1 Wakan Abraam yaki’d ka gagamis ’peni Pam Masir mo a’di uni ki ashim piti nyaḵki a’di mo dhali aris to kun tana a’di mo dhala Luuth si’da/ nyaḵki uni mo eya Januub mo.

2 Dhala Abraam ta pa ki pa mo e to/e mo dhali e ’dolkon kush mo dhali e ’dolkon gana/ mo. 3 Dhali a’di yaki’d ’pena Januub mo ntagi Pam Beeṯ/iil mo e mo jin dikina gu’b burrinyem piti ki monṯel ’pen mo, mo jin diki’di bwaman gi Pam Beeṯ/iil mo dhali gi Pa Ayy mo, 4 e mo jin nyaŋkina a’diya gwaṯa/ jin miinuwa bas mo iṯwa/a/ mo. Dhali e mun mo tani a/Abraam a’di yuḵki gway gi Tap̱a mo. 5 Dhala Luuth, a’di jin yaki’d nyaḵka Abraam mo tani a’di si’da/ ta’dki ma’diny ḵa’bal ka ris mo dhali ma’diny mi ka ris mo dhali to/e ka ris mo dhali gu’b burrinye/ ka ris mo. 6 Ki a’di wakan mo tani bampa/ mol uni thip̱ mo uni su/ mmonyaḵ uni ’ko mo mmonṯal ’de/ mo, haali/ tom buni kun takina uni mo tani uni tana ris ka ris kagahara mo. Wakan uni moli nyaḵ ’ko mo mmonṯal ’de/ mo. 7 Dhali mo jin biruwa bir diki’di bwaman imanhil to/e ma Abraam mo dhali imanhil to/e ma Luuth mo. Dhali ka tee c̱aan mo tani ’Kwani gi Paŋ Kanaan mo dhali ’Kwani gi Pam Paaris ’kokin mo e bampa/ mo.

8 Dhali yan’ko’d Abraam ki owa Luuth gwo mo ki: Dhalku/ ki dhal mo jin biruwa bir bway mo mmodi ibwaman ana mo, aha/ dhali /e mo, dhali ibwaman imanhil to/em pini mo dhali imanhil to/em pem mo haali/ ana tana ikam mo. 9 Dina bampa/ isi ’baar mo ki di ibwambori /e mo ’taa? Ḵwa/ki is pini bwa mo ’peni aha/ mo ma. Waḵki/ /e mini bu’th ’ban ma biny cam mo tani wakan aha/ mina ya ki ’ban ma bim poros mo, walla waḵki/ /e mini bu’th ’ban ma bim poros mo tani wakan aha/ mina ya ki ’ban ma biny cam moyi. 10 Dhala Luuth ’de’kki em piti ki mis mo dhali mishki mo mo ki embul ma Uurdun a’di ya’thkunu ki ’bore/ eya ris mo ’baar mo me’d bwaagoŋ jin ta monsinu gi Tap̱a mo, me’d bampa/ gi Pam Masir si’da/ e mo jin c̱utha a’di bway ’kup̱ ki Pan Suugar mo. Yansan diki’di ṯwa/a/ mo ki Pan Saduum dhali Paŋ Gamuura ’konuki ’ce’d sho’k mo ki Tap̱a mo. 11 Wakan mo Luuth kwanyki’d gom is piti aris mo ’baar mo jin ta embul ma Uurdun mo, dhala Luuth yaki’d mo ’kup̱ ki mom’pesho’k mo. Wakan uni ḵwa/ki is buni bwa mo ka rem ’kup̱ mo. 12 Abraam c̱a’bki’d mo e bampa/ gi Paŋ Kanaan mo, ka Luuth c̱a’bki’d mo e bwaŋ ’kwani eya ris ’peŋkuman bampa/ gi embul mo dhali a’di ijoc̱ki gu’b burrinyem piti ntagi Pan Saduum mo be. 13 Dhali ’Kwani gi Pan Saduum mo tani uni ta uni gun ta thus ki thus mo dhali gun ta imanmii miinthus kun shi/ashi/ ap̱o/ Tap̱a mo.

14 Dhali Tap̱a ki owa Abraam gwo mo ’ko’da Luuth ḵwa/ki is piti bwa mo ’pena Abraam mo ki: ’Deki em pini imis mo ma, dhali hili mo mo ma, ’peni mo jin dina /e nycine/ mo ’kup̱ ki moŋ’ko’d gwar ma bim poros mo dhali ’kup̱ ki moŋ’ko’d gwar ma biny cam mo dhali ’kup̱ ki mom’pesho’k mo dhali ’kup̱ ki bora luŋgu’b mo, 15 haali/ aris mony’cesh ’baar mo jin misha /e mo tani a’di miga/ c̱i gom /e mo dhali gom emen pini kun mini pi ’peni /e mo ki sule/ sule/ mo be. 16 Aha/ mina dhu emen pini kun mini pi ’peni /e mo mmota aris me’d emen gi bu’da’cesh gi mony’cesh mo. Wakan mo tani waḵki/ wathiŋ kamu/ mishi emen gi bu’da’cesh gi mony’cesh deŋ e mo tani emen pini kun mini pi ’peni /e mo si’da/ minu mish deŋ e mo be. 17 Cuyi mis mo ma, dhali ya ki sho’k ki tur mo e mony’cesh yan mo ka luc̱ piti mo dhali ki beem piti mo haali/ aha/ mina c̱i a’di ki /e mo be. 18 Wakan Abraam ijoc̱ki gu’b burrinyem piti mo dhali a’di p̱u’dki’d mo dhali c̱a’bki’d mo e ’ko’d gwar gi dhan cwa jin wana e ka ’kwaṯṯan ma Mamra kun ’kon e Pa Habruun mo. Dhali e mun mo tani a’di ki nyaŋa gwaṯa/ jin miinuwa bas gom Tap̱a mo be.