1 Dhali Tap̱a piki a’di i is mo e ’ko’d gwar gi dhan cwa kun wana e ka ’kwaṯṯan ma Mamra mo me’d jin c̱a’bkina a’di eya campur gi gu’b burrinyem piti mo e mo jin ta mom’batha’d jin ’koshki to montee mo. 2 Dhali a’di ’de’kki em piti ki mis mo dhali hilki mo mo, dhali hili mo mo ma, ’kwaniŋ gwasi kwara doshkin mo ibwambori a’di mo. Dhali ki a’di p̱arki uni e mo tani a’di guski’d ’pena campur gi gu’b burrinye/ mmoraḵ uni ibway mo dhali a’di kumki is piti ’twa/a ’cesh mo 3 dhali oki gwo mo ki: Tap̱am pema, waḵki/ aha/ gamkina ’the e jis/em pini mo tani dhalku/ ki ya c̱iŋkinam pini pe mo. 4 Dhalki ari yi’de/ ha’bkunu mo mo ma dhali lami sho’k bum mo ma dhali siyi is bum mo eya lany cwa mo 5 ki aha/ ki ya guwa gabul maaŋḵuthu’d mo ki um mini ye is bum ’ba/ mo dhali ŋ’ko’d mo tani um mini mish iim pe mo – haali/ um p̱u’dkin mo e c̱iŋkinam bum mo. Wakan uni oki gwo mo ki: Miiyi me’d jin okina /e mo mo ma. 6 Dhala Ibrahiim miiki is ki ’kasa/ ’kasa/ mo mmop̱u’d e gu’b burrinye/ eya Saarah mo dhali oki gwo mo ki: Thosoni to ki jahanne/ mo ma, to jin ta’da dip̱any jin ’tiya’ti jin baru ka uc̱aŋi kwara mo. Na’th a’di mo ma dhali miiya guraasa mo ma. 7 Dhala Ibrahiim guski’d mo eya ma’diny bip̱ mo dhali a’di ki bu’th ari bip̱ jin ’ta’dama’ta’dam mo dhali jin ’bora’bor mo dhali c̱i a’di ki c̱iŋkina/ mo a’di jin miiki is ki ’kasa/ ’kasa/ mo mmothoson a’di mo. 8 Yan’ko’d a’di ki guwa konṯaŋka/ mo dhala ko mo dhali ari bip̱ jin thosonkina a’di mo dhali dhuki uni ibwambori uni mo. Dhali a’di doshki’d ki ’dishe/ i uni mo e bwaŋ’kwariny gi cwa mo ki uni shwaki to mo.

9 Uni oki a’di gwo mo ki: Mane Saarah jin ta ashim pini mo mane? Dhali a’di oki gwo mo ki: A’di di’di gu’b burrinye/ mo be. 10 Dhali a’di oki gwo mo ki: Ka jiŋ gana aha/ mina mii doḵu/ e /e mo ki yil midi ta jin this mo, dhala Saarah jin ta ashim pini midi dho’th ya/ mo be. Dhala Saarah di’d mmociḵ gwo mo eya campur gi gu’b burrinye/ jin di’di bwamp̱o/ a’di mo. 11 Hili Ibrahiim dhala Saarah uni itakina dhan mo dhali cakin ki yil mo dhali goma Saarah mo tani mo jin baṯẖu mii gi up̱ daḵki’d mo. 12 Haali/ a’di wakan mo tani Saarah p̱e’thki’d ki is piti mo mmo/o gwo mo ki: ’Ko’di aha/ takina dhan mo dhala kaṯẖim pem si’da/ ta’da dhan mo tani miga/ ta gi ’ceŋ kamu/ jin midi ’kol aha/ mowa? 13 Dhala Tap̱a oki’da Ibrahiim gwo mo ki: Ata p̱e’thkin ma Saarah kan mo dhali ata on ma yim gwo mo ki: Ka jiŋ gana/ aha/ mina dhodha ’ciya ki aha/ shwane/ cakina yil mo? 14 Ton ṯal deŋ kamu/ di’da jin mola Tap̱a mii mo ’taa? Ka tenteŋ ḵar/e mo tani miga/ doḵu/ e /e mo e mo jin tana yil this mo dhala Saarah midi dho’th ya/ mo be. 15 Hili Saarah waṯki gwo mo mmo/o gwo mo ki: Aha/ dinaki p̱e’th mo, haali/ ayim ḵo/ki is mo. Dhali a’di oki gwo mo ki: Yisa wakana, hili /e p̱e’thkin mo ka jiŋ gana/ mo.

16 Yan’ko’d ’kwaniŋ gwas gwansan ’kakin ka ji sho’k ’peni maṯṯan mo, dhali uni hilkin mo ’kup̱ ki Pan Saduum mo. Dhala Ibrahiim suski uni ’pen mbway buni mo. 17 Dhali Tap̱a oki gwo mo ki: A/dhali a’di jin murka/ mii mo tani miga/ bag ’pena Ibrahiim mo ’taa? 18 Haali/ Ibrahiim midi war mo ki kal gi ’kwaniny’cesh jin caaca mo dhali jin eḵa/ eḵ mo dhali e a’di mo tani aris kal gi ’kwaniny’ceshi ’baar mo minu ’bor mii mo be. 19 Yisa, haali/ a’di kwanykika/ mo ki a’di midi ḵan uc̱im piti gwo mo dhali uni gi gu’b piti kun mini ’ko mo ŋ’ko’di a’di mo ki uni mini dhu bway gi Tap̱a mo mmo’ko mmomii mii ma ḵar/e mo dhali mii kun miinu ki dar gi mii ma gwar ’de/ mo. Ki a’di wakan mo tani a’di mina Tap̱a ’taki gu eya Ibrahiim mo a’di jin okina Tap̱a gwo is mo. 20 Yan’ko’d Tap̱a oki gwo mo ki: Haali/ cuuwa/ jin ’theru ap̱o/ Pan Saduum mo dhali Paŋ Gamuura mo maru is mo dhali miinthus buni caaca kagahara mo tani 21 aha/ mina ya ka ’cesh mo mmop̱ar e mo waḵki/ uni miiki mii mo isi gi cuuwa/ jin ’theru e aha/ ki ’bil kan mo, dhali waḵki/ a’di yisa wakan mo tani aha/ mina mish mo mo.

