1 Hili ka tee jin ṯwa/a/ ka dhas mon’thamo/ ka’tum mo tani uni iikin mo e moŋ’kup̱aje mo mmoḵal to kun ḵuyi/ mo mo kun thosonkina uni mo be. 2 Dhali uni gamki wosh ḵa’ckunu mo ’peni ’twaman jis jwa mo. 3 Hili ki uni iiki bwaman mo tani uni ’koki gam buŋgwar is gi Tap̱a Yesus mo be. 4 Ki uni ’kokin mo mmodumbul gom mii yansan mo tani hili mo mo ma, ’kwani su/ doshkini uni mo kun shwakina burrinye/ ka wara sho’k mo.

5 Dhali me’d jin ḵo/kina uni is mo tani uni luŋki bwam/em buni a’cesh mo dhali ’kwani ki o uni gwo mo ki: Atinta ŋap̱kina um a’di jin di’d ki e ’peni bwam mowu kan mo? A’di diki di mmahan mo. Hili a’di piki’d mo be. 6 Kayi gwo e mo ma, a’di jin ṯorkina a’di um mo ki a’di di’d naskina/ e Pany Jaliil mo 7 ki Ya/ gi ’Kwani minu mii c̱i ’kwanin thusi me’d mo dhali minu mii ’kosh jwa mo ki cwany’ciṯẖan dhul mo dhali ka cim kwara mo tani a’di midi cu mis mo be. 8 Dhali uni kaki gwom piti e mo be 9 dhali doḵ ka nyaŋ’ko’d ’peni moŋ’kup̱aje mo mmoṯor uni aris to gwansan ki uni gun ’koni ’kume’d i’ce’dka ’de/ mo dhali aris ’kwanin tiya si’da/ mo be. 10 Dhala Mariyam Magdaliyya dhala Yuwanna dhala Mariyam jin ta KoYakuub dhali up̱a tiya mo nyaḵki ’ko ki uni mo uni gun ṯori to gwansan e uni gun dhunu ki she/ mo. 11 Hili gwo gwansan kun onu mo tani wa uni e ki gwo gi ’kwani kun sona du mo dhali uni ’koki gam uni gwo is mo be. 12 Hila Buṯerus cuki mis mo dhali gus mo e moŋ’kup̱aje mo dhali tu mo mo dhali p̱ar bwaman e mo. Dhali a’di ki p̱ar burrinyen dhiny e e mo mmo’ko e mom buni mo dhali a’di doḵ bway pa mo dhali a’di merki’d mo gom to gun miikin mo be.

