1 Iesuꞌa ḡoere eꞌe niduꞌa rae hauḡirotene, ane tahiꞌatahiꞌa ziro, raenaꞌa, 2 “Zae edeḡa, mada ꞌaheu enogano Iḡine Modeꞌeteꞌe Muiḡaꞌe meꞌuma ebu eḡe, Vaze Ubugaꞌe sataurohihi radu vazeꞌa obohe tiꞌuma.”

3 Eꞌe madaḡano dibuꞌo azaḡa ḡihiꞌaḡaḡihiꞌaḡa zu vaze boroboroꞌa dibuꞌo azaḡa ḡihiꞌaḡa, niḡa Kaiafa, ane neo nuꞌoraro. 4 Ebu Iesu sifu obone teadu manoga veize ibiḡa ḡoꞌane vaḡiro. 5 Rehano ze raenaꞌa, “Iḡine Modeꞌeteꞌe Muiḡa madaḡanoꞌe mene idaḡa. ꞌOugine vaze ḡuḡuvaḡaniꞌa utitofiꞌuma.”

6 Iesuꞌe Betania neḡano, ibite leferaꞌa meiroteꞌe vazeḡa, Simona neo radiro. 7 Ani ogomu fataḡa zamao tave ehoreꞌenaꞌa, ogaueꞌeteꞌe zamaḡano, roḡae ꞌahoganiꞌa dehoro hohoga manoḡa naeḡa boroꞌe bioḡa komeꞌa manohuga irivaꞌonadu mae onairo. Ebu Iesu vadinio beuꞌiro. 8 Iesu tahiꞌatahiꞌaꞌa ꞌeꞌe horonirotene, ze maḡuniro, raenaꞌa, “Nougadu dehoro ꞌahiꞌe hauḡe tauḡeꞌohe? 9 Aꞌe moni boro hina seronadu zahara azaḡa zinifo!”

10 Iesuꞌa tahiꞌaḡa nagini reiroteꞌe ederadu ziro, raenaꞌa, “Za nougadu roḡae ꞌadi aduga hauꞌohe? Aniꞌe eḡe veize manoḡa hune haḡaeha. 11 Zahara azaḡaꞌe mada niduꞌa zae boꞌaḡano radiꞌuma, u eꞌe mada niduꞌa zae teite mene radiꞌuma. 12 Aniꞌa dehoro hohoḡa manoḡa eḡe ahiri rana beuꞌataꞌaꞌe, eḡe rune veize ruhineha. 13 E hube hune ziꞌohe. Raha niduꞌa zamaḡano noꞌe habaꞌano Badiꞌa hari manoḡa haramine, aniꞌa haḡataꞌaꞌe meꞌodadu ani zamariꞌuma.”

14 Eꞌe enogano Iesu tahiꞌaḡa 12 zamaḡano tahiꞌa ꞌahoga, niḡa Iuda Isakariotaꞌe dibuꞌo azaḡa ḡihiꞌaḡaḡihiꞌaḡa vaḡe onamiro, 15 ebu ḡadiziro, raenaꞌa, “Iesu zae ꞌevoreo riꞌinine, moni nugu iniꞌuma?” ꞌOugirotene ze moni silivaḡa 30 meꞌodadu haro. 16 Eꞌe madaḡanonoꞌo ani Iesu zeḡe evorao riꞌinoga veize ibiḡa vaḡiro.

