1 Dhali ka teen ’de/ c̱aan mo tani Yesus yaki’d ka pije/ mo ’peni gu’b mo dhali c̱a’bki’di shemena al mo be. 2 Dhali adhana waambuhany ’kwani tulki is mo e a’di mo. Wakan a’di sekina a’di mo e bwam ma ḵur mo dhali c̱a’b nycine/ mo dhali awaambuhany ’kwani uni doshkini shemen ma gap mo be. 3 Dhali a’di ki ṯor uni gwo ka ris ki gwom ’bi’th/e mo ki: Amanyeḵa ḵa’bany yaki’d mo mmoyeḵa ḵa’bany mo be. 4 Dhali ki a’di yeḵki’d mo tani aḵa’banya tiya biṯkin mo e bway tur kun iinu mo dhali ’dii p̱u’dkin mo dhali los uni mo be. 5 Dhali aḵa’banya tiya biṯkin mo eya ’cesh gi embul wosh mo, e mo jin dara uni ka ’cesh ki nyanye/ mo tani dhali ki jahanne/ uni ’kana le/ mo haali/ uni dar gi embul mo e mo ma ’cesh mo be. 6 Hili ka tente/ sulki’d mo tani uni shi’bilkunu mo dhali haali/ uni daran ga birman mo tani uni ḵu’thkin ka bush’ko’d mo be. 7 Aḵa’banya tiya uni biṯkin mo e bwam ma ’de/ mo dhali ka ’de/ can mo tani uni c̱okoṯki uni mo be. 8 Aḵa’banya tiya uni biṯkin mo eya ’cesh jin ’boro’d mo dhali uni dho’th maman mo, jaŋ kamu/ dhotho’di iss ’kwanimpa ka mudhe’d mo dhali jaŋ kamu/ dhotho’di iss ’kwanimpa ka ’de/ i’ce’dka ’kume’d mo be. 9 A’diyin jin ta’d gi gu’ban’ce mo tani dhalki a’di ciḵ gwo mo ma.

10 Dhali yan’ko’d imanciḵ a’di gwo p̱u’dkini a’di mo dhali o a’di gwo mo ki: Atinta ṯora /e uni gwo ki gwom ’bi’th/e mo sa/? 11 Dhali a’di ki thoḵ uni gwo mo ki: E um mo tani um c̱inu gwo mo mmomish gwo jin c̱inu ki jin bag mo gom Bampa/ gi Momis mo, hili e uni mo tani uni ’konuki c̱i a’di mo be. 12 Haali/ e a’diyin jin ta’d gi nyanye/ mo tani minu c̱i a’di ki nyanye/ mo be dhali a’di midi ta gi a’di jin ishki’d ka enthus mo. Dhali hili ’peni a’diyin jin dara’d mo tani hili me’d jin tana a’di gi a’di mo tani minu bu’th ’peni a’di mo be. 13 A’di ta ’pemen gwo a’danni jin oka/ gwo e uni ki gwom ’bi’th/e mo haali/ uni hilki to gun ’kona uni ki mish mo dhali uni ciḵki gwo kun ’kona uni ki ciḵ mo walla uni ’koki mish gwo ’ban mo be. 14 E uni ka jiŋ gana/ mo tani gwo thimkunu mo jin onu is mo eya Ishaya jin o’d ki:

18 Gom a’di gi wakan mo tani ciḵi gwo gom gwom ’bi’th/e goma manyeḵa ḵa’bany to mo ma. 19 Ki a’din ’de/ yin jin ciḵki gwo gom Bampa/ ma Arumgimis mo dhali diki mish a’di ’ban mo tani a’din thus ’de/ yin p̱u’dki’d mo dhali kwany gwo jin sinu eya dum piti mo be. A’di yansan ta a’di jin yeḵu e bway tur jin iinu mo be. 20 Dhali me’d gom a’di jin yeḵu e embula ’cesh wosh mo tani a’di ta a’di jin ciḵki gwo mo dhali ki jahanne/ a’di ki la bu’th a’di ki bwaŋ ’kunyga/ mo, 21 hili a’di dara’d ga birman e is piti mo hili a’di di’d ari’ceenne/ mo dhali ki monṯo’c bwa p̱u’dki’d mo walla ki moŋ’kosha ’kosh cuki’d mo gom gway gi gwo mo tani ki jahanne/ a’di biṯki’d mo be. 22 Dhali wakan gom a’di jin yeḵu mo e bwam ma ’de/ mo tani a’di yansan ita a’di jin ciḵ gwo mo, dhali hili a’di bala to ga ’cesh is mo dhali ’penkap̱an piti jin tana a’di pa ki pa mo tani c̱okoṯ a’di mo dhali a’di mol dho’th maman mo be. 23 Dhali gom gwo gi a’di jin yeḵu mo eya ’cesh jin ’bora’bor mo tani a’di yansan nta a’di jin ciḵ gwo mo dhali mish a’di ’ban mo dhali a’di ka jiŋ gana/ dhodhi maman mo be, dhali adho’th piti jin dhodha a’di eya tora ’de/ mo tani ta iss ’kwanimpa mmudhe’d mo dhali jaŋ kamu/ ki iss ’kwanimpa ikwara mo, dhali jaŋ kamu/ ki iss ’de/ i’ce’dka ’kume’d mo be.

