1 Iesu ebu ane tahiꞌa tahiꞌaniꞌa, Galilea duꞌuraḡa mone afao feuriro. Haba niḡa Gerasa, eꞌa feuriro. 2 Iesu aniꞌa ane tahiꞌa tahiꞌa teite ḡasionoꞌo buarotene, rune habaꞌanonoꞌo onairoteꞌe vazeḡa teite hidiro. Aniꞌe vine sauꞌaniꞌa ragano reiroteꞌe vazeḡa. 3 Aniꞌe idu habaꞌano radiudo. Vaze ꞌahoganiꞌa batunoga zuni mene idaḡa. 4 Ḡae ḡehaḡa ani odaḡa zu evoꞌa batunido, rehamo mene idaraudo. Iḡaiḡa batu riꞌido, ebu odaḡa batuniroteꞌe auriḡa mau riꞌi ḡuzuhido. Vazeꞌa obone toga zuni mene idaraudo. 5 Madai ebu ohere niduꞌa idu habaꞌano zuni haba maḡano ḡaniḡanau ragavido, ebu ahiꞌa hadi hina ruꞌido.

6 Aniꞌa faḡanonoꞌo Iesu horonirotene, ane uꞌa dure onairo, ebu ane zamao obena hina tuḡadu ḡuḡuriro. 7 Ebu vine sauꞌaniꞌa, ane mazaonoꞌo ḡihau hounaꞌe ḡoeriro. ꞌAhige reiro. 'Iesu, Badiꞌa, Niḡa Boro Ubuga, Ḡaꞌe eḡe mazao nagini urateꞌohe? Badiꞌa niḡano e ḡa umiꞌeꞌohe. Aduga ago enoꞌi!' 8 Mazaḡa Iesuꞌa ibite niro. ꞌAhige reiro. 'Vine sauꞌa, vaze ꞌahi mazaonoꞌo buanoꞌi!' 9 Ebu Iesuꞌa vaze ꞌahi ḡadiniro. 'Ḡa niḡo iniu?' Ebu raenaꞌa, 'E niꞌe “Legioni* Eꞌe huganiꞌe uti azaḡa daha fuꞌo tu tiba fare (6000) heuḡa”, mazaḡa emeꞌe ḡehaḡa ꞌahine.' 10 Ebu Iesu bare bare uminiro, eꞌe habaꞌanonoꞌo mene tuḡuze buzoga.

11 U maḡa kobeḡa ꞌahogano, aba ḡehaḡaniꞌa ogau radiro. 12 Eꞌanoꞌo vine sauꞌa sauꞌaniꞌa Iesu uminiro. 'Eme tuḡufoꞌi aba mazao, emeḡe zeḡe ragano rouga.' 13 Iesuꞌa tuḡuziro. Ebu vine sauꞌa sauꞌaniꞌa vaze eꞌe mazaonoꞌo buanadu, aba ragano reꞌ onamiro. Eꞌebone aba niduꞌa, daha aheu (2000)ꞌa maḡa duduḡa tauḡionoꞌo dure dure ovoadu, duꞌura boroo rafatadu, hunuhuniro.

14 Aba taufeꞌeteꞌe azaḡaniꞌa feraro, ebu ne boro zu ne kobeḡa kobeḡa azaḡa mazao hariḡa haire ḡehaniro. Ebu vaze vazeꞌa naginiꞌa fureraroteꞌe ḡianoga radu, onamiro. 15 Ebu zeꞌa Iesu vaḡe onairotene, vine sauꞌa ḡehaḡaniꞌa ragano reiroteꞌe vazeḡaniꞌa, ehore radiuꞌenogano horoniro. Aniꞌe dabua haḡairo. Zamaḡaniꞌe idaḡa horonirotene, ze riharo. 16 Eꞌe horoniroteꞌe azaḡaniꞌa meꞌodo ziniro. Vine sauꞌaniꞌa ragano reiroteꞌe vazeḡa, zu abaꞌa nougiroteꞌe meꞌodo ziniro. 17 Ebu Iesu mazao umidiro, Iesuꞌa zeḡe habaonoꞌo vaḡinoga.

18 Iesuꞌa ḡasio diuḡeꞌenogano, vine sauꞌaꞌa ragano reiroteꞌe vazeḡa ani uminiro, raenaꞌa, 'Eḡe zuni ḡae teite amihi.' 19 Rehano Iesuꞌa ani gararenaꞌa, ꞌahige rae niro. 'Nabugo vaḡe onamoꞌi! Ebu Zuhiꞌaꞌa ḡae veize haḡao ḡanateꞌe haḡaiḡa boro niduꞌa meꞌodo zenoꞌi! Ebu zuhiꞌaꞌa ḡa nouge nouge vetuḡaḡadateꞌe meꞌodo zenoꞌi!' 20 Ebu ani baradu, eꞌe habaꞌa, neḡa gaubanana onamiro, ebu Iesuꞌa ani ranao nagini haḡairoteꞌe hariḡa rae fureniro. Eꞌe igiroteꞌe azaḡa niduꞌa zaguzagaro.

