1 Yan’ko’d TAP̱A thoḵki’da Musa gwo mo ki: Shwane/ /e mini mish to jin miga/ miiya P̱irawn mo haali/ ki me’d pem jin ’bitha’bi’th mo tani aP̱irawn midi hashki uni ka pije/ mo. Nye, ki me’d pem jin ’bitha’bi’th mo tani a’di midi ur uni ka pije/ ’peni bampam piti mo be.

2 Dhali Arumgimis ki owa Musa gwo mo ki: Aha/ tana TAP̱A mo. 3 Aha/ pikina Ibrahiim i is dhala Is/haḵ dhala Yakuub mo me’da Arumgimis jin c̱a’b ki dem dem mo. Hili gom gway pem jin taka/ TAP̱A mo tani aha/ dina ki dhal gway yan bway mo uni ki mish aha/ mo be. 4 Aha/ si’da/ ṯela gwom pem jin gamga/ me’d ki mondeḵ nyaḵki uni mmoc̱iki uni Paŋ Kanaan mo e bampa/ jin ’kona uni ’pena gush ki hilkina/ mo be. 5 Dhali aha/ si’dayi ciḵa ohon gi ’kwani ma Israyiil mo uni kun dhukina ’Kwani Masir mo mmota c̱iŋkinam buni mo. Dhali aha/ kakina gwom pem e jin gamga/ me’d mo.

6 Oyi gwo cikise/ mo e ’kwani ma Israyiil mo ki: Aha/ tana TAP̱A mo dhali aha/ mina sus um ka pije/ mo ’peni ton diṯin gi ’kwani Pa Masir mo dhali aha/ mina ’cu’k um mo ’peni mii jin miina uni um ki c̱iŋkina/ mo. Dhali aha/ mina wan um ’ba/ mo ka bim pem jin miga/ ye’th ka pije/ mo dhali ki dhan mii jin caaca ki gwon dwall mo be. 7 Dhali aha/ mina bu’th um ki ’kwanim pem mo dhali aha/ mina ta Arumgimis bum mo. Dhali um mini mish mo mo ki aha/ tana TAP̱A Arumgimis bum mo a’di jin suski um ka pije/ mo ’peni aris ton diṯin gi ’Kwani Masir mo be. 8 Dhali aha/ mina sus um ka pije/ mo e bampa/ jin oka/ gwo is ki gwon deḵ mo mmoc̱ika Ibrahiim mo dhala Is/haḵ mo dhala Yakuub mo be. Aha/ mina c̱i ki um a’di mo mmota mo jin mina umi bu’th is mo. Aha/ be i tana TAP̱A mo be.

9 Musa si’da/ oki yase e ’kwani ma Israyiil mo, hili uni ’koki ciḵ gwo ma Musa haali/ shi/in buni i ’ce’dkunu bwa mo dhali gom miiny c̱iŋkinam buni jin maṯẖamaṯẖ mo be.

10 Dhali TAP̱A ki owa Musa gwo mo ki: 11 Yaku/ /e mo dhali ṯora P̱irawn gwo mo a’di jin ta’da maliḵ gi ’kwani Pam Masir mo mmodhalki ’kwani ma Israyiil bway mo mmo/ii ka pije/ mo ’peni bampam piti mo.

12 Hila Musa thoḵki TAP̱A gwo mo ki: Hili waḵki/ ’kwani ma Israyiil ush gwo ciḵ ’peni aha/ mo tani bakata i min ma P̱irawn i ciḵ aha/ ’twany c̱umpulgam pem yan mo? 13 Hili TAP̱A oki iMusa uni ka Haruun gwo mo gom ’kwani ma Israyiil mo dhali goma P̱irawn mo a’di jin ta’da maliḵ gi ’kwani Pam Masir mo. Dhali a’di ḵanki iMusa mmosus ’kwani ma Israyiil ka pije/ mo ’peni Bampa/ Masir mo be.

14 Gwansan uni tana ’kaŋ’kup̱ gom kuŋ gu’b gi ibabam buni mo, gway gi iya/ ma Ra/ubiin mo a’di jin ta’da bwanyara/ ma Israyiil mo: Hanuuḵ dhala P̱allu dhala Hasruun dhala ḵarmi mo. Uni gwansan i tana waḵ ma Ra/ubiin mo be.

