1 ’Ko’di a’di ’baarki’da ris gwom piti jin okina a’di mo e bwany’ceŋ ’kwani kun ciḵ gwo mo tani a’di cic̱ki’d mo e Paŋ Kap̱ranahuum mo. 2 Dhala mancil ma askar iss ’kwanimpa imudhe’d mo a’di ta’d gi c̱iŋkina/ jin kara a’di ki jiŋ ŋa/ mo tani a’di ’ba’thki’d mo dhali ’disha ’twa/ mmowu mo be. 3 Dhali ki a’di ciḵki gwo goma Yesus mo tani a’di hashki a’di ’kwaniŋ gwanyjaḵa/ gi ’Kwani Yahuuda/ mo mmodoṯ a’di mo mmoyayu/ mo dhali mmowac̱ c̱iŋkinam piti mo be. 4 Dhali ki uni pu’dkina Yesus mo tani uni ŋap̱ki a’di mo mmodi’b a’di is ki gwo mo mmo/o gwo mo ki: A’di ha me’d ki /e mini mii to yansan gom a’di mo be 5 haali/ a’di enki kal bana mo dhali a’di nyaŋki ana gu’b gi montul is bana mo be. 6 Dhala Yesus yaki’d mo nyaḵki uni mo. Ki a’di diki si’d pa is mo naskina/ tani amancil ma askar iss ’kwanimpa imudhe’d hashki imugum piti e a’di mo mmo/o a’di gwo mo ki: Tap̱a, dhalku/ ki mur is pini mo ma haali/ aha/ tana ji gi ha me’d mo yisa jin mina /e yayu/ eya galgin gu’b pem mo. 7 Wakan aha/ dinaki ṯosh ki aha/ tana ji gi ha me’d mo mmoyayu/ i /e mo. Hili oyi gwo mo ma dhali dhalki c̱iŋkinam pem minu wac̱ mo. 8 Haali/ aha/ tana wathi/ jin karkunu ’ko’d e moshirr mo dhali i/askar ’koni me’d pem mo dhali aha/ okina jan ’deŋ kamu/ gwo mo ki: Yaku/ mo ma tani, dhali a’di yaki’d mo be, dhali e jaŋ kamu/ ki: Yayu/ mo ma tani, dhali a’di yaki’d mo be. Dhali e c̱iŋkinam pem mo tani ki: Miiyi to yansan mo ma tani, dhali a’di miiki a’di mo be. 9 Ka Yesus ciḵki gwo yansan mo tani a’di merki’d mo gom a’di mo dhali a’di ki ṯuka bor mo dhali owa waambuhany ’kwani gwo mo kun baṯẖi a’di nsho’k mo ki: Aha/ ṯora um gwo mo ki aha/ dinaki gam jan ’deŋ kamu/ e ’Kwani ma Israyiil jin ta’d gi moŋgam gwo is jin wakansan mo be. 10 Dhali uni gwansan kun hashkunu mo tani uni doḵki bway pa mo ka nyaŋ’ko’d mo tani uni gamki c̱iŋkina/ ’borkina is mo be.

11 Yan’ko’d ki ’dishe/ mo tani a’di yaki’d mo e ’peŋkuman bampa/ jin yuḵu ka Naayiin mo dhali nyaḵki imanciḵ a’di gwo mo dhali awaambuhany ’kwani caaca kagahara mo nyaḵki ii ki a’di mo be. 12 Ki a’di ’dishki ’twaŋkala goŋ ’peŋkuman bampa/ is mo tani hili mo mo ma, wathiŋ kamu/ jin wuki’d mo a’di ḵalkunu ka pije/ mo a’di ta jasi ya/ ṯal ’deŋ gana/ jin di’di kum mo dhala yim a’di wun ma kaṯẖ mo. Dhali adhana buhany ’kwani caaca mo ’peni ’peŋkuman bampa/ nyaḵki ’ko ka yim mo be. 13 Dhali ki Tap̱a p̱arki’da yim e mo tani a’di hilki’da hil ka ’thime/ ap̱owa yim mo dhali owa yim gwo mo ki: Dhalku/ ki ko mo ma. 14 Dhali a’di p̱u’dki’d mo dhali ta aciny jwa is ki me’d mo dhali uni gun hankina ci mo tani doshkin naskina/ mo. Dhali a’di ki o gwo mo ki: Wathin dhuru’c, aha/ ona /e gwo mo ki: Cuyi mis mo ma.

