1 Dhali yan’ko’da Yuusup̱ biṯki’di ’ba/i com mo dhali ko eya p̱o/i a’di mo dhali p̱i a’di ’twa/ mo be. 2 Dhala Yuusup̱ ḵanki’da ris c̱iŋkinam piti gwo mo ka ris uni kun tana hakiim mini lol com bwa mo a’di idina a’di ki bul mo. Wakana risa hakiim uni lulkina Israyiil bwa mo be. 3 Acimi iss ’kwanimpa su/ a’di i’theḵkunu gwo mo gom a’di mo, haali/ acim tana ris wakan kun ’theḵkunu gwo mo mmolol bwa mo. Dhali ’Kwani Masir uni gwokin gom a’di ka cim iss ’kwanimpa ikwara i’ce’dka ’kume’d mo.

4 Dhali ka tee jin gwokunu gom a’di ’baarki’d mo tani aYuusup̱ ṯorki’da ṯor ki kuŋ gu’b ma P̱irawni ’baar mo mmo/o gwo mo ki: Waḵki/ aha/ mina gam mii ma ’the e jis/em pini shwane/ mo tani, oyi gwo mo, aha/ ’thona /e mo, e bwany’ce ma P̱irawn mo mmo/o ki: 5 Ababam pem kar aha/ mmothul gwo me’da p̱o/ mo mmo/o ki: Ki aha/ mura ’twa/ i’dish i mmomuri wu mo tani e jis wosh jwam pem jin ’kulkika/ mo e Paŋ Kanaan mo tani a’di iminu kan aha/ imun mo. Dhali shwane/ gom gwo gi wakan mo tani dhalki aha/ yana ka gagamis mo, aha/ ’thona /e mo, dhali kana babam pem mo dhali yan’ko’d aha/ ki doḵu/ mo. 6 Dhala P̱irawn thoḵki gwo mo ki: Yaku/ ka gagamis mo dhali kani cim mo me’d jin karkina a’di /e mmothul gwo me’da p̱o/ mo. 7 Wakana Yuusup̱ yaki’d ka gagamis mo mmokana babam piti mo dhali nyaḵki a’di mo tani c̱iŋkina/ tana ris kun baṯẖki a’di mo ’peni ku ma P̱irawn mo dhali aris ’kwaniŋ gwanyjaḵa/ ’peni ku ki gu’b piti mo dhali aris ’kwaniŋ gwanyjaḵa/ gi bampa/ Masiri ’baar mo. 8 Dhali isi kan aris kuŋ gu’b ma Yuusup̱i ’baar mo ikam piti dhali aris kuŋ gu’b gi com mo hili jasi ushi uc̱im buni a’di idhalkunu mo dhali ama’diny ḵa’bal buni mo dhali adhana ŋul’kup̱ bip̱ buni mo uni a’di idhalkunu mo e Pan Jaasaan mo. 9 Dhali aris ’kwani kun merkina arabiya kun dira shumarum mo tani uni inyaḵki ii ka gagamis nyaḵki a’di mo dhali aris ’kwani kun mer shumaruma p̱o/ mo a’di ta dhana buhany wathimpa jin seki’d jin caaca kagahara mo be. 10 Ki uni p̱u’dkin mo e ja’dam pos gi Pan Athaad mo a’di jin diki’d e bwamp̱o/ Yi’deŋ Ḵumma/ Uurdun mo tani uni ḵumki ko mo imun mo gom dhan bwan diṯi’d kagahara mo e kony jwa jin gwokina uni mmo/up̱ e ki jabu’th mo dhali a’di karki mo jin gwonu ki kony jwa gom com ka cima pesu/ mo. 11 Ki ’kwani kun cila mony’cesh yan mo tani uni gun ta ’Kwaniŋ Kanaan mo p̱arki kony jwa jin gwokunu mo e ja’dam pos gi Pan Athaad mo tani uni oki gwo mo ki: Kony jwa yansan jin gwokunu mo tani a’di ita a’di jin jwakaṯki’da du mo gom ’Kwani Masir mo. Gom gwo gi wakan mo tani a’di iyuḵkunu mo yan gway ka Aabilmisrayim mo. A’di jin diki’d e bwamp̱o/ Yi’deŋ Ḵumma/ Uurdun mo be. 12 To jin miina iya/m piti gom a’di a’dan mo me’d jin ḵankina a’di uni gwo mo. 13 Haali/ iya/m piti ḵalki a’di mo e mony’cesh gi Paŋ Kanaan mo dhali kan a’di mo e bwam bunto ma Maḵp̱iilah mo a’di jin di’d ’kup̱ki mom’pesho’k gi Pa Mamra mo a’di jin yolkin ma Ibrahiim ’pena Ip̱ruun jin ta wathi/ Hiṯẖṯẖa mo mmokar a’di ki mo jin minu kana kani cine/ mo. 14 ’Ko’di a’di kanki’da babam piti mo tani, aYuusup̱ doḵki bway Pa Masir mo nyaḵki ikam piti mo dhali aris ’kwani ’baar mo kun nyaḵki ii ki a’di ka gagamis mo mmokana babam piti mo be.

