1 ’Ko’di to gwansan mo tani Tap̱a laḵki ’kwanin tiya i/issi kwara i’ce’dka ’kume’d mo dhali a’di hashki uni mo nṯwa/a/ ki a’di mo ka susu/ susu/ mo e bampa/ ’baar mo dhali e mo ’baar mo jin mura a’di ki is piti mmoyaku/ mo. 2 Dhali a’di ki o uni gwo mo ki: Bwam mondhe’d ishki’d ka enthus mo, hili imanmiiya ṯu’c mo tani uni ’koni daḵa/ mo. Haali/ a’di wakan mo tani ’thoyi mo ma, ki Tap̱a gi bwam mondhe’d midi hash imanmiiya ṯu’c piti mo e bwam mondhe’d piti mo be. 3 Iiku/ i bway bum mo ma. Hili mo mo ma, aha/ mina hashki um mo me’d ushi ḵa’bal mo e bwam ma wu mo. 4 Dhalka jisilaan ki ḵal mme’d mo walla ḵucaŋ mo, walla ap̱p̱a/ mo, dhali dhalki wathin ’deŋ kamu/ ki the me’d mbway mo ma. 5 E gu’b yin jin mina umi cic̱ mo tani oyi gwo nṯwa/a/ mo cikise/ ki: Moŋḵu’th is midi di e gu’b yansan mo. 6 Dhali waḵki/ ya/ gi moŋḵu’th is di’d e mun mo tani moŋḵu’th is bum mini si/is ap̱o/ a’di mo, hili waḵki/ a’di diki di mo tani a’di minu doḵku/ um mo. 7 Dhali ’koyi e gu’ba ṯal ’de/ yan mo mmoshwa to mo dhali mmop̱i to mo a’di jin mina uni ic̱i um mo, haali/ amanmiiya ṯu’c minu mii c̱i to jin ha me’d ka ṯu’c piti mo. Dhalku/ ki tan gu’b mo ma. 8 E bampa/ yin jin mina umi cic̱ mo tani dhali ’kwani ki bu’th um mo tani shwayi tonṯe/ jin minu kara bori um mo. 9 Wac̱i uni gun ’bathan e bampa/ yan mo dhali oyi uni gwo mo ki: Bampa/ ma Arumgimis a’di p̱u’dki’d ki ’dishe/ e um mo. 10 Dhali e bampa/ yin jin cic̱kina um mo dhali uni ’koki bu’th um mo tani iiyi i bway tur piti mo dhali oyi gwo mo ki: 11 Bu’da ’cesh gi bampam bum yansan mo tani jin mu’thkina aman ki sho’k bam mo tani aman dhi’thkina a’di ap̱o/ um mo. Bahili mishi mo mo ma, ki Bampa/ ma Arumgimis midi p̱u’du/ ki ’dishe/ mo be. 12 Aha/ ṯora um gwo mo ki a’di mina ’twa/ si’d mo yisa gom Pan Saduum mo ka tee c̱aan mo me’d bampa/ c̱aan mo be.

13 Wayyi e um gi Paŋ Kurasiin mo, wayyi e um gi Pam Beeṯsayda mo, haali/ waḵka dhan miim ’bi’thga/ kun miikunu mo e um mo tani minu ’taki mii mo e Pan Sur mo dhali Pan Saydaa/ mo tani uni mini ’taki rica du is kadhamo/ mo mmo’ko e burrinyen shawaal mo dhali bwam ’piny mo. 14 Hili a’di mina ’twa/ ’dish mo gom gwon dwall gi Pan Sur mo dhali Pan Saydaa/ mo mmobol um e mo be. 15 Dhali um ’kwani gi Paŋ Kap̱ranahuum mo minu ’de’k um me’d momis mo ’taa? Um minu ’doyu/ ka luŋgu’b eya Haawiya mo be.

16 A’diyin jin ciḵki um gwo mo tani a’di ciḵki aha/ gwo mo be dhali a’di jin waḵki um mo tani a’di waḵki aha/ si’da/ mo be. Dhali a’di jin waḵki aha/ mo tani a’di waḵki a’di jin hashki aha/ mo be.

