1 Haali/ aman misha ki waḵki/ gu’ba’ku/ gi mony’cesh yan mo jin ’kona aman nycine/ ’ce’dkunu sho’k mo tani aman tana gi monyaŋ ’peni Arumgimis mo, gu’b jin nyaŋu ki me’d yisa, a’di jin midi di ki sule/ sule/ e momis mo be. 2 E mahan ka jiŋ gana/ mo aman ohonkina mo dhali ’kosh ḵwa/a/ mo mmoshum mo ki moŋ’kom bam e momis mo. 3 Wakan ki mo jin mina amani shum ki a’di mo tani aman minu ’koki gam is ’te/ mo be. 4 Haali/ me’d jin ’kona aman mo naskina/ e gu’ba’ku/ yan mo tani aman wukina shure/ ki mo/anan is mo, yisa ki aman minu ’koki hi’th is ki to mo, hili ki aman minu hi’th is ki to ki nyanye/ mo, wakan ki buŋgwar is yan jin mish wu mo tani minu los mo ki mondiki/e yan mo be. 5 A’di jin thosonki aman is mo gom to yan gana/ mo tani a’di ta’da Arumgimis mo, a’di jin c̱iki aman Shi/in mo me’d to jin woṯẖu/ ’twa/ mo be.

6 Wakan aman isa yempa/ mo tani tana gi mo ma duŋ gana/ jin ’bidhu is mo. Dhali aman misha ki me’d jin ’kona aman e moŋ’kom bam e buŋgwar is mo tani aman si’da ki si’d ’peni Tap̱a mo be. 7 Haali/ aman iina ki moŋgam gwo is mo, yisa ka shureya. 8 Aman tana ga duŋ gana/ jin ’bidhu is mo, dhali amani imina dhal mii e i is mo mmosi’d mo ’peni buŋgwar is mo dhali nyaḵ ’ko ki Tap̱a mo be. 9 Wakan waḵki/ aman nyaḵa ’ko mo walla si’d mo tani aman karkina a’di ki tom bam jin guna aman ki e mo mmo’bor a’di bwa mo be. 10 Haali/ ana ’baar mo mina mii pi mo e bwambor ma ḵursi ma Ḵrisṯẖos gi gwon dwall mo, wakan ki ’kwani ka ’deṯe/ ’deṯe/ mo mini ’taki bu’th to kun ’boron mo walla kun shiyin mo be isi me’d mii kun miikina uni ki buŋgwar is mo be.

11 Gom mii gi wakan mo tani mmomisha aman mii jin minu ḵo/ Tap̱a mo tani aman lalkina ’kwani sho’k ki gwo mo. Hili a’di jin tana aman mo tani a’di mish ma Arumgimis mo dhali aha/ tana ga ’teŋ kap̱e/ mo ki a’di si’da/ mishu ki ’twa/ ma dum bum mo be. 12 Aman yisa dhuna is bam ki ku gi ha me’d mo e um mo doḵ/e, hili mmoc̱i um mo jin raḵu mo mmodhu is ki ca mo gom am mo be. Wakan ki um mini mish thoḵ uni gwansan gwo mo kun dhu ’bam buni ki ca mo gom is buni mo gom monyca jin dina wathi/ nycine/ mo dhali yisa goma dum piti mo. 13 Haali/ waḵki/ aman sona du ki is bam mo tani a’di goma Arumgimis mo be. Waḵki/ aman ḵutha is mo ki ’cese/ ’cese/ eya dum bam mo tani a’di gom um mo be. 14 Haali/ mo/en ma Ḵrisṯẖos mo tani a’di ’timkina amana du mo haali/ aman su’kkunuwa du mo ki ṯal ’deŋ kamu/ wu’d mo gom ’kwani ’baar mo. Wakan aris ’kwani ’baar mo wukin mo be. 15 Dhali a’di wuki’d mo gom ’kwani ’baar mo ki uni gwansan kun ’kon mo mini doḵ/e ’koki ’ko mo gom buŋgwar is buni mo hili gom a’di mo jin wuki’d mo gom gway buni mo dhali jin ’de’kkunu mo be.

16 ’Peni mo yan shwane/ mo, ki mii gi wakan mo tani aman ’konaki nyiṯẖ wathin ’deŋ kamu/ ’peni ji en’thi/ mo. Isi kani ba am isa gush nyiṯẖa Ḵrisṯẖos mo ’peni ji wathimpa en’thi/ mo tani aman nyiṯẖa a’di wakan doḵ/e yisa. 17 Wakan be waḵki/ wathin ’deŋ kamu/ di’d mo eya Ḵrisṯẖos mo tani a’di ta jin this jin uḵu mo. Miin dhamo/ pekin mo tani dhali hili miin this uni p̱u’dkin mo be. 18 Aris uni gwansani ’baar mo ’peni Arumgimis mo be, a’di jin gwamki ana mo eya Ḵrisṯẖos mo ki is piti mo dhali c̱i ana mii ki mo gi gwo jin gwamkunuwa gwam mo be. 19 Gwo a’dan be. Arumgimis diki’d eya Ḵrisṯẖos mo mmogwamkina a’di ’kwaniny’cesh mo ki is piti mo, yisa mmodhu gwon dhaŋ buni ap̱o/ uni mo, dhali dhu gwo e me’d bana mmoṯor mo, gwo gi mo jin gwamkunuwa gwam mo be. 20 Wakan ana tana iman/ii goma Ḵrisṯẖos mo, haali/ mo ma Arumgimis jin yip̱kina a’di ’kup̱ mo tani e ana mo be. Dhali aman yuḵkina um mo gom gway ma Ḵrisṯẖos mo be: Wari um ki ku gun gwamkin ma Arumgimis mo ma. 21 Gom gway bana mo tani a’di ki kar a’di mo mmota ji gi miinthus mo, a’di jin molki miinthus mo. Wakan e a’di mo tani ana minu dhuku/ mo ki ku ma ḵar/e mo goma Arumgimis mo be.