15 Dhali wathi/ jin wuki’d mo tani c̱a’bki’d ki mis mo be dhali a’di ṯelki gwo ’pen mo mmowal ’twa/ mo. Dhali a’di ki c̱i a’di ki kum mo be. 16 Dhali moŋḵo/ is bu’th uni ’baar mo dhali uni karkina Arumgimis ki ca mo mmo/o gwo mo ki: Adhana manc̱i gwo ma Arumgimis a’di cukunu mo e bwam ana mo! Dhali, Arumgimis a’di buṯki’d e ’kwanim piti mo be! 17 Dhali gwo yansan gom a’di mo tani a’di yaki’d ki lala’th mo e bampa/ gi ’Kwani Yahuudiyya ’baar mo dhali eya ris bampa/ kun ’kon ka kukul is mo be.

18 Dhali imanciḵa Yohaan gwo uni ṯorki a’di gwo mo goma ris to gwansan mo be. 19 Dhala Yohaan yuḵki imanciḵ gwom piti isu/ mo mmohash uni mo e Tap̱a mo mmo/o gwo mo ki: A/e ta a’di jin midi yayu/ mo ’taa? Walla aman mina hil jaŋ kamu/ mo? 20 Dhali ki ’kwani p̱u’dkin mo e a’di mo tani uni o a’di gwo mo ki: Yohaan jin ta’da manmiiya mii ki yi’de/ mo tani a’di hashki am i /e mo mmo/o gwo mo ki: A/e ta a’di jin midi p̱u’du/ mo ’taa? walla aman mina hil jaŋ kamu/ mo? 21 Dhali e mo c̱aan mo tani a’di wac̱ki ’kwani ka ris mo kun ’kosha ’ba’th mo dhali kun doru ki isa nyor mo dhali ka rum thus kun nyo/on mo dhali ’kwaniny ja’da/ ka ris woṯẖkina a’di mo mmomish mo mo be. 22 Dhali a’di ki thoḵ uni gwo mo ki: Iiku/ mo ma dhali ṯora Yohaan gwo mo gom to kun p̱arkina um e mo dhali ciḵ mo be ki ’kwani kun tana ja’da/ mo bu’thki momish mom buni mo dhali ’kwani kun ta ŋwol mo tani iin ki sho’k mo dhali uni gun ’kosha monthus mo tani dhelelkunu is mo be dhali uni kun tana ’diye/ mo tani ciḵki gwo mo dhali uni gun wukin mo tani cukunu mis mo dhali uni kun hatha’ko’d mo tani tanki gwom ’boro’d jin c̱ikunu uni mo be. 23 Dhali mom’bor mii gom a’di jin diki gam to jin kol a’di mo e aha/ mo be.

24 Ki ’kwani kun hash ma Yohaan iikin mo tani a’di ṯelki gwo ’pen mo mmo/owa waambuhany ’kwani gwo mo isi gwo goma Yohaan mo ki: Atinta i/iikina um ka pije/ mo e mombwaasho mo mmohil mo? Apil jin yiḵinkina ’tham is mo ’taa? 25 Atinta i/iikina um ka pije/ mo mmop̱ar e mo? Wathi/ jin hithi burrinye/ jin na’bula/ na’bul mo ’taa? Hili mo mo ma uni gwansan kun ’kokin mo mmohi’th burrinyeny jaro/ jaro/ mo dhali mmo’ko ’kom ’penkap̱an mo tani uni ’kon mo e gu’b ma maliḵ mo be. 26 Atinta i/iikina um ka pije/ mo mmop̱ar e mo? Amanc̱i gwo ma Arumgimis kadhamo/ mo ’taa? Nye, aha/ ṯora um gwo mo dhali amanbola manc̱i gwo ma Arumgimis kadhamo/ e mo. 27 A’di yansan ta a’di jin ’kwarkunu gwo mo ki:

31 ’Kwani ma nyaḵum yil gwansan mo tani miga/ dhu uni ka p̱ar ’ban kata mo? Uni wana e kata mo? 32 Uni wana e ki uc̱i gun ’kon mo e mo ma suug mo dhali yuḵa yuḵ ka rem ’kup̱ mo ki:

