1 Hili imanc̱i gwonthus si’da/ cuki mis mo e bwaŋ ’kwani mo jasi me’d jin mina imanṯor gwonthus ’ko i bwam um mo, uni gun mini ḵal gwonthusa tiya kun ’ce’du/ sho’k ka ḵwal is mo, isi kani mmowaṯ Tap̱a gwo mo, a’di jin yolki uni mo, mmoḵal mo jin mina uni tor sho’k ka pupush ki is buni e mony’ce’d sho’k mo. 2 Dhali ’kwani ka ris mini baṯẖ miim buni kun ’kanuwa ḵanthi/ isho’k mo, dhali gom miim buni mo tani bway gi gwoŋ gana/ minu sor mo be. 3 Dhali e bwam buni kun purapur mo tani uni mini nyuny um mo mmota nyunycina/ ki gwonthus buni mo. ’Peni kadhamo/ miiwaḵ buni jin toru gwo ’twa/a ’cesh mo tani diki ta nyoŋ’kor mo dhali mony’ce’d sho’k buni si’da/ mo tani diki ish e mo be.

4 Haali/ waḵki/ Arumgimis diki ’tash iman’doyu gwo ’twa/ mo me’d jin miina uni miinthus mo tani, hili a’di ki ṯa’k uni e mo/o’d mo dhali a’di ki dhu uni e jisa ’kulga/ mo kun ta mondhurumi’d jin ’ceṯẖki’da ’tum mo mmodhu uni ntagi gwo jin minu dwall mo be. 5 Waḵki/ a’di diki ’tash mony’cesha dhamo/ ’twa/ mo tani, hili a’di ki kara Nuuh ki ’dantar mo, a’di jin ta’da amanc̱i gwo mo gom mo ma ḵar/e mo nyaḵki ’kwani pesun tiya mo me’d jin ḵalkina a’di agannu/ yi’de/ ap̱o/ mony’cesh mo jin ’kona iman/usha ush mo. 6 Waḵki/ mii jin ṯugu ’peŋkuman bampa/ gi Pan Saduum mo dhali Paŋ Gamuura mo ki burṯa/ o’d mo tani a’di ki waḵ uni mo ki mo jin toru gwo ’twa/a ’cesh ki mony’ce’d sho’k mo dhali dhu uni mo mmota she/mm mo gom uni kun mini ta uni gun ushuna ush mo. 7 Dhali waḵki/ a’di ye’da Luuth jin ta’da ḵar/e ’ba/ mo, a’di jin di’d ki dhan mo ma c̱is ki mii kun ’kanuwa ḵanthi/ mo gi ’kwanin thus gwansan mo 8 (Haali/ a’di jin misha wathiŋ ḵar/e yan mo dhali ciḵ mo me’d jin c̱a’ba a’di e bwam uni mo tani a’di ṯu/ulkunu mo ki isa nyor eya ḵashiram piti jin ta’da ḵar/e ka yempa/ mo ka tee kun baṯẖani ’ko’d mo ki miim buni kun ushkina uni gwoŋḵan mii mo). 9 Wakan Tap̱a mishki ye uni ’ba/ mo, uni kun tana gayiin ’peni mompal mo, dhali dhu uni gwansan kun ’koki ta kuŋ ḵar/e mo e bwaŋ’kwariny mo jin ’konu ka jisa ap̱o/ mo ntaga tee gi gwon dwall jin minu tor gwo ’twa/a ’cesh mo, 10 dhali isi ki ji mum mo gom uni gwansan kun c̱i is buni ki bwa en’dap̱ mo mmoshi/ is buni ki e gun dhuna uni ki ’thir ’thir mo dhali waḵ mo jin tanu ki moshirr mo.