17 Isiti Oꞌoꞌa Berediḡa Muiḡa* Isiti Oꞌoꞌa Berediḡa Muiḡaꞌe mada fuꞌo ꞌaheu fare zamaḡano haḡaeꞌohe. madaḡa ibiꞌaꞌe Iḡine Modeꞌeteꞌe Muiḡa rae reiro. Iesu tahiꞌatahiꞌa ane vaḡe onaadu ḡadiniro, raenaꞌa, “Ḡa uraꞌe eme Iḡine Modeꞌeteꞌe Muiḡa ogomuḡaꞌe nouma ruhibe tiꞌuma?” 18 Aniꞌa naenaeziro, raenaꞌa, “Ierusalema diuḡe onamadu vaze ꞌahoga vaḡoꞌi ebu noꞌi, 'Ihore vazeḡaniꞌa ꞌahige raꞌohe: Eḡe mada ꞌai haniteha. E tahiꞌaheta ḡa neo Iḡine Modeꞌeteꞌe Muiḡa ogomuḡa au tiburaꞌuma.'” 19 Ebu Iesu tahiꞌatahiꞌaꞌe Iesuꞌa ziroteꞌe haḡaiḡa haḡaadu Iḡine Modeꞌeteꞌe Muiḡa ruhibiro.

20 Ḡorava uḡano reirotene, Iesu ani tahiꞌaḡa 12 teite ogau tiburaro. 21 Ebu ze ogauꞌeteꞌe zamaḡano, Iesuꞌa ziro, raenaꞌa, “E hube hune ziꞌohe, zae boꞌaḡano vaze ꞌahoganiꞌa eḡe revoniꞌuma.” 22 Ebu ze zamaze adudanadu ḡaruga ḡarugano Iesu ḡadiniro, raenaꞌa, “Zuhiꞌa Boro, eḡehehe?” 23 Aneꞌa naenaezinaꞌa, “Izidi eḡe teite idaḡa siuvao tare auꞌeteꞌe vazeḡaniꞌa revoniꞌuma. 24 Ibite Buka Zaḡoḡano mirihiroteꞌe ḡoeꞌa idunaḡano, eḡe, Vaze Ubuganiꞌa hube rudaꞌuma. Rehano revoniꞌuma vazeḡaniꞌe, fase vetuꞌaḡa, aduga hidiꞌuma. Aniꞌe mene furerafone manoḡa reifo.” 25 Ebu ani revohaꞌuma vazeḡa, Iudaꞌa ninaꞌa, “Ihore vazeḡa, eḡehehe?” Iesuꞌa naenaeninaꞌa, “Oꞌe, vazeḡaꞌe ḡae.”

26 Ze ogauꞌeteꞌe zamaḡano, Iesuꞌa beredi madu kuraro, ebu vahegadu ane tahiꞌatahiꞌa ziniro. Ebu raenaꞌa, “ꞌAdiꞌe eḡe ahiri. Madu anoꞌi.” 27 Ebu aniꞌa vaini vuḡa bioḡa madu kuraro, ebu ziniꞌenaꞌa ziro, raenaꞌa, “Zae niduꞌa, ꞌahi gagoꞌi. 28 Mazaḡa bio ꞌadi zamaḡanoꞌe eḡe ru. Eḡeꞌa vaze ḡehaḡa sauꞌaze rae modoga veize rudanadu ruheꞌa beꞌutiꞌuma. Aꞌe, Badiꞌaꞌa vaze teite ḡoitoriroteꞌe ḡoeꞌaꞌe eḡe ru hina bare idaneꞌohe. 29 E ziꞌohe, vaini vuḡa ꞌahi mene bare gagiꞌuma, izidiꞌonoꞌo onamo eḡe Mamaꞌa ibitohauꞌeteꞌe madaḡano zae teite vaini vuḡa iziga gagiꞌuma.” 30 Ebu ze bada ꞌahoga mae hauḡadu Olive maḡa onamiro.

31 Ebu Iesuꞌa ane tahiꞌatahiꞌa ziro, raenaꞌa, “Izidi ohere zae niduꞌa eḡe uꞌano muhihe feraꞌuma. Mazaḡa Buka Zaḡoḡa zamaḡano ꞌahige mirihiro, raenaꞌa,

32 Rehano eꞌa runeonoꞌo bare iḡunine, Galilea habaꞌa ibite onamadu eꞌea zae hidiꞌuma.”

33 Peteroꞌa Iesu niro, raenaꞌa, “Zeḡe niduꞌa ferau muhiꞌiꞌuma rehano, eꞌe mene ferau muhiꞌiꞌuma!” 34 Iesuꞌa naenaeninaꞌa, “E hube hune ḡaꞌohe, izidi ohere izema kokorokuꞌa uganogano, ḡaꞌe ḡae uḡidu eḡe oꞌohiꞌuma.” 35 Rehano Peteroꞌa ḡoere ḡiharo, raenaꞌa, “E mene oꞌoꞌiꞌuma. Ḡae teite rudaune zuni idaḡa!” Ebu ane tahiꞌatahiꞌa niduꞌa zu ꞌouge reiro.

