1 Dhali ka tee c̱aan mo tani imanciḵ a’di gwo p̱u’dkina Yesus mo dhali o a’di gwo mo ki: Kaja a’di ica’d mo e Bampa/ gi Momis mo? 2 Dhali a’di ki yuḵa ’ci mo dhali kar a’di e bwaman uni mo 3 dhali o gwo mo ki: Ka jiŋ gana/ aha/ ona um gwo mo ki isi ciki/ waḵki/ um ’koki ṯu’k mo dhali war ki uc̱i mo tani um mini ’koki se Bampa/ gi Momis ki sule/ mo be. 4 A’diyin jin kar is piti ki gwa’d mo mmowa e ka ’ci yansan mo tani a’di icaaca mo e Bampa/ gi Momis mo be.

5 A’diyin jin midi budha ’ci gi wakansan ki gway pem mo tani a’di buthi aha/ mo be. 6 Hili a’diyin jin midi raḵ jan ṯal ’de/ ’peni uni gwansan kun gwa’dan kun gam gwo is e aha/ mo mmomii miinthus mo tani a’di midi ’taki ’bor mo gom a’di ka dhan wosha caaga/ minu ’taki deḵ a’di e ’bam piti mo dhali biṯ a’di mo e ḵulkun yi’de/ mo be.

7 Wayyi e ’kwaniny’cesh mo gom mompal gi miinthus mo. Haali/ a’di ta mii jin midi ta mii mo ki mompal mini p̱u’du/ mo. Dhali hili, wayyi e wathi/, a’di jin p̱u’dkina mompal ’peni cine/ mo be. 8 Dhali waḵki/ me’d pini walla sho’k pini raḵ /e mo mmomii miinthus mo tani ’ciṯẖi/ uni mo ma dhali ṯaki uni asho ’peni /e mo haali/ a’di ’boro’d gom /e mo mmocic̱ mondiki/e ki ŋul mo walla ki ŋwol mo jin minu ’koki biṯ /e ki me’d su/ mo walla ki sho’k su/ mo e mo ma al o’d ki sule/ mo be. 9 Dhali waḵki/ em pini raḵ /e mo mmomii miinthus mo tani buḵi a’di mo ma dhali biṯi a’di ka pije/ ’peni /e mo. A’di ’boro’d gom /e mo mmocic̱ mondiki/e ki en ṯal ’de/ mo jin minu ’koki biṯ /e ki e su/ mo e mo ma al o’d jin ḵakacaḵaka’c mo be.

10 Hil ki ’bore/ ki um mini ’koki waḵ jan ṯal ’deŋ kamu/ ’peni uni gwansan kun gwa’dan mo haali/ aha/ ṯora /e gwo mo ki e momis mo tani iman’doyu gwom buni isa yempa/ uni hilki bwam/e ma Ababam pem jin di’d e momis mo be. 11 Haali/ Ya/ gi ’Kwani p̱u’dki’d mo mmowoṯẖ uni gun thiskunu e mo be. 12 Um kulumi gwo mbwa jin wakata mo? Waḵki/ wathi/ ta gi ḵa’bal iss ’kwanimpa mmudhe’d mo dhali jan ṯal ’deŋ kamu/ ’peni uni thiski e mo tani mina a’di diki dhal uni iss ’kwanimpa mmudhe’d aṯẖka ’de/ mo e moŋ’kuwosh mo dhali ya mo mmoŋap̱ jin ṯal ’de/ jin thiski e mo ’taa? 13 Dhali waḵki/ a’di ki gam a’di mo tani ka jiŋ gana/ aha/ ṯora /e gwo mo ki a’di ’kunya bwa ki ’kuny kagahara mo gom a’di jin ’dap̱ uni ’twa/ ka iss ’kwanimpa mmudhe’d aṯẖka ’de/ mo kun ’koki this e mo ki sule/ mo. 14 Wakan a’di si’da/ diki ta bwa ma Ababam pem jin di’d e momis mo ki jan ṯal ’deŋ kamu/ ’peni uni gwansan kun gwa’dan mo tani minu ’taki ’koki ’ce’d sho’k mo be.

15 Waḵka kam pini mii miinthus ap̱o/ /e mo tani yaku/ mo dhali ṯor a’di miim piti mo c̱e um su/ mo, /e dhali a’di ’de/ mo. Waḵki/ a’di ciḵ /e gwo mo tani /e warana kan mo be. 16 Hili waḵki/ a’di diki ciḵ gwo mo tani susi jan ṯal ’deŋ kamu/ mo walla su/ mo nyaḵki /e mo ki aris gwo ’baar mo ka ’deṯe/ ’deṯe/ kun onu mo minu ’da’b ’pen mo mmota du’d gwo gi ’twaŋ ’kwani su/ mo walla kwara mo be. 17 Waḵki/ a’di ki ush gwo ciḵ ’peni uni mo tani ṯori a’di ki ’kwaniŋ ḵaniisa mo, dhali waḵki/ a’di si’da/ ki ush gwo gi ’kwaniŋ ḵaniisa ciḵ mo tani dhalki a’di wara’d gom /e ki wathi/ jin diki ta Wathi/ Yahuuda/ mo dhali ka mantera thulp̱a/ mo be. 18 Ka jiŋ gana/ aha/ ṯora um gwo mo ki ma to yin jin mina umi nnon mo e mony’cesh yansan mo tani a’di minu non mo e momis mo dhali ma to yin jin mina umi dhal me’d mo e mony’cesh mo tani a’di minu dhal me’d mo e momis mo be. 19 Doḵ/e aha/ ona um gwo mo ki waḵki/ ’kwani ’koni su/ mbwam um kun gami gwo me’d mo e mony’cesh mo gom ma to yin jin mina uni doṯ mo tani a’di minu mii gom uni ki gway ma Ababam pem jin di’d e momis mo be. 20 Haali/ waḵki/ ’kwani ’koni su/ mo walla kwara mo kun tuli is mo e gway pem mo tani aha/ dina e bwam uni mo be.