22 Wakan mo tani ’kwaniŋ gwas gwansan ṯu’kkin mo ’peni maṯṯaan mo dhali iikin mo ’kup̱ ki Pan Saduum mo. Hili Ibrahiim doshki’d mo naskina/ ibwambori Tap̱a mo. 23 Yan’ko’d Ibrahiim ’dishki is mo dhali o gwo mo ki: Ka jiŋ gana/ /e mini ’ce’d uni sho’k mowa uni gun mii miiŋḵar/e mo nyaḵki uni gun mii tonthus mowa? 24 Waḵki/ uni gun mii miiŋḵar/e mo mini ’taki ’ko iss ’kwanimpa su/ i’ce’dka ’kume’d mo ibwaman ’peŋkuman bampa/ mo tani wakan mina /e ’taki ’ce’d mo sho’k mo dhali diki ’taki ’tash a’di ’twa/ mo gom uni gun mii miiŋḵar/e mo kun ’koni iss ’kwanimpa su/ i’ce’dka ’kume’d mo ibwaman a’di mo ’taa? 25 Dhalka mii gi wakan midi mii diki thoṯẖ /e is mo ma mmo’kosh uni gun mii miiŋḵar/e mo nyaḵki uni gun mii tonthus mo, wakan ki uni gun mii miiŋḵar/e mina e wa gi uni gun mii tonthus mo. Dhalka mii yan midi mii diki thoṯẖ /e is mo ma. A/min ma Mandwall aris mony’cesh gwo mo diki mii miim ’boro’da? 26 Dhali Tap̱a oki gwo mo ki: Waḵki/ aha/ mina ’taki gam e Pan Saduum mo uni gun mii miiŋḵar/e mo kun ’koni iss ’kwanimpa su/ i’ce’dka ’kume’d mo ibwaman ’peŋkuman bampa/ mo tani aha/ mina ’tash aris mo yani ’baar mo ’twa/ mo gom gway buni mo be. 27 Dhala Ibrahiim thoḵki ’twa/ mo ki: Hili mo mo ma, aha/ bu’thkina a’di ap̱o/ is pem mo mmoṯor gwo e Tap̱a mo, aha/ be jin ta jasi bu’da’cesh mo dhali ’piny mo. 28 Waḵki/ uni imudhe’d ’peni uni kun ’koni iss ’kwanimpa isu/ i’ce’dka ’kume’d mo kun mii miiŋḵar/e mo tani mini ’taki aṯẖ mo, a/mina /e ’ce’d ’peŋkuman bampa/ sho’k mo ka ’bimbil mo mmo/aṯẖa ’kwani imudhe’d mowa? Dhali a’di oki gwo mo ki: Aha/ mina diki ’ce’d a’di sho’k mo waḵki/ aha/ mina ’taki gam uni kun ’koni iss ’kwanimpa su/ i’ce’dka mudhe’d mo mmun mo be. 29 Dhali doḵ/e a’di ki ṯor a’di gwo mo dhali o gwo mo ki: Waḵki/ uni ’koni iss ’kwanimpa isu/ kun minu ’taki gam mmun mowa? Dhali a’di thoḵki gwo mo ki: Gom gway gi uni kun ’koni iss ’kwanimpa isu/ mo tani aha/ mina diki mii a’di mo. 30 Yan’ko’d a’di oki gwo mo ki: Ayy Tap̱a dhalku/ anyor ki shwa mo ma, dhali aha/ mina ṯor gwo mo. Waḵki/ uni ’koni iss ’kwanimpa ’de/ i’ce’dka ’kume’d mo kun minu ’taki gam mmun mowa? Dhali a’di thoḵki gwo mo ki: Aha/ mina diki mii a’di mo tani waḵki/ aha/ mina ’taki gam uni kun ’koni iss ’kwanimpa ’de/ i’ce’dka ’kume’d mmun mo. 31 A’di oki gwo mo ki: Hili mo mo ma, aha/ bu’thkina a’di ap̱o/ is pem mo mmoṯor gwo e Tap̱a mo. Waḵki/ uni ’koni iss ’kwanimpa ’de/ mo kun minu ’taki gam mmun mowa? Dhali a’di thoḵki gwo mo ki: Gom gway gi uni kun ’koni iss ’kwanimpa ’de/ mo tani aha/ mina diki ’ce’d a’di sho’k mo. 32 Yan’ko’d a’di oki gwo mo ki: Ayy Tap̱a dhalku/ anyor ki shwa mo ma, dhali aha/ mina gwo ṯor doḵ/e mo jasi me’d ’deŋ gana/ mo. Waḵki/ uni ’koni ’kume’d mo kun minu ’taki gam mmun mowa? Dhali a’di thoḵki gwo mo ki: Gom gway gi uni kun ’koni ’kume’d mo tani aha/ mina diki ’ce’d a’di sho’k mo. 33 Dhali Tap̱a yaki bway piti mo me’d jin thimkina a’di gwo ṯor ka Ibrahiim mo. Dhala Ibrahiim doḵki’d ka nyaŋ’ko’d mo e mom piti mo be.