1 Mada fuꞌo tiba fare ḡaruḡano Iesuꞌa Petero, Iakobo zu Iakobo negoḡa Ioane zamazadu zeḡe daꞌo maḡa boro itiro. 2 Eꞌea ani iraḡaniꞌa ze ubumao nufiro. Iraḡaniꞌa mada teige agararo ebu dabuaḡaniꞌa agaḡa teige uraro. 3 Eꞌe madaḡano ze ubumao Mose zu Eliaꞌa fureranadu Iesu teite ḡoeriro. 4 Peteroꞌa Iesu niro, raenaꞌa, “Zuhia Boro, eme ꞌahao radiuꞌetaꞌaꞌe monoḡa! Ḡaꞌa uratine e taruha uḡidu ogoraꞌuma, tibaꞌe ḡae veize, tibaꞌe Mose veize ebu tibaꞌe Elia veize.” 5 Ani ḡoere radiuꞌenogano ḡoze vazavazahoganiꞌa ovadu ze ogoziro, ebu ḡoze zamaḡanonoꞌo ago ꞌahoga igiro, raenaꞌa, “Ahiꞌe eḡe zamarone, ubudehe. E ani mazao matue rudauꞌohe. Ani ḡoere egohanoꞌi.” 6 Iesu tahiꞌatahiꞌaꞌa ago eꞌe igirotene, rihau rudanadu rahao higau ḡuḡuriro. 7 Rehano Iesuꞌa aradu oboziro, ebu raenaꞌa, “Iḡunoꞌi. Ago rihanoꞌi.” 8 Zeꞌa dude ehamarotene, vaze nu mene horoziro, rehano Iesu daꞌo horoniro.

9 Ze maḡanonoꞌo ovairoteꞌe madaḡano Iesuꞌa ziro, raenaꞌa, “Zaꞌa horonataꞌaꞌe vaze mazao ago rae furenoꞌi, onamo eḡe, Vaze Ubuganiꞌa runeonoꞌo bare ḡabode iḡuniꞌuma.” 10 ꞌOugadu ane tahiꞌatahiꞌaꞌa ḡadiniro, raenaꞌa, “Nougadu Mose goro ḡoeꞌa ihozeꞌeteꞌe azaḡaniꞌa, ꞌEliaꞌe ibite onaiꞌuma,' rae raꞌohe?” 11 Iesuꞌa naenaezinaꞌa, “Aꞌe hube. Eliaꞌe ḡau niduꞌa ruhiboga veize ibite onaiꞌuma. 12 Ebu e ziꞌohe, Elia ꞌai amahi onairo. Rehano vazeꞌa mene ederadu ani mazao zeḡeꞌa uratiroteꞌe haḡaiḡa haḡairo. Eꞌe teige, eḡe, Vaze Ubuga zuni zeḡe mazaonoꞌo aduga hidiꞌuma.” 13 ꞌOugadu ane tahiꞌatahiꞌaꞌa Iesuꞌa Ioane Babatisoꞌe Elia idaneꞌenaꞌa, ḡoerateꞌe ederiro.

14 Zeꞌa maḡaꞌonoꞌo vaze ḡuḡuvaḡa vaḡe ovairotene vaze ꞌahoganiꞌa Iesu vaḡe aradu ane zamao tue ḡuḡuriro, ebu raenaꞌa, 15 “Zuhia Boro, eḡe ubude vetuḡanoꞌi! Aniꞌe ketoketeꞌohe ebu ahiriꞌe gigiꞌa boro maꞌohe. Aniꞌa mada ḡehaḡa ire roga rana ga vu rana higauꞌohe. 16 Eꞌa ani tutune ḡae tahiꞌatahiꞌa vaḡe areha, rehano zeꞌa ani manonoga mene idaraneha.” 17 Iesuꞌa naenaeziro, raenaꞌa, “Zaꞌe Badiꞌa mazao mene fiꞌeꞌeteꞌe zu veꞌoḡa haḡaeꞌeteꞌe azaḡa! E za teite noꞌe faḡa radiꞌuma? E noꞌe faḡa zae mazao zamahe gigau oboniꞌumahe?” Ebu tahiꞌa eꞌe moga ninaꞌa, “Ubugo odohe eḡe vaḡe aroꞌi.” 18 Ebu Iesuꞌa vine sauꞌa ronadu ane mazaonoꞌo buaro. Eꞌe madaḡano tahiꞌa eꞌe zogone manoriro.

19 Ebu ani tahiꞌatahiꞌaꞌa zeḡe daꞌo Iesu vaḡe aradu ḡadiniro, raenaꞌa, “Emeꞌa nougadu vine sauꞌa hegone bunoga mene idaraneha?” 20 Aniꞌa ziro, raenaꞌa, “Mazaḡa zae fieꞌetaꞌaꞌe tahiḡa fase. E hube hune ziꞌohe, zaꞌa eḡe mazao fieꞌetaꞌaꞌe fufu maḡa komeꞌa tiba heuḡa radu za maḡa ꞌahi mazao ninaꞌa, 'ꞌAhaonoꞌo vaḡinadu omo onamoꞌi,' rae reine, aniꞌa ꞌouge haḡaiꞌuma. Zaꞌe eḡe mazao fiine, ḡau niduꞌa haḡaogaꞌe idaḡa.”* Fare mirihiroteꞌe nuꞌe v. 21 madu raenaꞌa, “Kuraune zu zaḡozaḡine daꞌo vine sauꞌa ꞌahiguḡaꞌe hegone buneꞌohe.

22 Zeꞌa Galilea habaꞌano nuꞌorarotene, Iesuꞌa ziro, raenaꞌa, “Eḡe, Vaze Ubugaꞌe agirehe ꞌevoreo riꞌihiꞌuma. 23 Zeꞌa uḡuhiꞌuma, ebu mada uḡiduḡano eꞌa bare iḡuniꞌuma.” ꞌOugadu Iesu tahiꞌatahiꞌaꞌe zamaze are rudaro.

24 Zeꞌa Kaperanauma neḡa boro feuriroteꞌe enogano, kuru neḡa takesi azaḡaniꞌa Petero vaḡe aradu niro, raenaꞌa, “Ḡa miriho vazeḡaꞌe kuru neḡa takesi† Girikio, takesi moniḡaꞌe Derakima ꞌaheu. Derakima tibaꞌe mada tiba gau naeḡa heuḡa. mene haḡaeꞌehehe?” 25 Aniꞌa raenaꞌa, “Oꞌe, eḡe ihore vazeḡaꞌe takesi haḡaeꞌohe.”

Peteroꞌa ne diuḡirotene, Iesuꞌa ibite ḡadiniro, raenaꞌa, “Petero‡ Girikio, Simona, ḡa nouge rae zamareꞌohe? Haba kiniḡaꞌe iniu mazao takesi ufeꞌohe, ani haba azaḡa mazao ga avoꞌa azaḡa mazao?” 26 Aniꞌa naenaeninaꞌa, “Avoꞌa azaḡa mazao ufeꞌohe.” Ebu Iesuꞌa ninaꞌa, “Oꞌe, ane haba azaḡaꞌe takesi mene haḡaeꞌohe. 27 Rehano eme mene maḡunozifine takesi haḡaiꞌuma. Ḡaꞌe duꞌura ovoadu kimai feunoꞌi. Ebu ḡozone tiba kimainoꞌidene, hebeꞌa mae nahanoꞌi, ebu siliva moniḡa tiba§ Girikio, siliva moniḡa tibaꞌe Derakima ḡazaḡa heuḡa. horoniꞌuma. Eꞌe madu emetane veize zenoꞌi.”