1 Dhala Aghripaas oki’da Buulus gwo mo ki: /E dhalkunu bway mo mmo/o gwo gom is pini mo. Dhala Buulus he’thki me’d piti mo dhali o gwo jin ta jiny ’ce’d shem piti mo ki:

2 Aha/ ’bora bwa ki is pem mo aMaliḵ Aghripaas ki aha/ mina o gwo jin ta jiny ’ce’d shem pem ibwambori /e ka tee yan mo goma ris to gun yera ’Kwani Yahuuda/ aha/ is ki gway mo be. 3 Haali/ /e tana amanmish mii ’baar mo dhali gwo kun doṯu/ mo si’da/ kagahara kun ’koni bwaŋ ’Kwani Yahuuda/ mo be. Haali/ a’di gi wakan mo tani aha/ yuḵa /e mmociḵ aha/ gwo mo ki bwa jin ’kuc̱u mo ki ’kari’th mo be.

4 Aris ’Kwani Yahuuda/ ’baar mo mishi miim pem ki yil gi mondiki/em pem ’peni yil pem kun ṯwa/a/ kun ’kon ka muŋ’kup̱ e bwam unim pem kun ta kal pem mo dhali e Pa Urushaliim si’da/ mo. 5 Uni mishki aha/ ’peni ṯwa/a/ mo, waḵki/ uni ta gi bwa mmoṯor gwo mo, ki aha/ dina ki ji Wathim P̱arisi mmota jim buni kun miin ka ji sho’k ki nyanye/ mii gun onu gom ji gi luŋum bam mo. 6 Dhali shwane/ aha/ dosha mahan mmominu dwall gwo goma ’teŋ kap̱e/ gom gwo jin onu is ’peni Arumgimis gi ibabam bam mo be. 7 Iwaḵ bam kun ’koni ’kume’d i’ce’dka su/ mo ḵoci e mo mmomii to goma Arumgimis ki mon’thiny ilu/ mo dhali montee mmohil ’kup̱ ki gwo jin onu is mo mmop̱u’du/ mo. Dhali goma ’teŋ kap̱e/ yan mo tani aha/ yer ma ris ’Kwani Yahuuda/ ’baar mo is ki gway mo, ayy maliḵ. 8 Ata ṯosha /e ki a’di ta gwo jin molu gam is mo waḵka Arumgimis midi ’taki ’de’k jin wu’d mo?

9 Aha/ ka jiŋ gana/ kulumkina gwo ibwa ki is pem mo ki aha/ mina mii mii to ka ris kun ta kuny c̱a’ckona p̱o/ gway ma Yesus gi Pa Naasira mo. 10 Dhali yan si’da/ miikika/ e Pa Urushaliim mo dhali uni ka ris mu’thkika/ eya sijin mo ’peni imandhunu ki she/ ki dhelel dhelel mo mmobu’thkika/ gwo ki mom’bi’th ’peni igasiis kun can mo dhali ki uni ’kokunu mo mmo’kosh jwa mo tani aha/ si’da/ c̱ikina ’twam pem ap̱o/ uni mo be. 11 Dhali mmori’cka/ uni me’d ka ris eya ris gu’b gi montul isi ’baar mo tani aha/ ṯu’ckina uni mo mmowal gwo sor mo, dhali mmoshwakika/ anyor mo isi, ki bar bar ap̱o/ uni mo tani aha/ p̱u’dkina ka pije/ mmotagi isi pan tiya si’da/ mo mmoṯo’c uni bwa mo be.

12 E moyam pem yan mo tani ki aha/ dikina mmoya e Pan Dimashk mo mmokaru aha/ ’pen mo ki mom’bi’th ’peni igasiis kun can mo tani 13 ka tente/ di’di bwaŋ ’kup̱ mo tani, ayy maliḵ, aha/ mishkina e bway moŋkush jin boli’da tente/ e ki mon’twaḵ mo mo mmo’twaḵ mo mmo’kamaa/ is mo dhali uni gun nyaḵki ii ki aha/ mo be. 14 Dhali ki aman ’baar mo ’kokina mo mmobiṯa p̱owa ’cesh mo tani aha/ ciḵkina ’twa/ jin o gwo i aha/ ki ’twaŋ ’Kwani Yahuuda/ mo ki: Shawuul Shawuul, ata ṯoca /e aha/ ’kus kan mo? A’di diṯa mii gom /e mmoruḵa /eya ruḵ ki si mo mmoṯi’k a’di ’pen mo. 15 Dhali aha/ thoḵa gwo mo ki: /E tana ja Tap̱a? Dhali Tap̱a ki o gwo mo ki: Aha/ tana aYesus jin ṯoca /e ’kus mo be. 16 Hili cuyi /e mis mo dhali doshi ki sho’k pini mo haali/ gom ’pemen yan kan tan mo tani aha/ pina /e i is mo mmothoson /e mo mmota amanmii to mo dhali mmota aman/o gwo gom to gun mishkina /e aha/ mo dhali gom to gun miga/ pi /e i is mo 17 mmo’cuḵ /e ’peni ’kwani mo dhali ’peni ’kwani kun ’koki ta ’Kwani Yahuuda/ e uni gun miga/ ṯu’c /e mmoya mo be. 18 Mmoḵa’d uni em buni mo ki uni mini ṯu’k mo ’peni mondhurumi’d ’kup̱ ki moŋkush mo dhali ’peni mom’bi’th ma Seṯaan eya Arumgimis mo, ki uni mini bu’th moŋgwam gom miinthus mo dhali mal ibwaman uni gun dhunu ki she/ ki dhelel dhelel ki moŋgam gwo is e aha/ mo be.

