1 Dhali a’di yuḵki uni e a’di mo gun ta kum piti kun ’koni ’kume’d i’ce’dka su/ mo kun ta imanciḵ a’di gwo mo dhali c̱i uni moshirr mo ap̱owa rum thus kun nyo/on mo mmo/ur uni ka pije/ ’peni uni mo dhali mmowac̱a ris ’ba’th dhali aris isa nyor kun ’koshi ’kwani mo be. 2 Dhali gway gi uni kun ’koni ’kume’d i’ce’dka su/ mo kun dhunu ki she/ mo tani wa cikise/ mo be: jin ṯwa/a/ ta’da Simaan, a’di jin yuḵu gway ka Buṯerus mo dhala Andaraawus jin ta’da kam piti mo, dhala Yakuub jin ta ya/ ma Sabadi mo dhala Yohaan jin ta’da kam piti mo be. 3 Dhala P̱ilibbus dhala Barṯulamaawus, dhala Ṯuuma dhala Maṯṯa jin ta’da mantera thulp̱a/ mo, dhala Yakuub jin ta ya/ ma Halp̱a mo, dhala Ṯaddaawus mo, 4 dhala Simaan gi Paŋ Kaana mo dhala Yahuusa Isḵariyuuṯi, a’di jin ’ciṯẖi/ a’di is ki gwo mo be.

5 Uniŋ ’kume’d i’ce’dka su/ gwansan hashkin ma Yesus ka pije/ mo mmoḵan uni gwo mo ki: Dhalku/ ki ii mo e bwaman mo kun ’kona ’kwani kun ’koki ta ’Kwani Yahuuda/ mo ma dhali dhalku/ ki cic̱ mo e bampa/ gi Pa Saamira mo. 6 Hili iiyi mo ma mmodhal mii e i is mo mmoŋap̱ ḵa’bal kun thisu e mo e gu’b ma Israyiil mo be. 7 Dhali c̱iyi gwo mo me’d jin mina umi ii mo mmo/o ki: Bampa/ gi Momis p̱u’dki’d mo hila/ e me’d mo be. 8 Wac̱i uni gun ’ba’thkin mo, ’deki uni gun wukin mo, dhali dheleli uni gun ’kosha monthus mo, dhali uri aruma ’cesh ka pije/ mo. Um bu’thki a’di ki dar gi to jin c̱inu mo, c̱iyi a’di jin c̱inu ki dar ga kar ’kus mo. 9 Dhalku/ ’dolkon gana/ ki bu’th mo walla ’dolkon kush mo walla gurany ’per eya jisalaan bum mo, 10 walla ḵucaŋ mo gom iim bum mo, walla burrinyem bwaman isu/ mo, walla ap̱p̱a/ nsho’k mo, walla to mme’d mo, haali/ amanmiiya ṯu’c a’di ha me’d gom tonṯem piti mo. 11 Dhali e mom bampa/ yin jin mina umi se mo walla pa mo tani gami a’di jin ha me’d mo e bwaman mo yan mo dhali ’koyi nyaḵki a’di mo ntagi um mini ii mo. 12 Me’d jin mina umi cic̱ gu’b mo tani theyi a’di me’d mo ma. 13 Dhali waḵki/ gu’b ha me’d mo tani dhalki moŋḵu’th is bum p̱u’dki’da p̱o/ a’di mo. Hili waḵki/ a’di diki ha me’d mo tani dhalki moŋḵu’th is bum doḵki’di um ka nyaŋ’ko’d mo. 14 Dhali waḵki/ a’din ’de/ yin midi diki bu’th um mo walla diki ciḵ gwom bum mo tani biri abuhany ’peni sho’k bum mo ma me’d jin dhalkina um gu’b c̱aan ’pen mo walla pa c̱aan mo. 15 Ka jiŋ gana/ aha/ ona um gwo mo ki a’di mina ’twa/ si’d mo yisa ka tee gi gwon dwall mo gom bampa/ gi Pan Saduum mo dhali Paŋ Gamuura mo mmobol pa c̱aan e mo yisa.

16 Hili mo mo ma, aha/ hashkina um mo ka pije/ mo me’d ḵa’bal mo e bwaman ma wu mo, wakan yuḵi ki yuḵ mo me’d tasha/ mo, dhali dari ga maḵ mo me’d gurko/ mo. 17 Jiyi ’kwani ki e ki ’bore/ mo ma haali/ uni mini c̱i um mo e montul is jin dwallu gwo mo dhali dor um mo e gu’b gi montul is buni mo be. 18 Dhali um minu dir ’ko’da ’cesh mo mbwambori imudhiir mo dhali imaliḵ mo gom gway pem mo mmoc̱i gwo mbwambori uni mo dhali ’kwani kun ’koki ta ’Kwani Yahuuda/ mo be. 19 Ki uni mini c̱i um wakan mo tani dhalku/ is ki anan mo mmo/o gwo mo ki gwonta imina umi o mo walla um mini o ata mo. Haali/ a’di jin mina umi o mo tani minu c̱i um ki mo yansan mo be. 20 Haali/ a’di diki ta um kun mini o gwo mo, hili Shi/in ’pena Ababam bum oki gwo e um mo be. 21 Akama kamu/ midi c̱iya kam piti mmowu mo, dhali ababa gi wathin ’deŋ kamu/ midi c̱i ya/m piti mmowu mo dhali uc̱i mini cu mis ap̱o/ ikum mo dhali uni mini dhu uni mmowu mo be. 22 Dhali um minu ishi/ i e mo gom gway pem mo be. Hili a’diyin jin midi ’dim ’kup̱ ntagi ’pemen mo tani a’di minu woṯẖ mo be. 23 Ki uni mini ṯo’c um bwa mo e bampan ’deŋ kamu/ mo tani soyi mo e bampaŋ kamu/ mo. Haali/ ka jiŋ gana/ aha/ ona um gwo mo ki um mini ’koki ii e bampa/ gi ’Kwani ma Israyiili ’baar mo nṯwa/a/ ki Ya/ gi ’Kwani midi p̱u’du/ mo be.

