1 Haali/ um ki is bum mishki mo mo iwaḵ mo, ki buṯ jin buṯa aman e um mo tani diki ta jim p̱e’th mo. 2 Hili ba aman hila/ i’koshkina is ka nyor mo dhali miinu ki mon’the is kun shi/ashi/ mo e Pam P̱ilibbi mo me’d jin mishkina um mo dhali aman takina gi mo ma dum bam jin ’bi’thkina aman is mo eya Arumgimis mo mmobah um gwom ’borga/ ma Arumgimis mo e jis/e ka dhan mo jin tanu ’kup̱ ki ’kup̱ mo be. 3 Haali/ momalas bam mo diki pi ’peni mo ma he’k e mo walla mii kun nyo/anyo/ mo walla a’di jin miinu ka maḵ mo. 4 Hili jasi me’d jin ṯeskunu aman ka Arumgimis mo mmota imandhu to mo gom gwom ’borga/ mo tani wakan aman ṯorkina gwo mo, yisa mmomii mii mmo’bor ’kwani bwa mo yisa, hili mmo’bora Arumgimis bwa i is mo, a’di jin nyo/ki’da dum bam mo be. 5 Haali/ aman ’konaki bu’th gwo kun onu kun ta ku ma raḵakokosh mo, me’d jin misha um mo, walla mii jin diḵ mii e mo gom bwa jin puru’d mo me’d jin tan ma Arumgimis aman/o gwo mo. 6 Wakan si’da/ aman ’konaki simm monyca e mo ’peni ’kwani mo walla ’peni um mo walla ’peni ’kwanin tiya mo, ba aman mina ’taki ta ku gun ’theḵki gwo mo gom to mo me’d uni kun dhunu ki she/ mo goma Ḵrisṯẖos mo. 7 Hili aman takina ’kwani kun ’thup̱ ma du mo e bwaman um mo me’da yim jin hilki’da hil mo gom uc̱im piti mo be. 8 Wakan aman usha e joc̱o/ mo gom bwa jin o am ki um mo. Aman thosonkina is mo mmonyaḵa nyaḵ ki um mo, yisa jasi gwo gom gwom ’borga/ ma Arumgimis mo, hili si’da/ is bam gana/ mo haali/ um warkin ki uni kun ena am ki en gana/ mo be.

9 Haali/ um kaki miim bam jin miina aman to e mo dhali mii gun ’batha’ba’th mo, iwaḵ mo. Aman miikina mii mon’thiny mo dhali ki montee ilu/ mo ki aman mina ’taki diki dhu ton diṯin e ’ba/ ap̱o/ jaŋ kamu/ mo me’d jin ’kokina am mmoc̱i gwom ’borga/ ma Arumgimis e um mo be. 10 Um ta iman/o gwo mo dhali Arumgimis si’da/ mo gom mii ma gayiin bam mo dhali mii kun ta ku ma ḵar/e mo dhali mii kun daru/ ki thalkin mo ibwambori um kun ta imangam gwo is mo be. 11 Haali/ um mishki mo mo me’d mii kun miina com mo gom uc̱im piti mo tani aman malaskina um ka ’deṯe/ ’deṯe/ mo dhali ’bi’th uma du is mo dhali ḵan um gwo mo 12 mmo’ko ’ko jin ha me’d mo goma Arumgimis mo, a’di jin yuḵki um mo e bampam pitiŋ gana/ mo dhali monyca mo be.

13 Dhali aman si’da/ ’bora Arumgimis bwa i is mo ki ṯikir ṯikir mo gom mii yan mo haali/ ki um bu’thki gwo ma Arumgimis mo jin ciḵkina um ’peni aman mo tani um bu’thki a’di mo me’d gwoŋ ’kwani yisa, hili me’d a’di jin ta a’di mo, a’di jin ta gwo ma Arumgimis mo, a’di jin diki’d mo mmo/um mo e um kun gamki gwo is mo be. 14 Haali/ um, iwaḵ mo, um warkin ki imanthoḵ mii mo ka ḵaniisa ka ris mo kun ta ku ma Arumgimis mo eya Ḵrisṯẖos jin ta’da Yesus mo, uni kun ’kokin mo e Pa Yahuudiyya mo. Haali/ um ’koshkina is ka nyor mo ki ton ṯal ’de/ mo ’peni ’kwani gi bampam bum mo me’d mii kun miikunu uni mo ’peni ’Kwani Yahuuda/ mo, 15 uni kun ’koshki Tap̱a Yesus jwa mo nyaḵki imanc̱i gwo ma Arumgimis kadhamo/ mo dhali ur am ka pije/ gara/ mo dhali mii gi wakan diki ’bora Arumgimis bwa mo dhali uni ta ’kup̱ ki ’kup̱ mo gom ’kwani ’baar mo 16 mmononkina uni aman bway mo ’peni moṯor gwo e ’kwani kun ’koki ta ’Kwani Yahuuda/ mo ki uni minu ’taki woṯẖ mo. – Wakan me’d isa yempa/ mo uni ’tu’dki miinthus buni ki piny piny mo. Hili anyor ma Arumgimis p̱u’dki’d ap̱o/ uni ki ’ta’b mo.

17 Hili me’d jin ’thissa/ ḵwa/kunu aman bwa mo ’peni um iwaḵ mo, ki ari mo mo e buŋgwar is mo tani, yisa eya du mo tani aman palkina mii mo ka daran du kagahara mo dhali o bwa ki o shiyi’d mo mmoṯora ṯor ki um ka ḵarambuye/ mo. 18 Haali/ aman ŋap̱a mmop̱u’dku/ i um mo – aha/ Buulus doḵ/e dhali doḵ/e mo – hila Seṯaan nonki aman ’kup̱ mo. 19 Haali/ mo ma ’teŋ kap̱em bam walla moŋ’kuny bwam bam walla toŋ’kup̱ jin dhuna aman ’ba/ ki ca mo ibwambori Tap̱a Yesus bana mo gom p̱u’d piti jin mina a’di p̱u’du/ mo tani a’di ta’da ta mo? A’di diki ta uma? 20 Haali/ um ta tontaḵ bam mo dhali moŋ’kuny bwam bam mo be.