1 Dika/ ki di ki ’kus mowa? Dika/ ki ta a’di jin karu ki she/ mowa? Dika/ ki p̱ar Tap̱a Yesus bana e mowa? ’Kona um ki ta uni gun ta kuma ṯu’c pem e Tap̱a mowa? 2 Waḵki/ gom kun tiya mo tani aha/ dinaki ta a’di jin karu ki she/ mo, hili isi kan um ta kum pem kun cilka/ mo haali/ um ta to jin ’dap̱uwa ’dap̱ goma ṯu’c pem mo mmotaka/ a’di jin karu ki she/ mo gom Tap̱a mo be.

3 Gwo yansan ta gwom pem jin ’ce’dka/ she/ mo gom uni gwansan kun mini doṯ aha/ mo be. 4 ’Konuki dhal am bway mo mmoshwa tonṯe/ mo dhali mmop̱i to mowa? 5 ’Konuki dhal am bway mo mmota gi up̱ mo me’d jin tana unin tiya gun dhunu ki she/ mo dhali ikam gi Tap̱a mo dhala Sap̱a mowa? 6 Walla aBarnaaba a’di ’deya dhali aha/ am ’cena inonu mo mmomisha ṯu’c mii gom mo jin ’konu mowa? 7 Kaja a’di jin midi miiya ṯuca askar ka guurush pitiŋ gana/ mo? Kaja a’di jin midi si amura’th mo mmodiki shwa maman ’peni a’di mo? Kaja a’di jin ta’d gi toŋkal mo jin midi diki uma ko ’peni unin tiya mo?

8 Gwo yansan oka/ ki moshirr gi wathi/ mowa? Dina gwoŋḵan jin c̱inu ki o gwo mo jin nyaḵka’d kan mowa? 9 Haali/ a’di ’kwarkunu mo e gwoŋḵan ma Musa jin c̱inu mo ki: /E mini dhalka morbip̱ ki ’kamu’th ’twa/ mo ki a’di di’d mmotor pos ki sho’k mo. Arumgimis kulumki gwo ibwa mo goma morbip̱ mowa? 10 Dina a’di ki o gwo gom gway bana ’baar mo ki ’bil ’bila? A’di ’kwarkunu mo gom gway bana mo haali/ amangora ’cesh mo tani midi ’taki gora ’cesh ki mo ma ’teŋ kap̱e/ mo dhali amantor to mo tani midi tor to ki mo ma ’teŋ kap̱e/ mo mmogamkina a’di emen to en tiya mo. 11 Waḵki/ aman sina to gi shi/in gun ’boron mo e bwaman um mo tani a’di cana mii kagahara gara/ waḵki/ aman mina gam to ’peni um gom buŋgwar is mowa? 12 Waḵki/ kun tiya uni tan gi to gwansan ’peni um mo tani mina am ’koki ta ki nyanye/ si’da/ ’peni uma?

Hili aman ’konaki bu’th bway jin dhalu aman mo mmomii kan mo. Hili aman ’dimkina ’kup̱ mo e to gunn mo mmodhal mii e i is mo mmokar to jin gol ’kwani mo e bway gi gwom ’borga/ ma Ḵrisṯẖos mo be. 13 ’Kona um ki misha ki uni gwansan kun miiki to mo e gu’b gi mondheleladhelel mo tani gamki tonṯem buni mo ’peni gu’b gi mondheleladhelel mo dhali uni gwansan kun miiki to mo eya gwaṯa/ jin miinuwa bas mo tani gamki to ’peni to jin ’ciṯẖu/ ’kus mo mmomiiya bas mowa? 14 E bway jin nyaḵka’d kan mo tani Tap̱a a’di ḵanki gwo mo ki uni gwansan kun c̱iki gwom ’borga/ mo mini ’taki gam moŋ’kom buni jin mina uni ’ko ki ’kom pa mo ki gwom ’borga/ mo.

