8
Ti Jesuse jꞌetꞌesejcꞌop yuꞌun ti achꞌ trate
1 Ti cꞌusi más tsots scꞌoplal ti ta xcalboxuc avaꞌiique, jaꞌ ti tey xa chotol ti banquilal pale cuꞌuntic ta stsꞌel sbatsꞌi cꞌob ti Dios ti oy ta vinajele. 2 Tey ta xtun ta paleal tey ta batsꞌi templo ti pasbil yuꞌun ti Cajvaltic Diose, ti maꞌuc pasbil yuꞌun ti viniquetique. 3 Scotol ti banquilal paleetique jaꞌ vaꞌanbilic ta yetꞌesel, ta xchiqꞌuel smoton ti Diose. Jaꞌ jech ti Jesuse, tsots scꞌoplal ti oy cꞌusi ta xacꞌ jelavele. 4 Yan ti liꞌuc onoꞌox oy ta banomile, mi jaꞌuc ochem ta paleal ti jechuque. Yuꞌun oy to banquilal paleetic ti vaꞌanbilic ta sjelubtasel matanal jech chac cꞌu chaꞌal ta xal smantal ti Moisese. 5 Ti paleetic ti vaꞌanbilic ta sventa smantal ti Moisese, ti yabtel ti ta spasique jaꞌ noꞌox smelol svinajeb ti cꞌusitic oy ta vinajele. Jnaꞌtic lec ti jaꞌ noꞌox svinajebe, yuꞌun jech onoꞌox iꞌalbat ti Moisés yuꞌun ti Diose ti cꞌalal lic smeltsan ti templo nucule: “Jech me xameltsan ti temploe coꞌol sꞌelan jech chac cꞌu chaꞌal laj cacꞌbot avil tey ta vitse”, ti xꞌutate. 6 Pero ti banquilal pale cuꞌuntique más to lec ti bu ta xꞌabteje. Yuꞌun jaꞌ jꞌetꞌesejcꞌop yuꞌun ti achꞌ tratee. Yuꞌun tey albil scꞌoplal ti oy cꞌusi más lec ta xacꞌ ti Diose.
7 Yan ti lecuc itun ti baꞌyel tratee, mu xa persauc ti ital yan achꞌ tratee. 8 Pero ti Diose laj yil ti muꞌyuc ilecubtasatic ti cristianoetic yuꞌun ti baꞌyel tratee. Yuꞌun tsꞌibabil ta chꞌul cꞌop ti jech laj yal ti Cajvaltic Diose:
Oy bu ta xcꞌot yorail ti ta jpas achꞌ trate schiꞌuc ti jꞌisraelal cristianoetique schiꞌuc xtoc ti snitilultac ti Judae.
9 Jaꞌ noꞌox ti mu xa jechuc ta jpas ti tratee jech chac cꞌu chaꞌal laj jpas schiꞌuc ti smolmucꞌtotique,
ti cꞌalal laj jnitbe loqꞌuel talel scꞌobic ta Egipto banomile.
Yuꞌun ti stuquique muꞌyuc laj spasic ti jbaꞌyel tratee.
Jech o xal un, laj quicta comel.
10 Cꞌalal ta xcꞌot scꞌacꞌalil ti ta xcacꞌbe achꞌ trate ti jꞌisraelel cristianoetique,
jaꞌ jech chac cꞌu chaꞌal liꞌe.
Ta jticꞌbe ta sjolic ti jmantale.
Ta jtsꞌibabe ta yoꞌntonic.
Jech o xal un, vuꞌunun ti Dios yuꞌunique.
Jaꞌ jech xtoc ti stuquique, jaꞌ calab jnichꞌnab.
11 Jech o xal un, mu xa persauc oy buchꞌu ta xchanubtas sbaic schiꞌic ti schiꞌile,
ti yermanoe, yoꞌ jech ta snaꞌic ti cꞌu jꞌelane.
Yuꞌun scotolic ta xiyojtiquinicun, cꞌalal ta biqꞌuit ta mucꞌ.
12 Ta xcacꞌbe perdón yuꞌun ti schopolalique.
Mi jaꞌuc ta jvules ta coꞌnton ti smulique,
xi ti Diose. 13 Cꞌalal ta xalbe scꞌoplal jun achꞌ trate ti Diose, jaꞌ xa laj yal ti echꞌ xa scꞌoplal ti baꞌyel tratee. Ti cꞌusi ta xa xlaje, ti ta xa xꞌechꞌ batel ti scꞌoplale, yuꞌun ta xa xtub.