1 Kota eꞌe azaḡa niduꞌa iḡuniro, ebu Iesu tutune onamadu Pilato zamao ohone tiro. 2 Ebu zeḡeꞌa Pilato mazao Iesu sauꞌa rae fureniro, raenaꞌa, “Vaze ꞌadiꞌe emeḡe ne azaḡa soꞌozadu ibi veꞌoḡano tutuzeꞌohe. 'Roma kiniḡa mazao takesi ago hanoꞌi,' rae raꞌohe zu aneꞌa bare raenaꞌa, 'Eꞌe kini zu Keriso,' rae raꞌohe!” 3 Eꞌanoꞌo Pilatoꞌa Iesu ḡadiniro, raenaꞌa, “Ḡaꞌe hube Iuda azaḡa kinihe?” Iesuꞌa naenaeniro. “Oꞌe, ḡaꞌa raꞌetaꞌe hube.” 4 ꞌOugadu Pilatoꞌa tehadu Badiꞌa dibuo hauꞌeteꞌe ḡihiꞌaḡaḡihiꞌaḡa zu vaze ḡuḡuvaḡa ziro, raenaꞌa, “E ani mazaonoꞌo veꞌoḡa ꞌahoga mene horoneha.” 5 Rehano ze teꞌoteꞌau ḡoeriro, raenaꞌa, “Iesu ani, Galilea habaꞌanonoꞌo Iudea habaꞌa niduꞌa onamo Ierusalema ꞌahi habaꞌano zuni, vazevaze ihozeꞌenaꞌa haḡai veꞌoḡa ibiḡano tutuzeꞌohe!” 6 Pilato ani ḡoere ꞌadi igirotene, ḡadiziro. “Iesu aniꞌe Galilea vazeḡahe?” 7 Ebu Iesuꞌe kini Herodaꞌa ḡianeꞌeteꞌe Galilea habaꞌa vazeḡa rae ederiradu ani Heroda vaḡe tuḡuniro. Eꞌe madaḡano Heroda ani Ierusalema habaꞌano radiudo.

8 Herodaꞌa Iesu horonirotene, ani matuꞌe rudaro, mazaḡa ani amahionoꞌo Iesu ḡianihi rae zamarinu. Ani ibite Iesu hariḡa igiro ꞌahine, Iesuꞌa haḡai gigiꞌa haḡaoga horonihi reiro. 9 Eꞌanoꞌo Heroda ani ḡadimu ḡehaḡa Iesu mazao haḡairo, rehano Iesuꞌa mene naenaeniro. 10 Badiꞌa dibuꞌo hauꞌeteꞌe ḡihiꞌaḡaḡihiꞌaḡa zu Mose goro ḡoeꞌa ihozeꞌeteꞌe azaḡaniꞌa iḡunadu ḡoere riḡa ḡehaḡa Iesu rana ḡoeriro. 11 Heroda ani ane uti azaḡa teite Iesu ḡirihoharo. Ebu dabua manoḡa haḡaohanadu Pilato vaḡe bare tuḡune onamiro. 12 Ibite Heroda ebu Pilatoꞌe agiretitido, rehano eꞌe madaḡanoꞌe vazetitiro.

13 Ebu Pilato ani Badiꞌa dibuꞌo hauꞌeteꞌe ḡihiꞌaḡaḡihiꞌaḡa, vaze boroboro ebu haba azaḡa huze nuꞌoziro, 14 zinaꞌa, “Zaꞌe vaze ꞌadiꞌe vaze ibi veꞌoḡano ibitoziniro radu tutune areha. Eḡeꞌa zae zamao ḡianatene, zaeꞌa ane moneo rateꞌe veꞌoḡa ꞌahogani mene horoneha. 15 Herodaꞌa zuni Iesu mazao veꞌoḡa ꞌahogani mene horonadu ani emeḡe vaḡe bare tuḡune onaeha. Ḡianoꞌi! Iesu mazaoꞌe runeo tuḡuniꞌuma veꞌoḡaniꞌe oꞌoꞌa! 16 Eꞌanoꞌo eḡeꞌa uti azaḡa tuḡuzadu Iesu masiniꞌuma ebu tuḡune buniꞌuma* Mirihe farirote ꞌahogaꞌe v. 17 ꞌahige raꞌohe, 'Izidi Iḡine Modeꞌeteꞌe Muiḡano aniꞌa vaze ꞌahoga ḡuꞌaꞌono mae bunifo'.”

