1 Dhali wathiŋ kamu/ diki’di Paŋ Kaysariyya jin yuḵu gway ka Karniliyuus mo jin ta’da mancil ma askar iss ’kwanim pa mudhe’d mo ki mo jin yuḵu ki mo jin jin ma askar aji eya Ithaliyaan mo be. 2 A’di ta wathiŋ gayiin dhali a’di ta a’di jin ḵo/ki’da Arumgimis mo uni ki kuŋ gu’b piti ilu/ i’baar mo dhali jin c̱i tom piti kagahara gom ’kwani kun hatha’ko’d mo dhali ’tho’da Arumgimis isa yempa/ mo. 3 Ki mo wana e ka tente/ ikwara mmodina a’di ibum ’ban mo tani ki tonyjan p̱arkina a’di e eya tente/ mo tani aman’doyu gwo ma Arumgimis p̱u’dki’di a’di mo dhali o a’di gwo mo ki: Karniliyuus. 4 Dhali a’di mmohila a’di a’di ka ’thime/ mo tani dhali mmoḵo/ is mo tani a’di ki o gwo mo ki: Ata Tap̱a? Dhali a’di ki o a’di gwo mo ki: Mon’thom pini dhali to kun c̱ina /e cuki’di mis mo gom mo jin minu ka /e e mo ibwambor ma Arumgimis mo. 5 Dhali shwane/ dhuyi ’kwaniŋ gwas ’pen mo mmo/ii Pan Yaap̱a mo dhali susa Simaan jin yuḵu ki gwaya kamu/ ka Buṯerus mo. 6 A’di c̱a’bki’d nyaḵka Simaan jin ta’da manḵucur yiṯ mo. Gu’b piti di’di yana gap̱ mo. 7 Dhali ka man’doyu gwo jin ṯor a’di gwo yaki’d ’peni a’di mo tani a’di yuḵki imanmiiya ṯu’c gi gu’b piti isu/ mo dhala askara kamu/ ’peni uni jin ta’da gayiin mo jin c̱or a’di ki sule/ mo tani 8 dhali mmorasha a’di gwo e ’baar mo gom uni mo tani a’di ki dhu uni ’pen mo mmo/ii Pan Yaap̱a mo be.

9 Dhali ka cim jiŋ ’ko’d mo tani ki uni ’kon e mo/iim buni mo dhali ki uni ’dish pa is mo tani Buṯerus seki ’kuŋgu’b mo mmo’tho ki mo jin wana e ka tente/ ibwaŋ’kup̱ mo. 10 Dhali a’di ’kosha ṯe/ mo dhali ŋap̱ to mo mmoshwa mo. Hili ki uni ’kon mmothoson to mo tani a’di biṯa is jwa mo. 11 Dhali a’di hilki momis ḵa’du mo dhali toŋ’kul bwaŋ kamu/ thulki mo jin wana e ka dhan burrinye/ jin dhaluwa ’cesh ki shem ’pena bi doŋon ap̱owa ’cesh mo 12 kun ’kona ris to ’baar mo kun ’kona jamas ki she/ ki she/ nycine/ mo to/e kun ’kona sho’k do doŋon mo dhali tony’cesh kun paaran mo dhali ’dii kun p̱eni mis mo. 13 Dhali ’twa/ p̱u’dki’di a’di ki: Cuyi mis mo ma, Buṯerus. ’Koshi ma dhali ’kayi mo. 14 Hila Buṯerus ki o gwo mo ki: Yisa wakana, Tap̱a, haali/ aha/ dinaki ’ka toŋ kamu/ ṯal ’de/ ki sule/ jin ga/u mo walla jin ’konuki thoson me’d jin onu mmomii mo. 15 Dhali ’twa/ p̱u’dki’di a’di doḵ/e me’di su/ ki: A’di jin thosonkin ma Arumgimis ki dhelel dhelel mo tani dhalku/ ki kar a’di ki to jin ga/u mo ma. 16 Dhali yan miikunu me’di kwara mo. Dhali ise/ toŋ’kul bwa bu’thkunu e momis mo.

