1 Arumgimis pem, Arumgimis pem, atinta idhalkina /e aha/ ’pen kan mo?

Dhali ki ton ta’da ta isi’da/ /e ki si’d ’peni mowoṯẖ aha/ kan mo? ’peni gwo gi kom pem jin ohonkika/ mo?

2 Ayy Arumgimis pem aha/ gwokina montee ka yempa/ mo, dhali hili /e diki thoḵ aha/ ’twa/ mo.

Dhali mon’thiny si’da/ aha/ gwokina mo, dhali hili mosi/isa kamu/ gamkaa/?

3 Naskin mo tani /e dheleladhelel mo,

/e karuwa ḵursin tap̱a jin ta momaŋ gi ’Kwani ma Israyiil mo.

4 E /e mo tani ibaba gamki gwo is mo.

Uni gamki gwo is mo, dhali /e ’cuḵki uni mo.

5 E /e mo tani uni gwokin mo dhali ’kokunu mo mmota is ki me’d mo.

E /e mo tani uni gamki gwo is mo, dhali uni ’konuki this dhu mo.

6 Hili aha/ tana yiish mo, dhali aha/ tana wathi/ yisa,

haali/ aha/ c̱inu gurra/ ki ’kwani mo, dhali jin waḵkunu ki ’kwani mo.

7 Aris uni gwansan gun p̱arki aha/ e mo tani uni miiki aha/ ka maḵ mo,

uni ṯẖuny aha/ ’twa/ i is mo, dhali uni pirki ’kup̱ buni mo be.

8 A’di c̱iki miim piti jin raḵa’d e Tap̱a mo. Dhalki a’di ’cuḵ a’di mo.

Dhalki a’di ’cwam a’di mo, haali/ a’di ’kunya bwa e a’di mo.

9 Hili /e ta a’di jin bu’thki aha/ ’peni bwa ma dho’th ma ta’da mo.

Dhali /e karki aha/ ki ’dantar mo abora ko ma ta’dam pem mo.

10 Apo/ /e mo tani aha/ biṯkunu ’peni mondho’th pem mo,

dhali me’d jin ḵal ma ta’dam pem aha/ e bwa mo tani /e tana Arumgimis pem mo be.

11 Dhalku/ ki si’d ’peni aha/ kan mo ma,

haali/ monṯo’c bwa uni ’disha’dish mo

dhali wathiŋ kamu/ p̱iyi’d mmowoṯẖa woṯẖ mo be.

12 Aris gwaṯẖim bip̱ uni ’kamki aha/ mo,

gwaṯẖim bip̱ gun ’bitha’bi’th ’peni Pam Bashan mo tani uni ’kamki aha/ mo.

13 Uni c̱eeki aha/ ’twam buni i is mo

mmowa e ka dhop̱ kun pithilki to ki she/ mo dhali ko mo.

14 Aha/ wana ’baar mo me’d yi’de/,

dhala risa simam pemi ’baar raḵkin mo ’peni gwocor mo.

Adum pem ta walmish ki walmish mo,

a’di ṯo’do’d mo eya bor pem mo.

15 Mom’bi’th pem a’di ḵu’thki’d me’da ’pish mo,

dhala le’d pem a’di ’dap̱ki’d e bwaŋ ḵa’dkim pem mo.

/E ’thiki aha/ ’ko’d e bu’da ’cesh ki mowu mo.

16 Nye, arisa ’ka uni ’kamki aha/ mo.

Imanŋali ’pen kun mii tonthus mo tani uni hamki aha/ mo.

Uni su’kki me’d pem dhali sho’k pem mo.

17 Aha/ misha deŋa risa simam pem e mo –

Uni hilki aha/ ka ’thime/ mmoḵo’c e i is mo dhali p̱e’th ki ḵuss ḵuss ap̱o/ aha/ mo.

18 Uni pwaḵki burrinyem pem bwa mo e bwaman is buni mo,

dhali gom burrinyem bwaman pem mo tani uni biṯki to gom aha/ mo.

19 Hili /e, ayy Tap̱a, dhalku/ ki si’d mo ma.

Ayy /e jin ta mowoṯẖ pem mo, huru/ ki jahanne/ gom mowoṯẖ pem mo.

20 ’Cuḵa ḵashiram pem ’pena ris gandal gun kaaka mo ma,

dhali mondiki/em pem ’peni mom’bi’th ma ’ka mo.

21 Tayi aha/ is ki me’d ’peni ’twa/ ma dhop̱ mo ma,

aḵashiram pem wa’thkunu i e ki ce ma morbip̱ gun shwana nyor ka nyor mo.

22 Aha/ mina ṯor gway pini e iwaḵ pem mo.

E bwaman ma dhana tul ’kup̱ ’kwani mo tani aha/ mina maŋ /e mo be.

23 Um gun ḵo/ki Tap̱a mo tani maŋi a’di mo ma,

aris um gun ta iya/ ma Yakuub mo tani kari a’di ki ca mo ma,

dhali doshi ki moŋḵo/ is gom a’di mo, aris um gun ta iya/ ma Israyiil mo.

24 Haali/ a’di diki waḵa waḵ mo dhali shi/a shi/ i e mo

gom monṯo’c bwa jin ṯoci wathi/ bwa mo.

Dhali a’di diki bag jis/em piti ’peni wathi/ mo,

hili a’di ciḵki ko mo me’d jin gwokina wathi/ ’twa/ i a’di mo.

25 ’Peni /e mo tani a’di p̱u’dkina mom pem jin maŋka/ /e eya dhana tul ’kup̱ ki ’kwani mo,

aris gwom pem kun oka/ is mo tani aha/ mina c̱i uni ibwambori uni gwansan kun ḵo/ki a’di mo.

26 Wathi/ jin ṯo’ckunu bwa mo tani a’di midi shwa tonṯe/ mo tani dhali minu kap̱ mo,

Dhali uni gwansan kun simmki a’di e mo tani uni mini maŋ Tap̱a mo.

Dhalka dum bum ’kon ki sule/ sule/ ya ye ’ba/ mo.

27 Aris uni kun ’kokin isi ’pemen gi mony’ceshi ’baar mo tani uni a’di imini ka a’di e mo

dhali ṯu’k e Tap̱a mo,

dhala risa waḵ gi kal gi ’kwaniny’cesh mini luŋ ibwambori a’di mo.

28 Haali/ mo jin tanu tap̱a a’di cila Tap̱a mo,

dhali a’di ki jiya ris kal gi ’kwaniny’cesh mo.

29 Nye, e a’di aris ’kwani kun dhu ’ba/ ki ca e mony’cesh mo tani mini dhu shush ka luŋgu’b mo.

Ibwambori a’di mo tani uni mini luŋ mo, uni gun mini ii ka ’cesh mmowa e ki bu’da ’cesh mo,

dhali a’di jin mol is piti kar ki e mo.

30 Aris uni gun mini iiyu/ i’ko’d mo tani uni a’di imini mii a’di to mo.

Dhali ’kwani mini ṯor gwo gom Tap̱a goma nyaḵum yil gi uc̱i gun mini p̱u’du/ i’ko’d mo.

31 dhali bah gwo gom mony’cuḵ piti mo gom uni gun ’konuki dho’th naskina/ mo,

ki a’di a’di iwagaski a’di mo.