1 Uc̱iya, hayi gwo gi ibabam bum e mo dhali ikwan mo e Tap̱a mo, haali/ a’di yansan ta miim ’boro’d mo be. 2 Taḵi ibabam bum mo dhali ikwan mo (Gwo yansan ta gwoŋḵan jin ’kwarkunu mo jin ta jin ṯwa/a/ mo jin ta gi gwo jin onu is mo.), 3 ki a’di midi ’taki ’bor mo gom um mo dhali ki um mini ’taki ’ko ki ’kom ’pempaŋ gana/ e mony’cesh mo. 4 Ibaba, dhalku/ ki rukuny uc̱i ka nyor mo, hili thip̱i uni mo e mo jin ’dap̱uwa bora ’cesh mo dhali e mo jin yedhuwa ye’th sho’k ki gwon Tap̱a mo.

5 Um c̱iŋkina/ gun yolu mo, hayi gwo gi uni gwansan e mo kun ta tap̱am bum e mony’cesh mo ki moŋḵo/ is mo dhali ki mondee mo ka dun ṯal ’de/ mo me’d mii jin miina um goma Ḵrisṯẖos mo, 6 yisa e bway gi jis/e jin miina ’kwani to mo, mmo’bor ’kwani bwa mo ’te/ yisa, hili me’d uni kun ta c̱iŋkina/ kun mii to goma Ḵrisṯẖos mo mmomii bwa ma Arumgimis ’pena du mo, 7 mmomii to ki bwaŋ gana/ mo me’d mii jin miina um gom Tap̱a mo, dhali yisa gom ’kwaniya, 8 mmomisha um ki ma to gunn kun miina kun tiya ki ’bore/ mo tani a’di midi bu’th to jin nyaḵa’d kan doḵ/e mo ’peni Tap̱a mo waḵki/ a’di ta c̱iŋkina/ jin yolu mo walla ta a’di jin di ki ’kus mo be. 9 Itap̱a, miiyi to kun nyaḵan gom uni mo ma, dhali ’doyi bwa ka ’kany’cesh mo ’peni mo jin shwanuwa ’cesh ki sho’k mo, mmomisha um ki a’di jin ta Tap̱am buni dhali Tap̱am bum mo tani a’di di’d e momis mo, dhali mo jin miinuwa mii ka gwar ’de/ yisa di’da e a’di mo be.

10 Ḵwalany ’te/ be. ’Bithi um is mo e Tap̱a mo dhali e mom’bi’th ma dem dem piti mo. 11 Hithi agoŋgoro/ ma Arumgimis ka ’bimpil mo ki um mini mish dosh mo ap̱owa ’kanyco/ gi tap̱a ma ruma ’cesh mo. 12 Haali/ ana ’konaki ’thir mo ap̱o/ buŋgwar is mo dhala bas mo, hili ap̱o/ mom’bi’th kun molu gadhir mo dhali ap̱o/ mom’bi’th mo, dhali ap̱o/ itap̱a kun ji mony’cesh yan mo jin ta mondhurumi’d mo shwane/, dhali ap̱owa risa buhany shi/in thus kun ’koki ta gi buŋgwar is ga ’cesh mo e mo kun ’kon e momis mo. 13 Wakan budhi agoŋgoro/ ma Arumgimis ka ’bimpil mo ki um mini mish dosh mo mmoroc̱ mo ka tee jin ta thus mo dhali mmothimkina um a’di mo tani mmodosh mo be. 14 Doshi um wakan mo mmodeḵ wac̱kan gi gwoŋ gana/ mo e empa’d bum mo dhali hithi arac̱pa/ gi mii ma ḵar/e mo 15 dhali mmo’kamu’thkina um sho’k bum ki mo jin thosonkunu mo ki gwom ’borga/ mo gi mo ma ḵu’th is mo be. 16 Ap̱owa ris mii gwansani ’baar mo tani budhi agoŋgoro/ me’d bum mo, a’di jin ta moŋgam gwo is mo, haali/ e a’di mo tani um mini mish usa ris shemen toŋ kan kun ’bathan kun shina a’dinthus ’de/ yin mo. 17 Dhali budhi toŋ’kup̱ ki bway mowoṯẖ mo dhali gandala turga/ gi Shi/in mo, a’di jin ta gwo ma Arumgimis mo be. 18 Thoyi isa yempa/ e Shi/in ka risa ’tho mo dhali ka di’b is jin di’bu/ mo, ki um mini ’dim ’kup̱ mo ki montim mo mo mmodi’ba di’b is goma ris uni ’baar mo kun dhunu ki she/ ki dhelel dhelel mo be. 19 Dhali gom aha/ si’da/ ki mo jin bahkunu gwo mo minu ’taki c̱i aha/ mo e ’twam pem jin miga/ c̱ee mo ki dar gi monyju/ mo mmobah gwo jin c̱inu ki jim bag mo, a’di jin ta gwom ’borga/ mo. 20 Haali/ aha/ tana amanya eya jindhiir mo gom a’di mo jin miga/ ’taki bah a’di eya tente/ ki dar gi monyju/ mo me’d jin miga/ ḵa ’taki ṯor gwo mo ba/.

21 Dhali ki um si’da/ mini ’taki mish mo mo gom mondim pem mo dhali mii jin miga/ mo tani Tiḵikus, a’di jin ta’da kam bana jin enu mo dhali a’di jin ta isiŋ gana/ mo e miin to gi Tap̱a mo tani midi ṯor um gwo mo goma ris to ’baar mo be. 22 Aha/ hashkina a’di i um mo gom ’kup̱ gwom bwam ’boro’d yan mo, ki um mini ’taki mish mo mo ki aman anann be, dhali ki a’di midi ’taki ’bitha dum bum is mo be.

23 Moŋḵu’th is midi di mo gom iwaḵ mo dhali mo/en nyaḵki moŋgam gwo is mo ’peni Arumgimis jin ta’da Baba mo dhali Tap̱a Yesus Ḵrisṯẖos mo be. 24 A’the midi di mo gom umi ’baar mo, um gun enki Tap̱a Yesus Ḵrisṯẖos bana mo ki mo/en jin midi diki wuwa mashira/ mo be.