1 Pauloꞌa raenaꞌa, ꞌahige reiro. “Nego nabudi, eḡeꞌa izidi ꞌaha eḡe moneo zae mazao ḡoereꞌeteꞌe egoꞌi!” 2 Aniꞌa Heberu ḡoeꞌano zeḡe mazao ḡoeriroteꞌe igirotene, ze sifu hune radiro. Ebu ani raenaꞌa,

3 “Eꞌe Iuda vazeḡa. Kilikia habaꞌano Taso neḡano fureraro, ebu Ierusalema neḡano bororaro. Ebu Gamaliela ꞌuꞌuḡano diuḡadu, vouḡafe goro ḡoeꞌa riḡa huneo ihohido, ebu Badiꞌa veize inarido, izidi zaeꞌa haḡaeꞌeteꞌe teige. 4 Ebu Zuhiꞌa Boro ibi azaḡa sausauzido. Nuꞌe zimi ruzido. Ohoze zu roḡae batuzadu, ḡuꞌa neḡano ohozido. 5 Dibuꞌo hauꞌeteꞌe ḡihiꞌaḡa zu Iuda kanisoro azaḡa zuni eḡeꞌa ꞌada raꞌetaꞌaꞌe hube rae reꞌuma. Mazaḡa ze Iuda azaḡa Damaseko neḡano radiuꞌeteꞌe veize miriho ḡoeꞌa tiro. Miriho ḡoeꞌa eꞌe eḡeꞌa madu Damaseko neḡa onamiro, eꞌea Zuhiꞌa Boro ibio onameꞌeteꞌe azaḡa oboze teadu, Ierusalema neḡa tutuze onaadu, aduga zenoga veize.

6 Damaseko neḡa hanitiꞌ onamirotene, madai nemaḡano, eḡe rana agaḡa bagaḡaniꞌa adureonoꞌo tabara agaraꞌ ovairo. 7 Eꞌe rahao higau bauradu, ago ꞌahoga igiro, raenaꞌa, 'Saulo, Saulo! Ḡa nougadu eḡe sausauheꞌohe?' 8 E ḡadinenaꞌa, 'Zuhiꞌa Boro, ḡa iniu?' reiro. Aneꞌa naenaehinaꞌa, 'Eꞌe Iesu, Nazareta neḡa vazeḡa.' rae reiro. 'Ḡaeꞌa sausauheꞌeteꞌe vazeḡa.' 9 U ḡatihe onamiroteꞌe azaḡaꞌe agaḡa horoniro rehano, ḡorehirotaꞌaꞌe mene igiro.

10 Ebu eḡeꞌa raenaꞌa, 'Zuhiꞌa Boro, e nagini haḡaine manoḡa?' Aniꞌa raenaꞌa, 'Iḡunadu, Damaseko neḡa onamoꞌi! Eꞌea eḡeꞌa ḡaniroteꞌe gauḡa niduꞌa ihoꞌiꞌuma.' 11 Ebu eꞌe, agaḡa boroꞌa ubumahe ꞌuiro ꞌahine, ehamanoga mene idararo. Eꞌanoꞌo ḡatiheꞌeteꞌe azaḡaniꞌa tutuhe, abiheꞌenaꞌa Damaseko neḡa onamiro.

12 Eꞌea vaze ꞌahoga, niḡa Ananiaꞌa radiudo. Aniꞌe goro ḡoeꞌa ibiḡano daꞌo onamido, ebu Iuda azaḡa Damaseko neḡano radiuꞌeteꞌeꞌa niduꞌa, aniꞌe vaze manoḡa tauḡi reiro. 13 Ani onaadu, eḡe genaḡano edaro, ebu raenaꞌa, 'Saulo, nego! Bare fairu ehamanoꞌi!' Eꞌebuꞌu zogone Anania horonoga idararo.

14 Ebu Ananiaꞌa raenaꞌa, 'Vouḡafe Badiꞌaꞌa ḡa mae avo tiro, ane zama ederoga veize, zu Iesu, Vaze duduḡa horonoga veize, ebu ani hebeonoꞌo agoḡa egoga veize. 15 Mazaḡa Zuhiꞌa Boro veize ḡaꞌa horoniroteꞌe zu igiroteꞌe ḡauḡa vaze niduꞌa mazao rae fureniꞌuma. 16 Eꞌanoꞌo ḡa ago zamare ꞌadaꞌadoꞌi? Iḡunoꞌi! Iesu Keriso niḡano kuranadu bapatizo moꞌi, ebu haḡaiḡo sauꞌa vuzuꞌe modoꞌi!'