17 ’Kwanimpa issi kwara i’ce’dka ’kume’d mo tani uni doḵkini a’di mo ki bwaŋ ’kunyga/ mo mmo/o gwo mo ki: Tap̱a, aruma ’cesh uni haki gwom bam e ki gway pini mo be. 18 Dhali a’di ki o uni gwo mo ki: Aha/ p̱arkina Seṯaan e mo biṯki’d mo me’da wara sho’k mo ’peni momis mo.

19 Hili mo mo ma, aha/ c̱ikina um moshirr mo mmose tasha/ shoka p̱o/ mo dhali a’daḵ mo dhali ap̱owa ris mom’bi’th gi uni gun ta ’kup̱ mo, dhali toŋ kamu/ yisa di’da jin midi shi/ um is mo be. 20 Hili mo mo ma, dhalku/ bwa ki ’kuny mo gom mii yan mo, ka ruma ’cesh haki gwom bum e mo, hili ’kunyi bwa mo ma, gom gway bum kun ’kwarkunu mo e momis mo.

21 Dhali e mo yansan mo tani a’di ’kunykina bwa mo e Shi/in Dheleladhelel mo dhali o gwo mo ki: Aha/ ’bora /e bwa i is mo, Ababa, Tap̱a gi momis mo dhali mony’cesh mo, ki /e bagkina aris to gwansan ’peni uni gun yuḵayuḵ mo dhali kun mishi gwo ’ban mo dhali /e ki ṯor uni eya tente/ mo ki uni gun ta uc̱i mo be. Nye, Ababa, gom ku gi wakan mo tani bwam ma ’them pini a’di a’dan mo be. 22 Aris to ’baar mo c̱ikunu aha/ mo ka Ababam pem mo, dhali wathiŋ kamu/ yisa mishi mo mo ki Ya/ a’di ta’da aja mo, hili isi ciki/ Ababa mo be, walla Ababa a’di ta’da aja mo, hili isi ciki/ Ya/ mo dhali ma a’din ’de/ yin jin mina Ya/ ikwany mo tani mina a’di iṯor a’di i e mo be.

23 Yan’ko’d a’di ki ṯu’k ’ban mo dhali o imanciḵ a’di gwo gwo mo uni ’cena ki: Mom’bor mii gom e mo uni gun mishi to gun misha um mo. 24 Haali/ aha/ ṯora um gwo mo ki imanc̱i gwo ma Arumgimis kadhamo/ mo kun tana ris mo dhali imaliḵ si’da/ mo, uni ona bwa mo mmop̱ar to e mo kun p̱ara um e mo dhali uni ’koki mish a’di mo dhali mmociḵ a’di jin ciḵa um mo tani dhali uni ’koki ciḵ a’di mo be.

25 Dhali hili mo mo ma, amanmisha jo’d gwoŋḵan doshki’d ki mis mo mmokar a’di mo mmopal ki gwo mo ki: Manṯor Gwo, aha/ mina mii atinta mo mmota gi mal gi mondiki/e ki sule/ ya ye ’ba/ mo? 26 Dhali a’di ki thoḵ a’di gwo mo ki: Gwo wakata ’kwarkunu mo e gwoŋḵan jin c̱inu mo? Ji gi wakata ideŋkina /e e mo? 27 Dhali a’di ki thoḵ a’di gwo mo ki: /e mini en Tap̱a Arumgimis pini mo ka dum pini ’baar mo dhali ’ka ḵashiram pini ’baar mo dhali ki ’bi’th pini ’baar mo dhali ki bwam pini ’baar mo, dhali amannyaḵ c̱a’b pini mina /e i/en me’d is piniŋ gana/ mo be. 28 Dhali a’di ki thoḵ a’di gwo mo ki: /e thoḵki gwo ki ’bore/ mo be. Rashi yansan mii mo ma, dhali /e mini di ki e mo be.

