1 Iesuꞌa, ane tahiꞌa tahiꞌa teite Ierusalema neḡa hanitiro, ebu ne aheu, niḡa Betefage ebu Betania zuni hanitiro. Ebu Olive maḡa uhiḡano bone, Iesuꞌa tahiꞌaḡa aheu tuḡuziro, 2 ebu ziro. 'Zazore mone neḡa onamoꞌi. Eꞌe neḡano feurine, vazeꞌa ize mene ehoriroteꞌe |idoniki|r ubuga batune touga horoniꞌuma. Fuhiꞌadu mae onaoꞌi. 3 Vazeꞌa ḡadizenaꞌa, “Za nagini nougeꞌohe?” roꞌidene, ꞌahige rae zoꞌi. “Zuhiꞌa Boroꞌa urateꞌohe. Vesuꞌu bare mae onaiꞌuma.” '

4 Ze onamiro, ebu |idoniki|r ubuga ibiheta genaḡano batune touga horoniro. Aniꞌe ibio edau radiro, ebu zeḡeꞌa fuhiꞌiro. 5 Eꞌea edau radiroteꞌe azaḡaniꞌa ḡadiziro. ꞌAhige reiro. 'Za nougadu |idoniki|r ubuga eꞌe fuhiꞌeꞌohe?' 6 Ebu zeꞌa naenaezinaꞌa, Iesuꞌa ziroteꞌe ḡoeꞌa zirotene, tuḡuze onamiro.

7 Zeꞌa |idoniki|r ubuga Iesu vaḡe mae onairo. Ebu zeḡe dabua |idoniki|r ḡarugano hirau tirotene, Iesuꞌa eꞌe rana ehoriro. 8 Ebu vaze ḡehaḡaniꞌa zeḡe dabua ibio hirau tiro. Vaze nuꞌe, ire ezaga rouḡeita butuonoꞌo variꞌe madu, ibi rana tiro. 9 Ebu Iesu zamao onamiroteꞌe, zu ḡaruna onamiroteꞌe azaḡaniꞌa, rae huauꞌenaꞌa, ꞌahige reiro.

11 Aniꞌe Ierusalema neḡano feuriro, ebu Badiꞌa ḡahunohauꞌeteꞌe Neḡa* zamaḡano diuḡiro. Ḡau niduꞌa ḡiane ragave hauḡirotene, ḡoravararo ꞌahine, tahiꞌaḡa teite Betania neḡa bare onamiro.

12 Irarirotene, oherebau Iesu ebu ane tahiꞌa tahiꞌaꞌa, Betania neḡanonoꞌo vinini tare onairo. 13 Ebu |ifigi|r ireḡa rouḡeta haba faḡanonoꞌo moneni horonirotene, Iesuꞌa |ifigi|r ireḡa uꞌa onamiro, huga ḡianoga rae. Aniꞌa uhiḡa onairotemo, huga oꞌoꞌa. Rouḡa daꞌo horoniro. Mazaḡa |ifigi|rꞌa mene hudauꞌeteꞌe madaḡa. 14 Ebu Iesuꞌa |ifigi|r ireḡa niro. 'Vazeꞌa ḡa hugo mene bare aꞌuma onamo tuḡutuḡu, mazaḡa ḡaꞌe mene bare hudaꞌuma.' Ebu ane tahiꞌa tahiꞌaꞌa Iesuꞌa reiroteꞌe igiro.

15 Iesu ebu ane tahiꞌa tahiꞌa, Ierusalema neḡa bare itirotene, Badiꞌa ḡahunohauꞌeteꞌe Neḡa diuḡiro. Iesu ani, Badiꞌa ḡahunohauꞌeteꞌe Neḡa zamaḡano, ḡahunohanoga veize hoiteꞌeteꞌe hoihoi azaḡa, uhize ḡururuziro. Iudea |imoni|r hina seniseꞌeteꞌe azaḡa fataḡa, zuni tubugo niniḡa hoiteꞌeteꞌe azaḡa ehoro ḡauḡa mae ḡihuniro. 16 Ebu vaze garariro. Badiꞌa ḡahunohauꞌeteꞌe Neḡa zamaḡano tohe odohe diuḡe oname buanoga mene uratiro. 17 Ebu aniꞌa ihozeꞌenaꞌa, ꞌahige rae ziro. 'Buka zaḡoḡa zamaḡano ꞌahige tiro ga? “Eḡe neꞌe vaze niduꞌa kuru neḡa reꞌuma” Rehano zaeꞌa eḡe kuru neḡa zamaḡano ḡonore monede haḡaeꞌohe.'

