1 Dhali yan’ko’d TAP̱A oki’da Musa gwo mo ki: Yaku/ aP̱irawn mo haali/ aha/ i’bi’thkina a’di adum piti is mo dhala du gi aris ’kwani kun miiki a’di aṯu’c mo ki aha/ mina mii aris miimer pem gwansan i bwamani uni mo. 2 Dhali ki /e mini mii ṯor gwo mo ki uc̱im pini mo dhal ki uc̱i gi iya/in mo gom mon’the is jin ’thekika/ ’kwani Pam Masir mo ka tee jin miikika/ miimer e bwaman uni mo. Um ’baar mo mini mish mo mo ki aha/ tana TAP̱A mo.

3 Wakana Musa dhala Haruun uni iikina P̱irawn mo dhali o a’di gwo mo ki: Yase/ ta gwo jin ona TAP̱A mo a’di jin ta ’da Arumgimis gi ’kwani Ibraniyiin mo. Me’di ekata i mina /e i c̱a’bi ush is pini kar ki gwa’d kan mo ibwambori aha/ mo? Dhalki ’kwanim pem bway mo mmo/ii mo ki uni mini mii mii mmotaḵ aha/ ki momaŋ mo be. 4 Haali/ waḵki/ /e mini ush ’kwanim pem dhal bway mo mmo/ii mo tani, ka’thamoŋ gana/ aha/ mina hasha waambuhanya kuyu/ e bampam pini mo. 5 Dhali uni mini tiḵa ’cesh e mo, wakan ki wathin ṯal ’deŋ kamu/ midi diki misha ’cesh mo. Dhali uni mini shwa to ki c̱a’ba c̱a’ba kun urki ’kup̱ mo i’ko’da wassa/ mo. Dhali uni mini shwa aris cwam bumi ’baar mo kun cakin mo e mondhe’d mo be. 6 Dhali uni si’da/ mini ’tu’d aris gu’b pini mo dhali aris gu’b gi ’kwanim pini kun miiki /eya ṯu’c mo dhali aris gu’b gi ’kwani Pam Masiri ’baar mo. To gi wakansan yisa mishkina ibabam pini mo dhali idhan cim mo ’pena tee c̱aan jin p̱u’dkina uni e mo yan mo ntagi shwane/ mo yisa. Dhali yan’ko’d aMusa ṯu’kki’da bor mo ’pena P̱irawn mo dhali ya ka pije/ mo be.

7 Dhali ’kwani kun miikina P̱irawna ṯu’c mo tani oki a’di gwo mo ki: Me’d ekata i mina wathi/ yan ic̱a’bi yap̱ ana ka gumme/ wakan mo? Dhalki ’kwani iin mo ki uni mini mii mii mmotaḵ TAP̱A Arumgimis buni mo. /E mala ṯumu’c pini mmomol gwo ’ban naskinaŋ gana/ mo? Dina /e ki mish gwo ’ban ki Pam Masir ’ce’dkunu shoka?

8 Yan’ko’d aMusa dhala Haruun uni susunu ka nyaŋ’ko’d eya P̱irawn mo. Dhala P̱irawn ki o uni gwo mo ki: Iiku/ mo mmomii mii mmotaḵ TAP̱A jin ta’da Arumgimis bum mo. Hili ija uni i mini ii mo?

9 Dhala Musa ki thoḵ a ’di gwo mo ki: Aman mina ii nyaḵki dhuru’c bam mo dhali nyaḵki ’kwani kun tana dhan mo. Dhali aman mina ii nyaḵki iya/m bam mo dhali i’bwa/m bam mo dhali ura ma’diny ḵa’bal bam mo dhali aris bip̱ bam mo haali/ aman mina mii ta gi dhan moshwan to mmotaḵ TAP̱A mo be.

10 Dhala P̱irawn ki o uni gwo mo ki: Dhalki TAP̱A di’d e um mo ma, waḵki/ aha/ dhala um bway mo mmo/ii mo nyaḵki uc̱im bum mo. Um ta gi gwon thusa tiya eya dum bum mo ba/. 11 Yisa wakan ’teya. Iiku/ mo um ’kwaniŋgwaṯẖ um ’cena mo dhali miiyi mii mmotaḵ TAP̱A mo. Haali/ mii a’dan jin gwon ma dum bum mo. Dhala Musa uni ka Haruun urkunu ka pije/ ’peni buŋ’kus ma P̱irawn mo be.

12 Dhali TAP̱A oki’da Musa gwo mo ki: ’Deki me’d pini mo ap̱o/ Bampa/ Masir mo goma kuyu/ mo ki uni mini ṯẖathu ki sheŋ ’kup̱ mo eya ’cesh gi Pam Masir mo dhali shwa aris to kun sinu mo e bwam bunto mo aris uni ’baar mo kun urkin ma wassa/ ’kup̱ mo be.