24 Dhali gwom ’bi’th/eŋ kamu/ kara a’di uni mbwambor mo mmo/o gwo mo ki: Bampa/ gi Momis mo tani mishu kar ka par ’ban mo me’d wathi/ jin yeḵki’da ḵa’bany tom ’boro’d e bwaman buntom piti mo be. 25 Hili ki ’kwani ishki e mo tani a’di jin ta ’kup̱ gi a’di p̱u’dki’d mo dhali yeḵ biriny e bwaman pos piti mo dhali a’di ki ya mo be. 26 Wakan ki to jin sinu mo ’kaki’da le/ mo tani dhali dho’th emen mo tani dhali yan’ko’d biriny pikin si’da/ mo be. 27 Dhali ki imanmiiya ṯu’c gi com gu’b p̱u’dkin mo dhali o a’di gwo mo ki: Tap̱a, dina /e ki yeḵa ḵa’bany to jin ’boro’d e bwam buntom pini mo ’taa? Atinta winya biriny isi pi mo? 28 A’di ki o uni gwo mo ki: A’di jin ta ’kup, a’di mii mii yansan mo be. Dhali imanmiiya ṯu’c o a’di gwo mo ki: A/dhali /e ŋap̱i aman mmo/ii mo mmotul uni is mo ’taa? 29 Hili a’di ki o gwo mo ki: Yisa. Hili isi ciki/ ki um mini tul biriny is mo tani um mini buḵ pos si’da/ mo mmonṯal ’de/ nyaḵki uni mo be. 30 Dhalki uni cani monṯal ’de/ mo ntagi bwam mondhe’d mo dhali bwam mondhe’d min ma teem piti ’baar mo jin minu ’ciṯẖ a’di to mo tani aha/ mina ṯor iman’ciṯẖ to gwo mo ki: ’Ciṯẖi/ to mo ma mmotul biriny is nṯwa/a/ mo dhali deḵ uni ki deḵken mo mmoc̱i’th mo hili tuli pos is mo e bwan themes pem mo ma.

31 Dhali gwom ’bi’th/eŋ kamu/ kara a’di uni mbwambor mo mmo/o gwo mo ki: Bampa/ gi Momis a’di wana e ki emen to jin miinuwa ’tash mo, a’di jin ḵala wathi/ mo dhali yeḵ mo e bwam buntom piti mo be. 32 Emen to a’di ta p̱iri’th ki p̱iri’th mo be hili ki a’di caki’d mo tani a’di wurup̱a wurup̱ kagahara mo dhali warki’d ki cwa mo. Wakan ’dii kun p̱en e mis mo tani p̱u’dkin mo dhali nyaŋ gu’b buni eya bim piti mo be.

33 A’di ki ṯor uni gwom ’bi’th/eŋ kamu/ mo mmo/o gwo mo ki: Bampa/ gi Momis wana e ka cumaṯ jin ḵal ma ’bom mo dhali kum a’di ’kup̱ mo eya dip̱any jin baru ka uc̱aŋŋi kwara mo ntagi a’di sha’bki’di ’baar mo be.

34 Aris gwo gwansani ’baar mo okin ma Yesusa waambuhany ’kwani ki gwom ’bi’th/e mo. Ka jiŋ gana/ a’di diki o gwoŋ kamu/ ki dar gi gwom ’bi’th/e mo be. 35 A’di ta gwo jin minu thim mo jin okin ma amanc̱i gwo ma Arumgimis kadhamo/ ki:

