1 Dhali kun tiya ’kon e Pa Anthaakiya eya ḵaniisa jin di’d imun kun ta imanc̱i gwo mo dhali imanṯor gwo mo: iBarnaaba dhala Simaan jin yuḵu ka Nijar mo dhala Luḵiyus gi Paŋ Kerawaan mo dhala Manaayin jin ta’da amannyaḵ c̱a’b ka Hirodus jin ta’da mudhiir dhala Shawuul mo. 2 Dhali ki uni tul is mmoluŋ Tap̱a mo dhali ga/ to mo tani Shi/in Dheleladhelel oki gwo mo ki: Dhuyi iBarnaaba dhala Shawuul ki she/ gom aha/ mo goma ṯu’c jin yuḵga/ uni mmomii mo. 3 Dhali ki uni ga/ to mo dhali ’tho mo dhali dhu me’d buni ap̱o/ uni mo tani uni ki hash uni mo mmo/ii mo be.

4 Wakan be uni mmohasha Shi/in Dheleladhelel uni mo tani uni iikin ka luŋgu’b mo ntagi Pa Saluukiya mo dhali ’peni mun mo tani uni ki ii mo ka ḵur yi’de/ jin bela ’tham mo ntagi Paŋ Kuprus mo. 5 Dhali ki uni ’kon e Pan Salamiis mo tani uni c̱i gwo ma Arumgimis e gu’b montul is gi ’Kwani Yahuuda/ mo. Dhali uni tan ga Yohaan si’da/ jin woṯẖi uni mo. 6 Dhali ki uni ’ciṯẖkin isi bwaman ma ’cesha kunn is ki tur mo ntagi Pam Pap̱uus mo tani uni gam wathiŋ kamu/ jin ta gi e ma rum jin shi/ashi/ mo dhali jin ta’da manc̱i gwonthus mo dhali jin ta Wathi/ Yahuuda/ si’da/ jin yuḵu gway ka Baryashuu mo 7 jin nyaḵ c̱a’b ka waḵiila Sarjiyuus Buulus jin ta’da mishiŋ gwo wathi/ mo. A’di yan yuḵki’d iBarnaaba dhala Shawuul i a’di mo dhali ŋap̱ gwo ma Arumgimis mmociḵ mo. 8 Hila Aliim (haali/ gway piti yuḵu kan ki ’twaŋ kamu/ mo) jin ta gi e ma rum jin shi/ashi/ mo tani a’di roc̱ki uni mo mmoŋap̱a waḵiil yan mmoṯu’k mo ’peni moŋgam gwo is yan mo be. 9 Hila Shawuul jin yuḵu ka Buulus si’da/ mmo’tu’du/ a’di mo ki Shi/in Dheleladhelel mo tani a’di ki hil a’di ka ’thime/ mo 10 dhali o gwo mo ki: Ayy /e jin ’tu’du/ mo ka maḵi ’baar mo dhali /e jin ta ṯẖuthu/ ki ṯẖuthu/ mo dhali /e jin ta ya/ ma Ibliis mo dhali /e jin ta ’kup̱ ki a’di jin ta mo ma ḵar/e ’baar mo tani mina /e diki daḵ mo mmosusa sus jin ta jim per mo ’taa ’peni miiŋ gana/ gi Tap̱a mowa? 11 Dhali shwane/ hili mo mo ma, me’d gi Tap̱a midi di ap̱o/ /e mo dhali /e mini ta ja’da/ mo mmomola tente/ p̱ar e ki ari mo mo mmodiki c̱a’b c̱a’b ’pempa naskina/ mo. Dhali ise/ monduḵu’d biṯki’da p̱o/ a’di mo dhali mondhurumi’d si’da/ mo dhali a’di yuthurki’d mo mmoŋap̱ ’kwani mo mmosus a’di me’da bi mo be. 12 Dhali ŋ’ko’d mo tani awaḵiil ki a’di p̱arki to e jin miikunu mo tani a’di gamki gwo is mo mmomera a’di mo gom gwon Tap̱a jin ṯoru mo be.

