1 Dhali ki aman ’kokina mmo/ii mo ’peni uni mo dhali ’cuḵa ḵur yi’de/ jin bela ’tham mo tani aman iikina ka ji sho’k ki bway gi ’tham mo ntagi Paŋ Kus mo dhali ka cim jiŋ ’ko’d ntagi Pa Rudus mo dhali ’peni mo yansan mo tani ntagi Pam Paṯara mo be. 2 Dhali mmogamkina amana ḵur jin bela ’tham mo mmo’ciṯẖa/ gap̱ ntagi Pam Piniikiya mo tani aman iikina ap̱oŋ ḵur yi’de/ mo dhali ’cuḵ jin bela ’tham mo. 3 Dhali ki aman p̱u’dkina eya tente/ e Paŋ Kuprus mo tani mmodhalkina aman a’di ka biny cam mo tani aman iikina eya ḵur yi’de/ jin bela ’tham mo ntagi Pan Suriyya mo dhali aman thulkina ’cesh mo e Pan Sur mo be, haali/ e mun mo tani aḵur yi’de/ minu ḵal ton diṯin piti mo be. 4 Dhali mmogamkina am imanciḵ gwo mo tani am ’kokina ka cim pesu/ imun mo dhali uni gwansan okina Buulus ki Shi/in ki a’di midi ’taki diki kar sho’k piti e Pa Urushaliim mo. 5 Dhali ki a’di warki’d ka cim jin ’baarkina aman mo tani aman iikina mo dhali ii mo ki mo/iim bam mo. Dhali uni ’baar ki up̱i lu/ mo dhali uc̱i si’da/ mo tani uni suski am e bway bam mo gam am ’kokina mo mmo/ii ka pije/ mo ’peni ’peŋkuman bampa/ mo dhali mmo’kokina aman ki jiŋ ’kup̱a’dup̱un e mo ma dihal yi’de/ mo tani aman ’thokina mo be dhali aman c̱ikina uni gwo mo mmothe me’d ka rem ’kup̱ mmo/ii mo. 6 Dhali aman iikina ap̱oŋ ḵur yi’de/ jin bela ’tham mo hili uni doḵki bway pa ka nyaŋ’ko’d mo be.

7 Dhali ki aman ’baarkina mo/iim bam mo e yi’de/ ’peni Pan Sur mo tani aman merkina e Pam Puṯulimaayis mo dhali am thekina waḵ me’d mo dhali ’ko nyaḵki uni ka cim ’de/ mo. 8 Dhali ka cim jiŋ ’ko’d mo tani am iikina mo dhali p̱u’d mo e Paŋ Kaysariyya mo dhali mmociḵa aman gu’b ma P̱ilibbus jin ta’da manc̱i gwom ’borga/ jin ta jan ’de/ ’peni unim pesu/ mo tani am ’kona nyaḵki a’di mo. 9 Dhali wathi/ yan ta’d gi i’bwa/i doŋon kun ta nyaraŋ gana/ naskina/ kun c̱iki gwo is mo. 10 Dhali mmo’kokina aman imun ka cim ka hony/e mo tani amanc̱i gwoŋ kamu/ jin yuḵu gway ka Aghabuus yayi’d ka luŋgu’b ’peni Pa Yahuudiyya mo. 11 Dhali mmoyakina a’di i am mo dhali mmobu’thkina a’di wac̱kan ma Buulus mo tani a’di deḵki sho’k pitiŋ gana/ mo dhali me’d piti si’da/ mo dhali oki gwo mo ki: Wakansan okina Shi/in Dheleladhelel mo ki: Wakan si’da/ mina ’Kwani Yahuuda/ gi Pa Urushaliim deḵ wathi/ yan jin ta com wac̱kan yan mo dhali c̱i a’di e me’d gi ’kwani kun ’koki ta ’Kwani Yahuuda/ mo be. 12 Dhali ki aman ciḵkina to gwansan mo tani am inyaḵki uni gi pa yan mo tani aman malaskina a’di mo mmodiki ya ka gagamis e Pa Urushaliim mo. 13 Dhali ŋ’ko’d mo tani aBuulus thoḵki gwo mo ki: Ata gwokina um mo mmo’koshaa/ du mo? Haali/ aha/ thosonkina is mo jasi ki mondeḵ ’te/ yisa hili si’da/ mmowu mo e Pa Urushaliim gom gway gi Tap̱a Yesus mo be. 14 Dhali ki a’di ushki gwo gi lalu a’di sho’k mo tani am daḵkina gwo o mo mmo/o gwo mo ki: Dhalki bwan Tap̱a a’di miinu mo ma.