36 Ebu Iesu ane tahiꞌatahiꞌa teite Getesemane habaꞌa onamiro. Onamirotene, Iesuꞌa ziro, raenaꞌa, “ꞌAdao ehore radoꞌi, u eꞌe kuranoga veize omo onamiꞌuma.” 37 Ebu aniꞌe Petero zu Zebedeo ubuga ꞌaheu, Iakobo zu Ioane, tutuze onamiro. Ani zamaḡa ariro zu adudaro. 38 Hena ani zinaꞌa, “Eꞌe zamahe are rudauꞌohe. ꞌAdao radadu eḡe teite evate radoꞌi.”

39 Ebu ani tahiḡa faḡa onamadu rahao ḡuḡureꞌenaꞌa kuraro, raenaꞌa, “Eḡe Mama, idaḡa roꞌidene eḡe mazaonoꞌo bio ꞌadi mae vaḡinoꞌi. Rehano mene eḡe ura, ḡae ura daꞌo haḡaoꞌi.”

40 Ebu Iesu ane tahiꞌa uḡidu vaḡe bare onairotene, ze bazuna haniziro. Ani Petero niro, raenaꞌa, “Za mada tahiḡa zuni eḡe teite mene evate radiuhehe? 41 Zaꞌa haḡai veꞌoḡa ꞌahoga mene haḡaifine, evate radiuꞌenaꞌa, kuranoꞌi. Zamazeꞌe hube hune kuranoga urateꞌohe, rehano ahirizeꞌe inaraḡa oꞌoꞌa.”

42 Ebu Iesuꞌa bare onamadu ḡae ꞌaheuḡa kuraro, raenaꞌa, “Eḡe Mama, e bio ꞌahi hube hune gagiꞌuma reine, ḡae ura haḡaoꞌi.” 43 Ani bare onairotene, ze bazuna haniziro, mazaḡa ubumazeꞌa anoziro.

44 Ani ze muhizadu bare onamiro. Ebu ḡae uḡiduḡa kurauꞌenaꞌa, ibite kuraroteꞌe ḡoeꞌa bare reiro. 45 Ebu Iesuꞌa ane tahiꞌatahiꞌa vaḡe bare onaadu ziro, raenaꞌa, “Za ize bazeꞌehehe zu ahirize ohoneꞌehehe? Madaḡa ꞌai maha. Eḡe, Vaze Ubugaꞌe, haḡai sauꞌa azaḡa ꞌevorao riꞌihiꞌuma. 46 Iḡunadu onamihi. Ḡianoꞌi! E revoniꞌeteꞌe vazeḡa ꞌai feureha.”

47 Iesu ani ize ḡoereꞌeteꞌe zamaḡano, ane tahiꞌa 12 boꞌaḡano ꞌahoga, Iudaꞌa vaze ḡuḡuvaḡa teite feuriro. Vaze ḡuḡuvaḡa eꞌe dibuꞌo azaḡa ḡihiꞌaḡaḡihiꞌaḡa zu vaze boroboroꞌa tuḡuzadu benisi zu somori boro mae ariro. 48 Ebu Iesu revohaueꞌeteꞌe vazeḡaniꞌa, aneꞌa haḡaiꞌuma gauḡa ibite ihoziro, raenaꞌa, “Eḡeꞌa hidadu furaꞌiniꞌuma vazeḡaniꞌe Iesu. Ani obone toꞌi.” 49 Ebu aniꞌa zogone Iesu vaḡe onamadu niro, raenaꞌa, “Ihore vazeḡa! Manoḡahehe?” Ebu furaꞌiniro. 50 Iesuꞌa naenaeniro, raenaꞌa, “Vazehe, ḡaꞌa ahao nagini haḡaiꞌuma ḡauḡa haḡaoꞌi.”