13 Dhala Buulus uni ki imannyaḵ iim piti mo tani uni ’cuḵkina ḵur yi’de/ jin bela ’tham mo mmo/ii ’peni Pam Pap̱uus mo dhali uni p̱u’dkin mo e Pam Parja gi Bampa/ gi Pam Pamp̱iliyya mo dhala Yohaan ya’d mo ’peni uni mo mmodoḵ ka nyaŋ’ko’d e Pa Urushaliim mo. 14 Hili uni mmo’ciṯẖkina uni ’peni Pam Parja mo tani uni p̱u’dkin mo e Pa Anthaakiya gi Bampa/ gi Pam Pisidiyya mo dhali uni iikini gu’b gi montul is ka cim ma pesu/ mmo’kowa ’cesh mo. 15 Dhali ’ko’di gwoŋḵan jin c̱inu deŋu e mo dhali gwo gi imanc̱i gwo ma Arumgimis kadhamo/ si’da/ tani Tap̱a gi gu’b montul is hashki uni gwo mo mmo/o gwo mo ki: Ikam bamaa, waḵki/ um tan gi gwon tiya mo mmomalas ’kwani mo tani oyi mo ma. 16 Dhala Buulus doshki’d ki mis mo dhali mmowuḵkina a’di uni ki me’d mo tani a’di o gwo mo ki:

Um ’Kwani ma Israyiil mo dhali um kun ḵo/kina Arumgimis mo tani kana: 17 Arumgimis gi ’Kwani ma Israyiil gwan kwanyki ibabam bana mo dhali dhu ’kwani ki ca ki uni ’kon ki ’kus e Bampa/ Masir mo tani dhali ka bin tur mo tani a’di ki sus uni ka pije/ ’peni a’di mo be. 18 Dhali ki mo embul jin wana e ki yil issu/ mo tani a’di thip̱ki’da thip̱ gom uni mo e mombwaasho mo. 19 Dhali ki a’di ’ce’dki kal gi ’kwani kun ’kon ma p̱o/i pesu/ sho’k kun ’kon e Paŋ Kanaan mo tani a’di ki c̱i uni bampam buni ki mal ki mo embul yan jin wana e ki yil iss* urbumiyya wa ḵamsiin ’kwanimpa i/iss ’de/ i’ce’dki iss ’kwanimpa su/ i’ce’dka ’kume’d ap̱o/ mo. 20 Dhali ŋ’ko’di to gwansan mo tani a’di ki c̱i uni imandwall gwo gwo ntaga Samu/iil jin ta’da manc̱i gwo mo. 21 Dhali ka nyaŋ’ko’d doḵ/e mo tani uni doṯkina maliḵ mo dhala Arumgimis ki c̱i uni aShawuul jin ta ya/ ma Kish jin ta wathi/ gi ’kwani ma waḵ ma Benyamiin ki mo embul ki yil issu/ mo. 22 Dhali ki a’di ḵwa/ki a’di mo tani a’di piki’da Dawuu’d mmota amaliḵ buni mo. Gom a’di si’da/ a’di ki ṯe gwo mo dhali o gwo mo ki: Aha/ gamkina Dawuu’d jin ta ya/ ma Yassa jin ta wathi/ jin gam ma du ki aha/ jin midi mii bwam pemi ’baar mo. 23 ’Peni emen gi wathi/ yan mo tani Arumgimis me’d jin onu gwo is mo tani guyi’da Manwoṯẖ gom ’Kwani ma Israyiil mo jin ta’da Yesus mo 24 me’dyin ṯor ma Yohaan gwo nṯwa/a/ mo mmodina a’di ki yayu/ naskina/ mo tani gwo mmomiiya mii ki yi’de/ gom mo jin minu rica du is goma ris ’Kwani ma Israyiili ’baar mo. 25 Dhali ka Yohaan di’d mmo’baar bway piti mo tani a’di o gwo mo ki: Um ṯosh ki aha/ tana aja mo? Aha/ dina ki ta a’di mo. Hili mo mo ma, jamu/ midi yayu/ i’ko’di aha/ mo, ap̱p̱a/ sho’k piti mo tani aha/ dinaki ’bor jin miga/ ’cuḵ a’di mo.

