1 Dhali TAP̱A oki iMusa uni ka Haruun gwo mo e Pam Masir mo ki: 2 Appee yansan a’di ta’da ppee jin ṯwa/a/ ki yil gom um jin mina umi ṯel ’pen goma risa ppee i ’baar mo. A’di midi ta appee jin ṯwa/a/ ki yil gom um mo be. 3 Ṯora risa ŋul ’kup̱ ’kwani ma Israyiil gwo yan mo ka cima ’kume’d ka ppee yansan mo tani uni mini bu’th ushi ḵa’bal gwaṯẖan mo, wathi/ ka ’deṯe/ ’deṯe/ ’peni gu’b gi ibabam buni mo isi me’d jin wana a’di kan mo, ḵa’bala ’de/ gom gu’b ka kuluny mo be. 4 Dhali waḵki/ kuŋgu’b ka kuluny gwa’da she/ mo gom ḵa’bala ’de/ mo tani dhalki uni nyaḵ ḵa’bal ki gu’ba kamu/ mo jin ’dish uni is mo. Uni mini deŋ ’kwani e me’d isa nimira jin midi p̱ar shum isi me’d mo be. 5 ḵa’bal bum mini mii dar gi thalkin mo, ’pena rasan jin dina yili ’de/ gana/ mo. Um mini bu’th a’di ’peni bwaŋ ḵa’bal mo walla ’peni bwam mi mo. 6 Dhali um mini dhu uni ki ’bore/ mo ntaga cimi ’kume’d i’ce’d ka doŋon ka ppee yansan mo. ’Kwani ma Israyiil ka ŋul ’kup̱i ’baar mo mini ’kosh ḵa’bal buni jwa mom ’penḵaskum mo be. 7 Dhali yan’ko’d mo tani uni mini ’thup̱a bas mo dhali ’kosh a’di e cwa gi ’twaŋkal gu’b ka ’ban su/ mo dhali i cwa gi buŋ’kup̱ ma campur gu’b mo kun ’kokina uni mmo’ka shum mo be. 8 Uni mini ’thos shum ki isi o’d dhali ’ka a’di ki mon’thinya ’de/ c̱aan mo! Dhali uni mini ’ka a’di nyaḵki jasse/ jin ḵa/aḵa/ mo dhali nyaḵki maaŋḵuthu’d jin miinu ki dar ga cumaṯ mo. 9 Dhalku/ shum ki ’ka ki ’de/ mo walla dhalku/ a’di ki shun ki yi’de/ mo. Hili ’thosi a’di ki o’d mo ki ’kup̱ ilu/ mo dhali ki ’basho’k ilu/ mo dhali ka ris to ’baar kun ’koni bwaman buŋgwar is ilu/ mo be. 10 Dhali um mini dhalku/ shuma kamu/ ki boc̱ ntagi mon’thamo/ mo. Waḵki/ kun tiya boc̱a umi ta gi mon’thamo/ tani ’thayyi um uni o’d mo ka jiŋ gana/ mo. 11 Bwaya ’dihe/ jin mina um i ’ka a’di mo: Deḵi wac̱kan e empa’d bum mo dhali hitha p̱p̱am bum mo dhali ḵala lukaas e me’d bum mo, dhali um mini ’ka shum ki yap̱ yap̱ ise/ ki jahanne/ mo. Haali/ a’di ta Mompe’kup̱anyolos gi TAP̱A mo be.

12 Dhali aha/ mina pe ki tur e Bampa/ Masir ki mon’thiny c̱aan mo. Dhali aha/ mina ’kosha bwanyara/ gi Pam Masir ’baar mo uni kun tana gwaṯẖ mo dhali ki to e ilu/ mo. Dhali arum p̱inycon jin luŋa uni mo tani aha/ mina dor uni mo. Aha/ be i tana TAP̱A mo be. 13 Abas a’di i midi ta jamas mmomish gwo ’ban gom moŋ’kom bum mo. Dhali ki aha/ mina p̱ara bas e mo tani aha/ mina pe um ’kup̱a nyolos mo. Dhali mii shi/gaŋ kamu/ yisa midi biṯa p̱o/ um mo mmo’ce’d um sho’k mo me’d jin miga/ ’kosh Bampa/ Masir mo yisa.