24 Amanciḵ gwo yisa ica’d ka manṯor a’di gwo mo yisa, walla c̱iŋkina/ si’da/ yisa ica’d ki tap̱am piti mo yisa. 25 A’di ’koshi jwa mo goma manciḵ gwo mo mmowa e ka manṯor gwom piti mo be, dhali c̱iŋkina/ si’da/ a’di ’koshi jwa mo mmowa e ki tap̱am piti mo be. Waḵki/ uni mini yuḵ tap̱a gi gu’b gway ka Baalsebuul mo tani bakata ’te/ beseene/ mina uni sor uni gwansan kun ’koni gu’b piti mo.

26 Wakan dhalki uni ki ḵo/ mo haali/ toŋ kamu/ yisa di’da jin kumu ’kup̱ mo ki a’di minu ’koki ṯor eya tente/ mo. Walla toŋ kamu/ yisa di’da jin bagkunu mo ki a’di minu ’koki mish eya tente/ mo. 27 A’di jin ṯorka/ um ka ḵwal is mo tani mina umi ṯor e moŋkush mo dhali a’di jin ciḵa um ki ḵako/ mo tani mina umi ṯor eya tente/ eŋ ’kuŋgu’b mo be. 28 Dhali dhalku/ ki ḵo/ uni gwansan kun ’koshi buŋgwar is mo hili uni ’koki misha ḵashira/ ’kosh mo. Hili dhali mii yan e i is mo mmoḵo/ a’di jin mishki’da ḵashira/ sho’k ’ce’d mo mmonṯal ’de/ ki buŋgwar is ilu/ mo e mo ma al o’d mo be. 29 ’Konuki yol ushi ’dii su/ ka maliimi su/ mo ’taa? Dhali jaŋ kamu/ ’de/ ’peni uni gwansan midi diki biṯa ’cesh mo ki dar gi bwa ma Ababam bum mo be. 30 Hili amur ’kup̱ bum gana/ uni ’baar mo deŋkunu e mo be. 31 Gom a’di gi wakan mo tani dhalku/ is ki ḵo/ mo ma haali/ um a’di i’bitha yol she/ ki ’bi’th mo mmobol ushi ’dii e mo be. 32 Wakan aris ’kwani ’baar mo ka ’deṯe/ ’deṯe/ uni gun mini c̱i gwo mbwambori ’kwani mo gom aha/ mo tani aha/ si’da/ mina c̱i gwo gom uni mbwambor ma Ababam pem mo, a’di jin di’d e momis mo be. 33 Hili a’diyin jin waṯki aha/ gway mo mbwambori ’kwani mo tani aha/ si’da/ mina waṯ a’di gway mo mbwambor ma Ababam pem jin di’d e momis mo be.

34 Dhalku/ ki ṯosh ki aha/ p̱u’dkina mo mmokar moŋḵu’th is e mony’cesh mo. Aha/ dinaki p̱u’du/ mo mmoḵal moŋḵu’th is mo, hili gandala turga/ mo be. 35 Haali/ aha/ p̱u’dkina mo mmothum wathi/ ap̱o/ com mo dhali a’di jin ta uni a’bwa/um mo tani ap̱o/ kum mo be dhali a’di jin ta uni a’bwa/um eya mar piti mo tani ap̱owa mar pitim ’bomi mo be. 36 Dhali ’kwani kun ta ’kup̱ gom wathiŋ kamu/ mo tani mini ta uni gwansan gi gu’b pitiŋ gana/ mo be. 37 A’di jin eni com kagahara mo walla kum mo mmobol aha/ e mo tani a’di diki ha me’d mo gom aha/ mo be. Dhali a’di jin eni ya/ mo walla ’bwa/ mo mmobol aha/ e mo tani a’di diki ha me’d mo gom aha/ mo be. 38 Dhali a’di jin diki ḵal cwany’ciṯẖan dhul piti mo dhali diki baṯẖ aha/ nsho’k mo tani a’di diki ha me’d mo gom aha/ mo be. 39 A’di jin midi gam mondiki/em piti mo tani a’di midi this a’di e mo be, dhali a’di jin midi this mondiki/em piti e mo gom gway pem mo tani a’di midi gam a’di mo be.

40 A’diyin jin bu’thki um mo tani a’di bu’thki aha/ mo dhali a’diyin jin bu’thki aha/ mo tani a’di bu’thki a’di jin hashki aha/ mo be. 41 A’diyin jin bu’thki’da manc̱i gwo ma Arumgimis kadhamo/ mo haali/ a’di ta’da manc̱i gwo mo tani midi bu’th to jin ish ḵumma/ ma manc̱i gwo ma Arumgimis mo, dhali a’diyin jin bu’thki wathiŋ ḵar/e mo haali/ a’di ta wathiŋ ḵar/e mo tani a’di midi bu’th to jin ish ḵumma/ gi wathiŋ ḵar/e mo be. 42 Dhali a’diyin jin midi pash ari jan ṯal ’de/ jin gwa’da’d ’peni uni gwansan yi’den ’thup̱ga/ ki ’kwa mo haali/ a’di ta’da manciḵ gwo mo tani ka jiŋ gana/ aha/ ona um gwo mo ki a’di midi diki this tom piti e jin ish ḵumma/ mo be.