15 Gway gi iya/ ma Shim/uun si’da/ aniihe/ mo. Yamu/iil dhala Yamiin dhala Uhad dhala Yakiin dhala Suhar dhala Sha/uul jin ta ya/ ’pena ’bom gi Paŋ Kanaan mo. Uni i tana waḵ ma Shim/uun mo be.

16 Gwansan si’da/ i ta gway gi iya/ ma Lawi mo isi me’da nyaḵum yil buni kun tana uni mo: Jirshuun dhala Gahaat dhala Maraari mo. Dhali yil ma Lawi jin dikina a’di ki e mo tani ’koni 137 mo be. 17 Dhali gway gi iya/ ma Jirshuun aniihe/ mo: Libni dhala Shim/i nyaḵka waḵ buni mo be.

18 Dhali gway gi iya/ ma Kahaat aniihe/ mo: Amraam dhala Yishaar dhala Hibruun dhala Usi/iil mo. Dhali yil jin dikin ma Kahaat ki e mo ’koni 133 mo be.

19 Dhali gway gi iya/ ma Maraari aniihe/ mo: Mahli dhala Mushi mo: Gwansan uni tana waḵ gi ’kwani Lawi mo isi me’da nyaḵum yil buni mo be.

20 Amraam bu’thki’da ’bom jin yuḵu ka Yukabed mo a’di jin ta ’bwah ma babam piti mo dhala yim dho’thki a’diya Haruun mo dhala Musa mo. Dhali yil piti jin dikina a’di ki e mo tani a’di ’koni 137 mo be.

21 Dhali gway gi iya/ ma Yashar aniihe/ mo: ḵuurah dhala Napu’c dhala Sikri mo be.

22 Dhali gway gi iya/ ma Usi/iil aniihe/ mo: Misha/iil dhala Elsap̱aan dhala Sitri mo be.

23 Haruun si’da/ bu’thki’da ’bom jin yuḵu gway ka Alishaba/ mo a’di jin ta ’bwa/ ma Aminadab mo dhali a’di jin ta ’bwah ma Nahshuun mo. Dhali ayim dho’thki a’di aNadaab dhala Abiihu dhala Eli/asar dhala Iṯẖamaar mo be.

24 Dhali gway gi iya/ ma ḵuurah aniihe/ mo: Assiir dhala Elḵana dhala Abi/asaap̱ mo. Gwansan uni i tana waḵ gi ’kwaniŋ ḵuurah mo.

25 Ili/assar a’di jin ta ya/ ma Haruun mo a’di bu’thki’da ’bom ’de/ mo ’peni ’bwa/ ma Puṯi/iil mo. Dhala ayim dho’thki a’di a P̱inihas mo. Gwansan uni i tana ’kaŋ’kup̱ gu’b ’kwani ma Lawi mo ’pena waḵ buni mo be.

26 AHaruun dhala Musa uni anansan kun ona TAP̱A gwo mo ki: Susu ’kwani ma Israyiil ka pije/ mo ’peni Bampa/ Masir mo ka waḵ buni mo. 27 Uni i ta uni kun oki gwo eya P̱irawn jin ta’da maliḵ gi ’kwani Pa Masir mo mmomuri susu ’kwani ma Israyiil ka pije/ mo ’peni Pam Masir mo, aMusan ’de/ yan mo dhala Haruun mo be.

28 Ka tee yin jin okina TAP̱A gwo eya Musa e Bampa/ Masir mo tani 29 TAP̱A oki’da Musa gwo mo mmo/o ki: Aha/ tana TAP̱A mo. Ṯori aP̱irawn jin ta’da maliḵ gi ’Kwani Masir aris gwo kun oka/ /e ’baar mo.

30 Hila Musa thoḵki TAP̱A gwo mo ki: Aha/ wana ’twam pemi c̱umpula/ ki jin ta’da tinta i min ma P̱irawn i ciḵ ’peni aha/ mo?