14 Atee midi ta jim bum jin mina umi ka e mo. Um mini ta gi dhan moshwan to mmotaḵ TAP̱A mo. Um mini nyoŋ a’di me’d gwoŋḵan jin mina umi mii ki tur e emen bum ki sule/ sule/ mo be. 15 Um mini shwa maaŋḵuthu’d jin miinu ki dar ga cumaṯ goma cimi pesu/ mo. Dhali ka cim jin ṯwa/a/ mo tani um mini ḵala cumaṯ bum sho’k ka pije/ mo ’peni aris gu’b bum mo. Jan ṯal ’deŋ kamu/ midi diki shwa ji gi din ma cumaṯi e mo’pena cim jin ṯwa/a/ ntaga cimi pesu/ mo. Haali/ waḵki/ wathiŋ kamu/ shwa to ka maḵ tani minu ’ciṯẖ ’twa/ mo ’peni ’kwani ma Israyiil mo be. 16 Ka cim jin ṯwa/a/ mo tani um mini ta gi mo ma tul ’kup̱ jin ḵogu mo. Dhali ka cimi pesu/ mo doḵ e um mini ta gi mo ma tul ’kup̱ jin ḵogu mo. Aṯuca kamu/ minu mii ka tee gwansan yisa, hili jasi to jin miin ma ris ’kwani ’baar ka ’deṯe/ ’deṯe/ i shwa mo a’di mina umi i mii thoson jasi is mo be.

17 Um mini kar Dhan Moshwan To gi Maaŋḵuthu’d jin miinu ki dar ga cumaṯ mmotaḵ TAP̱A ki sule/ mo be. Haali/ a’di ta’da tee yan gana/ jin ḵalkika/ waḵ bum ka pije/ ’peni Pam Masir mo. Ka cim yansan ’ko’di yili ’baar mo tani um mini shwa maaŋḵuthu’d jin miinu ki dar gi cumaṯ mo ki dhan mombuṯ yan mo be. 18 Dhali ka cim jin ṯwa/a/ jin ta’da ’kume’d i’ce’d ka doŋon ma ppe mo mom’pimpili/ mo tani um mini shwa maaŋḵuthu’d jin miinu ki dar ga cumaṯ mo dhali wakan si’da/ ntaga cim iss ’de/ i’ce’d ’de/ ka ppe mo mom’pimpili/ mo be. 19 Haali/ goma cima pesu/ mo tani acumaṯa kamu/ minu gam yisa eya ris gu’b mowa. Dhali waḵki/ unin tiya shwaki maaŋḵuthu’d jin miikunu ka cumaṯ mo tani ’kwani gwansan minu ’ciṯẖ ’twa/ mo ’pena ŋul’kup̱ gi ’kwani ma Israyiil mo be. Nyaḵka’d kan waḵki/ a’di ta wathi/ jin yayi yilkina/ mo walla wathi/ gi bampa/ mo be. 20 Dhalku/ maa jin minu ka cumaṯ ki shwa mo. E mo ’baar kun ’kona um mo tani, um mini mii shwa to kun minu ki dar ga cumaṯ mo be. 21 Dhala Musa yuḵki’da ris ’kwani jwaha/ ma Israyiil mo dhali ṯor uni gwo mo ki: Lahi ushi ḵa’bal gom is bum mo me’d isa waḵ bum mo dhali ’koshi uni mo goma Cim gi Mompe’kup̱anyolos yan mo. 22 Budhi deḵken cwan ’tasha cal bip̱ mo dhali ’thup̱i a’di ka bas jin diki’d mo e bwaman ma sahan mo. Dhali ’koshi a’di i buŋ’kup̱ ma campur mo dhali ka ’ban su/ cwa ma campur mo ka bas jin diki’d e bwaman ma sahan mo. Dhali jan ṯal ’deŋ kamu/ yisa midi ya ka pije/ ka campur gu’b piti mo ntagi mon’thamo/ mo be. 23 Haali/ TAP̱A a’di i midi ya pe ki tur mo mmo’kosh ’kwani Pam Masir mo. A’di midi p̱ara bas e mo e buŋ’kup̱ ma campur dhali ’ko’d gwara su/ mo. Dhali a’di midi peya campur ’kup̱ mo dhali midi diki dhala aman’ce’da ’ce’d sho’k bway mo mmoci’c aris gu’b bum mo mmo’kosh um mo be.

