞌiba chac liꞌi:
Ta to xtal jun jchiꞌiltic, jaꞌ smom ti Isaie.
Jaꞌ tspas ta mantal noxtoc li namal crixchanoetique.
Ta xchꞌunic ti jaꞌ ch-acꞌbon scuxlejalic uque, xi.
13 Lavi achꞌunic xa ti chacꞌ acuxlejalic ta sbatel osil ti Rioxe, acꞌu spat avoꞌonic ti Chꞌul Espíritue yoꞌ xamuyubajic oe, yoꞌ mu cꞌusi xal o avoꞌonique.
14 Voꞌotic ti jchiꞌil jbatic ta xchꞌunel li scꞌop Rioxe, jnaꞌoj ti lec xa avoꞌonique. Xanaꞌic xa li cꞌusitic leque, yechꞌo ti xuꞌ xa xapꞌijubtas abaique. 15 Ti lajtsꞌibabeic li vun liꞌi, jaꞌ ti bu tscꞌan chapasique yoꞌ mu xchꞌay o xavaꞌiique. Yuꞌun jaꞌ svaꞌanojon o ti Rioxe ti chcal aꞌyuc ti cꞌusi yaloje, yechꞌo ti muc bu xiꞌem lacalbeique. 16 Jaꞌ stꞌujojon o ti chacalbeic ti chacꞌ jcuxlejaltic ti Jesucristoe, voꞌoxuc ti maꞌuc juriooxuque. Jaꞌ yech chitun chac cꞌu chaꞌal ti paleetique ti jaꞌ yabtelic chacꞌbeic smoton ti Rioxe. Li smoton Riox chcacꞌbe li voꞌone, voꞌoxuc ti maꞌuc juriooxuque. Yuꞌun lec xa chayilic ti Rioxe lavi achꞌunic xae. Jaꞌ laslecubtasbe avoꞌonic ti Chꞌul Espíritue.
17 Lavi liscolta ti Jesucristoe ep litun yuꞌun ti Rioxe. 18-19 Pero muꞌnuc ipas cuꞌun ta jtuc, jaꞌ liscolta ti Cristoe. Jaꞌ ti icalbe yaꞌi lachiꞌilique ti jaꞌ chacꞌ jcuxlejaltic ta sbatel osil ti Cristoe, voꞌoxuc ti maꞌuc juriooxuque. Jaꞌ liscolta ta yalel aꞌyuc ti cꞌusi icale, jaꞌ liscolta ta spasel ti cꞌusi ijpase. Icacꞌ iluc slequilal syuꞌelal Riox. Ilecub yoꞌonic ta syuꞌel ti Chꞌul Espíritue ti jun xchiꞌuc ti Rioxe. Ti cꞌalal lic cale, ijtambe yalel aꞌyuc ta Jerusalén. Buyuc noꞌox ical echꞌel aꞌyuc, licꞌot cꞌalal estado Ilírico. 20 Jaꞌ noꞌox ta coꞌon chcalbe yaꞌiic ti muchꞌutic mu to bu yaꞌyojic cꞌusi yaloj ti Cristoe. Maꞌuc icalbe yaꞌiic ti muchꞌutic yaꞌyojic xae yuꞌun mu jcꞌan xba jticꞌ jba yoꞌ bu chalic aꞌyuc li yane. 21 Jaꞌ yech ta jpas chac cꞌu chaꞌal tsꞌibabil ta scꞌop Rioxe:
Li muchꞌutic muc bu yaꞌyojic ta jmoj scꞌoplal ti Cajvaltique,
ta xꞌalbat yaꞌiic.
Jaꞌ ta xichꞌic ta mucꞌ,
xi tsꞌibabil.
Jaꞌ liꞌ yaloj ti tsnop chbat ta Roma ti Pabloe
22 Jaꞌ mu jayicon o yechꞌo ti mu xuꞌ chtal jvulaꞌanoxuc ta orae. Ep xa ta echꞌel ijnopilan ti chtal jvulaꞌanoxuque. 23-24 Pero lavie laj xa calbe scotolic liꞌtoe, lixocob xa. Chibat xa cꞌalal España. Ti cꞌalal xibate, tey ch-ech jvulaꞌanoxuc yuꞌun voꞌne onox jnopoj ti chtal jvulaꞌanoxuque. Ti cꞌalal xlaj jcꞌopon jbatique, tey xanopic mi chacoltaicon cꞌuuc yepal ti cꞌalal xibat ta Españae. 25 Lavie chibat ta Jerusalén, chba cacꞌbe comel smoton li jchiꞌiltactic ta xchꞌunel li scꞌop Riox teyoꞌe. 26 Yuꞌun istsobic taqꞌuin li jchiꞌiltactic ta xchꞌunel scꞌop Riox ta estado Macedoniae xchiꞌuc liꞌ ta estado Acayae yuꞌun la tscoltaic li jchiꞌiltactic ta Jerusalene, jaꞌ ti muchꞌutic meꞌone. 27 Scꞌan noꞌox yoꞌon stuquic ti istsobique. Lec ti xꞌelan ispasique yuꞌun snaꞌojic ti voꞌoticotic ta jcuentaticotic ti iyaꞌiic ti jaꞌ chacꞌ jcuxlejaltic ta sbatel osil ti Cristoe. Jaꞌ noꞌox yech tscꞌan chanaꞌic uc. Lec mi jaꞌ yech chanopic uque. 28 Ti cꞌalal xlaj cacꞌ comel li taqꞌuine, tey ch-echꞌ jvulaꞌanoxuc ti cꞌalal xibat ta Españae. 29 Ti cꞌalal xiyule, jnaꞌoj ti chiyacꞌbotic bentisyon jcotoltic ti Cristoe.
30 Voꞌotic ti jchiꞌil jbatic ta xchꞌunel li scꞌop Rioxe, oy cꞌusi chacalbeic yuꞌun coꞌol chispasotic ta mantal ti Cajvaltic Jesucristoe, yuꞌun jcꞌanoj xa jbatic ti coꞌol xchiꞌinojotic ti Chꞌul Espíritue. Mu me xchꞌay xavaꞌiic ti chacꞌoponbecon Rioxe. 31-32 Jaꞌ albeic ti Rioxe ti mu me xismilic ti jchiꞌiltac tey ta Judeae, jaꞌ ti muchꞌutic mu xichꞌic ta mucꞌ ti Cajvaltic Jesuse. Xchiꞌuc ti lec me stsac smoton taqꞌuinic ti chquichꞌbeic echꞌel ti muchꞌutic xchꞌunojic scꞌop Riox ta Jerusalene. Mi lec lisut tale, jun coꞌon ti cꞌalal xiyul yoꞌ bu nacaloxuque mi yech tscꞌan ti Rioxe. Coꞌol jun coꞌontic. 33 Acꞌu xchiꞌinoxuc ti Rioxe ti jaꞌ tspas ta jun coꞌontique.