1 Mada nu ḡarugano, Iesu ani Kaperanauma neḡa bare onamiro. Ebu aniꞌa ane bazuni neḡano diuḡiroteꞌe hariḡa, ne azaḡaniꞌa igiro. 2 Eꞌanoꞌo vaze ḡehaḡaniꞌa Iesuꞌa radiroteꞌe neḡa onairo. Eꞌanoꞌo ehoro habaꞌa niduꞌa vazeꞌa iriꞌaviro. Ibiheta habaꞌano zuni iriꞌaviro. Iesuꞌa Badiꞌa hari manoḡa haramo ziniro. 3 Vaze ḡazaḡaniꞌa, Iesu vaḡe, ahiꞌa mene haganeꞌeteꞌe vazeḡa odohe onairo. 4 Rehano vaze ḡehaḡa ꞌahine, Iesu uhiḡa onamoga mene idararo. Mene idararotene, Iesuꞌa ehoriroteꞌe hitagano binu fahiro. Ebu ahiꞌa mene haganeꞌeteꞌe vazeḡaniꞌa bazeꞌeteꞌe farataḡa, mini hina ovoe dabaniro. 5 Zeḡeꞌa Iesu mazao fieꞌeteꞌe, Iesuꞌa horonirotene, ahiꞌa mene haganeꞌeteꞌe vazeḡa niro. ꞌAhige reiro. 'Ubude! Ḡa sauꞌa ꞌai rae ꞌueha.'

6 Mose goro ḡoeꞌa ihozeꞌeteꞌe vazeḡa nuꞌe, eꞌe zamaḡano ehoriro, ebu zamazeo zamariro. 7 ꞌAhige reiro. 'Nougaꞌahi vaze ꞌahi ꞌouge ḡoereꞌohe? ꞌAdiꞌe Badiꞌa ni sausauneꞌeteꞌe ḡoeꞌa. Iniuꞌa daꞌo sauꞌa mae vaḡiniꞌuma? Badiꞌaꞌa daꞌo haḡaiꞌuma.'

8 Zeḡeꞌa ꞌouge zamarirotene, Iesu ani zeḡeꞌa zeḡe zeḡe zamao ꞌouge zamariroteꞌe, ane zamao ederiro. Ebu ziro. 'Za nougaꞌahi zae zamao ꞌouge rae zamareꞌohe? 9 Ahiꞌa mene haganeꞌeteꞌe vazeḡa nouge nouge rae nine, ḡoeꞌaꞌe ufiḡa? 'Ḡae sauꞌa ꞌai rae modeha' rae niꞌeteꞌe ga 'Iḡunadu onamoꞌi' rae niꞌeteꞌe? 10 Rehano e ani manoniꞌuma ebu ani sauꞌa zu rae modiꞌuma, mazaḡa eḡe, Vaze Ubuḡaꞌe raha ꞌadao vaze sauꞌa rae modeꞌeteꞌe gigiꞌaḡa meiroteꞌe zuni za ihoziꞌuma.” Ebu Iesuꞌa ahiꞌa mene haganeꞌeteꞌe vazeḡa eꞌe ninaꞌa, 11 “Eḡeꞌa ḡaꞌohe. Iḡunoꞌi ebu farataḡo odohadu neḡo onamoꞌi!”

12 Ani iḡuniro. Ebu Farataḡa mae ḡihinadu, vaze niduꞌa ubumao eꞌe neḡanonoꞌo buaro. Ebu zeḡe niduꞌa zaguzaganadu, Badiꞌa niḡa mae ḡihiniro, ebu ꞌahige reiro. 'Ibite ꞌahiguḡa mene horoniro.'

13 Iesu ani Galilea duꞌuraḡa boro genaḡa bare onamiro. Vaze ḡuḡuvaḡa niduꞌa, ani vaḡe onairo, ebu aniꞌa ihoziro. 14 Iesuꞌa bare ibio onamiroteꞌe zamaḡano, Alefeo ubuga Levi horoniro. Ani |itakesi moni|rḡa* ufeꞌeteꞌe neḡano ehoriro, ebu Iesuꞌa niro. 'Eḡe ḡaruna aroꞌi!' Ebu aniꞌa iḡunadu, Iesu ḡaruna hegotiro.

