1 Aman ciḵkina gwo ki ’cem bam mo, ayy Arumgimis mo,

ibabam bam ṯorki aman gwo mo,

gom miim pini kun miikina /e mmothim ka teem buni mo,

ka tee ’peni kadhamo/ mo.

2 /E ki me’d piniŋ gana/ mo tani /e ki ura ris kala tiya ka pije/ mo

dhali hili uni mo tani /e ki c̱u’th uni mo.

/E ki dor ’kwani ka ris mo,

dhali hili uni mo tani /e ki dhu uni ki ’kus mo.

3 Haali/ a’di ki gandal buni yisa igamkina uniya ’cesh yan adu is mo yisa,

walla si’da/ abim buni diki c̱i uni mom’bi’th mo,

hili me’da bim poros pini mo dhali abim pini mo,

dhali moŋkush ’peni bwam/em pini jin kushki mo mo,

haali/ /e ’kunykina bwa e uni mo be.

4 /E tana Maliḵ pem mo dhali Arumgimis pem mo,

a’di jin ’kawurki’da ’kawur mo gom momp̱inu mii e ma Yakuub mo.

5 Ki /e mo tani am ki ṯan uni kun ta ’kup̱ bam ka bor mo.

Dhali ki gway pini mo tani am ki yap̱ uni gwahan ki sho’k mo kun gam am ’kup̱ mmo/as mo.

6 Haali/ bwam pem mo tani aha/ dinaki gam gwo is gom a’di mo,

walla gandal pem si’da/ diki ta aha/ is ki me’d mo.

7 Hili /e woṯẖki aman mo ’peni uni kun ta ’kup̱ ki am mo,

dhali kar to ibwaman uni kun shi/i aman i e mo jin midi duŋgur uni ’kup̱ ’kup̱ is mo.

8 Eya Arumgimis mo tani aman dhukina ’ba/ ki ca ki ṯikir ṯikir mo,

dhali aman mina c̱i /e momaŋ gom gway pini ki sule/ sule/ mo.

9 Hili /e ki ṯa’k am ka pije/ mo dhali dhu am ki mondhu is ki gwa’d mo,

dhali /e diki ya ka pije/ nyaḵki ’kwani ma meem bam mo.

10 /E ki dhu am mmodoḵ ka nyaŋ’ko’d mo ’peni uni gun ’kwar am ka gwap̱i/ mo.

Dhali uni kun ta ’kup̱ ki am mo tani dilki aman to mo.

11 /E ki dhu am me’d ḵa’bal kun minu ’ciṯẖ ’kus mo,

dhali /e ki c̱eker aman bwa mo e bwaman kal gi ’kwaniny’ceshi ’baar mo.

12 /E ki yol ’kwanim pini ka maliim gana/ mo,

/e ki ḵan gwo ki uni minu ’koki yol ka thaman kun caaca mo.

13 /E ki dhu am ki uni gun nyaḵ ’ko ki am mmoc̱i aman gura/ mo,

dhali aman dup̱u i e dhali ṯẖuny ’twa/ i is ki uni gwansan kun ’kamki am is mo.

14 Dhali /e ki dhu am ki ku gun miinu mii ka maḵ mo e bwaman kal gi ’kwaniny’cesh mo.

dhali aman p̱e’thkunu mmopir ’kup̱i is e bwaman ’kwaniny’cesh mo.

15 Ka cim ’baar mo mom pem jin darka/ ka ’the mo di’di bwambori aha/ mo,

dhali mon’the is a’di kumki aha/ bwam/em pem mo,

16 gom gwo gi uni kun c̱iki aman gura/ mo dhali imansor aman mo tani

dhali e bwambor uni gun ta ’kup̱ mo dhali a’di jin ŋap̱a’d mmori/a ri’c mo.

17 Aris to gwansan p̱u’dki’d ap̱o/ aman mo,

ba aman ’konaki ŋa /e mo,

walla aman ’konaki ta thus gom gwom pini jin gamu me’d mo.

18 Adum bam ’koki doḵ ka nyaŋ’ko’d mo,

walla ŋaṯgin bam ’koki dheres ’peni bway pini mo

19 ki /e mini ’taki ’ce’d am mo ’peni mo jin ’kon ma jala/ nycine/ mo,

dhali kum am ’kup̱ ki mondhurumi’d jin ’kula’kul mo.

20 Waḵki/ aman ŋakina gway ma Arumgimis bam mo tani,

walla he’th me’d bam goma rum p̱inycon mo tani,

21 min ma Arumgimis ’taki diki gam mii yansana?

Haali/ a’di mishki to kun ’kona duŋ ’kwani ka ḵwal is mo.

22 Yisa, gom gway pini mo tani aman ’koshkunu yula tente/ mo,

dhali aman dhukunu mo me’d ḵa’bal kun dhunu mmo’ciṯẖ ’kus mo be.

23 Muri is pini mo. Ata isha /e e kan mo, ayy Tap̱a?

Meri /e e mo. Dhalku/ ki ṯa’k am asho ki sule/ sule/ mo.

24 Katinta ibaga /e jis/em pini mo?

Katinta iŋana /e mom bam jin woja is am she/ mo dhali mo jin siri’ckunu am ki sho’k mo?

25 Haala ḵashiram bam a’di kumkunu ’twa/a ’cesh e bwam bu’d mo,

dhali buŋgwar is bam ishkina ’cesh ki rap̱ rap̱ mo.

26 Cuyi mis mo dhali yayu/ mmowoṯẖ aman mo.

’Cuḵi aman mo gom gway gi mo/en pini jin ṯelu sho’k mo.