1 Gwo be’dkunu ki mo jin miinu miinyc̱al mo ishki’d mo e bwaman um mo dhali ji gi wakansan gamkunu mo yisa isi bwaman ’kwani kun ’kon ka p̱o/ ki dar gi ji gi luŋu mo. Haali/ wathiŋ kamu/ ishki’d e ash gi com mo. 2 Dhali um dhu ’ba/ ki ca mo. Um ḵa ba/ imini ’taki dhal mii yan e i is mo mmoko mo. Dhalki a’di jin miiki mii yansan kan san mo tani uru ka pije/ ’peni bwaman um mo.

3 Bahili ki aha/ p̱ina e buŋgwar is tani aha/ nyaḵkina di ki um mo e shi/in mo. Dhali me’d jin dika/ e buŋ’kus bum mo tani aha/ c̱ikina ’twaŋ gwon dwall mo hila/ 4 e gway gi Tap̱a Yesus ap̱o/ wathi/, a’di jin miiki ji gi ta thus kansan mo be. Ki um tul is mo tani dhali shi/in pem nyaḵ di ki um mo tani nyaḵki mom’bi’th gi Tap̱a Yesus bana mo be tani 5 um mini mii c̱iki wathi/ yansan mo ka Seṯaan mo gom mo jin minu ’ce’d a’di sho’k mo e buŋgwar is mo, ki shi/in piti minu woṯẖ mo ka tee gi Tap̱a Yesus mo be.

6 ’Bam bum kun dhuna um ki ca mo tani yisa ’borona. ’Kona um ki misha ki ara cumaṯa gwa’dga/ seki’da ga’bula gana’th ki ’twan’dap̱ mowa? 7 Dhagami acumaṯa dhamo/ mo ki um mini ta agana’th kun ta kun this mo me’d jin ’kona um ka jiŋ gana/ ki dar ga cumaṯ mo. Haali/ aḴrisṯẖos jin ta ari ḵa’bal bana gi mompe’kup̱anyolos mo tani a’di miikunuwa bas mo be. 8 Gom a’di gi wakan mo tani dhalki ana nyoŋa montul is jin yuḵuwa yuḵ mo, yisa ka cumaṯa dhamo/ mo, a’di jin ta’da cumaṯ gi mii kun dup̱a dup̱i e mo dhali mii kun ’koki ta miiŋḵar/e mo yisa, hili ki maaŋḵuthu’d jin dar ga cumaṯi e mo, a’di jin dar ki washila/ mo dhali jin ta gwoŋ gana/ mo be.

9 Aha/ ’kwarkina um gwo e gwom pem mo ki um mini ’koki ce e ki imanmii miinyc̱al mo. 10 A’di yisa ta ’pemen gwo mo gom imanmii miinyc̱al gi mony’cesh yan mo walla imanta a’thoṯẖum bwa mo walla imandil to mo walla imanluŋ tomp̱inycon mo, haali/ waḵki/ a’di wakan mo tani ki ton ta’da ta imina /e diki ya ka pije/ ’peni mony’cesh mo, eee. 11 Hili aha/ dhala mii yan e i is mo mmo’kwar gwo mo e um mo ki um mini dhalku/ ki ce e nyaḵki a’din ’de/ yin jin ta’d gi gway ma kam piti mo waḵki/ a’di dina mii m’ba/ mo gom miinyc̱al mo walla mmota a’thoṯẖum bwa mo walla mmota amanluŋ tomp̱inycon mo walla mmota amansora sor mo walla mmota aman’kosh ma su mo walla mmota amandil to mo hili isi kan mo um mini dhalki to ki nyaḵ shwa ki a’dinthus ’de/ yan mo be. 12 Haali/ a’di diki ta miim pem mmodwall gwo gom uni kun ’kona pije/ mo. A’di diki ta uni gwansan kun ’kon eya ḵaniisa kun mina um idwall gwo mowa? 13 Arumgimis a’di dwalli uni gwansan gwo mo kun ’kona pije/ mo be. Uri a’di jin ta thus ki thus kan ’peni bwam um ka pije/ mo ma.