1 Bana Madaḡa ꞌahogano Iesuꞌa Farisea azaḡa ibitoziniꞌeteꞌe vazeḡa neo ogomu anoga veize onamiro. Ebu vazevazeꞌa ani uhiḡano ḡiaḡianiro. 2 Eꞌea Iesu zamao vaze ꞌahogaꞌe ahiꞌa uginadu menoga radiunu. 3 Ebu Iesuꞌa Mose goro ihozeꞌeteꞌe azaḡa zu Farisea azaḡa ḡadiziro, raenaꞌa, “Zaꞌa zamareꞌetene Bana Madaḡano ugi vazeḡa fainoga idaḡa ga mene?” 4 Zeꞌa mene naenaeniro. Iesuꞌa ꞌevoꞌa ugi vazeḡa oboneꞌenaꞌa, fainadu tuḡune vaḡiniro. 5 Ebu Iesuꞌa zinaꞌa, “Zae boꞌaḡano Bana Madaḡano iniu ubuga ga boromakauꞌa idu zamaḡa ovoine, ḡarihe mae ḡihiniꞌuma ga mene?” 6 Zeꞌe mene bare naenaeniro.

7 Iesuꞌa huziroteꞌe azaḡa hitana ehoroḡano ehoroga horozirotene, aniꞌa hari ꞌahoga idaniro, raenaꞌa, 8 “Vaze ꞌahoganiꞌa hahu muiḡa auḡoga veize ḡa huḡadine, hitana ehoroḡano ago ehoroꞌi! 9 Mazaḡa ufeta hitaga vazeḡa zuni hunine, ḡanine huzateꞌe vazeḡaniꞌa onadu ḡaniꞌuma, raenaꞌa, 'Ḡa ehoro habaꞌa vaze ꞌadi hanoꞌi!' ꞌOugine ḡaꞌe nouge rae zamariꞌuma? Eꞌe bone mazagaroꞌadu raha ehoroḡa vaḡe onamiꞌuma.

10 Eꞌanoꞌo muieꞌeteꞌe vazeḡaniꞌa huḡadoꞌidene, raha ehoroḡano ehoroꞌi! ꞌOugine, mui haḡaeꞌeteꞌe vazeḡaniꞌa horoꞌadu ḡa vaḡe ariꞌuma. Ebu ḡaꞌenaꞌa, 'Vazehe, iḡunadu hitana ehoroḡano ehoroꞌi!' ꞌOugadu ḡae teite huzateꞌe azaḡaniꞌa ḡa niguꞌiꞌuma. 11 Iniu vaze aneꞌa bare niḡa mae itine, aniꞌe mae ovoiꞌuma, u iniu vaze aneꞌa bare niḡa mae ovoine, aniꞌe mae ḡihiniꞌuma.”

12 Ebu Iesuꞌa vaetadu ani huniroteꞌe vazeḡa eꞌe niro, raenaꞌa, “Ogomu ga mui veize huzoꞌidene, vazeḡo, negoḡo, nabugo ga ḡae uhiḡano radiuꞌeteꞌe maꞌora azaḡa ago huzoꞌi! ꞌOugine zeꞌa ḡa bare naenaeꞌe huḡadiꞌuma. 13 Rehano ḡa muioꞌidene, zahara azaḡa, oda sauꞌa azaḡa, edanoga mene idaḡa azaḡa ebu ubumaze kuruḡa azaḡa huzoꞌi! 14 ꞌOugine zaꞌe Badiꞌaꞌa manohuga ziniꞌuma. Mazaḡa zeꞌe baronogaꞌe mene idaḡa ꞌahine, duduḡa azaḡaniꞌa bare ḡabode iḡuneꞌeteꞌe madaḡano, ḡaꞌe Badiꞌaꞌa naeḡa ḡaniꞌuma.”

15 Iesu teite ogau radiroteꞌe vazeḡa ꞌahoganiꞌa Iesu ḡoere igirotene, ani Iesu niro, raenaꞌa, “Badiꞌaꞌa ibitohauꞌeteꞌe habaꞌano ogau tiburuꞌeteꞌe azaḡaꞌe matuiꞌuma!”

16 Ebu Iesuꞌa hari ꞌahoga idaniro, ninaꞌa, “Mada ꞌahogano vaze ꞌahoganiꞌa mui boro ruhibadu vaze ḡehaḡa huziro. 17 Mui madaḡa reirotene, ani tuḡure vazeḡaꞌe huziroteꞌe azaḡa mazao tuḡunadu ꞌahige ziro. 'Mui boro veize ḡau niduꞌa ruhina ꞌahine, zaꞌe niduꞌa, izidi aroꞌi!' 18 Ebu tuḡure vazeḡaꞌe ꞌouge ḡoeriro, rehano ze tiba tibaꞌe ḡoere nufenufiro. Ibite niroteꞌe vazeḡaniꞌa raenaꞌa, 'E haba iziga hoiteha, eꞌanoꞌo e eꞌe ḡiani onamihi. E mene amateꞌe moneo ago maḡunoꞌi!' 19 Ebu vaze ꞌahoganiꞌa raenaꞌa, 'E boromakau 10 hoiteha. Eꞌanoꞌo e ze manoga ga mene rae tuhune nurihi. E mene amateꞌe moneo ago maḡunoꞌi!' 20 Ebu vaze ꞌahoganiꞌa raenaꞌa, 'E iziduꞌu hahureha, eꞌanoꞌo e mene amiꞌuma.'