18 Rehano vaze ḡuḡuvaḡa niduꞌa huau iḡuniro, raenaꞌa, “Vaze adiꞌe manoꞌi, u Barabasiꞌe tuḡune bunoꞌi!” 19 Barabasi ani Ierusalema habaꞌano gavamani utitoziniro zu vaze zimiro. Eꞌanoꞌo ani ḡuꞌano ohoniro. 20 U Pilato ani vaze ḡuḡuvaḡa teite taꞌirotitiro, mazaḡa ani Iesu tuḡune bunihi reiro. 21 Rehano zeꞌa huaro, raenaꞌa, “Satauronoꞌi! Satauronoꞌi!” 22 Pilatoꞌa ḡae uḡiduḡano ziro, raenaꞌa, “Ani nagi veꞌoḡa haḡaeha? E ani rune moneo tuḡuniꞌuma veꞌoḡa ꞌahoganiꞌa mene horoneha. Eꞌanoꞌo e ani masine tauḡiꞌuma ebu tuḡune buniꞌuma!”

23 Rehano vaze ḡuḡuvaḡaniꞌa Iesu satauronoga veize ḡihau teoteꞌau huaro. Zeḡe agoꞌe ufeta boro hune uꞌano, 24 Pilatoꞌa zeꞌa urateꞌeteꞌe ibiḡano haḡaoziniro. 25 ꞌOugadu ani gavamani utitoziniroteꞌe zu vaze goruziroteꞌe vazeḡa, Barabasi ḡuꞌanonoꞌo mae buniro. U vaze ḡuḡuvaḡaniꞌa uratiroteꞌe idunaḡano, Iesuꞌe satauronoga veize uti azaḡa evora riꞌiniro.

26 Uti azaḡaniꞌa Iesu tutune onamiroteꞌe zamaḡano, Kurene vazeḡa ꞌahoga niḡa Simona, aniꞌe ane habaonoꞌo onaeꞌenogano ibio hidiro. Uti azaḡaniꞌa obone teadu Iesu satauro mae heratoharo ebu Iesu ḡaruna onamiro. 27 Vaze ḡuḡuvaḡaniꞌa zuni Iesu hegote onamiro. Zeḡe boꞌaḡano roḡaeroḡaeꞌa Iesu vetuḡanadu niau kuaro. 28 Iesuꞌa tehadu zinaꞌa, “Ierusalema roḡaeroḡae, eḡe uꞌano ago nianoꞌi, rehano zae zu ubudeze veize nianoꞌi! 29 Mazaḡa aduga boro hidiꞌuma madaḡa ꞌai onaiꞌuma. Eꞌe madaḡano vazevazeꞌa ꞌahige reꞌuma, raenaꞌa, 'Gabani roḡaeḡa zu ene ize ꞌizema mouga roḡaeḡaniꞌe manoḡa tauḡi!' 30 Eꞌe madaḡano ze maḡamaḡa komeꞌa boro zinaꞌa, 'Fahanadu emeḡe ḡahifoꞌi!' 31 Eꞌe ire ḡaboḡa heuḡa, rehano zaꞌa sataurohiꞌohe. ꞌOugine zaꞌe, ire roḡa azaḡa heuḡa, aduga ufeta boro hidiꞌuma.”

32 Ḡonore boro vazeḡa ꞌaheu zuni Iesu teite zemoga radu tutuze onamiro. 33 Ebu zeꞌe haba ꞌahoga niḡa Vadini Isiga feuriro. Eꞌea Iesu ebu ḡonore vazeḡa ꞌaheu satauroziro, vaze ꞌahogaꞌe edaꞌe moneo zu ꞌahogaꞌe kauri moneo. 34 Ebu Iesuꞌa satauronoꞌo reiro, raenaꞌa, “Mama, zeḡe haḡai sauꞌa aḡutu modoꞌi, mazaḡa zeꞌe nagini haḡaeꞌetaꞌaꞌe aḡuꞌa.” Zeꞌa iniuꞌe Iesu dabua meꞌuma radu kaḡusi arahoḡa arahiro.

35 Vazevazeꞌe edanadu muririnu. U vaze ibitoziniꞌeteꞌe azaḡaꞌe Iesu ḡirihoharo, raenaꞌa, “Ani vaze ꞌahogaꞌahogaꞌe ḡaboziro. Aniꞌe Keriso, Badiꞌaꞌa ohotiroteꞌe vazeḡa reine, aneꞌa bare ḡaboniꞌuma!” 36 Uti azaḡaniꞌa zuni arahoharo ebu vaini vuḡa ḡiḡiꞌa gagoharo. 37 Ebu ze ninaꞌa, “Ḡaꞌe Iuda azaḡa kini roꞌidene, ḡaeꞌa ḡae bare ḡaboꞌoꞌi!” 38 Iesu satauro hitaganoꞌe ꞌahige mirihiro, 'Iuda Azaḡa Kini'.