19 Wakan si’da/, ayy Maliḵ Aghripaas, aha/ dinaki usha ush e tony jan jin piyaa/ i is ’peni momis mo. 20 Hili aha/ c̱ikina uni gwo eya tente/ mo nṯwa/a/ uni gun ’koni Pan Dimashk mo dhali e Pa Urushaliim si’da/ mo dhali isi bwamana ris bampa/ gi Pa Yahuudiyya mo dhali e ’kwani kun ’koki ta ’Kwani Yahuuda/ si’da/ ki uni mini ’taki rica du is mo dhali mmoṯu’k ’kup ka Arumgimis mo mmomii mii gun minu gam mo jin rijuwa du is mo. 21 Gom gwo yan mo tani ’Kwani Yahuuda/ tulki aha/ me’di is mo mmobu’th mo e gu’b gi mondheleladhelel mo dhali uni murkini ’kosh aha/ jwa mo be. 22 Mmobu’thka/ mowoṯẖ jin di’d ’peni Arumgimis mo tani a’di doshka/ gama tee yan mmoc̱i gwo gom uni gun gwa’dkin mo dhali uni kun cakin mo mmo/o gwoŋ kamu/ ṯal ’de/ yisa, jasi a’di jin ona imanc̱i gwo ma Arumgimis kadhamo/ mo dhala Musa jin midi ’taki p̱u’du/ mo, 23 ka Ḵrisṯẖos yan mina isi mii ’kosh ka nyor mo dhali a’di jin midi ta amanpiya pi nṯwa/a/ jin wuki’d mo midi ’taki c̱i moŋkush ki ’kwani mo dhali ki ’kwani kun ’koki ta ’Kwani Yahuuda/ si’da/ mo.

24 Dhali ki a’di c̱iki gwo jin ta jiny ’ce’d shem piti kan mo tani P̱asṯuus oki gwo ki dhan ’twa/ mo ki: Buulus /e guskina du mo ba/. Mmomisha /e to deŋ e kagahara mo a’di ṯu’k /eya du mo mmogus mo. 25 Hila Buulus oki gwo mo ki: Aha/ dinaki gusa du mo ba/ P̱asṯuus /e jin ta jim ’borga/ mo hili aha/ ona gwoŋ gana/ mo dhali ka du jin ḵuthi/ is ki ’cese/ ’cese/ mo be. 26 Haala maliḵ mishki to gwansan mo. E a’di si’da/ aha/ ona gwo ki dar gi monyju/ mo gom aha/ laluwa du sho’k gom toŋ kamu/ ṯal ’de/ ’peni ’kwani gwansan yisa di’da jin bagu mo ’peni a’di mo haali/ mii yansan yisa miikunu ki tar mo. 27 Maliḵ Aghripaas, gwo ’peni imanc̱i gwo ma Arumgimis kadhamo/ gamkina /e is mowa? A’di mishga/ ki /e gami gwo is mo. 28 Dhala Aghripaas oki’da Buulus gwo mo ki: A/e palaa/ ki ari mompal mmolal aha/ sho’k ki gwo mo jin miga/ war ka Ḵrisṯẖiyan mo? 29 Dhala Buulus oki gwo mo ki: Aha/ mishayi ka Arumgimis ki ari pal walla ki dhan mompala caaga/ mo, yisa /e ’deya, hili si’da/ uni ’baar mo gun ciḵki aha/ ka tee yan mini ’taki war mo mmowa e ki aha/ isi ciki/ ki dar gi mondeḵ gwansan mo be.

30 Dhala maliḵ cu mis mo dhala mudhiir dhala Barniiki mo dhali uni gun nyaḵki ’ko ki uni mo. 31 Dhali ki uni thoṯẖkin ka pije/ mo tani uni c̱iki gwo ka rem ’kup̱ mo mmo/o gwo mo ki: Wathi/ yan diki mii toŋ kamu/ jin midi gam ’pemen jin ta ji gi wu mo walla jin midi ta jin minu deḵa deḵ mo be. 32 Dhala Aghripaas oki’da P̱asṯuus gwo mo ki: Wathi/ yan minu ’taki kar ki ’kus mo waḵki/ a’di midi ’taki diki yip̱ ’kup̱ ’kup̱ ka Kaysar mo be.