1 Farisea azaḡa Iesu teite nuꞌoraro. Mose goro ḡoeꞌa ihozeꞌeteꞌe azaḡa nu zuni, Ierusalemaonoꞌo onaadu, zeḡe teite nuꞌoraro. 2 Ebuni Iesu tahiꞌa nuꞌa ꞌevoreze torahoo ogaudoteꞌe horoziro. Aꞌe zeḡe goro ibiḡano mene vuzuꞌido.

3 Farisea azaḡa zuni Iuda azaḡa* niduꞌa zeḡe haḡaiꞌe, ibiꞌa azaḡaꞌa ihoziroteꞌe idunaḡano, ꞌevoreze mene faine vuzuꞌine, mene ogaꞌuma. 4 Ebu hoihoi habaꞌanonoꞌo barine zuni, mene ogaꞌuma. Rehano zeḡeꞌa gezo vire deheraꞌuduꞌu, ogaꞌuma. Ebu ibiꞌa azaḡa goro ḡehaḡa zuni haḡaido, bio zuni ḡoḡore vuzuꞌeꞌeteꞌe goroḡa. 5 Eꞌanoꞌo Farisea azaḡa zuni Mose goro ḡoeꞌa ihozeꞌeteꞌe azaḡaniꞌa ḡadiniro, raenaꞌa, 'Nougaduni ḡae tahiꞌa tahiꞌaꞌe ibiꞌa azaḡa goroꞌe mene zamare borofeꞌohe? Rehano ꞌevoreze torahoo ogauꞌohe?'

6 Iesu ani naenaezinaꞌa, ꞌahige reiro. 'Peroveta vazeḡa Isaiaꞌe za, zamaze aheu azaḡa rae zamareꞌenaꞌa, buka zaḡoḡa zamaḡano ꞌahige tirotaꞌaꞌe, hubehune tiro.

9 Hena bare zinaꞌa, 'Zaꞌe Badiꞌa goro ḡoeꞌa zamare doḡoꞌarauꞌenaꞌa, enonaniꞌohe, zae ibiꞌa azaḡaꞌa ihozidoteꞌe ḡoeꞌa daꞌo obone radoga veize. 10 Mazaḡa Mose ani raenaꞌa, “Viꞌu mogo gubazoꞌi.” ebu 'Iniuꞌa ane viꞌa moga rae sausauzoꞌidene, mau runoꞌi.' 11 Rehano zaꞌe ꞌahige raꞌohe. Vaze ꞌahoganiꞌa moga ga viꞌa nifo, raenaꞌa, “E ḡa danaꞌoga mene idaḡa, mazaḡa eḡe toheꞌe ḡa ḡanifo, rehano Badiꞌa haꞌuma.” 12 ꞌOuge reifone, zaꞌe, eꞌe vazeḡaniꞌa, viꞌa ga moga mene dananiꞌuma raꞌohe. 13 Eꞌanoꞌo zaꞌe, zaeꞌa ihoze onameꞌeteꞌe ibiꞌa azaḡaꞌa ihozidoteꞌe ḡoeꞌa uꞌano, Badiꞌa ḡoere rae modeꞌohe. Za haḡai ꞌuguḡa ḡehaḡa haḡaeꞌohe.'

14 Ebuni Iesuꞌa vaze ḡuḡuvaḡa bare huziro. Ebu raenaꞌa, 'Zae niduꞌa, egoꞌi, ebu ederoꞌi! 15 Enoneonoꞌo hebeo diuḡeꞌeteꞌe ogomuḡaniꞌe vaze mene sausauneꞌohe. Rehano zamaonoꞌo buaꞌ onaeꞌeteꞌe ḡauḡaniꞌa vaze sausauneꞌohe. 16 Teḡaḡeta vazeḡaniꞌe igiꞌuma.'

17 Iesu ani vaze ḡuḡuvaḡa muhizadu, ne diuḡe onamiro. Ebu ane tahiꞌa tahiꞌaꞌa, ḡoere eꞌe huga ihozoga veize ani ḡadiniro. 18 Ebuni aniꞌa naenaezinaꞌa, ahige reiro. 'Zae zuni zamaze mene ꞌaꞌaduꞌehehe? Enoneꞌonoꞌo hebeo diuḡeꞌeteꞌe ogomuḡaniꞌe vaze mene sausauneꞌohe. 19 Mazaḡaniꞌe zamao mene diuḡeꞌohe. Rehamo isio daꞌo diuḡeꞌohe. Ebuni modeꞌeteꞌe habaꞌanonoꞌo buauꞌohe.' Ḡoere ꞌadi raꞌetaꞌaꞌe, Iesu ani, ogomu niduꞌa aꞌaꞌe anoga idaḡa rae raꞌohe.