36 Dhali yan’ko’d a’di dhalki’da waambuhany ’kwani ’pen mo dhali a’di yaki bway gu’b mo. Dhali imanciḵ a’di gwo p̱u’dkini a’di mo mmo/o a’di gwo mo ki: Ṯori aman ’pemen gwom ’bi’th/e mo ma gom biriny jin yeḵu e bwam bunto mo. 37 Dhali a’di thoḵ gwo mo ki: A’di jin yeḵki emen to jin ’boro’d mo tani ta Ya/ gi ’Kwani mo be. 38 Dhali bwam mondhe’d mo tani a’di ta mony’cesh mo be. Dhali emen to tani a’di ta ’pemen gwo gom iya/ gi Bampa/ gi Momis mo. Dhali ’pemen gwo gom biriny mo tani a’di ta iya/ gi a’din thus ’de/ yin mo be. 39 Dhali a’di jin ta ’kup̱ jin si’da ḵa’bany to e uni mo tani ta tap̱a ma ruma ’cesh mo be. Dhali bwam mondhe’d mo tani a’di ta mo jin ’disha ’pemen mo mo mmodi ’kup̱ mo be. Dhali iman’ciṯẖ to mo tani ta iman’doyu gwo mo be. 40 Jasi me’d biriny kun tulu is mo dhali c̱i’th ki o’d mo tani wakan a’di mina embul mo i’dish ’twa/ mo be. 41 Haali/ Ya/ gi ’Kwani midi hash iman’doyu gwom piti mo dhali uni mini tul uni gwansan is ka pije/ ’peni bampam piti mo aris uni gun raḵki miinthus mo dhali aris uni gun miiki to kun ta thus ki thus mo. 42 Dhali uni mini ṯa’k uni e mo/o’d jin c̱a’bki wur wur mo. Dhali e mun mo tani ’kwani mini ko mo dhali ’pe’d shem buni mo be. 43 Dhali uni gun miin ka ḵar/e mo tani mini ’twaḵ mo mo me’da tente/ ’peni Bampa/ ma Ababam buni mo be. A’di jin ta’d gi gu’ban’ce mo tani dhalki a’di ciḵ gwo mo ma.

44 Bampa/ gi Momis mo a’di wana e ki to jin ish ḵumma/ jin bagu mo e bwam bunto mo, jin gama wathi/ mo dhali kum ’kup̱ mo. Yan’ko’d gom bwaŋ ’kunygam piti mo tani a’di ki ya mo dhali yol a’di ’baar mo, a’di jin tana a’di mo jin mina a’di yol bunto c̱aan mo be.

45 Doḵ/e Bampa/ gi Momis a’di wana e ki wathi/ jin mii’da dukkaan mo jin ŋap̱i dhema/ jin gama gam mo be. 46 A’di, ki a’di gamki a’din ’de/ jin caaca mo jin ’bitha yol she/ ki ’bi’th mo tani a’di yaki’d mo dhali yol a’di ’baar mo, a’di jin tana a’di mo ki a’di midi yol a’di mo be.

47 Doḵ/e Bampa/ gi Momis a’di wana e ka ’thi/ mo, a’di jin yip̱u mo e bwam yi’de/ mo dhali mmomusha ris wa’c ka enthus ki e ki she/ ki she/ mo be. 48 Dhali ki a’di ’tu’dki’d mo tani ’kwani ki dir a’di ka gap̱ mo dhali ’ko ’pena ’cesh mo dhali laḵ uni gun ’boron mo e bwaman toŋ’kul bwa mo, hili kun shiyin mo tani ṯaguwa sho mo be. 49 Wakan si’da/ a’di midi ta mo jin ’disha ’twa/ mo. Iman’doyu gwo mini p̱u’du/ mo dhali ḵwa/ ’kwanin thus bwa mo ’peni uni gun miin ka ḵar/e mo be. 50 Dhali ṯa’k uni e mo o’d jin c̱a’bki wur wur mo be. Dhali e mo yin mo tani ’kwani mini ko mo dhali ’pe’d shem buni mo be.

51 A/um mishi gwo gwansan ’bani ’baar mo ’te/ sana? Uni thoḵ a’di gwo mo ki: Nye. 52 Dhali a’di oki uni gwo mo ki: Wakan si’da/ iman’kwar to ’baar mo uni gun ye’thkunu sho’k mo gom Bampa/ gi Momis mo tani uni wana e ki com gu’b jin ḵalki tom piti jin ish ḵumma/ mo ka pije/ mo a’di jin ta jin this mo dhali jin dhamo/ mo be.

53 Dhali ka Yesus ’baarki gwom ’bi’th/e gwansan mo tani a’di yaki’d ’peni mun mo be. 54 Dhali a’di p̱u’dki’d mo e bampam pitiŋ gana/ mo dhali ṯor uni gwo mo e gu’b gi montul is buni mo. Wakan uni merkin mo dhali o gwo mo ki: ’Peni mana gama wathi/ yansan yuḵ kan mo sa/? Dhali mii mii gwansan kun eḵa/ eḵ mo? 55 Dina a’di ki ta ya/ ma manp̱a/ cwa mo ’taa? Dhali din ma kam piti ki ta Yakuub mo dhala Yuusup̱ mo dhala Simaan mo dhala Yahuusa mo ’taa? 56 Dhali ’kona i’bwaham piti ’baar mo ki nyaḵ ’ko ki ana mo ’taa? Dhali ’peni mana gama wathi/ yansan aris to gwansani ’baar mo kan? 57 Dhali uni kolu ki a’di mo be. Hila Yesus ki o uni gwo mo ki: Amanc̱i gwo ma Arumgimis yisa dar gi taḵ e mon tiya yisa, hili isi ciki/ e bampam piti mo dhali e gu’b pitiŋ gana/ mo be. 58 Dhali a’di mol mii mii gun ’bitha’bi’th mo e mun gom uni dar gi gwo jin gamu is mo be.