29 Hili a’di dina gwo mbwa mo mmokar is piti me’d wathi/ jin ta jaŋ ḵar/e ki is piti mo. A’di ki owa Yesus gwo mo ki: Dhali aja a’di ita’da amannyaḵ c̱a’b pem mo? 30 Yesus thoḵ gwo mo ki: Wathiŋ kamu/ yaki’d ka luŋgu’b ’peni Pa Urushaliim mo e Pa Ariiha mo. Dhali a’di ’kamkina ’kwanin ’di/ ’kup̱ mo. Uni ki bu’th tom piti ’baar mo dhali dor a’di mo, dhali uni ki ii mo dhali dhal a’di mo mmodikina a’di eny jwa mo. 31 Dhali e ya ma gasiis jin yana a’di iya ka luŋgu’b mo e bway tur mo tani dhali a’di ki p̱ar a’di e mo dhali a’di ki per bway tur ki ’bana kamu/ mo. 32 Wakan si’da/ Wathi/ Lawi ki a’di p̱u’dki’d mo e mo yan mo dhali p̱ar a’di e mo tani a’di ki per ki bway ki ’bana kamu/ mo. 33 Hili Wathi/ gi Pan Saamira a’di yaki’d ki yampe mo tani a’di p̱u’dki’d mo e mo jin dina a’di mo, dhali ki a’di p̱arki a’di e mo tani a’di ki hil a’di ka ’thime/ mo 34 dhali ya i a’di mo dhali a’di ki ya i’tam jamam piti mo dhali wol a’di ayin nycine/ mo dhali yimana mura’th jin ḵa/u ki ŋah ŋah mo. Dhali yan’ko’d a’di ki kar a’di ap̱o/ thuluny piti mo dhali a’di ki sus a’di e gu’b yilkina/ mo dhali a’di ki mii miim pa gom a’di mo be. 35 Dhali ka cim jiŋ ’ko’d mo tani a’di ki budha riyaal ’de/ mo dhali a’di ki c̱i a’di e com gu’b gi yilkina/ mo mmo/o gwo mo ki: Miiyi ki ’bore/ gom a’di mo ma, dhali a’diyin jin mina /e i’baar mo tani aha/ mina c̱i /e a’di mo ki aha/ mina doḵku/ ka nyaŋ’ko’d mo. 36 Jana ’peni bwam uniŋ kwara gwansan jin kuluma /e gwo mbwa mo jin nyoŋki mii mo me’da mannyaḵ c̱a’b gi wathi/ yan jin biṯki’d e bwam me’d gi ’kwanin ’di/ mo? 37 A’di o a’di gwo mo ki: Jan ’de/ jin ṯor momiimii ap̱o/ a’di mo be. Dhala Yesus ki o a’di gwo mo ki: Yaku/ mo ma, dhali miiyi wakansan mo.

38 Dhali ki uni iikin e bway buni mo tani a’di cic̱ki’d e pa mo. Dhala ’bom jin yuḵu gway ka Marṯẖa bu’thki a’di e gu’b piti mo. 39 Dhali ayim ta’d gi ’bwaham jin yuḵu gway ka Mariyam mo, a’di jin c̱a’bki’d e sho’k gi Tap̱a mo dhali ciḵ gwonṯor piti mo. 40 Hila Marṯẖa a’di tashu ka ṯu’c kagahara mo mmomii to mo. Dhali ayim yaki’d e a’di mo dhali o gwo mo ki: Tap̱a, dina bwa ki ta /e wathimpa mo ki ’bwah pem a’di dhalki aha/ mo mmomii to aha/ ’de/ mo? Ṯora yim gwo mo ma, mmowoṯẖ aha/ mo. 41 Hili Tap̱a thoḵ a’di gwo mo ki: Marṯẖa, Marṯẖa, /e tana man/anan is mo dhali din ma du ki ’kus goma ris to ’baar mo. 42 Ton ṯal ’de/ di’d jin minu mii ta mo. Mariyam a’di kwanyki ’ban jin ’boro’d mo a’di jin minu ’koki bu’th mo ’pena yim mo be.