17 Dhali ka Buṯerus dumpulki’d kagahara ki is piti mo gom tonyjan yan jin p̱ara a’di e mo tani dhali gom ’pemen piti midi ’taki ta ji gi wakata mo tani hili ’kwaniŋ gwas kun ṯu’c ma Karniliyuus ki iiku/ mo tani mmodoṯkina uni gu’b ma Simaan mo tani uni doshkin ibwambor ’twaŋkal gu’b mo, 18 dhali yuḵkina yuḵ mo mmodoṯ gwo mo waḵka Simaan jin yuḵu ki gwaya kamu/ ka Buṯerus mo tani midi ’taki c̱a’bi mahan mo. 19 Dhali ka Buṯerus di’d mmokulum gwon tonyjani bwa mo tani Shi/in o a’di gwo mo ki: Hili mo mo ma, ’kwaniŋ gwasi kwara ŋap̱i /e mo. 20 Hili cuyi mis mo dhali thuli /e mo ma dhali yayi nyaḵki uni mmodiki dhaŋ gwo i she/ mo, gom aha/ ṯuca uni mo be. 21 Dhala Buṯerus thulki’d ka ’ceshi ’kwani mo dhali o gwo mo ki: Hili mo mo ma. Aha/ tana a’di jin ŋap̱a um ti. Um iiyin kata? 22 Dhali uni o gwo mo ki: Karniliyuus jin ta’da mancil ma askar iss ’kwanimpa mudhe’d jin ta wathi/ jin mii’d ka ḵar/e mo dhali ta a’di jin ḵo/ki’da Arumgimis si’da/ mo dhali jin maŋa ’kwani gi Bampa/ Yahuuda/ ’baar mo tani a’di c̱in ma Arumgimis gwo nṯwa/a/ ka man’doyu gwo jin dheleladhelel mo mmohashi /e e gu’b piti mo dhali mmociḵ gwo ’peni /e mo. 23 A’di yuḵkina a’di uni bway bwaŋ gu’b mo dhali dhu uni mmota yilkina/ mo be.

Dhali ka cim jiŋ ’ko’d mo tani a’di cu mis mo dhali ya nyaḵki uni mo dhali kun tiya ’pena waḵ buni ’peni Pan Yaap̱a nyaḵ ii ki uni si’da/ mo. 24 Dhali ka cim jiŋ ’ko’d mo tani uni seki Paŋ Kaysariyya mo. Dhala Karniliyuus di’d mmoc̱or uni mo mmoyuḵkina a’di abas piti imonṯal ’de/ mo dhali imuguŋ ganam piti kun ena a’di ki en gana/ mo. 25 Dhali a’di warki’d ki mo jin sen ma Buṯerus mo tani aKarniliyuus gam a’di ’kup̱ mo dhali biṯki’da ’ceshi sho’k piti mo dhali luŋ a’di mo. 26 Hila Buṯerus ’de’kki a’di ki mis mo mmo/o gwo mo ki: Cuyi mis mo ma. Aha/ ki is pem si’da/ tana wathi/ mo. 27 Dhali ki a’di ṯorki’da ṯor ki a’di mo tani a’di seki bway bwaŋ gu’b mo dhali gamki ’kwani ka ris tulki isi monṯal ’de/ mo. 28 Dhali a’di ki o uni gwo mo ki: Um ki is bum mishkin ki a’di nonu mo ki gwoŋḵan jin c̱inu ki wathi/ jin ta Wathi/ Yahuuda/ midi mol is piti gam me’d mo walla midi diki ya e jaŋ kamu/ ’de/ e bampaŋ kamu/ mo. Dhali hili Arumgimis ṯorki aha/ ki aha/ mina diki ’taki yuḵ wathiŋ kamu/ ṯal ’de/ ki jin ga/u mo walla jin dinuki thoson me’d jin onu mmomii mo. 29 Haali/ a’di wakan mo tani aha/ si’da/ yayina um ki dar gi gwon dhaŋ mo haali/ aha/ hashkunu mo. A’di doṯka/ um ki gwonta ihashkina um aha/ mo.

30 Dhala Karniliyuus o gwo mo ki: Acim doŋon jin di’di ṯwa/a/ ntagi mo yan shwane/ mo tani aha/ dina mmobu’th mon’tho ka tente/ kwara e gu’b pem mo. Dhali hili mo mo ma. Wathi/ doshki’d ibwambori aha/ ki burrinye/i is ki ra/ ra/ mo 31 dhali o gwo mo ki: Karniliyuus, mon’thom pini ciḵu mo dhali to kun c̱ina /e mo tani kakunu e mo eya Arumgimis mo. 32 Haali/ a’di wakan mo tani hashki gwo mo e Pan Yaap̱a mo dhali yuḵa Simaan jin yuḵu ki gwaya kamu/ ka Buṯerus mo. A’di ta yilkina/ e gu’b ma Simaan jin ta’da manḵucur yiṯ iyana gap̱ mo. 33 A’di hashka/ /e gwo mo ise/ dhali /e miin ki ’bore/ mmoyayina /e kan mo. Shwane/ haali/ a’di wakan mo tani aman ’baar mo imahan ’kona e buŋ’kus ma Arumgimis mo mmociḵa ris to ’baar mo kun ḵankina Tap̱a /e gwo mo.