15 Dhali ’ko’da cim gwansan mo tani am deḵa tom bam is mo dhali ii ka gagamis e Pa Urushaliim mo. 16 Dhali imanciḵ gwon tiya si’da/ nyaḵki ii ki am ’peni Paŋ Kaysariyya mo. Uni suski jan ṯal ’de/ nyaḵki uni jin yuḵu gway ka Manasuun gi Paŋ Kuprus jin ta’da manciḵ gwo jin ṯwa/a/ jin mina am ’taki nyaḵ ish ki a’di mo.

17 Dhali ki am merkina e Pa Urushaliim mo tani awaḵ bu’thki am mo ki bwaŋ ’kunyga/ mo. 18 Dhali ka cim ki jim baṯẖ mo tani aBuulus ya’di bwam am eya Yakuub mo dhala ris ’kwaniŋ gwanyjaḵa/ ’kon mo. 19 Dhali ki a’di theki uni me’d mo tani a’di ṯorki uni gwo mo ka ’deṯe/ ’deṯe/ gom to kun miikin ma Arumgimis ibwaŋ ’kwani kun ’koki ta ’Kwani Yahuuda/ eya ṯu’c piti mo be. 20 Dhali ki uni ciḵki a’di mo tani uni karkina Arumgimis ki ca mo dhali uni oki a’di gwo mo ki: Misha /eya mudhu, ’kwani wakina risa e bwaŋ ’Kwani Yahuuda/ ’peni uni gun gamki gwo is mo dhali uni ’baar mo shwana nyor mo gom gwoŋḵan jin c̱inu mo. 21 Dhali uni ṯorkunu gwo mo gom /e ki /e din mo mmoṯora ris ’Kwani Yahuuda/ gwo kun ’kon ibwaŋ ’kwani kun ’koki ta ’Kwani Yahuuda/ mo mmodhal gwo ma Musa ’pen mo mmo/o uni ki uni mini dhalku/ uc̱im buni ki ’ciṯẖa/ munyjal yis buni mo dhali mmodhalku/ ki c̱iya hirdhe/ si’da/ ki mii kun onu mmomii mo. 22 Ata mina ana mii mo sa/ gom a’di mo? Uni mini ciḵ gwo ka jiŋ gana/ ki /e p̱u’dkin mo. 23 Haali/ a’di gi wakan mo tani miiyi a’di jin mina amani ’taki o /e mo. Aman tana gi ’kwaniŋ gwasi doŋon kun ’kona to i’bam buni mo be. 24 Budhi gwan mo ma dhali thosoni is pini ki dhelel dhelel nyaḵki uni mo dhali c̱a’bi /e mo ma gom to gun minu doṯ mo gom uni ki uni mini mish ’kup̱ buni ’thi mo be. Dhala ris ’kwani ’baar mo mini mish ki a’di diki ta gwoŋ gana/ gom to kun ṯorkunu uni gom /e mo hili /e ki is pini si’da/ iyan mo mmodiki tor ci ’twa/ mo mmodhu gwoŋḵan jin c̱inu mo. 25 Hili gom ’kwani kun ’koki ta ’Kwani Yahuuda/ kun gamki gwo is mo tani am ’kwarkina gwo mo mmoc̱i gwo jin gamkunu me’d mo ki uni mini non is buni mo ’peni to gun ’ciṯẖu/ mo mmomiiya basa ’cesh mmoluŋ tomp̱inycon mo dhali ’peni miin to ma bas mo dhali ’peni to gun minyciru ’kus mo dhali ’peni mo jin miinu miinyc̱al si’da/ mo. 26 Dhali ŋ’ko’d mo tani aBuulus ki bu’th ’kwani mo dhali ka cim jiŋ ’ko’d mo tani mmothosonkina a’di is piti ki dhelel dhelel nyaḵki uni mo tani a’di yaki’d e gu’b gi mondheleladhelel mo mmoc̱i gwo mmo’baara cim gi mo jin thosonkunu is ki dhelel dhelel mo ntagi to minu c̱i mo a’di jin c̱ikunu eya tente/ mo gom uni gwansani ’baar ka ’deṯe/ ’deṯe/ mo.

