1 Itap̱a, miiyi c̱iŋkinam bum kun yola um ki mii ma ḵar/e mo dhali ki dar gi mii ma gwar ’de/ mo, mmomisha um si’da/ ki um ta gi Tap̱am bum e momis mo.

2 Ṯikiri mosho’k ṯel mo e mon’tho mo mmotimkina uma tim mo gom a’di ki mo jin ’boruwa ’bor bwa i is mo 3 dhali ’thoyi mo gom am si’da/ ka Arumgimis midi ’taki ḵa’d amana campur gom gwo mo, mmobah gwo ma Ḵrisṯẖos jin c̱inu ki jim bag mo gom gway gi a’di jin dikika/ eya sijin mo 4 ki aha/ mina ’taki ṯor a’di eya tente/ me’d jin miga/ ’taki ṯor a’di ḵa ba/.

5 Boṯi ki mii ki is bum gana/ ki yuḵ yuḵ mo ’kup̱ki uni gwansan kun ’kona pije/ mo mmowara tee is mo. 6 Dhalki gwom bum kun ona um isa yempa/ mo ta gwo ma ’the mo dhali kun c̱emesa c̱emes ka ’doŋkoro/ mo, wakan ki um mini mish mo mo gwo kun mina um ḵa ba/ ithoḵ ’kwani ’baar ka ’deṯe/ ’deṯe/ mo.

7 Tiḵikus a’di midi ṯor uma ris to ’baar mo kun miika/ mo. A’di ta’da kam bana jin enu mo dhali ta a’di isiŋ gana/ mmomii to mo dhali agarr jin ta’da manmii to e Tap̱a mo be. 8 Aha/ hashkina a’di i um mo gom isi gwoŋ ’kup̱ gwo yan gana/ mo ki um mini mish mo mo gom ’kom bam jin ’kona am mo dhali ki a’di midi ’taki ’bi’th uma dum bum is mo, 9 dhali nyaḵki a’di mo si’da/ a’di jin ta’da Unisiimus mo, a’di jin ta isiŋ gana/ mo, dhali jin ta’da kam bana jin enu mo, a’di jin ta jan ’de/ gi is bum gana/ mo. Uni mini ṯor uma ris to ’baar mo kun buthi mo mo e mo yan mo.

10 Aristarḵus jin ta’da agarr pem jin nyaḵkaa/ c̱a’b eya sijin mo tani theki um me’d mo dhala Markus jin ta nam ma Barnaaba mo (isi gwo gom a’di jin bu’thkina um mmoye’thkunu um sho’k ki gwo mo – waḵki/ a’di midi p̱u’dku/ i um mo tani buthi a’di mo ma), 11 dhala Yesuu/ a’di jin yuḵkunu gway ka Yusthus mo. ’Kwani gwansan uni ta jasi uni kun ’ciṯẖkunuwa munyjal yis mo e bwaman uni kun nyaḵkaa/ ṯu’c mii mo gom Bampa/ ma Arumgimis mo, dhali uni ita momalas pem mo be. 12 Abap̱raas, a’di jin ta jan ṯal ’de/ ki is bum mo, jin ta’da manmii to goma Ḵrisṯẖos jin ta’da Yesus mo tani theki um me’d mo, isa yempa/ mmoka um e mo ka dun dara’d mo e mon’thom piti mo, ki um mini ’taki dosh mo me’d ku gi isin mo dhali mmomish mo ki isi mish gana/ ’baar mo a’di jin ta bwa ma Arumgimis mo be. 13 Haali/ aha/ tana aman/o gwo gom a’di mo haali/ a’di miiki’da ṯu’c jin ’batha’ba’th mo gom um mo dhali gom uni gwansan kun ’kon e Pa Lawudikiyya mo dhali e Pa Hiyarabulis mo be. 14 ALuuka, a’di jin ta’da hakiim jin enu mo dhala Dimas mo theki um me’d mo. 15 C̱iki monthe me’d pem eya waḵ kun ’kon e Pa Lawudikiyya mo dhali eya Nimp̱aas mo dhala ḵaniisa jin di’d e gu’b ma yim mo. 16 Dhali ki gwo yansan deŋkunu e mo e bwam um mo tani dhalki a’di si’da/ deŋu e mo eya ḵaniisa gi Pa Lawudikiyya mo be dhali hili ki ’bore/ ki um ki deŋ gwo yan e si’da/ gwo ’peni Pa Lawudikiyya mo. 17 Dhali oya Arḵibbus gwo mo ki: Hili ki ’bore/ ki /e mini thim to mii mo a’di jin bu’thkina /e ’peni Tap̱a mo.

18 Aha/ Buulus i’kwarkina gwo monthe me’d yan ki me’d pem gana/ mo. Kayi amaḵḵiyam pem e jin deḵkunu aha/ mo. A’the midi di gom um mo.