18 Badiꞌa ḡahunohauꞌeteꞌe neḡa zuhiꞌaḡa, zuni Mose goro ḡoeꞌa ihozeꞌeteꞌe azaḡaniꞌa, eꞌe hariḡa igirotene, Iesu manoga ibiḡa vaḡiro. Mazaḡa vaze niduꞌa aniꞌa ihozeꞌeteꞌe egadu, zaguzagaro ꞌahine, Iesu rihoniro. 19 Ḡorava urirotene, Iesu ebu ane tahiꞌa tahiꞌa, Ierusalema neḡanonoꞌo bare Betania neḡa onamiro.

20 Oherebau ibio onamiroteꞌeba, |ifigi|r ireḡa horoniro. Ane huga moꞌaḡanonoꞌo rorau ovoiro taiga. 21 Ebu Peteroꞌa, Iesuꞌa |ifigi|r ireḡa niroteꞌe ḡoeꞌa zamariro. Ebu Iesu niro, raenaꞌa, 'Ihore vazeḡa, ḡianoꞌi! Ḡaeꞌa rone sausaunateꞌe |ifigi|r ireḡa roraneha.' 22 Ebu Iesuꞌa naenaeziro. 'Badiꞌa mazao fioꞌi! 23 E hubehune ziꞌohe. Iniuꞌa maḡa ꞌadi ninaꞌa, “Ḡihitadu, davara zamaḡano buanoꞌi” rae reꞌuma. Ebu zamaḡa mene ꞌadaꞌadiꞌuma. Zuni aneꞌa rateꞌe haḡaiḡa hubehune fureraꞌuma rae zamariꞌuma. ꞌOuge Badiꞌa mazao fine, huganiꞌa ane mazao fureraꞌuma. 24 Eꞌanoꞌo ziꞌohe. Nagini nagini kurauꞌenaꞌa, umidiꞌuma. Ebu hubehune eꞌe hidiꞌuma rae zamaradu, fiꞌuma. ꞌOuge haḡaine, huga hidiꞌuma. 25 Zaꞌa edanadu, kuraune, vazeꞌa zae mazao haḡai sauꞌa haḡaateꞌe rae modoꞌi. ꞌOugine, moze adureo radiuꞌeteꞌeꞌa zae haḡai sauꞌa zuni rae modiꞌuma.'

27 Ze Ierusalema neḡano bare feuriro. Iesuꞌa, Badiꞌa ḡahunohauꞌeteꞌe Neḡa zamaḡano onameꞌenogano, Badiꞌa ḡahunohauꞌeteꞌe neḡa zuhiꞌaḡa boro boro, zuni Mose goro ḡoeꞌa ihozeꞌeteꞌe azaḡa, ebu vaze boro boroꞌa, ani vaḡe onairo. 28 Ebu zeḡeꞌa ḡadiniro. 'Noꞌe gigiꞌaḡa hina haḡai eꞌe haḡaeꞌohe? Iniuꞌa eꞌe gigiꞌaḡa ḡaniro?'

29 Iesuꞌa naenaeziro. 'Eḡeꞌa ḡadimu tiba ḡadiziꞌuma. Zaeꞌa naenaehine, eḡeꞌa ziꞌuma, noꞌe gigiꞌaḡa hina haḡai ꞌahi haḡaeꞌohe. 30 Ioaneꞌa ziniroteꞌe bapatizoḡaꞌe, Badiꞌaonoꞌo ga vazeonoꞌo? Naenaehoꞌi.'

31 Zeḡeꞌa zeḡe daꞌo neneḡaniro. ꞌAhige reiro. 'Badiꞌaonoꞌo reine, ani ꞌahige reꞌuma. “Tena nougadu ani ḡoere mene mae ḡihinido?” 32 U “Vazeonoꞌo reine, ...” ' Vaze ḡehaḡaniꞌa maḡuniꞌuma rihoniro. Mazaḡa vaze niduꞌa ꞌahige rae zamariro, Ioaneꞌe hubehune peroveta vazeḡa.

33 Eꞌanoꞌo Iesu naenaeniro. ꞌAhige reiro. 'Eme aḡuꞌa.' Ebu Iesuꞌa ziro. 'Eḡe zuni noꞌe gigiꞌaḡa hina haḡai ꞌahi haḡaeꞌetadi mene ihoziꞌuma.'