1 Dhali ki uni pekin ki tur mo e Pa Amp̱ipuliis mo dhali Pa Apuluniyya mo tani uni p̱u’dkin e Pan Tasaluniiki mo jin dina gu’b montul is gi ’Kwani Yahuuda/ mo. 2 Dhala Buulus me’d miim piti jin miina a’di mo tani a’di yaki’d e bwam uni mo dhali ka cim ma pesu/ ikwara mo tani a’di ṯorki’da ṯor ki uni ka ḵarambuye/ ’peni Gwo ma Arumgimis kun ’kwarkunu mo 3 mmoḵa’d gwo mo dhali mmodhu eya tente/ ka Ḵrisṯẖos mina isi mii ’kosh ka nyor mo dhali midi mii piyu/ mo doḵ/e ’peni mowu mo, dhali ka Yesus yan jin c̱ika/ um gwo mo tani a’di ta’da Ḵrisṯẖos mo be. 4 Dhali kun tiya e uni lalkunu gwo sho’k mo tani dhali uni wanki ’kwani is ki gwo mo nyaḵka Buulus dhala Sila mo. Dhali ’peni ’kwaniŋ gayiin kun ta ’Kwaniŋ Griḵi mo adhana waambuhany ’kwani si’da/ mo dhali ’peni up̱ kun tana ’kaŋ’kup̱ pa yisa p̱elena. 5 Hili ’Kwani Yahuuda/ mmo’kon ma du uni ki joc̱on mo mmodee mo tani uni bu’thki uni ki me’d ’kup̱ ki uni kun ta cin tiya kun ta gi mii kun bulabul ’peni uni gun ’kon ka p̱iny is e mo ma suug mo, dhali mmotula uni awaambuhany ’kwani is mo tani uni ṯu’cki ’kwanim bampa/ mmo/eḵ mii kagahara mo dhali mmoṯẖa’th ’kup̱ ki gu’b ma Yasuun mo tani uni palki mii mo mmoŋap̱ uni mmobor uni ka pije/ i ’kwani mo. 6 Dhali ki uni ’koki gam uni mo tani uni dirkina Yasuun dhala waḵa tiya e bwambori tap̱am bampa/ mo mmocuu gwo mo ki: Gwahan kun wuluski mony’cesh mo tani uni iiyini mahan si’da/ mo, 7 kun bu’thkin ma Yasuun mo dhali uni ’baar mo mii to ki c̱a’ckon ap̱o/ gwoŋḵan ma Kaysar mo mmo/o gwo mo ki: aMaliḵa kamu/ di’d jin ta’da Yesus mo be. 8 Dhali uni c̱ina waambuhany ’kwani bwa shi/ ki me’d mo dhali tap̱am bampa/ ilu/ mo ki uni ciḵki to gwansan mo be. 9 Dhali ki uni dilki to ’pena Yasuun mo dhali kun tiya mo tani uni ki dhal uni bway mo mmo/ii mo be.

10 Dhala waḵ buni ise/ uni ki ṯuca Buulus dhala Sila ki ii mo mon’thiny mo ntagi Pam Biriyya mo dhali uni iikin e gu’b gi montul is gi ’Kwani Yahuuda/ me’d jin pu’dkina uni imun mo. 11 Hili uni gwansan bol uni gi Pan Tasaluniiki e ki yuḵ mo mmobu’thkina uni gwo mo ki mo/o bwa kagahara mmo’cunycur Gwo ma Arumgimis kun ’kwarkunu mo ka yempa/ mo waḵki/ to gwansan mini wakansan mo. 12 A’di gamkina uni gwo is ka ris ’peni uni mo dhali ’peni up̱ Griḵi si’da/ kun maŋu mo dhali kun ta ’kwaniŋ gwas yisa p̱elena. 13 Hili ki ’Kwani Yahuuda/ kun ’kon e Pan Tasaluniiki mishkin ki gwo ma Arumgimis c̱in ma Buulus e Pam Biriyya si’da/ mo tani uni p̱u’dkin imun si’da/ mo mmoc̱iya waambuhany ’kwani bwa shi/ ki me’d mo dhali mmoṯu’c uni adu mmomur mo. 14 Dhali ise/ ki jahanne/ mo tani awaḵ buni ṯu’ckina Buulus mmo/ii ka pije/ ntaga dhan yi’de/ mo dhala Sila dhala Ṯimuṯẖawuus ’kokin naskina/ imun mo. 15 Hili uni kun suskina Buulus mo tani uni gu a’di ntagi Pa Aṯẖiina mo dhali mmobutha uni gwoŋḵan goma Sila mo dhali Ṯimuṯẖawuus jin mina uni ’taki ii i a’di ki jahanne/ e me’d mo tani uni iikin mo be.