17 Ierusalema neḡa bare eriroteꞌe enogano, dibuꞌo neḡano kuraroteꞌe zamaḡano, iḡunuꞌeteꞌe teigiro. 18 Ebu Zuhiꞌa Boroꞌa ḡorehoga horoniro. Ani raenaꞌa, 'Ḡarihoꞌi! Ierusalema neḡanonoꞌo zogone iḡunoꞌi! Mazaḡa ḡaeꞌa eḡe hari rae fureneꞌetaꞌaꞌe, Ierusalema azaḡaniꞌa mene mae ḡihiniꞌuma'

19 Rehano eḡeꞌa raenaꞌa, 'Zuhiꞌa Boro, eḡeꞌa Iuda azaḡa kuru neḡa niduꞌa onamadu, ḡae mazao fieꞌeteꞌe azaḡa madu ḡuꞌa neḡano ohozido zu bouzidotaꞌaꞌe, zeḡe edeḡa. 20 Ebu ḡae hari rae furenidoteꞌe vazeḡa, Stefano mau runiroteꞌe zamaḡano, eḡe zu zeḡe teite zamahe tibunadu, eꞌea edau radiro. Ebu Stefano mau runiroteꞌe azaḡaꞌe dabuaze fuiꞌe tiro. Eꞌe dabuaḡaꞌe eḡeꞌa taufe radiro.'

21 Rehano Zuhiꞌa Boroꞌa ihinaꞌa, 'Onamoꞌi! Mazaḡa eḡeꞌa Iuda mene azaḡa, haba faḡano radiuꞌeteꞌe mazao tuḡuꞌiꞌuma.' ”

22 Vaze ḡuḡuvaḡaniꞌe igi onao, Pauloꞌa ḡoere eꞌe reiroteꞌe igirotene, ze harae iḡuniro, raenaꞌa, “ꞌUguḡa vazeḡaꞌe mau runoꞌi! Aniꞌe ḡabode radoga mene idaḡa.” 23 Ze dabuaze feune ḡihineꞌenaꞌa zu raha mae feuneꞌenaꞌa harae ḡunuḡuniro.

24 Roma uti vazeḡa boroꞌa uti azaḡa zeadu, Pauloꞌe uti azaḡa radone neḡano mae zouniro. Ebu hariḡa rae furenoga veize “Masinoꞌi!” rae ziro. Aniꞌe nougadu vaze ḡuḡuvaḡaniꞌa ane mazao maḡune haraeꞌeteꞌe ederihi reiro. 25 Uti azaḡaniꞌa Paulo masinoga rae, ꞌevoꞌa hutube ꞌeine utirotene, Pauloꞌa uti azaḡa ibito ziniꞌeteꞌe vazeḡa eꞌea edauꞌeteꞌe ninaꞌa, ꞌahige reiro. “Eꞌe Roma mone vazeḡa rehano, kotao ꞌize mene ohohogano masihihi raꞌohe. Aꞌe Roma goroḡano idaḡa hehe?”

26 Ibito ziniꞌeteꞌe vazeḡa eꞌe igirotene, uti vazeḡa boro vaḡe onamadu niro, raenaꞌa, “Vaze ꞌadiꞌe Roma mone vazeḡa. Ḡa nougiꞌuma?”

27 Uti vazeḡa boroꞌa Paulo vaḡe onamadu ḡadiniro, raenaꞌa, “Ehoꞌi! Ḡa Roma mone vazeḡa hehe?” Pauloꞌa “Oꞌe” rae reiro.

28 Ebu uti vazeḡa boroꞌa raenaꞌa, “Eꞌe Roma mone rouga veize moni boro modiro.” Pauloꞌa naenaeninaꞌa, “Eꞌe fureraroteꞌeanoꞌo onao izidi, Roma mone vazeḡa.”

29 Eꞌanoꞌo Paulo masinadu ḡadimu vaḡihi reiroteꞌe azaḡaniꞌe, ane mazaonoꞌo zogone ie vaḡiniro. Ebu uti vazeḡa boro ani, Pauloꞌe Roma mone raꞌeteꞌe igirotene, ḡiḡaroniro, mazaḡa Roma mone vazeḡa obone tiro ꞌahine.

30 Irarirotene, uti vazeḡa boro ani, Iuda azaḡaꞌe nougadu Paulo mazao maḡuniroteꞌe huga ederihi reiro. Eꞌanoꞌo Pauloꞌe adiri mae butiro, ebu dibuꞌo hauꞌeteꞌe boroboro zu kanisoro azaḡa niduꞌa nuꞌoziro. Ebu Paulo tutune onaadu, zeḡe zamao mae ohoniro.