13 Dhali ka tee yansan gana/ mo tani ’kwani su/ ’peni bwam uni ’kokin mo mmo/ii bway Pa jin yuḵu gway ka Imwaas mo, a’di jin wana e ki ŋaṯgini pesu/ ’peni Pa Urushaliim mo be. 14 Dhali uni ’kokin mo mmoṯora ṯor ka rem ’kup̱ mo goma ris to gwansan kun miikin mo be. 15 Ki uni ’kokin mo mmoṯora ṯor mo dhali mmodhaŋ gwo n’twa/ mmonṯal ’de/ mo tani Yesus ki is piti ’dishki uni is mo dhali nyaḵ ya ki uni mo be. 16 Hili em buni ’kokunu mo mmodiḵ mo ’peni monyiṯẖ a’di mo be. 17 Dhali a’di ki o uni gwo mo ki: Gwon tinta ’kona um mo mmoburushi ’twa/ mo ka rem ’kup̱ mo mmo/iina um kan mo? Dhali uni doshkin mo naskina/ mmohil mo ki bwan diṯi’d mo. 18 Dhali jan ’de/ ’peni uni mo tani yuḵkunu gway ka Kilyubaas mo, thoḵki a’di gwo mo ki: /e ta jasi wathi/ yilkinan ’de/ e Pa Urushaliim mo jin diki mish to gwansan kun miikin ka tee gwansan mo ’taa? 19 Dhali a’di ki o uni gwo mo ki: Ton tinta mo? Dhali uni ki thoḵ a’di gwo mo ki: Isi gwo goma Yesus gi Pa Naasira mo, a’di jin ta’da manc̱i gwo mo, a’di jin ta gi mii gun ’bitha’bi’th mo dhali gwo ibwambor ma Arumgimis mo dhali eya ris ’kwani ’baar mo. 20 Dhali hili igasiis kun can bana mo dhali ’kwaniŋ ’kaŋ’kup̱ pa mo tani uni c̱iki a’di mo ki a’di minu waḵ mo mmowu mo dhali mmo’kosh a’di jwa mo ki cwany’ciṯẖan dhul mo. 21 Hili aman takina ga ’teŋ kap̱e/ ki a’di ta jan ’de/ mmowan ’Kwani ma Israyiil ’ba/ mo be. Nye, dhali ka ris to gwahan ka roṯẖam p̱o/ mo tani a’di ta’da tee kun ’koni kwara mo shwane/ ki to gwansan miikin mo be. 22 Dhali up̱a tiya ’peni bampam bam mo tani merki aman e mo. Uni ’kokin e moŋ’kup̱aje mo e mon’thamo/ ka’tum mo 23 dhali uni ’koki gam is piti mo. Dhali uni doḵkin ka nyaŋ’ko’d mo mmo/o gwo mo ki uni hilki jasi tonyjan jin wana e ki iman’doyu gwo mo, a’di jin o gwo mo ki a’di di’d ki e mo be. 24 ’Kwanin tiya ’peni ’kwani gwansan, uni gun nyaḵki ’ko ki am mo tani uni iikin mo e moŋ’kup̱aje mo dhali gam a’di mo me’d jasi gwo jin ona up̱ mo, hili a’di mo tani ’kona uni ki p̱ar e mo be. 25 Dhali a’di ki o uni gwo mo ki: Ayy um ’kwani kun ta p̱us mo dhali kun gwa’d ma du ki gwa’d mo mmo’koki gam aris gwo ’baar is mo kun okina imanc̱i gwo ma Arumgimis kadhamo/ mo. 26 A’di diki ta mii jin minu mii mii mo ka Ḵrisṯẖos mina is ’taki diki mii ’kosh ka nyor gom to gwansan mo dhali cic̱ mo e monycam piti mo ’taa? 27 Dhali mmoṯel ’pen ’pena Musa mo dhali imanc̱i gwo ma Arumgimis kadhamo/ mo tani a’di ki ṯor uni aris ’pemen gwo kun ’kwarkunu mo e Gwo ma Arumgimis mo goma ris to gi isi gom is piti mo be.

28 Wakan uni ’dishki pa is mo e mo jin iikina uni mo. A’di wana e ki a’di ya’di ya gi yam piti mo. 29 Hili uni woṯẖki a’di ’kup̱ mo mmo/o gwo mo ki: C̱a’bi nyaḵki am mo ma haali/ mo ta mom’peŋḵaskum mo be haala tee ’baara ’pen mo be. Wakan a’di seki bwaman mo mmonyaḵ c̱a’bki uni mo be. 30 Dhali ki a’di diki’da tharabeesa nyaḵki uni mo tani a’di bu’thki maaŋḵuthu’d mo dhali ’bora ’bor bwa i is mo dhali ’ce’d a’di mo dhali c̱i a’di ki uni mo be. 31 Dhali em buni ḵa’dkunu mo dhali uni nyiṯẖki a’di mo dhali a’di p̱iki’d mo ’peni bwam/em buni mo be. 32 Dhali uni o gwo ka rem ’kup̱ mo ki: ’Kon ma dum bana ki su’kka war mo mmo’kona ana mmoṯora/ ṯor e bway tur mo? mmoḵa’dkina a’di ana Gwo ma Arumgimis kun ’kwarkunu mowa? 33 Dhali uni cuki mis mo ka tenteŋ gana/ yansan mo dhali doḵ ka nyaŋ’ko’d mo e Pa Urushaliim mo. Dhali uni ki gam uniŋ ’kume’d i’ce’dka ’de/ mo tulki is mo mmonṯal ’de/ mo dhali uni gwansan kun nyaḵki ’ko ki uni mo 34 dhali uni kun o gwo mo ki: Tap̱a, ka jiŋ gana/ a’di cuki mis mo dhali a’di piki’da Simaani is mo. 35 Dhali yan’ko’d uni ki ṯor uni to kun miikin e bway tur mo dhali mmonyiṯẖkina uni a’di mo mmo’ce’d maaŋḵuthu’d mo be.