Ebu Iuda teite onairoteꞌe azaḡaniꞌa onamadu Iesu obone tiro. 51 Rehano Iesu ḡati vazeḡa ꞌahoganiꞌa benisiḡa ahase bunadu dibuꞌo azaḡa ḡihiꞌaḡa tuḡure vazeḡa udiro, ebu teḡaḡa variꞌe butiro. 52 ꞌOugadu Iesuꞌa niro, raenaꞌa, “Benisiḡo bare iḡuꞌano toꞌi! Benisi hina vaze matihi raeteꞌe azaḡaꞌe zeḡe zuni benisi uꞌano rudaꞌuma. 53 Eḡeꞌa Mamahe uminine, aneꞌa tuḡure viga ḡehaḡa bagaḡa ḡarihe tuḡuzadu emeḡe biriꞌuma. Aꞌe ḡa aḡuꞌahehe? 54 Rehano Buka Zaḡoḡano eḡe mazao ꞌahiguḡaniꞌa fureraꞌuma reiroteꞌe ḡoeꞌaꞌe izidi hudanoga veize, eḡeꞌa mene ꞌouge uminiꞌuma.”

55 Ebu Iesuꞌa vaze ḡuḡuvaḡa ziro, raenaꞌa, “Zaꞌe ḡonore vazeḡa obone tiꞌeteꞌe teige, benisi ebu somori boro madu eḡe obohe touga veize arahehe? Mada niduꞌa eꞌe kuru neḡa habaꞌano ihore radiunu. Eꞌe madaḡano zaꞌe mene obohe tiro. 56 Rehano peroveta azaḡaniꞌa mirihiroteꞌe ḡoeꞌaniꞌa hudafine, ꞌahiguḡaniꞌa fureraneha.” Ebu ane tahiꞌatahiꞌa niduꞌaꞌe muhine feraro.

57 Ebu Iesu obonetiroteꞌe azaḡaniꞌa dibuꞌo azaḡa ḡihiꞌaḡa, niḡa Kaiafasi ne tutune onamiro. Mose goro ḡoeꞌa ihozeꞌeteꞌe azaḡa zu vaze boroboroꞌe irina deꞌea nuꞌoraro. 58 Eꞌe madaḡano, Peteroꞌe faḡanonoꞌo Iesu hegotadu dibuꞌo azaḡa ḡihiꞌaḡa ne habaꞌano feuriro. Ne diuḡadu kuru neḡa taufeꞌeteꞌe azaḡa teite ehoreꞌenaꞌa, naginiꞌa fureraꞌuma veize ḡiane radiro.

59 Dibuꞌo azaḡa ḡihiꞌaḡaḡihiꞌaḡa zu nuoꞌnuꞌo boro auḡeꞌeteꞌe azaḡaꞌe Iesu manoga veize ḡuriro ḡoeꞌaḡoeꞌa vaze mazao vaḡiro. 60 Vaze ḡehaḡaniꞌa ḡuriro ḡoeꞌa ani mazao reiro, rehano ḡau veꞌoḡa ꞌahoga mene horoniro. Ḡonagano vaze ꞌaheuꞌa iḡune edaro. 61 Ebu raenaꞌa “Vaze ꞌadaꞌa ꞌahige reiro. 'Eꞌa Badiꞌa kuru neḡa ruinadu mada uḡidu zamaḡano bare ogoraune idaḡa.'” 62 ꞌOuge reirotene dibuꞌo azaḡa ḡihiꞌaḡaniꞌa iḡune edanadu Iesu niro, raenaꞌa, “Ḡa ze ḡoere mene naenaeniꞌumahe? Zeꞌa ḡaꞌe veꞌoḡa rae ḡoereꞌohe. Ḡa ze mazao ḡoere nu reꞌumahe?” 63 Rehano Iesuꞌe sifu radiro. Ebu dibuꞌo azaḡa ḡihiꞌaḡaniꞌa niro, raenaꞌa, “Radiuꞌeteꞌe Badiꞌaꞌaḡa niḡano ḡadimuꞌohe. Badiꞌa zamao huga roꞌi. Ḡaꞌe Keriso, Badiꞌa Ubuga ga mene? Efoꞌi.” 64 Iesuꞌa naenaeniro, raenaꞌa, “Oꞌe, ḡaꞌa eꞌe Keriso rae eheha. Rehano e ziꞌohe, zama moneo eḡe, Vaze Ubugaꞌe Gigiꞌa Boro Badiꞌaḡa edaꞌe moneo ehoradu ibitozenoga zu adure ḡozeḡa zamaḡano ovaoga horoniꞌuma.”