24 Um mini ha gwoŋḵan e mo, um dhali iya/m bum ki sule/ sule/ mo. 25 Dhali ki um mini ci’c mo e bampa/ c̱aan jin okina TAP̱A mo mmoc̱i um mo me’d isi gwo jin okina a’di is mo tani um mini kar Mompe’kup̱anyolos yansan mo be. 26 Dhali uc̱im bum mini o um gwo mo ki: ’Pemen mii yan ta’da tinta jin ona um gom miin to yan mo? Ki uni mini o um gwo kan mo tani 27 um mini o gwo mo ki: A’di ta mii ma basa ’cesh gi TAP̱A mo gom mompe’kup̱anyolos mo haali/ a’di peki gu’b gi ’kwani ma Israyiil ’kup̱ e Pam Masir mo. A’di ’koshki ’kwani Pam Masir mo hili a’di i ’tashki gu’b bana ’twa/ mo be. Dhali ’kwani ṯaki ’kup̱ buni ka luŋgu’b mo dhali luŋa luŋ mo be. 28 Dhali ’kwani ma Israyiil uni iikin mo dhali mii a’di wakansan mo me’d gwo jin ḵankina TAP̱A aMusa mo dhala Haruun mo.

29 Ki mombwam/e mo tani TAP̱A ’koshki’da risa bwanyara/ gi Bampa/ Masir mo. A’di ’koshki’da bwanyara/ ma P̱irawn mo a’di jin c̱a’bki’da ḵursem piti mo. Dhali a’di ’koshki’da ris uni ’baar mo si’da/ ntaga bwanyara/ gi a’di jin di’da sijina ’kulga/ mo dhali arisa bwanyara/ gi to e mo be. 30 Dhali aP̱irawn cuki mis mo mon’thiny mo, a’di dhali aris imanmii a’di to mo dhali aris ’kwani Pam Masiri ’baar mo. Dhali adhan mo jin ḵumu/ ko caaca kagahara mo e Bampa/ Masir mo haali/ gu’ba kamu/ yisa di’da jin dina jan ṯal ’deŋ kamu/ ki wu i bwaman mowa.

31 Dhali a’di yuḵki’da Musa dhala Haruun ki mon’thinya ’de/ c̱aan mo dhali o gwo mo ki: Cuyi um mis mo dhali iiku/ mo ka pije/ ’peni bwaŋ ’kwanim pem mo isi um gwan dhali ’kwani ma Israyiil mo. Dhali iiku/ um mo dhali mii ki montaḵ gom TAP̱A mo me’d jin okina um mo be. 32 Budhi arisa ma’diny ḵa’bal bum dhali aris bip̱ bum mo me’d gwo jin okina um mo. Dhali iiyi mo dhali ’borki aha/ mii si’da/ mo.

33 Dhali ’kwanim Pam Masir uni di’bki ’kwani is mo mmo/iiku/ mo ki yap̱ yap̱ ki jahanne/ ’peni bampam buni mo haali/ uni oki gwo mo ki: Amani ’baar mo mura wu mo be. 34 Gom kan mo tani ’kwani ḵalkina gana’th buni ki dar ga cumaṯ i e mo. Aḵwalal buni jin ’thoḵa uni to nycine/ mo tani koṯẖkina uni is mo ki burrinyem buni mo dhali shir uni mo e ’kup̱a bim buni mo be. 35 Dhali ’kwani ma Israyiil miikin mo me’d jin ṯorkin ma Musa uni gwo mo. Uni ’thoki ’kwani Pam Masir dhiriny ’dolkon kush mo dhali ’dolkon gana/ mo dhali burrinye/ mo be. 36 Dhali TAP̱A c̱iki ’kwani mii ma ’the e jis e gi ’kwani Pam Masir mo. Uni c̱iki uni to gun doṯa uni mo be. Yase/ i ta mii jin ḵalkina uni ’kwani Pam Masir to mo be.

37 Dhali ’kwaniŋ gwaṯẖ ma Israyiil thum ii ka ji sho’k mo ’peni Pa Ramisiis mo ntagi Pan Suḵuuṯ mo. ’Kwani ’kona alip̱i suttu miyya mo kun iikin ki sho’k mo mmodiki deŋ up̱ e dhali uc̱i mo be. 38 ’Kwanin tiya ka ris iikin nyaḵki uni mo dhali to e kun tana ris ka ris mo nyaḵka ma’diny ḵa’bal mo dhali aris bip̱ mo be. 39 Dhali uni ’thoḵki maaŋḵuthu’d ki dar ga cumaṯ i e mo ’pena gana’th jin ḵalina uni mo ka pije/ ’peni Pam Masir mo. Uni ’konuki miiya cumaṯ i e mo haali/ uni dhi’thunu sho’k ka pije/ mo ’peni Pam Masir mo. Uni yisa tan ga tenteŋ kamu/ mo mmothoson is buniŋ gana/ mo gom tonṯe/ gom bway mo yisa.

40 Yil gun ’kokina ’kwani ma Israyiil mo e Pam Masir mo tani ta’da urbu/ miyya wa talatiin mo be. 41 Dhali e she/ yil ma urbu miyya wa talatiin mo ’pena cim gana/ ’de/ yan mo tani ku gi TAP̱A ’baar mo iikin ka pije/ mo ’peni Pa Masir mo. 42 A’di ta mon’thiny jin jikina TAP̱A aji mo mmosusu uni ka pije/ mo ’peni Pam Masir mo. Wakan ki mon’thiny yansan jin nyaḵka’d mo tani ’kwani ma Israyiili ’baar mo mini jiya ji ka tee yan eya risa nyaḵum yil buni mo be.

43 Dhali TAP̱A oki’da Musa dhala Haruun gwo mo ki: Yansan a’di i ta gwoŋḵan gom mompe’kup̱anyolos mo be. Wathi/ gi paŋ kamu/ midi ’ka a’di mo yisa.

44 Hili aris c̱iŋkina/ kun yolu ka guurush mo tani uni a’di i mini ’ka a’di mo ŋ’ko’di /e mini ’ciṯẖ uni amunyjal yis buni mo be. 45 Hili ’kwani gun iiyi yilkina/ mo walla ’kwani gun kwanyu ki imanmiiya ṯu’c mo tani uni mini ’ka yisa.

46 E gu’ba ’de/ mo tani a’di i minu ’ka a’di mo. Um mini dhalku/ shum ki ḵal ka pije/ mo ’peni gu’b mo dhali um si’da/ mini dhalka sima/ ki ’ce’d bwa mo ’peni uni mo be. 47 Adhana waḵ ’kwani ma Israyiil ka kuluny mini mii moshwan to yan mmotaḵ TAP̱A mo be.

48 Dhali waḵki/ wathi/ jin dina e ki she/ di’di nyaḵki um mo dhali ŋap̱a’d mmokar Mompe’kup̱anyolos gi TAP̱A mo tani dhalka ris unim piti ka kuluny kun tana gwaṯẖ ’ciṯhuwa munyjal yis mo, dhali yan’ko’d a’di midi yayu/ mo mmo’dish mo is mo dhali kar a’di mo. A’di si’da/ midi wa e ki wathi/ gi bampa/ mo. Hili wathi/ jin di’d ka munyjal yisi e mo tani midi diki ’ka shum yan mo. 49 Gwoŋḵan midi ṯal ’de/ gom wathi/ gi bampa/ mo dhali gom wathi/ jin dina e ki she/ jin nyaḵki di ki um mo be.

50 Yase/ i miikina ’kwani ma Israyiil i ’baar mo me’d jin ḵankina TAP̱A aMusa gwo dhala Haruun mo. 51 Dhali ka cima ’deŋ gana/ yan mo tani TAP̱A suski ’kwani ma Israyiil ka pije/ mo ’peni Bampa/ Masir mo ka waḵ buni ’peni e kun ’ko uni ki she/ ki she/ mo be.