1 Dhalka ris uni ’baar mo kun ’kon mo e bwaŋ’kwariny dhaŋḵa’b ’bam buni kun tana uni c̱iŋkina/ kun yolu mo mmodhu uni kun ta tap̱am buni ki uni gun ha me’d mo eya ris montaḵ mo, wakan ki gway ma Arumgimis mo dhali gwo jin ṯoru mo minu ’koki wal gwo sora p̱o/ mo be. 2 Uni gwansan kun takin gi itap̱a kun gamki gwo is mo tani uni mini mii ’koki dhu uni ki mon’the is mo mmo/o gwo mo ki uni ta ikam mo ’te/. Hili uni mini mii dhal mii yan e i is mo mmomii aris to ’baar mo ki ’bore/ ki nyanye/ mo haali/ uni gwansan kun miina c̱iŋkinam buni to mo tani ta uni kun gamki gwo is mo dhali uni gun enu mo be.

Ṯori gwo mo dhali ṯirrishi gwo mo goma ris to gwansan kun minu mii mii mo. 3 Waḵki/ wathin ṯal ’deŋ kamu/ midi ṯor gwoŋ kamu/ jin di ki she/ mo dhali diki gam gwo me’d mo ki gwom ’borga/ gi Tap̱a Yesus Ḵrisṯẖos bana mo tani dhali gwo jin ṯoru jin gamu me’d mo ki mii ma gayiin mo tani 4 a’di yin seki’d ki ’pura/ ’pura/ mo, ki ’ba/ jin karu ki ca mo. A’di diki mish toŋ kamu/ mo. A’di ta’d gi ’ba’th jin ’kosh a’di mo mmo’kosh ’daŋ gwo mo mmodoṯa/ doṯ mo dhali gom gwo jin sugu ki gwo mo, a’di jin wagaski miin dhap̱an mo, dhali mii kun biruwa bir mo, dhali mii kun thudhuwa thu’th ’pen mo dhali mmoṯosh gwon thus eya du ap̱o/ ’kwanin tiya mo 5 dhali mii gi gwo kun sugu e bwaman ’kwani mo ’peni bwam buni kun bulabul mo dhali kun dheru bwa mo ’peni gwoŋ gana/ mo, mmoṯoshkina uni ki mii ma gayiin jin luŋuwa luŋ mo ta ’pemen mmogam mii adu is mo. 6 Dhan mii ’kon kun gamuwa du is ki mii ma gayiin jin luŋuwa luŋ mo waḵki/ mo jin thisu is e di’d si’da/ mo, 7 haali/ ana ’konaki ’do miin tiya ’kup̱ pa mo e mony’cesh yan mo dhali a’di mishu ka jiŋ gana/ mo ki ana mola toŋ kamu/ bu’th mmoḵal ’peni mony’cesh mo. 8 Hili waḵki/ ana tana gi tonṯe/ mo dhali burrinye/ mo mmohi’th mo tani ana mina ’ko ka this mo i e mo gom uni gwansan mo. 9 Hili uni gwansan kun ’kona gwo ibwa mo mmota pa ki pa mo tani uni ṯa’kkin mo e mo jin paluwa pal mo dhali e mo ma gume/ jin bu’thki’da bu’th mo dhali eya ris miim p̱us mo dhali bwa jin onu gwo jin ta jama/ ki jama/ mo mmobul ’kwani ’kup̱ e mo jin daḵu gwo me’d mo dhali mo jin ’ce’duwa ’ce’d sho’k mo. 10 Haali/ mo jin enuwa guurush mo tani a’di ta’da birman goma ris tonthusi ’baar mo. Gom ’daŋ gwo yan jin ’kosho’d mo tani kun tiya perkin mo ’peni bway gi moŋgam gwo is mo dhali uni su’kkin ma dum buni ki la/a’d la/a’d ka ris mo.