Dhali dar gi monyju/ mo dhali ki bwam buni mo tani uni ’koki ḵo/a ḵo/ is mo mmosor uni kun ta gi monyca mo. 11 Bahili iman’doyu gwo mo, ba uni bol tiya e mo ki mo/eḵ jin caaca kagahara mo dhali mom’bi’th mo tani uni ’koki bah gwo sor jin ta gwon dwall ap̱o/ uni mo mmosul Tap̱a bway mo. 12 Hili uni gwansan wana e ki to/e gun ’kon ka miiny mo, kun ta to gun uḵu mo ki buyem buni mo, uni gun dho’thkunu mo mmobu’th mo dhali mmo’kosh mo tani sorkina sor mo e mii kun ’kokina uni mmota p̱us mo tani uni minu ’ce’d sho’k mo nyaḵki uni ki mony’ce’d sho’k jin ṯal ’de/ mo, 13 mmo’kosh is ka nyor e miin ṯẖu’th buni jin ṯẖu’thkina uni to mii mo. Uni tulki a’di ’kup̱ mo gom ’cem buni kun ’ko ki ’kol uni mo mmomiina uni ki ra’b mo e montee mo. Uni ta monyo/on mo dhali monthalkin mo mmomii ki ra’b mo e miim buni kun ’curkina uni e mo e mii ’baar mo dhali mmoko cuuwa/ ki ḵawwu mo e mo kun yuḵuwa yuḵ ka tul ’kup̱ mo mmonyaḵki um mo. 14 Uni takin gi em buni kun ’tu’dkunu ki piny piny ki miinyc̱al mo, a’di jin moli daḵ mo gom miinthus mo. Uni ellkina ell e mo gom ’kwanin tiya kun ’konuki ṯela ḵashiram buni sho’k mo. Uni takin ga dum buni kun yedhu sho’k mo e bwa jin purapur mo. Uni ta uc̱i kun jeekunu mo. 15 Mmodhalkina uni bwaya ḵar/e ’pen mo tani uni iiki iim per mo. Uni baṯẖki bway ma Balaam mo, a’di jin ta ya/ ma Basuur mo, a’di jin enki mo jin gamu nyunycina/ ’peni mii kun ṯẖudhu mo 16 hili a’di ḵucurkunu mo gom gwondhaŋ pitiŋ gana/ mo. Ntagi thuluny jin mol ’twa/ wal mo, ki wal a’di ki ’twa/ gi wathimpa en’thi/ mo dhali nona manc̱i gwo ’kup̱ ’pena du ma nyonkom piti jin gusa a’di mo be.

17 Uni gwansan ta jis yi’de/ kun du’dun kun ḵutha e ki ḵu’th mo dhali kun tana shile/ kun borkin ma p̱unthar mo. Gom uni mo tani mondhurumi’da ’tum a’di karkunu mo be. 18 Haali/ ’twam buni kun baha uni mmodhu ’ba/ ki ca mo eya p̱alim buni mo tani uni ellkina ell e ki mii kun ’kanuwa ḵanthi/ mo ki e kun dhunu ki ’thir ’thir ki buŋgwar is mo, mmo/ell ’kwani e mo, uni gun yekin mo ’peni yoḵkam gi uni kun ’kon e mii gun ṯẖudhu mo be. 19 Uni oki uni gwo is mo gom mo jin mina uni ’ko ki ’kus mo, hili uni ki is buni mo tani ta c̱iŋkina/ kun yolu mo e mo jin p̱u/u mo. Haali/ ma a’diyin jin midi p̱i wathi/ e mo tani a’di ta c̱iŋkinam piti mo be. 20 Haali/ waḵki/ ’ko’di uni yekin mo ’peni mo jin shi/u buŋgwar is mo ’peni mony’cesh mo ki monyiṯẖ Tap̱am bana mo dhali Amanwoṯẖ jin ta’da Yesus Ḵrisṯẖos mo tani uni doḵ/e koṯẖkunu mo e uni mo dhali p̱inu e mo tani moŋ’kom buni jin ta jiŋ ’ko’d mo tani warki’d ki shi/ kagahara mo gom uni mo mmobol jin ṯwa/a/ e mo be. 21 Haali/ a’di midi ’taki ’bor ki isi ’bor gana/ mo gom uni mo ki uni mini ’taki ’koki mish bwaya ḵar/e yansan ki sule/ sule/ mo dhali ’ko’di uni mmomishkina uni a’di mo tani uni ki ṯu’k ka nyaŋ’ko’d ’peni gwoŋḵan jin ḵogu mo jin c̱ikunu uni mo. 22 A’di p̱u’dki’di uni mo isi ki gwoŋ gana/ mo jin onu ’pena dhamo/ mo ki: A’ka laḵki ya/ piti ka nyaŋ’ko’d jin ya/kina a’di mo, dhali kuman ḵuthar up̱kunu yi’de/ mo jasi mmo’daŋkali bwam boro’th jin ’dorotha’doro’th mo be.