20 Hena bare ziꞌenaꞌa, 'Zamaonoꞌo buaꞌ onaeꞌeteꞌe ḡauḡaniꞌa, vaze sausauneꞌohe. 21 Mazaḡaniꞌe vaze zamaonoꞌo zamarone sauꞌaniꞌa buaꞌ onaeꞌohe: nogoba teite ḡiriu bazeꞌeteꞌe, 22 ḡonore, gorugoru, vaze hahu teite bazeꞌeteꞌe, teꞌone, haḡai sauꞌa, ḡuriro, ubuma ḡezoḡa, ahiahi, ḡuriro ḡoeꞌa aduga, niḡa bare ḡihine, ebuni haḡai tauḡi tauḡe. 23 ꞌAdi sauꞌa niduꞌaniꞌe vaze zamaonoꞌo fureruꞌohe. Ebu vaze sausauneꞌohe.'

24 Iesu eꞌanoꞌo iḡunadu, Turo zuni Sidono habaꞌa onamiro. Ebuni ne ꞌahogano diuḡiro. Ani uraꞌe aneꞌa onairoteꞌe, vazeꞌa ederoga mene uratiro. Rehamo vazeꞌa mene ederadu, Iesuꞌa ꞌuꞌuru radoga ibiḡa oꞌoꞌa.

25 U roḡae ꞌahoga aboḡaniꞌe, vine sauꞌaniꞌa rana reiroteꞌe. Eꞌe roḡaeḡaniꞌa Iesu hariḡa igirotene, onairo. Ebu Iesu odaḡa babaḡano ḡuḡuriro. 26 Aniꞌe |iGuriki|r* roḡaeḡa, TuroFenise habaꞌano bororaro. Ani Iesu uminiro, vine sauꞌa aboḡa mazaonoꞌo hegone bunoga veize.

27 Rehano Iesuꞌa ninaꞌa, ꞌahige reiro. 'Ne tahiꞌaḡa isize ge au usuranoga. Mazaḡa tahiꞌa ogomu madu, ḡuni veize feuno zenogaꞌe mene manoḡa.' 28 Roḡae ani naenaeniro. ꞌAhige reiro. 'Zuhiꞌa Boro, hube, rehano ḡuniꞌe fata ꞌuꞌuḡano tahiꞌa ogomu mumuḡa auꞌohe.' 29 Ebuni aniꞌa roḡae bare ninaꞌa, ꞌahige reiro. 'Ḡa ḡoereꞌe idaḡa bobo, ne onamoꞌi. Vine sauꞌa ai aboḡo mazaonoꞌo buaneha.'

30 Ebuni roḡae ai ane ne onamiro. Aboḡaniꞌe ane bazuni fataḡano bazeꞌenogano haniniro. U vine sauꞌaniꞌe ani zamaonoꞌo buaro.

31 Ebuni Iesu ani Turo habaꞌa modirotene, Sidono ebu ne gaubanana habaꞌanonoꞌo vitau onamiro. Ebu Galilea duꞌuraḡano feuriꞌ onamiro.

32 Ebuni vaze nuꞌa teḡa ꞌuhu zu ḡoeꞌa oꞌoꞌa vazeḡa, Iesu vaḡe zamahu onairo. Ebu uminiro, ane evoꞌa ane ranatoga veize. 33 Iesuꞌa ḡuḡuva zamaḡanonoꞌo zamahu vaḡiniro. Ebu evoꞌa huduꞌa hina teḡaḡa hoꞌoga ruꞌuniro. Ebu soꞌabidadu, mazaḡa oboniro. 34 Ebu adure ite ḡianeꞌenaꞌa, heriro. Ebu ꞌahige rae niro. 'Efata' (Ḡoere eꞌe huganiꞌe 'Teḡaḡo bohatanoꞌi') 35 Ebu teḡaḡaniꞌa bohataro, mazaḡa zu manoradu, fairu ḡoeriro.

36 Iesuꞌa ziro, vaze ꞌahoga ꞌahoga mazao mene hairoga. Rehano aniꞌa bare bare zirotene, zeꞌe bare bare haire ragaviro. 37 Zeḡe zama niduꞌa zaguzagaro, raenaꞌa, 'Ani, gau niduꞌa faifaine haḡaeꞌohe. Teḡaze ꞌuhuḡa azaḡa faizadu, ḡoere igiꞌohe. Ebu ḡoeꞌa oꞌoꞌa azaḡa faizadu, ḡoereꞌohe.'