65 ꞌOuge reirotene, dibuꞌo azaḡa ḡihiꞌaḡaniꞌa dabuaḡa zegadu ziro, raenaꞌa, “Vaze ꞌadiꞌe Badiꞌa rae sausauneꞌohe! Eme aniꞌe veꞌoḡa rae raꞌeteꞌe vazeḡa mene bare vaḡiꞌuma. Izidi aniꞌa Badiꞌa rae sausaunataꞌe zae niduꞌa egeha! 66 Za ani mazao nagini haḡaiꞌuma rae zamareꞌohe?” Zeꞌa naenaeniro, raenaꞌa, “Aniꞌe veꞌoḡa. Runeo tuḡuniꞌuma.” 67 Ebu zeꞌa iraḡa ꞌue soꞌabide vaniro zu evoreze hina bouniro. Vaze nuꞌa ubumaḡa dabua hina uꞌadu faꞌone arahiro, 68 ebu raenaꞌa, “Hei, Keriso! Iniuꞌa faꞌoꞌeha efoꞌi.”

69 Peteroꞌa dibuꞌo azaḡa ḡihiꞌaḡa ne habaꞌano ehore radirotene, tuḡure roḡaeḡa ꞌahoganiꞌa ane uꞌa onaadu niro, raenaꞌa, “Ḡae zu Galilea vazeḡa Iesu teite radiudo.” 70 Rehano Peteroꞌa zeḡe niduꞌa zamao ꞌoꞌoniro, raenaꞌa, “E ḡa nagini raꞌetaꞌaꞌe e aḡuꞌa!” 71 Ebu aniꞌa haba ḡabiriḡa ibihetaḡa uꞌa onamirotene, tuḡure roḡaeḡa ꞌahoganiꞌa horonadu vaze ziro, raenaꞌa, “ꞌAdiꞌe Nazareta vazeḡa Iesu teite radiudo.” 72 Ebu ani bare riḡa ꞌoꞌoniro, raenaꞌa, “Eꞌe hube hune vaze aꞌe aḡuꞌa!” 73 Mene mada faḡa enogano, eꞌea edaroteꞌe azaḡaniꞌa Petero vaḡe onaadu niro, raenaꞌa, “Hube ḡa zuni ane tahiꞌa ꞌahoga, mazaḡa ḡae ago iraḡaꞌe Galiliea habaꞌa ago iraḡa.” 74 Ebu aniꞌa ḡihau teꞌoteꞌau ḡoeriro, raenaꞌa, “E ḡuririne aduga hidiꞌuma! E vaze aꞌe aḡuꞌa!” Ani Ꞌouge reirotene, kokorokuꞌa ugaro. 75 Ebu Peteroꞌa Iesu ibite niroteꞌe ḡoeꞌa zamariro. Iesuꞌa raenaꞌa, “Kokorokuꞌa ꞌizema uganogano, ḡaꞌa eḡe ḡae uḡidu ꞌoꞌohiꞌuma.” Ebu ani haba ḡabiriḡa mode buanadu niau rudaro.