36 Wathi/ ’deŋ kamu/ ’peni ’Kwani P̱arisiyiin a’di doṯki a’di mo mmonyaḵ to shwa ki a’di mo dhali a’di cic̱ki gu’b gi Wathim P̱arisi mo dhali a’di c̱a’bki’da tharabeesa mo be. 37 Dhali hili mo mo ma, a’boma kamu/ ’peni ’peŋkuman bampa/ yan mo a’di ta’da manmii miinthus mo. Ka yim da/arki gwo ki a’di c̱a’bki’da tharabeesa gi gu’b gi Wathim P̱arisi mo tani a’di guyi’d turaŋ gasaas jin ta gi kush jin din ma yina ’borga/ mo. 38 Dhali a’di ki doshi bwamp̱o/ a’di isho’k piti mo. A’di ki ko mo. A’di ki ṯel mii ’pen mo mmoli/ a’di sho’k ki jabu’th em piti mo dhali a’di ki shumuṯ uni ka mur ’kup̱ ma yim mo dhali a’di ki p̱i sho’k piti ’twa/ mo dhali a’di ki ’kosh uni ka yina ’borga/ mo be. 39 Dhali ki Wathim P̱arisi jin yuḵki a’di mo p̱arki a’di e mo tani a’di o gwo e is piti mo ki: Waḵki/ wathi/ yan ta’da amanc̱i gwo ma Arumgimis kadhamo/ mo tani a’di midi ’taki nyiṯẖ mo mo ka ’bom yansan si’da/ ta’da ’bom jana mo jin taki a’di is is ki me’d mo haala yim ta’da manmii miinthus mo be. 40 Dhala Yesus thoḵki gwo mo dhali o a’di gwo mo ki: Simaan, aha/ tana gi gwoŋ kamu/ mo mmo/o /e mo. Dhali a’di ki thoḵ a’di gwo mo ki: Katinta mo Manṯor Gwo mo? 41 Wathin ’deŋ kamu/ ta’d gi ’kwani su/ mo kun ’kon ma mure/ m’ba/ mo. Jan ’de/ din ma mure/ ma riyaal* (b) ṯulṯumiyya iss ’kwanimpa ka ḵarpaci ’ba/ mo dhali jamu/ ka riyaal† (c) ṯalaṯiin iss wathimpa mmota iss ’de/ i’ce’dka ’kume’d mo. 42 Ki uni mol to c̱i ka nyaŋ’ko’d mo tani a’di ki dhal uni su/ ’pen mo ka mure/ i’ba/ mo. Shwane/ jana ’peni bwam uni midi en a’di ki nyanye/ mo? 43 Simaan thoḵ a’di gwo mo ki: Jan ’de/ jin ṯoshka/ mo ki a’di jin dhalkunu amure/ ’pen mo ki nyanye/ mo. Dhali a’di ki o a’di gwo mo ki: /e o gwo ki ’bore/ mo be. 44 Yan’ko’d a’di ki ṯu’k ’kup̱ ka ’bom mo dhali owa Simaan gwo mo ki: /e mishkina ’bom yansan mo ’taa? Aha/ cic̱kina gu’b pini mo tani dhali /e diki c̱i aha/ yi’deŋ kamu/ mo ki sule/ mo gom sho’k pem mo. Hila yim a’di ki li/ aha/ sho’k pem ki jabu’th em piti mo dhali shumuṯ uni ka mur ’kup̱ piti mo be. 45 /e diki c̱i aha/ momp̱i ’twa/ ki sule/ mo. Hili ’pena tee ki aha/ p̱u’dkina mo tani ayim diki daḵ mo mmop̱i sho’k pem ki ’twa/ mo be. 46 /e diki ’koshaa/ ’kup̱ pem ka yin mo be. Hila yim a’di ’koshki aha/ sho’k pem ka yina ’borga/ mo be. 47 Wakan aha/ ṯorkina /e gwo mo ki miinthus ma yim kun takina ris mo tani uni dhalkunuwa yim ’pen mo haala yim enki’da en ki nyanye/ mo. Hili a’di jin dhalkunu miinthus ’pen ki gwa’de/ mo tani a’di enki’da en ki gwa’d gwa’d mo be. 48 Dhali a’di ki owa yim gwo mo ki: Miinthus pini dhalkunu /e ’pen mo be. 49 Dhali yan’ko’d uni gwansan kun nyaḵki ’kowa tharabeesa nyaḵki a’di mo tani uni ṯelki gwo ’pen mo mmo/o e bwam uni ’cena mo ki: Kaja yanne jin mishi dhal ’kwani miinthus buni ’pen mo? 50 Dhali a’di ki owa ’bom gwo mo ki: Moŋgam gwo is pini a’di woṯẖki /e mo be. Yaku/ ki moŋḵu’th is mo ma.