15 Iesuꞌa Levi neo ogaroteꞌe zamaḡano, takesi azaḡa zu haḡai sauꞌa azaḡa ḡehaḡaniꞌa Iesu zu ane tahiꞌatahiꞌa teite ogau tiburaro. Mazaḡa vaze ḡehaḡa bagaḡaniꞌa, Iesu ḡaruna iḡaiḡa hegotido ꞌahine. 16 Ebu Mose goro ḡoeꞌa ihozeꞌeteꞌe Farisea azaḡaniꞌa, Iesu horoniro, |itakesi moni|rḡa gugeꞌeteꞌe azaḡa zu, sauꞌa azaḡa rae ziꞌeteꞌe teite ogauꞌenogano. Ebu Iesu tahiꞌa tahiꞌa ḡadiziro. 'Nougadu Iesuꞌe |itakesi moni|rḡa gugeꞌeteꞌe azaḡa zu, sauꞌa azaḡa rae ziꞌeteꞌe teite ogau tiburuꞌohe?'* Zeꞌe vaze ꞌuguḡa teite tiburu ranogaꞌe sauꞌa rae zamariro. 17 Ebu Iesuꞌa eꞌe egadu ziro, raenaꞌa, “Ugi oꞌoꞌa azaḡaꞌe gohe vazeḡa mene vaḡeꞌohe, rehano ugi azaḡaniꞌa ani vaḡeꞌohe. Eꞌe teige, eꞌe haḡai duduḡa rae zamareꞌeteꞌe azaḡa huzoga radu mene onairo. Rehano haḡai sauꞌa rae zamareꞌeteꞌe azaḡa huzoga radu onairo.”

18 Mada ꞌahogano, Ioane tahiꞌa tahiꞌa zuni Farisea azaḡa*niꞌa, Mose goro ḡoeꞌa idunaḡano zaḡozaḡiro. Mene ogaro. Vaze nuꞌa onaadu, Iesu ḡadiniro. ꞌAhige reiro. 'Ioane tahiꞌa tahiꞌa, zuni Farisea tahiꞌaḡaꞌe zaḡozaḡeꞌohe. Rehano nougadu ḡae tahiꞌaꞌe mene zaḡozaḡeꞌohe?' 19 Iesuꞌa ziro. ꞌAhige reiro. 'Zamaroꞌi! Hahureꞌeteꞌe madaḡano, ohoze hahu izigaꞌa, aneꞌa huzeꞌeteꞌe vazeḡa teite ogauꞌeteꞌe zamaḡano, ze zaḡozaḡiꞌuma ga mene? Zeḡeꞌa ohoze hahu iziga teite radiuꞌeteꞌe madaḡano mene zaḡozaḡiꞌuma. 20 Rehamo eꞌe madaḡa onaiꞌuma. Agire azaḡaniꞌa ohoze hahu iziga, ane vaze niduꞌa mazaonoꞌo mae vaḡiniꞌuma. Eꞌe madaḡano zeḡeꞌa zaḡozaḡeꞌenaꞌa, mene ogaꞌuma.'

21 Vaze ꞌahoganiꞌa dabua iziga variꞌe madu dabua amahiḡa mene baniniꞌuma, mazaḡa dabua siꞌiga izigaꞌa amahiḡa hutubadu borofe zigaꞌuma. 22 Vaze tibuhuga zuni mani ogaḡa mahiḡa zamaḡano |ivaini|r vuḡa* iziga mene iḡiꞌuma. (Aꞌe |ifainafu|r vuḡa heuḡa) Iḡine, vehuꞌu mani ogaḡa fuꞌuradu, zigaꞌuma. Ebu |ivaini|r vuḡaniꞌa soriꞌuma. |iVaini|r vuḡa zu mani ogaḡaniꞌa sautaꞌuma. Eꞌanoꞌo |ivaini|r vuḡa izigaꞌe mani ogaḡa iziga zamaḡano daꞌo iḡiꞌuma.'

23 Bana Madaḡa ꞌahogano, Iesu ani, tahiꞌaḡa teite |iuiti|r* (wheat) mebaḡa genaḡano onamiro. Ebu tahiꞌaḡaꞌe |iuiti|r maḡa ririꞌe madu, au onamiro. 24 Farisea azaḡaniꞌa Iesu ḡadiniro. 'Ḡianoꞌi! Zeꞌe nougadu Bana Madaḡa goroḡa varadeꞌenaꞌa, |iuiti|r hiriveꞌohe?' 25 Ebu Iesuꞌa naenaeziro. 'Za buka zaḡoḡa zamaḡano, Davidaꞌa nagini haḡairotaꞌaꞌe, meꞌodiro ga? Davida ani, ane uti azaḡa teite ogomuzeꞌa hauḡadu, vinize ruziro. 26 Abiata aniꞌe, Badiꞌa ḡahunohauꞌeteꞌe neḡa zuhiꞌaḡa ḡihiꞌa reiroteꞌe madaḡano, Davidaꞌa Badiꞌa ne diuḡiro. Badiꞌa ubumao tiroteꞌe |iberedi|rḡa* Abiataꞌa mae hanadu, aro. Aꞌe Badiꞌa ḡahunohauꞌeteꞌe neḡa zuhiꞌaḡaniꞌa daꞌo auꞌeteꞌe |iberedi|rḡa, rehano aro. Ebu ane teite onairoteꞌe azaḡa zuni mae ziniro.'

27 Ebu Iesuꞌa ziro. 'Badiꞌaꞌa, Bana Madaḡaꞌe, vazeꞌa manoḡa hidifine haḡairo. Badiꞌaꞌa vaze mene haḡairo, Bana Madaḡa veize. 28 Eꞌanoꞌo, eḡe, Vaze Ubugaꞌe, Bana Madaḡa ibitohauꞌeteꞌe zuhiꞌaḡa.'