21 Tuḡure vazeḡa aniꞌe bare onamadu zeꞌa reiroteꞌe ḡoeꞌa zuhiꞌaḡa ihoniro. Aniꞌa ihonirotene mui vazeḡaꞌe maḡune rudaro ebu tuḡure vazeḡa niro, raenaꞌa, 'Ne ibiḡano zu ibi kokosiḡano ḡarihe onamadu zahara azaḡa, oda sauꞌa azaḡa, ubumaze kuruḡa azaḡa zu edanoga mene idaḡa azaḡa huzoꞌi!' 22 Tuḡure vazeḡa onamadu ꞌouge haḡairo. Ebu bare onaadu zuhiꞌaḡa niro, raenaꞌa, 'Zuhiꞌa, ḡaꞌa ehateꞌe ḡauḡa haḡaeha, rehano ne ize mene irivaꞌeha.' 23 Zuhiꞌaḡaniꞌa tuḡure vazeḡa niro, raenaꞌa, 'Ibi boro zu maḡa neḡa ibiḡano buau onamadu vaze vaḡoꞌi ebu tutuze aroꞌi! Vaze hina eḡe ne irivaꞌoꞌnoꞌi! 24 Ḡianoꞌi! Eḡeꞌa ibite mui veize huziroteꞌe azaḡa niduꞌaꞌe, eḡe mui tahiḡa zu mene auḡiꞌuma.”

25 Mada ꞌahogano vaze ḡuḡuvaḡa huneꞌa Iesu ḡaruna hegotinu. Ebu Iesuꞌa vaetadu ziro, raenaꞌa, 26 “Iniuꞌa eḡe ḡaruna hegotoga uratoꞌidene, eḡe zamare borofoꞌi! Moḡa zu viꞌa, inuḡa zu ubuga, negoḡa zu ezeḡa, ebu ḡaboneḡa zuni ago zamare borofoꞌi! ꞌOuge haḡaine, aniꞌe eḡe tahiꞌa rae reꞌuma. 27 Iniuꞌa ane satauro odohadu eḡe ḡaruna mene hegotine, aniꞌe eḡe mene tahiꞌa rae reꞌuma.

28 E hari ꞌahoga idaniꞌuma. Zae boꞌaḡano, vaze ꞌahoganiꞌa ne hitaḡa ogoranoga uratine, ibite geno ehoradu moni nugu hina ogoru hauḡiꞌuma rae ḡianiꞌuma. Zu ani moniḡaꞌe ne eꞌe ogoranoga veize idaḡa ga mene rae ḡianiꞌuma. 29 Iḡite ohonadu mene ogoru hauḡine, vaze ḡehaḡaniꞌa eꞌe horonadu ḡiriho haꞌuma. 30 Zeꞌe raenaꞌa, 'Vaze ꞌadiꞌe ne ohoniro, rehano hauḡogaꞌe mene idaraneha!'

31 Ebu kini ꞌahoganiꞌa kini ꞌahoga teite uti onamine, ani ibite geno ehoradu zamareꞌenaꞌa, 'Eḡe uti azaḡaꞌe 10,000 ebu ꞌahoga uti azaḡaꞌe 20,000. Eꞌe kiniḡa teite utitine, ani vitiniꞌuma ga mene?' rae ḡianiꞌuma. 32 Ani vitinoga mene idaḡa reine, kiniḡa eꞌe ize faḡano, ani teite uniho manoḡa mouga veize hari odohe dureꞌeteꞌe vazeḡa tuḡuniꞌuma. 33 Eꞌe teige, zae boꞌaḡano iniu vaze ane ḡau niduꞌa hune modoga moneo ibite mene zamarine, aniꞌe eḡe tahiꞌa rae mene reꞌuma.”

34 Ebu Iesuꞌa ziro, raenaꞌa, “Zaꞌe dama heuḡa. Damaꞌe manoḡa, rehano iniganiꞌa dauḡine, nougenouge damaḡa bare haḡaiꞌuma? 35 Damaḡa mene bare haḡaine, raha ga ogomu ḡuhuneꞌeteꞌe busiḡaꞌe mene manoḡa, eꞌanoꞌo mae modiꞌuma. Za teḡazeta roꞌidene, eḡe ḡoere faifaine abitoꞌi!”