27 Dhali ka cim ma pesu/ ’dishki’di ’baar mo tani ’Kwani Yahuuda/ ’peni Pa Asiyya ki uni p̱arki a’di e e gu’b gi mondheleladhelel mo tani uni c̱i’thkina waambuhany ’kwani is ki mii mo dhali uni ṯẖa’thki a’di me’di is mo be 28 mmocuu gwo mo ki: ’Kwani ma Israyiil, woṯẖi/ aman mo ma. Wathi/ yansan ta a’di jin ṯorki’da ris ’kwani ’baar mo gwo mo e mo ’baar mo ap̱o/ ’kwani dhali ap̱o/ gwoŋḵan jin c̱inu mo dhali ap̱o/ mo yansan mo. Dhali a’di si’da/ suski ’Kwaniŋ Griḵi si’da/ e gu’b gi mondheleladhelel mo dhali mo yan jin ḵogu mo karkina a’di mo me’d mo jin dinuki ḵo/ mo be. 29 Haali/ uni nṯwa/a/ mishki a’di e bampa/ nyaḵka Ṯurup̱iimus jin ta Wathi/ gi Pan Ep̱asus jin ṯoshkina uni ka Buulus nsuski a’di e gu’b gi mondheleladhelel mo. 30 Dhala ris ’kwanim bampa/ cuki mis mo dhali ’kwani sokin mo imonṯal ’de/ mo dhali uni ki budha Buulus mo dhali dir a’di ka pije/ ’peni gu’b gi mondheleladhelel mo dhali ki jahanne/ acampur mu’thkunu mo be. 31 Dhali ki uni ’kon mmoŋap̱ a’di mo mmo’kosh mo tani gwo p̱u’dki’d e mis eya mancil ma askar alip̱ ki mo jin jin ma askara ji ka ris mo e Pa Urushaliimi ’baar mo ’kokin mo ka c̱ulma’th mo be. 32 Dhali ki jahanne/ a’di bu’thki i/askar mo dhali imancil ma askar iss ’kwanim pa imudhe’d mo dhali thulkin mo ka ŋwac̱a/ a’cesha p̱o/ uni mo dhali uni, ki uni mishki imancil ma askar alip̱ mo dhali mishki i/askar mo tani uni daḵana Buulus ’kosh mo. 33 Dhali yan’ko’d mo amancil ma askar alip̱ p̱u’dki’d mo ki ’dishe/ mo dhali bu’th a’di mo dhali ḵan gwo mo ki a’di minu deḵ mo ka jindhiiri su/ mo. Dhali a’di doṯki gwo mo ki a’di ta’da ja sa/ mo dhala ta miikina a’di mo. 34 Dhali kun tiya cuun mo nton ’de/ mo dhali kun tiyan tiya ibwaman ma waambuhany ’kwani mo dhali ki a’di moli gwoŋ ḵa’b yan jin ḵa’bu mo ka c̱ulma’th mo tani a’di ḵanki gwo mo ki a’di minu sus mo e gu’b gi i/askar mo. 35 Dhali ki a’di p̱u’dki’d ap̱o/ mo jin senu mis mo tani a’di warki’d ki mo jin ḵalkin ma askar a’di ime’d mo gom mii yan jin ḵal ma waambuhany ’kwani mo be. 36 Haala waambuhany ’kwani baṯẖani baṯẖi ’ko’d mmocuu gwo mo ki: Guyi a’di mo ma.

37 Dhali ka Buulus muru susu gu’b gi i/askar mo tani a’di oki’da mancil ma askar alip̱ gwo mo ki: Miga/ o gwoŋ kamu/ e /e mo ’taa? Dhali a’di o gwo mo ki: ’Twaŋ Griḵi wala /e ’taa? 38 /E diki ta Wathi/ gi Pam Masir yan si’da/ jin dhuki ’kwani alaap̱i doŋon kun ta iman’kosh tiya jwa mo mmo/eḵ mii kagahara mo dhali jin suski uni ka pije/ mombwaasho ka cim kagush yin mo ’taa? 39 Hila Buulus a’di oki gwo mo ki: Aha/ tana ji Yahuuda/ mo ’peni Pan Tharsuus gi Paŋ Kilikiyya jany ’cesh gi bampa/ jin molu mo yisa. Dhali aha/ ’thona /e mo mmodhalaa/ bway mo mmoṯor ’kwani gwo mo be. 40 Dhali ki a’di c̱iki a’di bway mo tani aBuulus mmodoshkina a’di mo eya p̱o/ mo jin senu mis mo tani a’di ki wuḵ ’kwani e ki me’d mo dhali ki mo doshki’d ki biyuu mo tani a’di ṯorki uni gwo ki ’twaŋ ’Kwani Yahuuda/ mo mmo/o gwo mo ki: