1 Arumgimis oki’da ris gwo gwansani ’baar mo mmo/o ki:

2 Aha/ tana TAP̱A Arumgimis pini jin suski /e ka pije/ mo ’peni Pa Masir mo ’peni mo jin miikunu /e ki miiny c̱iŋkina/ mo.

3 /E mini mii dhalku/ ki mii luŋa ruma tiya mo. /E mini mii luŋ jasi aha/ ’de/ mo.

4 /E mini mii dhalku/ to ki mii uḵ mo jin mina /e i luŋ mo, a’di jin wana e ki toŋ kamu/ jin di’d e momis walla jin di’di mony’cesh walla jin di’d e yi’de/ e bwaŋ’kwariny mony’cesh mo.

5 /E mini mii dhalku/ ki mii luŋ to/uḵa kamu/ mo walla mii uni to mo. Haali/ aha/ tana TAP̱A Arumgimis pini mo. Aha/ yisa mina dhal /e bway mmoluŋa ruma kamu/ mo. Aha/ dora ’kwani gun shi/aa/ i e dhali gun ush gwom pem mo. Dhali aha/ dora emen buni ka lonthoṯẖ i taga p̱o/ doŋon mo. 6 Hili aha/ ṯora mo/en jin ṯelu sho’k mo gom emena alip̱ kun enki aha/ mo dhali dhu gwoŋḵan pem mo.

7 /E mini mii dhalku/ ki yer gway gi TAP̱A Arumgimis pini ka wuny is ka ṯor mo haali/ TAP̱A midi diki dhal a’di jin yeri gway piti ka ṯor mo be.

8 Kayi acima pesu/ e mo mmokar a’di ki she/ ki dhelel dhelel mo.

9 /E ta ga cimi pe’de/ mo mmomiiya risa ṯu’c pini ’baar mo. 10 Hili acim ma pesu/ mo tani a’di ta’da cim gi mo si/is gom aha/ mo be. E a’di mo tani /e mini mii dhalka ṯu’c pini mo, /e dhali ya/m pini mo dhali ’bwa/m pini mo walla c̱iŋkina/ wathiŋ gwaṯẖ jin mii’da ṯu’c pini mo dhali c̱iŋkina/ nyara/ jin mii’da ṯu’c pini mo dhali bip̱ pini mo dhali wathi/ jin yayi yilkina/ e pum mo. 11 Haali/ acim pe’de/ mo tani aha/ jin tana TAP̱A uḵkina momis mo dhali mony’cesh mo dhali ḵumma/ yi’de/ mo dhali aris to kun ’kokin e bwaman uni mo. Bahili ka cim ma pesu/ mo aha/ sikina is mo. Gom gwo gi wakan mo tani aha/ ’borkina cim ma pesu/ mii mo dhali kar a’di ki ji gi ḵogu mo be.

12 Taḵi cim dhali kwan mo ma, ki yil pini jin dina /e ki e mo mini ta ris mo e mo jin min ma Arumimisi c̱iki /e mo be.

13 /E mini mii dhalka mee ki ’kosh mo.

14 /E mini mii dhalku/ miinyc̱al ki mii mii mo.

15 /E mini mii dhalku/ to ki ḵwal mo.

16 /E mini mii dhalka ṯor ki ḵal ap̱o/ wathiŋ kamu/ mo.

17 /E mini mii dhalku/ bwa ki mii ’thoṯẖ gom gu’b gi wathiŋ kamu/ mo. /E mini mii dhalku/ bwa ki ’thoṯẖ goma ’bom gi wathiŋ kamu/ mo walla gom wathi/ jin ta c̱iŋkinam piti mo walla nyarany c̱iŋkinam piti mo walla mor bip̱ piti mo walla thuluny piti mo walla ton ṯal ’deŋ kamu/ jin di’d e gu’b gi wathiŋ kamu/ mo be.

18 Dhali ki ’kwani nyiṯẖ mondor ma sho’k mo dhala wara sho’k mo dhali ko ma poome/ mo dhali wosha turga/ mmoyakina a’di aku’d mo tani ’kwani ḵo/ki is mo dhali den ki bir bir mo dhali uni doshkin isa dhana mo be. 19 Dhali uni ki owa Musa gwo mo ki: /E a’di i mini wal ’twa/ nyaḵki aman mo dhali aman mina ciḵ gwo mo. Hili aman ḵo/a is gom waḵka Arumgimis a’di midi wal ’twa/ i nyaḵki aman mo tani aman mina wu mo be.

20 Dhali aMusa oki ’kwani gwo mo ki: Dhalki is ki ḵo/ mo ma, haali/ Arumgimis p̱u’dki’d mo mmopal um mo dhali woṯẖ um mmoha gwom piti e mo ki um mini ’koki mii miinthus mo be

21 Hili ’kwani doshkin isa dhanaŋ gana/ mo imun mo. Jasa Musa a’di ’de/ ’dishki’da raḵa dhiny e is mo e mo jin dikin ma Arumgimis mo be.

22 Dhali TAP̱A oki’da Musa gwo mo ki: Yase a’di i mina /e i o ’kwani ma Israyiil mo ki: Um mishkin ki is bum ki aha/ ṯorkina aṯor nyaḵki um ’peni momis mo. 23 Um mini mii dhalka ruma kamu/ ki mii uḵ ’peni ’dolkon kush walla ’dolkon gana/ mo mmokar ka p̱ar ki aha/ mo, jin mina umi luŋ mo. 24 Agwaṯa/ ma ’cesh a’di i mina umi uḵ mo mmomii aha/ abasi cine/ mo ’peni ḵa’bal pini dhali bip̱ pini mo mmota to jin c̱inu ki me’d goma Arumgimis mo. Kun tiya minu c̱i mmo’tha o’d ka kuluny dhali kun tiya minu c̱i gom moŋḵu’th is goma Arumgimis mo. E mo guni ’baar mo jin raḵ gway pem kakunu e mo tani aha/ mina p̱u’dku/ i um mo dhali ’bor um mii mo be.

25 Dhali ki um mini uḵa gwaṯa/ ’peni wosh mo tani um mini mii dhalki a’di ki uḵ ’peni wosh jin paṯẖu ki ’doro/ mo haali/ waḵki/ um mini paṯẖ a’di ki ’doro/ mo tani a’di yisa midi ’kosh jwa mo yisa gom to jin ḵogu mo. 26 Dhali um mini ’koki seya bor ki mis gi ushi mon tan eya gwaṯam pem mo haali/ um mini ṯora yir buŋgwar is bum eya tente/ mo be.