21 Iesu ebu ane tahiꞌa tahiꞌaniꞌa, duꞌura boro mone afa fare onamirotene, eꞌea bone duꞌura genaḡano, vaze ḡehaḡaniꞌa ane mazao nuꞌoraro. 22 Iuda kuru neḡa ḡianeꞌeteꞌe vazeḡa* ꞌahoga, niḡaꞌe Iairoꞌa onairo. Iesu horonirotene, odaḡa babaḡano ḡuḡuradu, 23 zamaḡa niduꞌa hina Iesu uminiro, raenaꞌa, 'Aboehe komeꞌaꞌe ugi boroꞌa madu, ꞌariga rudauꞌohe. Eꞌanoꞌo e umiꞌeꞌohe. Aroꞌi ebu evoꞌo ani ranao toꞌi, ane manoradu ḡabodoga.' 24 Ebu Iesuꞌa ane teite onamiro. Vaze ḡehaḡa bagaḡa zuni ḡiriu onamiro ꞌahine, naenaeonoꞌo bibine onamiro.

25 Bato ugiḡaniꞌa madu, muri gaubanana aheu fare (12) zamaḡano, iḡaiḡa ruau radiroteꞌe roḡaeḡa eꞌea. 26 Gohe vazeḡa ḡehaḡaniꞌa ḡianiro, rehano adudu radiro. Toheḡa niduꞌa mode hauḡiro, rehano ufeta hune sautaro. 27 Ani Iesu hariḡa igirotene, vaze ḡehaḡa ḡunuḡano diuḡiro Iesu ḡarunio, ebu dabuaḡa oboniro. 28 Mazaḡa aniꞌe ꞌahige zamariro. 'Eꞌa dabuaḡa tahiḡa obonine zuni, manoriꞌuma.' 29 Ebu ḡarihe hune ruaroteꞌe ai hauḡiro. Roḡae aneꞌa, ane ahiri zamaḡano, ane ugi ai hauḡiroteꞌe ederiro.

30 Ebu Iesu ani, ane mazaonoꞌo gigiꞌa inaraḡaniꞌa buaroteꞌe ederiro. Eꞌanoꞌo vaze ḡehaḡa ḡunuḡano ḡarihe tehiro. Ebu vaze vaze ḡadiziro. 'E dabua iniuꞌa oboneha?' 31 Ebu Iesu tahiꞌa tahiꞌaniꞌa naenaeniro. 'Ḡae eꞌe horoneꞌohe, vaze ḡehaḡaniꞌa bibiꞌeꞌeteꞌe. Ḡa nougadu ꞌahige raꞌohe, “Iniuꞌa eḡe dabua oboneha?” ' 32 Rehano tehe vaḡo vaḡiro. Iniuꞌa oboneha radu, vaḡiro. 33 Roḡae eꞌeꞌa, naginiꞌa ane mazao fureraroteꞌe ederiro ꞌahine, ḡiḡaroneꞌenaꞌa, rereranadu onairo. Ebu ane zamao ḡuḡuriro. Ebu ane hari huga niduꞌa Iesu niro. 34 Iesuꞌa roḡae niro. 'Aboe, Ḡaeꞌ a eḡe mazao fiateꞌ e uꞌ ano ugiḡoꞌ a manoreha. Matuꞌuḡota onamoꞌi, ebu ahiꞌo ugiḡa oꞌoꞌa radoꞌi!'

35 Iesu ani ize, ꞌadige rae ḡoereꞌeteꞌe zamaḡano, tuḡure azaḡa, Iuda kuru neḡa ḡianeꞌeteꞌe vazeḡa neonoꞌo onairo, ebu Iairo ninaꞌa, 'Ḡa aboḡo ai rudaneha. Ḡa nougaduni ihore vazeḡa mazao ize umideꞌohe?' 36 Iesuꞌa ze hari ꞌomo igirotene, ani reꞌoreꞌiro, ebu kuru neḡa ḡianeꞌeteꞌe vazeḡa ninaꞌa, 'Zamaḡo ago adufoꞌi! Eḡe mazao zamaḡo tiba hanadu, inaroꞌi!' 37 Ebu ani vaze ḡuḡuvaḡa ane teite onamoga garariro, rehano Petero, Iakobo, ebu Iakobo negoḡa, Ioane, zeḡe daꞌo tutuze onamiro.

38 Ze, kuru neḡa ḡianeꞌeteꞌe vazeḡa neo feurirotene, vaze ḡehaḡaniꞌa harae ḡunuḡuniroteꞌe horoniro. Ze niau ḡaniḡanau radiro. 39 Ani diuḡadu, ꞌahige rae ziro. 'Za nougadu ufeta niau ḡunuḡuneꞌohe? Roḡae kobeꞌa ani mene rudaneha. Ani bazeꞌohe.' 40 Ze eḡofoharo. Rehano zeḡe niduꞌa enona tuḡuze buziro. Roḡae kobeꞌa viꞌa moga ebu ane teite onairoteꞌe azaḡa uḡidu daꞌo tutuze diuḡiro, roḡae kobeꞌaꞌa bazeꞌeteꞌe habaꞌano. 41 Ebu Iesuꞌa evoꞌa maduni, ꞌahige rae niro. 'Tarita kumi' Ḡoere eꞌe huganiꞌe 'Roḡae kobeꞌa, eḡeꞌa ḡaꞌohe. Iḡunoꞌi!' 42 Ebu roḡae kobeꞌaꞌa ḡarihe hune iḡunadu, edau ragaviro. Ani muriꞌe gaubanana aheu fare (12). Ze eꞌe horonirotene, zaguzagaro. 43 Iesuꞌe ḡoere riḡa hina iraduguziro. 'Roḡae kobeꞌa ꞌadi ḡabonateꞌe hariḡa ago rae ḡehanoꞌi!' Ebu zinaꞌa, 'Roḡae kobeꞌa ꞌadi ogomu nu hanoꞌi!'