13 Wakan aMusa a’di ihe’thki’da lukaas piti mo ap̱o/ Bampa/ Masir mo. Dhali TAP̱A ḵalki ’tham gi mom’pesho’k mo mmoposh ka enthus mo ka cim c̱aan ki mon’thiny ilu/ mo. Dhali ki mo ta mon’thamo/ mo tani ’tham gi mom’pesho’k a’di i ḵala’da risa kuyu/ mo be. 14 Dhala waambuhanya kuyu/ ṯẖa’thkin ap̱owa ’cesh gi Pam Masir mo dhali thoson is buni mo mmo’ko mo e dhan Bampa/ Masiri ’baar mo. Adhana kuyu/ shwan ma risa nyor kagahara mo. Ji gi wakansan yisa mishkunuwa, dhali a’di midi doḵ e di ki sule/ sule/ mo yisa. 15 Uni kumkina ’ceshi ’baar mo. Wakan a’cesh ki ḵar ’kup̱ ki dhurum mo mo. Dhali uni shwaki to kun sikunu mo e mony’cesh mo dhali aris maman to ’peni uni kun urkin ma wassa/ ’kup̱ mo. Ton dhi/i’da kamu/ yisa boc̱o’da walla cwa si’da/ walla to kun sinu mo em bunto mo ki tur eya ’cesh gi Pam Masir mo.

16 Dhali yan’ko’da P̱irawn yuḵki’da Musa dhala Haruun ki jahanne/ mo dhali o uni gwo mo ki: Aha/ miikina miinthus ap̱o/ TAP̱A Arumgimis bum mo dhali ap̱o/ um mo be. 17 Dhali shwanesan gwami aha/ miinthus pem jasi me’d ’deŋ gana/ mo. Dhali ’thoyi TAP̱A Arumgimis bum mo gom aha/ mo mmojoc̱ ki mompal jin ’kosho’da ’kosh jwa mo ’peni aha/ mo.

18 Wakan aMusa yaki’d ka pije/ ’pena P̱irawn mo dhali ’thoki TAP̱A mo be. 19 Dhali TAP̱A aḵki ’tham gi mompesho’k a’ban e mo mmowar ka bora luŋgu’b mo jin ’bitha’bi’th mo a’di jin yu’dki’da buhanya kuyu/ mo dhali ḵal uni sho’k mo e Yi’deŋ ḵummam ’Per mo. Ara kuyuŋ kamu/ ’de/ yisa di’d jin dhalkunu mo e Bampa/ Masira. 20 Hili TAP̱A ’bi’thki’da P̱irawn adum piti is mo dhali a’di diki dhal ’kwani ma Israyiil bway mo mmo/ii mo be.

21 Dhali yan’ko’d TAP̱A oki’da Musa gwo mo ki: Ṯe’dki me’d pini ’kup̱ ki momis mo ki mondhurumi’d jin ’ceṯẖe’da ’tum midi wuma p̱o/ Pam Masiri ’baar mo. Mondhurumi’d mina moŋkusha kamu/ i diki di ce e mo. 22 Wakan aMusa ṯe’dki me’d piti ’kup̱ ki momis mo dhali dhan mondhurumi’da ’tum diki’d mo e Bampa/ Masir goma cimi kwara mo be. 23 Wathiŋ kamu/ yisa di’da jin mishi tiyan tiya p̱ar e mo yisa. Walla jin ṯal ’deŋ kamu/ yisa cuki mis mo ’peni mom piti mo ka cimi kwara mo. Hili aris ’kwani ma Israyiil uni a’di i ta gi moŋkush mo e mo jin ’kokina uni mo be.

24 Dhali yan’ko’d aP̱irawn yuḵki’da Musa mo dhali o gwo mo ki: Iiku/ mo mmomii mii mmotaḵ TAP̱A mo ki up̱ bumi lu/ mo. Dhali uc̱im bum si’da/ mini nyaḵ ii ki um mo. Hili dhalka ma’diny ḵa’bal dhali aris bip̱ bum i mini ’koku/ maṯaan mo.

25 Hila Musa thoḵki gwo mo ki: /E mini mii dhal aman bway si’da/ mo mmota gi to jin mina aman i miiya basa ’cesh mo dhali to kun miinu mo kun c̱inu ki me’d mo jin ’thanu o’d ka kuluny ki aman mina c̱iki a’di TAP̱A Arumgimis bam mo be. 26 To em bam si’da/ mini mii ii nyaḵki aman mo, To e ’deŋ kamu/ yisa minu dhalku/ i’ko’d yisa, haali/ aman mina mii bu’th uni mo dhali mii mii mmotaḵ TAP̱A Arumgimis bam mo. Dhali aman yisa misha to kun mina aman i mii i ’ci’th ’kus naskina/ gom TAP̱A yisa ntagi aman mina p̱u’dku/ i mun mo be.

27 Hili TAP̱A a’di i ’bi’thki’da P̱irawna du is mo dhali a’di diki dhal uni bway mo mmo/ii mo be. 28 Dhala P̱irawn ki owa Musa gwo mo ki: Guki jis em pini mo ’peni aha/ mo. Mishi gwo ’ban ki /e mini diki doḵu/ ka nyaŋ’ko’d doḵ e mo. Dhali ka cim jin mina /e i p̱ar jis em pem e mo tani /e mini wu mo be.

29 Musa thoḵki a’di gwo mo ki: Me’d jin ona /e mo tani aha/ si’da/ mina diki p̱ar jis em pini e ki sule/ doḵ e mo be.