15 Hili aha/ dinaki bu’th bway ṯal ’deŋ kamu/ mo jin dhalu aha/ mo mmomii wakan mo walla aha/ dinaki ’kwar gwo yansan mo mmogam ari toŋ kamu/ gi wakan mo. Haali/ aha/ wari mina dhal mii e i is mo mmowu moyi mmodiki dhal aha/ bway mo mmoc̱i aha/ a’di jin midi dhal aha/ mmokar ’ba/ ki ca mo be. 16 Haali/ waḵki/ aha/ c̱ina gwom ’borga/ mo tani a’di midi diki dhal aha/ bway mo mmokar ’ba/ ki ca mo. Haala ṯu’c jin ṯucu mo tani a’di ’thinu ap̱o/ aha/ mo. Wayyi e aha/ mo waḵki/ aha/ dinaki c̱i gwom ’borga/ mo. 17 Haali/ waḵki/ aha/ mina mii yansan ki bwam pem gana/ mo tani aha/ tana gi to jin ish ḵumma/ mo. Hili waḵki/ aha/ dinaki mii mii yansan mo ki bwam pem gana/ mo tani aha/ ’dap̱kina ki a’di jin ta’da mandhu to mo. 18 Waḵki/ a’di wakan mo tani tom pem kun taka/ mo mmo/ish ḵumma/ mo tani ta’da ta mo? Jasi a’di ’de/ jin wa cikise/ mo be: Ki gwom pem jin c̱ika/ mo tani aha/ mina c̱i gwom ’borga/ ki me’d mo ki dar gi ton doṯ mo, mmodiki bu’th bway mo jin dhalu aha/ mo mmomii mo e gwom ’borga/ mo be.

19 Haali/ aha/ ḵa ba/ dina ki ’kus ’pena ris ’kwani ’baar mo. Aha/ kara is pem mmota c̱iŋkina/ goma ris ’kwani ’baar mo ki aha/ mina ’taki gam ’kwani ki nyanye/ adu is mo. 20 Gom ’Kwani Yahuuda/ mo tani aha/ warkina ki Wathi/ Yahuuda/ mo mmomiga/ mish gam ’Kwani Yahuuda/ adu is mo. Gom uni gwansan kun ’ko ’ko’d e gwoŋḵan jin c̱inu mo tani aha/ warkina ki a’di jin di’d e bwaŋ’kwariny gwoŋḵan jin c̱inu mo – aha/ bala dinaki di e bwaŋ’kwariny gwoŋḵan jin c̱inu mo – ki aha/ mina ’taki gam uni gwansan kun ’koni bwaŋ’kwariny gwoŋḵan jin c̱inu adu is mo be. 21 Gom uni gwansan kun ’kon ka pije/ ’peni gwoŋḵan jin c̱inu mo tani aha/ warkina mo ki a’di jin di’d ka pije/ ’peni gwoŋḵan jin c̱inu mo – yisa mmodarka/ gi gwoŋḵan jin c̱inu ka ḵarambuye/ ’kup̱ ka Arumgimis mo yisa hili ibwaŋ’kwariny gwoŋḵan ma Ḵrisṯẖos mo be – ki aha/ mina ’taki gam uni gwansan adu is mo kun ’kon ka pije/ ’peni gwoŋḵan jin c̱inu mo be. 22 Gom uni gwansan kun ’ka’da is mo tani aha/ warkina mo ki a’di jin ’ka’da is mo ki aha/ mina gam uni gwansan adu is mo kun ’ka’da is mo. Aha/ warkina ka mandhas is pem bway mo gom ’kwani ’baar mo tani ki aha/ mina ’taki ta kun tiya is ki me’d mo, ma ki ’pemen yan kan mo be. 23 Aha/ miikina a’di ’baar mo gom gway gi gwom ’borga/ mo ki aha/ minu ’taki pwaḵ mom’bor miim piti mo be.

24 ’Kona um ki misha ki e mo jin p̱aru sho’k mo tani aris uni gun dhunu mo mmop̱ar sho’k mo tani uni p̱arki sho’k mowa? Hili jasi a’din ’de/ a’di ibu’thki tontaḵi. Wakan soyi mo ki um mini bu’th a’di mo. 25 Aris ’kwani ka ’deṯe/ ’deṯe/ mo kun ta imanlo’ba lo’b mo kun birina bir mo tani uni ’timkina adum buni mo goma ris en ton tiya mo be. Uni miiki a’di mo mmobu’th toŋ’kup̱ jin midi p̱u/ mo. Hili ana miikina a’di mo mmobu’th toŋ’kup̱ jin midi mol p̱u/ mo be. 26 Nye, aha/ dinaki gus ka kar ’kup̱ mo. Aha/ dinaki hi’th toŋ’kulush ime’d mo mmomiiya bumbum ’te/ mo. 27 Hili aha/ ṯuḵkinkina is pem ki me’d mo dhali aha/ dilkina is pem ki me’d si’da/ mo tani isi ciki/ ’ko’di gwom pem jin c̱ika/ kun tiya mo tani aha/ ki is pem mo mina ’taki ta a’di jin minu this waḵ mo be.