36 Dhali ki uni ’kon mo mmo/o gwo yansan mo tani Yesus ki is piti doshki’d mo mbwam uni mo dhali o uni gwo mo ki: Moŋḵu’th is e um mo. 37 Hili uni dherkina is bwa mo mmoḵo/ is mo dhali ṯoshki uni p̱arkina arum e mo be. 38 Dhali a’di ki o uni gwo mo ki: Atinta murkina uma du kan mo? Dhali gwondoṯa tinta cuki’d mo eya dum bum kan? 39 Hili me’d pem dhali sho’k pem mo ma. Aha/ ki is pem tana a’di mo be. Budhi aha/ is ki me’d mo ma dhali p̱ar e mo, haala rum diki ta gi buŋgwar is mo dhala sima/ mo me’d jin p̱arkina um e mo kun taka/ mo be. 40 Dhali ki a’di oki gwo yansan mo tani a’di ki ṯor uni me’d piti i e mo dhali sho’k piti mo be. 41 Dhali ki uni ’kokin mo mmothis gwo ’koki gam is naskina/ mo gom moŋ’kuny bwa mo dhali momer mo tani a’di ki o uni gwo mo ki: Um tan gi toŋ kamu/ mmoshwa mmahan mo ’taa? 42 Dhali uni ki c̱i a’di ushi kuluny shum wa’c mo jin ’thosu mo 43 dhali a’di ki bu’th a’di mo dhali ’ka ibwambori uni mo be.

44 Dhali yan’ko’d a’di ki o uni gwo mo ki: Gwo gwansan ta gwom pem kun oka/ um mo ki aha/ dina um naskina/ mo, ka ris to gwansan kun ’kwarkunu mo gom aha/ mo e gwoŋḵan ma Musa jin c̱inu mo dhali e gwo gi imanc̱i gwo ma Arumgimis kadhamo/ mo dhali eya Masamiir mo tani minu mii thim mo be. 45 Yan’ko’d a’di ki ḵa’d uni adum buni e mo mmomish gwo ’ban mo gom Gwo kun ’kwarkunu mo be. 46 Dhali a’di ki o uni gwo mo ki: Wakan a’di ’kwarkunu mo ka Ḵrisṯẖos minu mii ’kosh is ka nyor mo dhali ka cim kwara mo tani a’di midi cu mis mo ’peni mowu mo. 47 Dhali ki gwo gom mo gi rijuwa du is mo dhali gom gwo gi minu dhal miinthus gi ’kwaniny’cesh ’pen mo tani minu mii c̱i ki gway piti mo e kal gi ’kwaniny’ceshi ’baar mo mmoṯel ’pen ’peni Pa Urushaliim mo be. 48 Um ta iman/o gwo gom to gwansan mo be. 49 Dhali hili mo mo ma aha/ mina hash gwo jin on ma Babam pem is mo ap̱o/ um mo be. Hili ’koyi e ’peŋkuman bampa/ mo ntagi um minu shum mo ki mom’bi’th mo ’peni momis jin eḵa/ eḵ mo be.

50 Dhali yan’ko’d a’di ki shu uni bway ka pije/ mo ntagi Pam Beeṯaniya mo. Dhali a’di ki ’de’k me’d piti ki mis mo dhali ’bor uni mii mo be. 51 Ki a’di di’d mmo’bor uni mii mo tani a’di ki ḵwa/ is piti ’peni uni mo dhali a’di bu’thkunu bway momis mo be. 52 Dhali uni luŋki a’di mo mmodoḵ ka nyaŋ’ko’d mo e Pa Urushaliim mo ka dhan bwaŋ ’kunyga/ mo be 53 dhali uni ’kokin mo mmorash ’ko mo e gu’b gi mondheleladhelel mo mmo’bora Arumgimis bwa i is mo be.