16 Dhali ka Buulus c̱orki uni e Pa Aṯẖiina mo tani shi/in piti de’da dum piti ki birbir mo mmohila a’di bampa/ jin ’tu’du/ ki tomp̱inycon mo. 17 A’di ṯorkina a’diya ṯor ka ḵarambuye/ e gu’b gi montul is gi ’Kwani Yahuuda/ mo dhali nyaḵka gayiin ’kwani mo dhali e mo ma suug si’da/ isa yempa/ mo nyaḵki uni kun gam a’di ’kup̱ mo. 18 Dhali ’kwaniŋ gaŋgashan tiya si’da/ ’peni ’Kwani ma Apikuur mo dhali ’Kwani Ruwaak gam ’kup̱ ki a’di mo. Dhali kun tiya o gwo mo ki: Aman’ta’b mo ki ’twa/ yan mo midi ’taki o katinta sa/ ise/? Kun tiya o gwo mo ki: A’di wana e ka manṯor gwo goma rum kun molu mo haali/ a’di c̱iki gwo ma Yesus mo dhali gwo gom mompinu mo be. 19 Dhali uni bu’thki a’di mo dhali sus a’di mo e mo jin yuḵu ka Ariyuus Baghuus mo mmo/o gwo mo ki: Mina amani mish gwo yan ki gwo ta’da tinta jin ṯoru ki a’di jin ta jin this jin okina /e mo? 20 Haali/ /e ’doyi ton tiya eyi ’cem bam kun meru mo. A’di mina amani ’taki mish ki ’pemen to gwansan mo tani itana tinta mo? 21 Hila ris ’Kwani gi Pa Aṯẖiina dhali ’kwani gi kala tiya kun ’kon ki ’kus e mun mo tani uni ’baarana tentem buni mo mmomii toŋ kamu/ yisa hili jasi mmoṯora ṯor mo dhali mmociḵ gwo gom jasi ton thisa tiya mo.

22 Dhala Buulus doshki’d mo ibwaman ma Ariyuus Baghuus mo dhali o gwo mo ki:

Um ’Kwani gi Pa Aṯẖiina mo. Eya ris to ’baar mo tani aha/ nyiṯẖa ki um tana shi/inyjwa kagahara mo. 23 Haali/ ki aha/ yakina ki yam pe mo tani dhali hila to gun luŋa um mo tani aha/ gamkina si’da/ to jin thenuwa rum ap̱o/ jin ta gi gwo kun ’kwarkunu mo cikise/ ki: Gom toŋ kamu/ jin luŋu mo ki ji mol mo. A’di si’da/ jin luŋa um ki ji mol mo tani a’di ṯorka/ eya tente/ gom um mo. 24 Arumgimis yan jin uḵki mony’cesh mo dhala ris to kun ’koni bwaman a’di mo tani a’di mmotana a’di Tap̱a gi momis mo dhali ji gi mony’cesh mo tani a’di diki c̱a’b e moŋ’ko kun ḵogu mo kun uḵu ki me’d mo be. 25 A’di si’da/ idinuki mii to ki me’d gi ’kwani en’thi/ mo, ma me’d jin mina a’di mii diki ta gi toŋ kamu/ haali/ a’di ki is piti c̱i’da ris moŋ’koki/e dhali shi/in dhala ris to ’baar mo be. 26 Dhali ’peni jan ṯal ’de/ mo tani a’di uḵki’da ris kal gi ’kwaniny’ceshi ’baar ki ’beles mo mmo’ko eya ris bwam/e gi mony’cesh mo mmo’kawurkina a’di yil mom buni kun dhunu mo dhali ki mom bwaŋgwayu/ gi moŋ’kom buni si’da/ mo, 27 ki uni mini ’taki ŋap̱a Arumgimis mo waḵki/ uni si’da/ mini ’taki topu i a’di mo dhali gam a’di mo. Dhali a’di bala yisa isi’dki’d ’pena ris ana ’baar ka ’deṯe/ ’deṯe/ yisa. 28 Haali/

32 Dhali ki uni ciḵki gwo gom mompinu ’peni mowum piti mo tani kun tiya mii a’di ka maḵ mo. Hili kun tiya oki gwo mo ki: Am mina ciḵ ’peni /e gom gwo yan doḵ/e naskina/ mo. 33 A’di gi wakan be tani a’di yakin ma Buulus ka pije/ mo ’peni bwam uni mo be. 34 Hili ’kwanin tiya ’dim ’kup̱ e a’di mo dhali gamki gwo is mo. Ibwam uni mo tani Diyunisiyuus diki’d si’da/ mo jin ta wathi/ gi mo ma Ariyuus Baghuus mo dhala ’boma kamu/ jin yuḵu ka Damaris mo dhali kun tiya si’da/ nyaḵki ’ko ki uni mo be.