21 Dhali yan’ko’d Buṯerus p̱u’dki’d mo dhali o a’di gwo mo ki: Tap̱a, me’d ekata min ma kam pem mmii miinthus ap̱o/ aha/ mo dhali aha/ ki dhal a’di miinthus piti ’pen mo? a/me’d kun ’koni saba kana? 22 Yesus ki thoḵ a’di gwo mo ki: Aha/ dinaki o /e gwo mo ki jasi me’di saba mo, hili me’d saba/iin p̱i saba mo.

23 Wakan Bampa/ gi Momis minu kar ka p̱ar ’ban ka maliḵ jin thosoni gwo nyaḵki c̱iŋkinam piti mo gom to gun deŋu e mo. 24 Ki a’di ṯelki mii ’pen mo mmodeŋ a’di e mo tani jaŋ kamu/ suskunu mo e a’di mo jin din ma murem piti m’ba/ mo ki dhan* Dhan kuluny ’dolkon ’de/ wana e ka jineeh iss ’kwanimpa ka iss ’de/ aṯẖa iss ’de/ ap̱o/ mo. kuluny ’dolkon alaap̱i ’kume’d mo. 25 Dhali ki a’di diki mish mmoc̱i a’di to mo tani tap̱am piti ḵanki gwo mo ki a’di minu yol mo nyaḵki ashim piti mo dhali ki uc̱im piti ilu/ mo dhali ka ris to ’baar mo kun tana a’di mo tani, dhali mii jin din ma mure/ a’di m’ba/ mo tani minu c̱i mo be. 26 Wakan c̱iŋkina/ a’di biṯki’d ki jiŋ ’kup̱a’dup̱uni sho’k piti mo mmowoṯẖ gwo is gom a’di mo mmo/o gwo mo ki: Tap̱a, ’kuc̱i bwa gom aha/ mo ma dhali aha/ mina c̱i /e aris to ’baar mo be. 27 Dhali gom miiny c̱iŋkina/ jin miikina a’di mo gom a’di mo tani tap̱a gi c̱iŋkina/ ki ’cuḵ a’di ’ba/ mo dhali dhal a’di amurem piti ’pen mo be. 28 Hili eny c̱iŋkinan ’de/ yan mo tani me’d jin yakina a’di ka pije/ mo tani a’di gamki ’kup̱ ki c̱iŋkinam pitiŋ kamu/ mo a’di jin din ma mure/ a’di m’ba/ mo ka riyaal iss ’kwanimpa ikwara mo. Dhali a’di ki jigiṯ a’di ’ba/ ki me’d mo dhali o gwo mo ki: C̱iyaa/ to jin din ma mure/ /e m’ba/ mo ma. 29 Wakan agarr piti jin nyaḵa a’di aṯu’c mii mo tani biṯki’da ’cesh mo dhali woṯẖ a’di gwo is mo mmo/o gwo mo ki: ’Kuc̱i bwa gom aha/ mo ma dhali aha/ mina c̱i /e amurem pini mo be. 30 A’di ushu’d mo dhali ya mo dhali kar a’di eya sijin mo ntagi a’di midi ’taki c̱iya mure/ mo be. 31 Ki imannyaḵa ṯu’c mii ki a’di, ki uni p̱arki a’di jin bu’thki embul mo mo tani uni butha ’tham kagahara mo dhali uni ki ii mo dhali c̱i gwo e tap̱am buni mo goma ris to gwansan kun bu’thki embul mo mo be. 32 Dhali yan’ko’d tap̱am piti ki doṯ a’di gwo mo dhali o a’di gwo mo ki: /E ta c̱iŋkina/ jin ta thus ki thus mo. Aha/ dhalkina /e arisa murem pini ’peni ’baar mo haali/ /e wuki aha/ jwa i is mo be. 33 Dhali /e mini ’taki diki ta gi momiimii ap̱o/ amannyaḵa ṯu’c pini mii mo me’d jin miikika/ mii ap̱o/ /e mo? 34 Dhali ka nyor mo tani tap̱am piti a’di ki c̱i a’di ki imanjiya sijin mo ntagi a’di midi ’taki c̱i amurem piti ’baar mo be. 35 Wakan si’da/ Ababam pem jin di’d e momis mo midi mii kan goma ris umi ’baar mo ka ’deṯe/ ’deṯe/ mo waḵki/ um ’koki dhal ikam bum amure/ miinthus buni ’pen ’pena dum bum gana/ mo be.