26 Ikam pema um kun ta uc̱i ma Ibrahiim kun iiyin ’pena tora ’de/ mo dhali um gwan ibwaman um kun ḵo/kina Arumgimis mo tani gwo gom mowoṯẖ yan hashkunu mo gom ana mo be. 27 Haali/ uni kun ’koni Pa Urushaliim mo dhali tap̱am buni si’da/, haali/ uni ’koki mish a’di mo dhali ’koki mish gwo gi ’twa/ gi imanc̱i gwo kun deŋu e mo ka cim ma pesu/ isa yempa/ mo tani uni miikina uni ’baar mo mmowaḵkina uni a’di mo be. 28 Dhali uni bala gamana ta i a’di mo mmoc̱i a’di mmowu mo hili uni doṯkina Bilaaṯus gwo mo ki a’di minu mii ’kosh mo be. 29 Dhali ki uni ’baarkina ris to ’baar mo mmomii kun ’kwarkunu mo gom a’di mo tani uni bu’thki a’di ka ’cesh ’peni cwa mo dhali ’thi a’di e moŋ’kup̱aje mo be. 30 Hili Arumgimis ’de’k a’di ’peni mowu mo. 31 Dhali a’di mishu ka cim ka ris mo ’peni uni kun nyaḵ ii ki a’di ’peni Pany Jaliil ’kup̱ ki Pa Urushaliim mo tani uni shwane/ ita iman/o gwo gom a’di ibwaŋ ’kwani mo be. 32 Dhali am guyina um gwom ’borga/ ’peni jin onu is me’d jin ṯoru ibaba mo 33 ka Arumgimis ’baarki mii yansan e ana gom uc̱im bana mmo’de’kkina a’di aYesus mo be. Me’d jin ’kwarkunu mo si’da/ ka Masmuuri su/ mo ki:

42 Dhali ki uni iikin ka pije/ mo tani uni doṯki gwo mo ki gwo gwansan minu ’taki o gom uni ka cim ma pesuŋ kamu/ jiŋ ’ko’d mo. 43 Dhali ki montul is ’koshu jwa mo tani uni ka ris ’peni ’Kwani Yahuuda/ dhali ’peni uni kun tana gayiin kun ta ’kwani kun ’koki ta ’Kwani Yahuuda/ kun bu’th gwo ma Arumgimis mo tani uni baṯẖkina Buulus mo dhala Barnaaba mo kun o uni gwo mo mmomalas uni mo mmo’ko ki sule/ eya ’the ma Arumgimis mo.

44 Dhali ka cim ma pesuŋ kamu/ jiŋ ’ko’d mo tani ’kwani murkini ’taki ta ’kwani gi bampa/ ’baar mo kun iiyin mmotul is imonṯal ’de/ mo mmociḵ gwo ma Arumgimis mo. 45 Hili ki ’Kwani Yahuuda/ mishkina waambuhany ’kwani mo tani uni ’tu’du/ ki mondeeya du mo dhali uni dhaŋki to kun on ma Buulus mo dhali wal gwo sor si’da/ mo be. 46 Dhala Buulus dhala Barnaaba o gwo eya tente/ mmo’koki ju/ mo dhali o gwo mo ki: A’di minu mii mii mo ki gwo ma Arumgimis minu mii o i/um nṯwa/a/ mo be. Haali/ um bel a’di ’peni um mo dhali um ’cunycurki is bum mmo/o ki um ’koki ’bor mmota gi moŋ’koki/e ki sule/ ya ye ’ba/ mo tani hili ma, aman ṯuka mo ki ’kwani kun ’koki ta ’Kwani Yahuuda/ mo. 47 Haali/ wakan si’da/ Tap̱a ḵanki am gwo mo mmo/o gwo mo ki:

48 Dhali me’dyin ciḵa ’kwani kun ’koki ta ’Kwani Yahuuda/ gwo yan mo tani uni ’borkina bwa mo dhali kar gwo ma Arumgimis ki ca eya tente/ mo. Dhala ris uni gun dhunu mo mmota gi moŋ’koki/e ki sule/ ya ye ’ba/ mo tani uni gamki gwo is mo be. 49 Dhali gwo gi Tap̱a ḵalu ki lala’th isi bampa/ yani ’baar mo ki ’beles mo. 50 Hili ’Kwani Yahuuda/ lali up̱a gayiin kun maŋu sho’k mo dhali ’kwani kun tana ’kaŋ’kup̱ pa sho’k mo dhali uni cuuna p̱o/ uni mmoṯoca Buulus dhala Barnaaba bwa mo dhali ṯa’k uni ka pije/ ’peni bwaman mompam buni mo be. 51 Hili uni pirkina buhany ’peni sho’k buni ap̱o/ uni mo dhali p̱u’dkin mo e Pa Ikuuniya mo. 52 Dhali imanciḵ gwo ’tu’dkin mo ki mom’bor bwa mo dhali ki Shi/in Dheleladhelel mo be.