15 Ki ikam ma Yuusup̱ p̱arki mo e mo ka babam buni a’di iwuki’d mo tani uni oki gwo mo ki: Wariba/ aYuusup̱ midi shi/ ana i e mo dhali ri/ ana mo goma ris tonthus kun miikina ana a’di ap̱o/ me’d yin mo. 16 Gom gwo gi wakan mo tani uni hashki gwo aYuusup̱ mo dhali o gwo mo ki: Ababam pini a’di iḵanki gwo yansan nṯwa/a/ ki a’di diki wu mo ki: 17 Oya Yuusup̱ gwo mo ki: Gwami agwam mo ma, aha/ ’thona /e mo, gwondhaŋ gi ikam pini mo dhali miinthus buni mo haali/ uni miiki /e tonthusa p̱o/ mo. Dhali shwane/ am ’thona /e ki /e mini gwama/ gwam mo gom gwondhaŋ gi c̱iŋkina/ ma Arumgimis mo jin ta’da Arumgimis ma babam pini mo. Yuusup̱ a’di gwoki’d mo me’d jin ṯorkina uni aṯor ki a’di mo. 18 Dhali ikam piti p̱u’dkin mo dhali ṯaka ’ceshi bwambori a’di mo dhali o gwo mo ki: Hili mo mo ma, aman tana c̱iŋkinam pini mo. 19 Hila Yuusup̱ oki uni gwo mo ki: Dhalku/ is ki ḵo/ mo ma haali/ a/aha/ be dina e embul ma Arumgimis mowa? 20 Haali/ me’d um mo, kagush tani um kar to ap̱o/ aha/ ki ’pemen thus mo hili Arumgimis a’di ikarki a’di ki ’pemen jim ’boro’d mo mmowaski mii yan mo ki ’kwani ka ris ris minu dhu ki e mo, me’d jin ’kokina uni ki e shwanesan mo. 21 Dhalku/ is ki ḵo/ wakan mo, aha/ mina thip̱ um mo dhali ushi uc̱im bum mo. Wakan a’di rokomki uni ki gwo mo dhali malas uni mo.

22 Wakan Yuusup̱ a’di c̱a’bki’d mo e bampa/ Masir a’di nyaḵki ’kwani gi gu’b gi com mo. Dhala Yuusup̱ a’di c̱a’bki’d ki e mo ki yil iss ’kwanimpa imudhe’d i’ce’dka ’kume’da p̱o/ mo. 23 Dhala Yuusup̱ p̱arki uc̱i ma Ep̱rayim e mo kun ’kon ma aṯa/i kwara mo dhali uc̱i ma Maakiir si’da/ mo a’di jin ta ya/ ma Manassa mo uni dho’thkunu mo e ’kup̱a’dup̱un ma Yuusup̱ mo. 24 Dhala Yuusup̱ oki ikam piti gwo mo ki: Aha/ ’dishkina ’twa/ mmomuri wu mo hili Arumgimis a’di midi yayu/ mmobuṯi um mo dhali a’di midi susi um bway pa ka nyaŋ’ko’d mo ’peni bampa/ yansan e mony’cesh jin thulkina a’di a/Ibrahiim gwo me’da p̱o/ mo goma Is/hak dhala Yakuub mo be. 25 Dhali yan’ko’da Yuusup̱ bu’thki mo jin thulu gwo me’da p̱o/ mo e iya/ ma Israyiil mo mmo/o gwo mo ki: Arumgimis midi yayu/ mmobuṯi um mo dhali um mini ḵal asimam pem mo ’peni mahan mo. 26 Wakana Yuusup̱ a’di iwuki’d mo mmo’kokina yil a’di i/iss ’kwanimpa imudhe’d i’ce’dka ’kume’da p̱o/ mo, dhali uni lolki is piti mo dhali a’di karkunu mo e bwam ma ḵur jwa mo e bampa/ Masir mo be.