11 Hili gom /e jin ta wathi/ ma Arumgimis mo tani ship̱iṯi/a ŋwac̱a/ mo ’pena ris to gwansan mo. Guyi a’di ki e mo a’di jin ta mo ma ḵar/e mo dhali mii ma gayiin mo dhali moŋgam gwo is mo dhali mo/en mo dhali sho’k mmoṯel mo dhali mon’thup̱ e mo. 12 Asi ki as gana/ mo gom moŋgam gwo is mo. Budhi a’di ki nyeŋ mo, a’di jin ta mondiki/e ki sule/ ya ye ’ba/ mo, a’di jin yuḵkunu /e nycine/ mo me’d jin pikina /e gwom ’boro’d mo gom a’di mo e buŋ’kusi iman/o gwo ka ris mo. 13 Dhali e buŋ’kus ma Arumgimis mo, a’di jin c̱iki moŋ’koki/e mo goma ris to ’baar mo dhala Ḵrisṯẖos jin ta’da Yesus mo, a’di jin c̱iki gwom piti ibwambor ma Punthi Bilaaṯus mo, gwo jin pikina a’di ki piŋ gana/ mo tani 14 aha/ ḵana /e gwo mo mmodhu gwoŋḵan jin ’kwarkunu mo ki dar gi monyo/o’d mo dhali ki dar gi mo jin waḵuwa waḵ mo ntaga tee jin mina Tap̱a Yesus Ḵrisṯẖos bana piyu/ mo be. 15 Dhali a’di yansan minu ṯor eya tente/ mo, ka tente/ jin ta’da ḵar/e mo jin ta Liṯgany gana/ ’de/ ki lish mo, jin ’boru mii mo, dhali a’di jin ta’da Maliḵ jin doshki’da p̱o/ imaliḵi ’baar mo dhali a’di jin ta Tap̱a jin doshki’da p̱o/ itap̱a ’baar mo, 16 a’di jin ta a’di ki is piti a’di ’de/ mo jin dar gi mo jin wunu mo dhali jin c̱a’bki’d mo e moŋkush jin molu ii ’kup̱ki cine/ mo, jin dina wathiŋ kamu/ ṯal ’de/ ki p̱ar e mo ki sule/ sule/ mo walla jin mola wathiŋ kamu/ p̱ar e ki sule/ mo be. E a’di mo tani montaḵ midi di mo dhali mo jin tanu tap̱a midi di ki sule/ sule/ ya ye ’ba/ moonnii. Amen.

17 Dhali gom uni kun ta pa ki pa mo e mony’cesh yan mo tani ḵani uni gwo mo mmo’koki ’do bwam buni isi mis mo walla mmodhu mo ma ’teŋ kap̱em buni ap̱o/ pa jin tana uni jin mii uni e ki ’kala/ ’kala/ mo, hili ap̱owa Arumgimis mo jin c̱iki ana aris to ’baar mo ki moŋ’ka’d me’di is mo mmo’kuny bwa mo. 18 Uni mini mii to ki ’bore/ mo mmota pa ki pa mo ki miim ’borga/ mo dhali mmoc̱i to ki nyanye/ ka ’ka’d me’di is mo. 19 Wakan mmodhuna uni to mmo/ish ḵumma/ mo gom is buni mo mmota moŋḵa’b jin ’bora’bor mo gom yilaŋ kamu/ mo tani wakan ki uni mini bu’th mondiki/e ki nyeŋ mo, a’di jin ta mondiki/eŋ gana/ mo be.

20 Ayy Ṯimuṯẖawuus, kari a’di jin ḵankunu /e mo mmodhu mo. Theṯẖi/ mo ’peni gwo jin waluwa ṯor ka wuny is mo ki dar gi mii ma gayiin mo dhali ayiseŋ gwo kun ’kon ki c̱a’ckon mo gom gwom p̱us jin yuḵu ki gwo gi moyuḵ mo. 21 Haali/ ki mo jin baṯẖu/ a’di i’ko’d mo tani kun tiya ŋana/ du’d mii mo isi gwo jin gamu is mo be.

A’the midi di e /e mo.