39 Satauro ranaꞌonoꞌo ḡonore boro vazeḡa ꞌahoganiꞌa Iesu roniro, raenaꞌa, “Ḡaꞌe Keriso roꞌidene, ḡaeꞌa ḡae bare ḡaboꞌoꞌi ebu emeḡe zuni ḡabofoꞌi!” 40 Rehano ḡonore boro vazeḡa ꞌahoganiꞌa ḡonore boro vazeḡa omo ḡoere riḡa hina naenaeninaꞌa, “Ḡa Badiꞌa mene rihoneꞌehehe? Ḡae zuni ane teite idaḡa rudaꞌuma ebu Badiꞌa hidiꞌuma. 41 Emetaneꞌe emeḡe sauꞌa uꞌano rudauꞌohe, rehano vaze ꞌadiꞌe haḡai sauꞌa ꞌahogani mene haḡairo.” 42 Ebu aneꞌa Iesu niro, raenaꞌa, “Iesu, ḡaeꞌa ibitohauꞌeteꞌe habaꞌa onaꞌidene eḡe zuni zamaroꞌi!” 43 Iesuꞌa naenaeninaꞌa, “Hube hune ḡaꞌohe, izidi ḡaꞌe eḡe teite Badiꞌa habao radiꞌuma.”

44 Madai kirikiri meirotene, haba niduꞌa uzaboꞌa ꞌuiro onamo ḡorava mone mada uḡidu. 45 Mada mene hiaro ebu kuru neḡa dabuaḡaniꞌa nemao zigau ꞌaꞌadaro. 46 Ebu Iesuꞌa ḡihau huaro, raenaꞌa, “Mama, eḡe vineꞌe ḡae ꞌevoreo tiꞌohe!” Ani ꞌouge reiroteꞌe enogano ꞌai, iriga riꞌiro.

47 Roma uti azaḡa ibitoziniꞌeteꞌe ḡihiꞌaḡaꞌe naginiꞌa fureraroteꞌe horonirotene, ani Badiꞌa niguniro ebu raenaꞌa, “Hube hune vaze ꞌadiꞌe duduḡa!” 48 Iesu satauro rudaroteꞌe muririroteꞌe azaḡa ḡuḡuvaḡaniꞌe naginiꞌa fureraroteꞌe horonirotene, ze zuni vetuḡa ranadu neze ꞌuꞌa barobaro ꞌuhiro. 49 Rehano Iesu vaze niduꞌa zu Galilea habaꞌanonoꞌo hegotiroteꞌe roḡaeroḡaeḡa niduꞌa faḡanonoꞌo naginiꞌa fureraroteꞌe muririro.

50-51 Iudea habaꞌano Arimatea vaze ꞌahoga niḡa Iosefa radiunu. Aniꞌe vaze manoḡa zu duduḡa, zuni Badiꞌaꞌa ibitohauꞌeteꞌe habaꞌa guhininu. Aniꞌe vaze ibitoziniꞌeteꞌe azaḡa boro zamaḡano boro ꞌahoga, rehano vaze boroboroꞌa Iesu matihi reirotene ani ze ḡoere mene mae ḡihiniro. 52 Aneꞌa Pilato vaḡe onamadu edaꞌeꞌedaꞌe uminiro, raenaꞌa, “Iesu rune ahiꞌa enoꞌi!” Ebu hena Pilatoꞌe reiro. “Oꞌe”. 53 ꞌOugadu Iosefaꞌa satauronoꞌo Iesu ahiri mae bunadu dabua hina ꞌumiro. Ebu Iesu ahiri vatava varadiroteꞌe ꞌiduḡa izigano tiro. 54 Aꞌe Bana Madaḡa veize ruhibeꞌeteꞌe madaḡa ḡoravaḡa, ebu Bana Madaḡa hanitiro.

55 Galilea habaꞌanonoꞌo Iesu teite onairoteꞌe roḡaeroḡaeꞌe Iesu ahiri mae onamiroteꞌe hegotiro ebu ahiꞌa tiroteꞌe habaꞌa horoniro. 56 ꞌOugadu ze neze bare onamadu Iesu ahiri aso hanoga veize murava hohoḡa zu dehoro hohoḡa manoḡa ruhibiro. Rehano Mose goro ḡoeꞌa idunaḡano Bana Madaḡa ꞌahine, ze ahirize ohone baniro.