34 Dhala Buṯerus ḵa’d ’twam piti mo dhali o gwo mo ki: Ka jiŋ gana/ aha/ nyiṯẖkina ka Arumgimis diki mii mii ka gwar ’de/ gom ’kwani mo. 35 Hili em bampany ’ceshi ’baar mo ki ’beles mo tani a’di jin ḵo/ a’di mo dhali mii miiŋḵar/e mo tani a’di misha a’di bu’th mo. 36 Gwo jin hashkina a’di uc̱i ma Israyiil mo mmoc̱i gwom ’boro’d ki moŋḵu’th is ma Yesus Ḵrisṯẖos mo (a’di jin ta Tap̱a gom ’kwani ’baar mo) – 37 Gwo c̱aan jin onu misha um ki is bum mo a’di jin c̱inu ki lala’th e Bampa/ Yahuudiyya ’baar mo mmoṯelu a’di ’pen mo ’peni Pany Jaliil mo ’ko’di gwo jin miin ma Yohaana mii ki yi’de/ jin c̱inu mo be. 38 Yesus gi Pa Naasira mmo’kosh ma Arumgimis a’di ki Shi/in Dheleladhelel mo dhali mom’bi’th si’da/ i’kup̱i a’di mo, tani, a’di jin maŋaski’d ki mis mo mmomii mii kun ’boron mo dhali mmowoṯẖa ris ’kwani kun ’kosh ma ruma ’cesh mo be, haali/ Arumgimis di’d e a’di mo. 39 Dhali am tana iman/o gwo goma ris to gwansan kun miina a’di e bampaŋ ’Kwani Yahuuda/ mo dhali e Pa Urushaliim si’da/ mo. A’di si’da/ jin ’koshkina uni jwa mo mmohankina uni a’di ap̱o/ cwa mo. 40 A’di ’de’k ma Arumgimis mmis ka cim kwara mo dhali ṯor a’di eya tente/ mo 41 yisa ka ris ’kwani ’baar yisa, hili ki iman/o gwo kun laḵ ma Arumgimis ’thissa/ kun ta aman kun nyaḵ to shwa ki a’di mo dhali mmonyaḵ to p̱i ki a’di mo ’ko’di a’di piki’d ’peni mowu mo be. 42 Dhali a’di ḵan am gwo mmoc̱i ’kwani mo dhali ṯe gwo mo ki a’di ita a’di jin kar ma Arumgimis mmota adwalliŋ gwo gom uni gun ’kon ki e mo dhali uni gun wukin mo. 43 Gom a’di mo tani aris imanc̱i gwo ma Arumgimis kadhamo/ mo uni ṯe gwo mo ki ki gway piti mo tani aris ’kwani ’baar ki ’beles kun gam a’di gwo is mo tani mini bu’th moŋgwam gom miinthus mo be.

44 Hili ka Buṯerus di’d mmo/o gwo gwansan mo tani Shi/in Dheleladhelel yaki’da p̱o/ aris uni ’baar mo kun ciḵ gwo mo. 45 Dhali uni kun ’ciṯẖu/ amunyjal yis kun gam gwo is mo tani merkin kagahara mo, uni ’baar mo kun iina Buṯerus haali/ to jin c̱inu ki me’d jin ta Shi/in Dheleladhelel mo gac̱ki’da p̱o/ ’kwani kun ’koki ta ’Kwani Yahuuda/ si’da/ mo. 46 Haali/ uni ciḵ uni mmo/o gwo ki ’twan tiya dhali maŋa Arumgimis mo. Ŋ’ko’d mo tani aBuṯerus thoḵ gwo mo ki: 47 Mina wathiŋ kamu/ mish non yi’de/ ki uni minu ’taki ’koki mii ki yi’deya, uni kun bu’th Shi/in Dheleladhelel me’d ana mo ’taa? 48 Dhali a’di ḵan uni gwo mo ki uni minu mii ki yi’de/ ki gway ma Yesus Ḵrisṯẖos mo. Dhali uni doṯki a’di mo mmoc̱a’bi uni ka cim ush’ceenne/ mo be.