1 Iesuꞌa hari idaidaḡa ꞌahoga hina bare ḡoreziro, raenaꞌa, 2 “Badiꞌaꞌa ibitoziniꞌetaꞌaꞌe kini ꞌahoga heuḡa. Aniꞌa ubuga veize hahu muiḡa haḡairo. 3 Ebu huziroteꞌe azaḡa mui augoga veize tuḡure azaḡa zeḡe vaḡe tuḡuziro. Rehano zeꞌe onaoga hezahiro.

4 Ebu aniꞌa tuḡure azaḡa nu ꞌahoga bare tuḡuziro, raenaꞌa, 'Eḡeꞌa huzateꞌe azaḡa ꞌahige zoꞌi. “Zae veize eḡeꞌa mui ruhibeha. Boromakau zu mani igaḡa maneha ebu ḡau niduꞌa ꞌai ruhibeha. Hahu muiḡa uꞌa aroꞌi!” 5 Rehano ze teḡa riraro. ꞌAhogaꞌe mebaḡa onamiro, ebu ꞌahogaꞌe moni vaḡi onamiro. 6 Nuꞌe tuḡure azaḡa oboze teadu rae sausauziro ebu zimi ruziro. 7 Kiniꞌa eꞌe igirotene, ani maḡune rudaro. Ebu uti azaḡa tuḡuzadu gorugoru azaḡa eꞌe zimi hauḡiro zu neze zuni hufi haoniro.

8 Ebu ane tuḡure azaḡa huzadu ziro, raenaꞌa, 'E hahu muiḡa ꞌai ruhibe idaneha, rehano eꞌa huziroteꞌe azaḡaꞌe onaoga mene idaḡa. 9 Eꞌanoꞌo ibi boro onamadu horoziteꞌe azaḡa niduꞌa mui aroga veize huzoꞌi!” 10 Ebu ane tuḡure azaḡaniꞌa ibi boro onamadu hidiroteꞌe azaḡa niduꞌa, manoḡa zu sauꞌa azaḡa nuꞌoziro. Ebu tutuze onamadu mui neḡa nuꞌoru irivaꞌoniro.

11 Ebu kiniꞌa iꞌudi azaḡa diuḡe ḡiazirotene, vaze ꞌahoganiꞌa hahu mui dabuaḡa mene vidanoga horoniro. 12 Ani ḡadiniro, raenaꞌa, ꞌEḡe vaze, ḡaꞌe hahu dabuaḡa mene vidaneha. Nougenouge ꞌadi diuḡi areha?' Rehano ani ḡoere ꞌahoga mene reiro. 13 Ebu kiniḡaniꞌa ane gau azaḡa zinaꞌa, 'ꞌEvoꞌa zu odaḡa batunoꞌi, ebu enone uzaboḡano duine feunoꞌi! Ane eꞌea niaꞌuma zu ḡononeḡa atitiꞌuma.'” 14 Ḡonagano Iesuꞌa ziro, raenaꞌa, “Badiꞌaꞌa vaze ḡehaḡa huzeꞌohe, rehano aniꞌa ibitoziniꞌeteꞌe azaḡa veize ohotirotaꞌaꞌe tahiḡa daꞌo.”

15 Ebu Farisea azaḡaniꞌa onamadu Iesuꞌa ḡoere veꞌoḡa ꞌahoga rouga veize nougenouge soꞌonihi radu tiburu neneḡaniro. 16 Ebu zeꞌa zeḡe tahiꞌatahiꞌa zu kini Heroda mone azaḡaꞌe Iesu mazao tuḡuziro. Ze ani vaḡe onamadu niro, raenaꞌa, “Ihore vazeḡa, eme edeḡa ḡaꞌe huga daꞌo ḡoereꞌohe zu Badiꞌaꞌa urateꞌeteꞌe ibiḡa hugano daꞌo ihozeꞌohe. Ebu vaze boro zu komeꞌa idaidazadu vaze uꞌano zamaḡo mene haganeꞌohe. 17 Eꞌanoꞌo eme efoꞌi. Ḡaꞌe nouge rae zamareꞌohe? Roma kiniḡa takesi moniḡa haune, idaḡa ga mene?”

18 Rehano Iesuꞌe zeḡe zama sauꞌaꞌe ederadu ziro, raenaꞌa, “Zaꞌe, zama guhi azaḡa! Nougadu e soꞌohihi rae tuhuheꞌohe? 19 Takesi moniḡa nugo ihohoꞌi.” Ze Roma moniḡa* Giriki, Denari tiba mae harotene, 20 aniꞌa ḡadiziro, raenaꞌa, “Iniu viga zu iniu niḡaꞌe eꞌe rana mirihoga?” 21 Ze raenaꞌa, “Aꞌe Roma kiniḡa viga zu niḡa.” Ebu aniꞌa zinaꞌa, “Tena Roma kiniḡa ḡauꞌe Roma kiniḡa hanoꞌi, u Badiꞌa ḡauꞌe Badiꞌa hanoꞌi.” 22 Zeꞌa ani ḡoere eꞌe igirotene ze zaguzagaro ebu muhinadu oname ḡouriro.

23 Eꞌe madaḡano Sadukea azaḡa nuꞌa Iesu vaḡe onairo. Sadukea duḡuruꞌe vazeꞌa runeonoꞌo mene bare iḡuniꞌuma rae reiro. Ebu ze Iesu ḡadiniro, raenaꞌa, 24 “Ihore vazeḡa, Moseꞌa goro ḡoeꞌa ꞌahige mirihiro. 'Ohoze ꞌahoganiꞌa rudanadu ani inugaꞌe ubuga oꞌoꞌa reine, ohoze negoḡaniꞌa ḡozobaḡa teite hahuradu negoḡa rudaroteꞌe niḡa mouga veize ene furenohaꞌuma† Duet 25:5-6.

25 Hari ꞌahi zamaroꞌi. Negoḡa niduꞌa fuꞌo ꞌaheu fareꞌa radiunu. Ibiꞌaniꞌa hahuriro ebu ubuga oꞌoꞌano rudaro. Eꞌanoꞌo negoḡa ꞌaheuḡaniꞌa ḡozobaḡa teite hahuriro. 26 Rehano ani zuni ubuga oꞌoꞌano rudaro. Ebu negoḡa uḡiduḡa zu onamo fuꞌo ꞌaheu fareḡa mazao haḡai idaḡaniꞌa fureraro. 27 Ḡonaḡano ḡozoba zuni rudaro. 28 ꞌOugadu runeonoꞌo bare iḡuniꞌuma madaḡano roḡae aꞌe iniu inuga reꞌuma? Mazaḡa ohoze niduꞌa fuꞌo ꞌaheu fare ani teite hahuriro.”

29 Iesuꞌa naenaeziro, raenaꞌa, “Zaꞌa zamareꞌetaꞌaꞌe veꞌoḡa, mazaḡa Buka Zaḡoḡa ga Badiꞌa gigiꞌaꞌe aḡuꞌa. 30 Runeonoꞌo bare iḡuniꞌuma madaḡano, vazeꞌe mene hahuriꞌuma, rehano zeꞌe tuḡure viga adureo heuḡa reꞌuma. 31 Runeonoꞌo bare iḡuneꞌeteꞌe moneo, Badiꞌaꞌa reirotaꞌaꞌe za mene meꞌodirohehe? Aniꞌa ꞌahige reiro, raenaꞌa, 32 'Eꞌe Aberahamo Badiꞌa, Isako Badiꞌa zu Iakobo Badiꞌa.'‡ Exod 3:6 Ze amahi rudaro, rehano ze vineꞌe ḡabodeꞌeteꞌe uꞌano, Badiꞌaꞌe zeḡe Badiꞌa rae reiro. Badiꞌaꞌe mene rune azaḡa Badiꞌa, rehano ḡabone azaḡa Badiꞌa.” 33 Vaze ḡuḡuvaḡa aniꞌa ihoziroteꞌe ḡoeꞌa igirotene, zaguzagaro.

34 Ebu Farisea azaḡaniꞌa Iesuꞌa Sadukea azaḡa ḡadimu naenaenadu hebeze huniroteꞌe hariḡa igirotene, ze nuꞌoraro. 35 Zeḡe boꞌaḡano Mose goro ihozeꞌeteꞌe vazeḡa ꞌahoganiꞌa Iesu tuhune nurihi radu ḡadiniro, raenaꞌa, 36 “Ihore vazeḡa, Mose goro ḡoeꞌa niduꞌa zamaḡano noꞌe goro ḡoeꞌaꞌe ḡihiꞌaḡa hune?”

37 Iesuꞌa naenaeniro, raenaꞌa, “Goro ḡoeꞌa ḡihiꞌaḡa huneꞌe ꞌahiꞌeꞌe. 'Ḡae Badiꞌa Zuhiꞌa Boro, zamaḡo niduꞌa hina, vineḡo niduꞌa hina zu zamaroneḡo niduꞌa hina zamaroꞌi.' 22:37 Deu 6:5 38 Aꞌe goro ibiꞌa zu ḡihiꞌaḡa hune raꞌohe. 39 Ebu goro ḡihiꞌaḡan hune ꞌahogaꞌe ꞌahiguḡa. 'Ḡaeꞌa ḡae bare zamareꞌeteꞌe teige, ḡae nabugo zamaroꞌi.' 22:39 Levi 19:18 40 Mose goro ḡoeꞌa niduꞌa ebu peroveta azaḡaniꞌa ihoziroteꞌe ḡoeꞌa niduꞌaꞌe goro ꞌaheu eꞌe rana edau haḡairo.”

41 Farisea azaḡaniꞌa nuꞌoraroteꞌe zamaḡano, Iesuꞌa ḡadiziro, raenaꞌa, 42 “Zaꞌa Kerisoꞌe nouge rae zamareꞌohe? Aniꞌe iniu mariga?” Ze naenaeninaꞌa, “Davida mariga.” 43 Iesuꞌa ḡadizenaꞌa, “ꞌOugadu Davidaꞌe nougadu Vine Zaḡoḡaniꞌa ibitohanadu Keriso mazao 'Zuhiꞌa Boro,' rae hunehehe? Davida ꞌahige reiro, raenaꞌa,

45 Davidaꞌa Keriso mazao 'Zuhiꞌa Boro,' rae huniro. Eꞌanoꞌo Kerisoꞌe mene Davida mariga raꞌohe.” 46 Ebu vaze tibaniꞌa zuni Iesu mene naenaeni ḡoreniro. Eꞌe enoganonoꞌo vaze ꞌahoganiꞌa Iesu inare ḡadimuꞌeteꞌe mene bare haḡairo.